John 10

May-arig Si Jesus Chiwa Mapteng A Naiyanbantay Na Kalniro

1Et in-arig Jesus a kigwan to i “Sejay a konen kod si-kayo, podnon no gwariy koral na kalniro, et nat manchedan i tood ma pasbol to, no diket onkalab cha alad to, mahibot tan tolisan iwa too. 2Nem sema toon manchedan chiwa pasbol, si-kathoy naiyanbantay na kalniro. 3Si-kathoy ipaskep na kowadjed ma koral. Nainki-ngelan na kalniroy esel to et napiyeschian cha. Natiya-gway niwa naiyanbantay i kalniro thon nangiyaranan to na sa-ki tan sa-ki, et nain-awas to ired ma koral. 4No nain-awas to wen emiin ira ma kalniro, naedagwas, et naiyonod iren ma kalniro tep amta riy esel to. 5Nat onoren chiy afil a too, no diket bebtihan cha tep nat amta riy esel to.” 6Kigwan Jesus iyay a arig ired ma too, nem nat igwathan chiy piyan ton a-seden.

7Et in-arig mowan Jesus a kigwan to i “Sejay a konen kod si-kayo, podnon si-kak i pasbol a nasimekepan na kalniro. 8Emiin a toon edagwas iy say si-kak a engitoro na nat podno, singen mahibot tan tolisan ira. Nem nat inki-ngelan iren ma kalniro. 9Si-kak iwa pasbol. Angken siyen toon onsekep babaen cha si-kak, maysalakan. Sema toon maysalakan, may-arig cha kalniron egwayen onsekep tan on-awas cha koral et naiyaypastol cha edo-do-betan. 10Sema mahibot, nakimowan alin mengibot, memono, tan menechal. Nem si-kak, kimowanak ali say may-i-kanan i too na biyag a nagwariy kay-ingesan to.”

11Kigwan mowan Jesus i “Si-kak i mapteng a naiyanbantay na kalniro. Sema mapteng a naiyanbantay, i-kan toy biyag to para cha kalniro tho. 12Sema toon edagboan a manbantay na kalniro, nat si-kathoy podnon naiyanbantay tan nat si-kathoy mahakalniro. No menakmang na emanekot a animal a mankokowan ali, ipekday to ira ma kalniro et onbetik iwa too. Et kedathen niwa emanekot a animal ira ma kalniro, et mesidak ira. 13Sema too, onbetik tep edagboan bengat tan nat napiyategan to ira ma kalniro.

14-15“Si-kak i mapteng a naiyanbantay na kalniro. Sema pengamten Awak cha si-kak tan sema pengamtak cha Awak, inges ngon man i pengamtak iren ma kalnirok tan sema pengamta iren ma kalnirok cha si-kak. Et i-kan koy biyag ko para cha kalnirok. 16Gwara ngoy echom a kalnirok a nagwared ja koral. Mesepol a a-daen ko di ired jay, et manki-ngel ngo ired esel ko. Et sema emiin a kalniro, manbalin na sa-kin gropo, tan sa-sa-kiy manbantay iren ma kalniro.

17“Si Awak, ensemek toak tep i-kan koy biyag ko say manpawilak mowan. 18Nagwariy mahabonod si-kak no ekak itolok, no diket i-kan koy biyag ko tep seman i piyan ko. Gwariy panakabalin kon mengi-kan na biyag ko, tan gwara ngoy panakabalin kon mengoli na biyag ko. Tep seman i inbilin Awak cha si-kak.”

19Idi inki-ngelan na Hodjos i kigwan Jesus, nat man-iringes mowan i nemnem cha. 20Chakel i engowan i “Ebang-ag tep iya-janan na dimonyo. Niyana naiyanki-ngel kayod si-katho?” 21Nem kigwan ngo na echom i “Sema toon iya-janan na dimonyo, nat nakigwan to iriy inges to man. Mebedin ayen a-kalen na dimonyoy korab na too?”

