Mak 4

Kaani hu ma Ahan ma Alai

1Mwen nin ndai, Yeso fur kofiti ta foi yiir i Galili. Male' ɗufal si suɓut ta kyel ames, ɓurti hya i ɗufali, kyel ti twaha, kin Yeso lang ta kwang i ham te ta. Ɗufal si te tasi tur i foi hami. 2Yis kofiti si ɗamam hyang ti findel i kaani.

3Ni, “Hal huni! Ma ahan nin wa lai ti musut ta yang. 4Te ak ti musuti, shini si fur ta fisel, avyash si yes si tang ya. 5Shini si fur ta afyai wi, kyel ima mati ta' hyang kwa, fo abet musuti ɓu, ɓurti ta'i mayus tashkalak. 6Myan ima ɓwe ti ka', ɓurti si mati sisyar kwa, a o i ɓwe ngyesh ya, si shokus. 7Shini musuti si fur ta aren wi, areni luk fit zure' us ya, ɓurti andi si shu fe kwa. 8Shini si fur tasi ta' maɗesi hai. Mii si ngye si al, shini si wis karat maɗesi, anggumi si wis karat hyang, anggumi si wis male' i karat.”

9Unai Yeso nyus, “Mamwal i hali, u hali.”

10Myan ima Yeso yis ahwes, som koltifai asussi hure mulang apil hu shini ima si tikul, si lulus lul tasi mangga' i findel i kaani mai. 11Unai Yeso nyus, “Hun, DeeƁwe fu shang ti kinggyongat i kaitat ames. Som ima sita saikyel, si wa kofsus ɗamam ta fisel ti kaani. 12Ɓurti,

“ ‘Ɗufal mii si wa ɗingi ti shishat kpwet o,

si wa kini ta mulut kwa fweng,

si wa hali ti mwal kpwet o

si wa shangi kwa fweng,

ɓurti kan si hatat si shussi ya!’ ”#4:12 Ɗing huni hwak: Ish 6:9-10.

13Unai Yeso nyus, “Na hu shang kaani mai kwa, atini hu wa shang ti anggum i kaani ya? 14Musut ima ma ahani ak, a findel i DeeƁwe. 15Shini ɗufali sima fota ta' i fisel ima si lai musut ta. Myan ima si hal findeli, fo abet Shatan yes fyal findeli ya ta mulwat. 16Musut ima si fur ta afyai wi, a ɗufal ima si hal findeli, si mat ra apil-apil. 17Ɓurti si shu sisyar ta ta'wi fwet kwa, si pwet i myan ndyong. Myan ima shum ahun a anggwya luk fit ɓurti findeli, unai fo abet si furus. 18Musut ima si fur ta aren wi, sima fota ɗufal ima si hal findeli, 19ɗak tirim i mute naya, hu dang i ramwayat, hu shak gwel i ɗamam shini, si yes si vwere' findeli ya, findeli tehus ii gbya'. 20Musut ima si fur ta si ta' maɗesi hai, sima fota ɗufal ima si hal findeli, si mat, shini si wis karat maɗesi, anggumi si wis karat hyang, anggumi si wis male' i karat.”

Man ti Mukof tima Si Gu'ut Kwang Hai

21Unai lakus ni, “Awe lwa' mukof ɗak vo ya ti mbai kwang, ahun u kin ya ta ɗar i kyel marak ya? Ka nyai si kyan tasi kwetleng hai hoo? 22Shak aɗeng ima mata mufot wi, si wa mulang tus ya, aɗeng ima mata mavo, a kpak, u lang ya nasi kweneng hai. 23Mamwal i hali, u hali.” 24Cu wei ti nyai, “Hal huni ndere, kwang tima hu mba ti, ayit si wa mbasui ti si mbwa'i. 25Shak maɗufal ima mati, si wa fasus si mbwa'i. Som ima si mati kwa, al maɗeng ima mati, si wa mati ya.”

Kaani ti Musut ima Mangye

26Lakus hwak ni, “Kaitat i DeeƁwe ma fota maɗufal ima wa ak ti musut ta yang. 27Ka kon ti ɓu, musuti tor, ngye, kaciwa' yis shang ngga' ima musuti ngye ta. 28Ta'i ti haisus kin musuti ngye, shu gungai, re' hihai, mas macwa fwet. 29Myan ima macwai nung, unai zan bakam i karat ames, ɓurti myan i karat ndok.”

Kaani ti Musut ima ma Hyangang Kwa

30Lakus hwak ni, “Ka wa kaan ti kaitat i DeeƁwe ti amiya? A hun anggi findel i kaani ka wa ti mbai ya? 31Ma fota musut i gadina ima ma hyangang kwa, si lai ta fisha. 32Shak ta andi, myan ima si lai, ngya u te i mbai fwet tasi shak yitat, u shu ra hyang i mbayai. Avyash hyang si wa ta' ti wurai ames ta manjingi wi.”

33Ti musut i kaani mai hyang, Yeso lakus findel ta ngga' ima si wa shangi ta. 34Findyalus kaciwa' findel i kaani kwa. Myan ima yis ahwes hu som koltifai asussi, tyai u kofus ti, u lakus aɗeng ima findel i kaani ma laki.

Yeso Kin Se Manjengi Rak

35Mwen ani, ma ango ti mas, Yeso lak som koltifai amesi ni, “Ka pis fiti.” 36Si hon male' i ɗufal ta kyeli, si lang ta kwang ima Yeso mata. Si pis fiti tikul, anggum i kwangangi si kolfai. 37Unai pelem luk fit ti ambas, yis gicik ti hami, hami rang ta kwangi wi, kwangi kat ndyong i ndyolok. 38Yeso tes ta takfai i kwangi, yis yus raki, mwet hai si ɗama hai. Si wa si ɓusho hus si nyus, “A makofiti, ka kpa! Ha tirim kwa haa?”

39Unai ɓusho, ti' pelemi ra, lak hami ni, “Raka ti hai, tya cakat!” Unai pelem rak fo abet, kyel ti te ryot. 40Lak som koltifai amesi ni, “A ɓurti mi hu mwen fwet ya? Hal mwashi hu fa mulut kwa haa?” 41Myanat ka'us fwet si lak ɗiyai nyai, “Awe mai, ima pelem hu ham si halus ya?”

Currently Selected:

Mak 4: AlisIRonNT

Highlight

Copy