John 11

Sema Ingkathiy Lazarus

1Gwariy sa-kin dahin mansekit a iyanngaran na Lazarus. Naiyan-iyan chiwa Bethany a otik a siyodad, et sema chegwen ahi thon si Mary ni Martha, naiyan-iyan ngo ired man. 2Seja Mary a ahi na mansekit a si Lazarus, si-kathoy engiso-jat na bangbangdon daned sekin Jesus, et piyonasan to na bowek to. 3Et si Mary ni Martha, engito-no iren mengowan cha Jesus i “Afo, mansekit i kajem mon ensemek mo.” 4Idi inki-ngelan Jesus iwan, kigwan to i “Sema sahit Lazarus, nat sema ketiy toy panpa-noan to, no diket epasamak iwan say maychejaw si Afo Chiyos, tan say si-kak a Anak Afo Chiyos, maychejawak ngo.”

5Si Jesus, ensemek tos Martha tan si Mary tan si Lazarus. 6Nem angken amta tho i mansekit si Lazarus, imeket chiwa iyan-iyanan to na chegwen akow pay. 7Idi epalabas iwa chegwen akow, kigwan tod disipolos to i “On-oli kiya wed Judea.” 8Et kigwan na disipolos to i “Maistoro, nonta engkay, sema iren Hodjod man, piyan chaken chedtogen. Niyana piyan mon on-olid man?” 9Kigwan Jesus i “Sema silow, nasimilow na sawal na chegwen oras na san-akow. Sema toon man-ahad no kaakawan, nat maysokbab tep gwariy silow chiya dobong a naenilow na chalan to. 10Nem sema man-ahad no edagwi, maysokbab tep nagwariy silow cha si-katho.”

11Idi kigwan Jesus iwan, kigwan to ngod disipolos to i “Si Lazarus a kajem tayo, manjo-jo-kow, nem onkowanak a bengonen ko.” 12Et kigwan na disipolos to i “Afo, mapteng no manjo-jo-kow tep onmapteng.” 13Kigwan na disipolos to man tep kin cha i agpayson manjo-jo-kow si Lazarus. Nem say piyan Jesus a a-seden, etiy si Lazarus. 14Et indiritson Jesus i inpangowan tod si-kara i “Etiy si Lazarus, 15nem manchadsahak a nagwaraak ded man nonta ingkathiy to say onkedkedsang i pamati yo kagol na sema si-nengen jo. Emoy ired kad-an to.” 16Et si Thomas a iyanngaran na Epin, kigwan tod echom ton disipolos i “Emoy ira say no bonoen ches Jesus, mekipathiy kiya ngod si-katho.”

17Idi mimothok si Jesus cha Bethany, iyamtaan to i epalabas maliy epat a akow manipod nonta ingkaybeken Lazarus. 18Sema Bethany, iyay-esop cha Jerusalem a tedon kilomitroy kaaragwi tho. 19Isonga, chakel i Hodjos a kimowan alid Jerusalem a mekidiwdiwed Martha ni Mary tep etiy si ahi ra.

20Idi iyamtaan Martha i manmomothok si Jesus, kimowan a mengaspol cha si-katho, nem imeket ma ngos Mary a mantoktokkong cha baliy. 21Kigwan Martha cha Jesus i “Afo, no gwara ked jay nonta engkay da, nat etiy komes ahi wi. 22Nem amtak i angken niman, angken nengoy ibagam cha Afo Chiyos, i-kan tod si-kam.” 23Et kigwan Jesus i “Manbiyag mowan si ahim.” 24Insongbat Martha i “Ahow, amtak i manbiyag mowan no manpawil a emiin i iyangketiy no kaonoran a akow.”

25Et kigwan Jesus i “Si-kak i naengipawil na iyangketiy tan si-kak i naengi-kan na biyag. Angken siyen toon naematid si-kak, angken metiy, manbiyag mowan na ingked ingka. 26Et angken siyen toon sibibiyag tan naematid si-kak, nat meti-metiy. Napiyatim iyay?” 27Et insongbat Martha i “Ahow, Afo, patien ko i si-kam i Criston Anak Afo Chiyos a miyan seke-sekeren onmothok alid ja dobong.”

28Idi kigwan Martha man, imolid baliy. Idi mimothok chiwan, ingwakdin tos ahi thon si Mary, et kigwan to i “Ijay i Maistoro. Towan ipata-gway ka.” 29Idi inki-ngelan Mary iwan, imakgwat a chakos et kimowan cha kad-an Jesus. 30Si Jesus, aneng pay onmothok chiwa siyodad, no diket gwara pay nin chiwa iyan-aspolan chen Martha. 31Sema iren Hodjos a mekidiwdiwed Mary chiwa baliy, idi sini-neng ches Mary a imakgwat a chakos et imawas, tined cha tep kin cha i onkowan chiwa iyaybekaan Lazarus say onnangis chiwan.