Nat Piyan Na Hodjos A Mematid Jesus

22Nonta timpo na siteg-inan, gwariy piyasted Jerusalem a kigwan cha i Piyasta na Ingkaydasin na Timplo. #10:22 Sema Piyasta na Ingkaydasin na Timplo, piyasta na Hodjos. Sema kebejag na pansilibrar, gwalon akow. Nasinilibrar na Hodjos a penginemnemneman na epasamak cha timplod Jerusalem. Nontan da gwariy naiyantoray a edafod Syria a si Antiochus Epiphanes. Nonta 167 B.C., inpaskig toy timplod Jerusalem tep siya-dathan toy altar Afo Chiyos na altar na afil a chiyos. Nonta 164 B.C., si Judas Maccabeus a Hodjo tan sema iren olop to, igwak ches Antiochus Epiphanes. Et inpadinis Judas Maccabeus i timplod Jerusalem et indasin to mowan para cha kechejaw Afo Chiyos. 23Gwares Jesus chiwan a man-aahad cha parti na timplon kigwan cha i Siroman Solomon. 24Biyo-ngolan na Hodjos a kigwan cha i “Sa-noy kebejag na panseked mi asan mo ipaamta no siya ka? No si-kam i Cristo, idiritsom i pengowan mod si-kawi.”

25Et insongbat Jesus i “Kigwan ko waled si-kayo, nem nat piyati yoak. Sema iren milagron naima-imag ko babaen na karebengan Awak, si-kathoy mengipaneknek no siyaak. 26Nem eg kayo naemati tep nat kalniro tahejo. 27Sema iren kalnirok, nainki-ngelan chiy esel ko. Amtak ira et naiyonod chaak. 28I-kanan ko ira na biyag a nagwariy pengingkaan to, et eg ira maysi-si-jan cha Afo Chiyos. Nagwariy mahapingil iren man cha si-kak. 29Si Awak a engipiyal iren man cha si-kak, mas ekayang iy say emiin. Et nagwariy mahapingil iren man cha si-katho. 30Si Awak tan si-kak, sa-sa-ki kawi.”

31Idi kigwan Jesus iwan, engopkop mowan ira ma Hodjos na batho say ichetog ched si-katho tep piyan chen bonoen. 32Et kigwan Jesus i “Inbiybiy ko waled si-kayoy chakel a mapteng a kigwan Awak a a-magen ko. Nengo iren jay a imag koy kagol a piyan jon chedtogen joak?”

33Et insongbat iren ma Hodjos i “Chedtogen mika, nat kagol na mapteng a ima-imag mo, no diket mowan kelsithis Afo Chiyos. Tep si-kam a too bengat, mowan iinges i angel mod Afo Chiyos.”

34Et kigwan mowan Jesus i “Gwariy inpasolat Afo Chiyos cha dinteg jon kigwan to i ‘Kigwan ko i chiyos kayo.’ #10:34 Psalm 82:6 35Amta thayo i sema inpasolat Afo Chiyos, nat mebedin a mesa-dathan. Isonga, no chiyos i inngaran Afo Chiyos ired ma toon inni-kanan ton ma minsahi to, 36niyana kigwan jo i kiyelsithan kos Afo Chiyos tep kigwan ko i si-kak i Anak to? Tep si-kak i pinispis Afo Chiyos et into-no thoak alid ja dobong. 37No nat kowan amagiy obden Awak, enogak i piyati. 38Nem no kowan amagiy obda tho, angken nat patien joy nakigwan ko, pati yo wangoy naimag ko say amtaan jo i gwares Awak cha si-kak tan gwaraak ngod si-katho.” 39Et inparas mowan iren ma Hodjos a chedmethen ches Jesus, nem bintihan to ira.

40Et iyan-olis Jesus cha piig na kolos a Jordan a emonjagan John nontan. Et chiwan i iyan-iyanan to. 41Chakel i toon kimowan chiwa kad-an Jesus. Kigwan cha i “Nagwariy imag John a milagro, nem podnon emiin i kigwan to maypangkep niya too.” 42Et chakel i tood man a ematid Jesus.

Currently Selected:

John 10: KAR

Highlight

Copy