32Idi mimothok si Mary cha kad-an Jesus et sini-neng to, iyantalimohod cha sangoanan ton kigwan to i “Afo, no gwara ked jay nonta engkay da, nat etiy komes ahi wi.” 33Idi sini-neng Jesus a mannanangis si Mary tan sema iren Hodjos a timened cha si-katho, enbel-at i nemnem to tan iya-ngos a chilin 34kigwan to i “Toy engibekaan jod si-katho i?” Et kigwan cha i “Gomali, Afo, say metaen mo.” 35Et nimangis si Jesus. 36Et kigwan na Hodjos i “Si-neng joy kabenay na semek tod si-katho!” 37Nem kigwan ngo na echom i “Inpasi-neng toy ekorab. Niyana nat inpamapteng tos Lazarus say nat metiy?”

Inpanpawil Jesus Si Lazarus

38Idi mimothok si Jesus cha iyaybekaan Lazarus, enbel-at mowan i nemnem to. Sema iyaybekaan Lazarus, dohang a esa-dinan i sakepan to na batho. 39Kigwan Jesus i “Ekal joy batho.” Nem si Martha a ahi na etiy, kigwan to i “Afo, enbanget emo wala tep epat a akow i ingkathiy to.” 40Et kigwan Jesus i “Ampay nat kigwan kod si-kam i no memati ka, si-nengen moy kinakayang Afo Chiyos?”

41Et ingkal chiy batho. Et timangkak si Jesus a kigwan to i “Awa, mansalamathak cha si-kam tep inki-ngelan moak. 42Amtak i nainki-ngelan moak na olay, nem kowan kona jay kagol iren ja toon kainakgwat chiyay say patien cha i si-kam i engito-no did si-kak.”

43Idi kigwan Jesus iwan, inpekes toy esel ton kigwan to i “Lazarus, bo-day ka did tan.” 44Et bimo-day ali ma etiy a ebedberan i diweto tan seki tho tan edibothan i dopa tho na dofot. Et kigwan Jesus cha si-kara i “Ekal jo ma iket say mahabetik.”

Tiyabtabal Iren Ma Naengibalnay Na Hodjos I Pesing Chen Mengipabonon Jesus

(Matthew 26:1-5; Mark 14:1-2; Luke 22:1-2)

45Sema iren Hodjos a kimowan a mekidiwdiwed Mary, sini-neng chiy imag Jesus, et chakel i ematid si-katho. 46Nem sema echom, kimowan ired Pharisees, et kigwan ched si-kara ma imag Jesus.

47Isonga, sema iren aafo na papari tan sema iren Pharisees, inpata-gway chiy echom a naengibalnay na Hodjos a kigwan cha i “Ngoy a-magen tayo? Tep chakel i naima-imag niwa toon milagro. 48No nagwariy a-magen tayod si-katho, mematin emiin i tood si-katho. Et no iki-ngelan na naiyantoray cha Roma i gwariy toon manbalin na ari na Hodjos, onkowan iren menechal niwa timplo thayo tan too thayo.”

49Nem gwariy sa-kid si-karen iyanngaran na Caiaphas a kahejangan a pari nontan a tawen. Kigwan to i “Nagwaren polos i amta yo. 50Nat egwathan jo i magangkana no metiy i sa-kin too bengat para cha kaidian to say nat maomas a emiin i Hodjos?” 51Sema kigwan Caiaphas, nat edafod nemnem to, nem kagol na kahejangan a pari nontan a tawen, inpapadton Afo Chiyos cha si-katho i metiy si Jesus para cha Hodjos. 52Et nat sema iren Hodjos bengat i ketiyan to, no diket sema iren aanak ngon Afo Chiyos a man-iiyan cha chakel a dogad say mansa-sa-ki iren emiin.

53Et iyanchogid ma akow, ina-inap iren ma naengibalnay na Hodjos i pesing chen mengipabonon Jesus. 54Isonga, nat iyanparang males Jesus cha chakel a tood Judea, no diket ipit to liy Ephraim a siyodad a iyay-esop cha dogad a nagwariy toon naiyan-iya-iyan. Chiwan i iyan-iyanan Jesus tan disipolos to.

55Chanchaniy piyasta na Hodjos a kigwan cha i Piyasta na Inda-bas na Anghil cha Hodjos. Chakel i toon edafo did siyo-siyodad a kimowan cha Jerusalem say a-magen chiy ogadi ra na pan-emes et say mebedin a mekipiyasta ira. 56Ina-inap ches Jesus, et idi gwara ired timplon kainakgwat, iyanbinaga iren kigwan cha i “Nengoy nemnem jo? Onkowan ali ja piyasta ono enchi?” 57Tep sema aafo na papari tan sema iren Pharisees, inbilin cha i angken siyen toon mahaamta na kad-an Jesus, konen to komed si-kara say chedmethen cha.

Currently Selected:

John 11: KAR

Highlight

Copy