Mak 5

Yeso Fa Maɗufal Marin Mafwashi i Garasi Cala

1Myan ima si ndok ta fo i yiir si pis fiti, wa ta' ti som Garasin. 2A myani Yeso ɗorkyel ta wii kwangi, unai mawangan nin ima hya ti rin mafwashi, lang ya ta wii fiyayai wa kyel ames. 3Ai Mawangani yis yus tyayan ta kyel fiyayaiyi, ɗufal si mba no'sus ti shitam wet. 4Si wo no'sus ti shitam ra hu sisai, shak ta andi u ɗwak shitami ya, awar i shitami ɗwak ya hwak andek-andek. Ɗeng ndok ɓa u masus ɗama kwa fweng. 5Ngang fo' ta reni, yis ta fiyai hu ɗanggash, yis gwa'an ti rafo, yis mbwalangan ti lo' ya ti afyai.

6Myan ima ɗing Yeso ta maleng, unai lang ti tital fur ta wei ames. 7Gu' rafo ni, “Ami ama ta ti yin ya, a Yeso, Al i DeeƁwe Mambaitat shak? I fwalsa ɓurti DeeƁwe, kan ha fan shum kwa.” 8Ɓurti Yeso tuu nyus, “Langaya na maɗufal mai wii, ha rin mafwashi!” 9Unai Yeso lulus ni, “A asum ama aweya?” Unai matussi ni, “Asum amen a Male'i, ɓurti ni ma buu.” 10Unai rini fwal Yeso ti ambas, ɓurti kan nggahus ya ta kyeli kwa.

11Nasi myan mai, shini sin ɗing ti nggishash hyang tasi fwere nin. 12Rin mufwashani si cu wei ti fwalsus nyai, “Tuka nin wa kyel i nggishash mii, hona nin ni langus hai.” 13Unai ɓwet ɓa si lang ta nggishi wi, fo abet rin mufwashani si rangya ta maɗufali wi, si rang ta nggishashi wi. Nggishashi shak si ɗor ti tital si fwar ta yiir wi, si mwat ta wi. Nggishashi si kol nggal apil (2,000).

14Som i ɗing ti nggishi si tital si lang ta ashwaha hu fo i fiselal, sin lak ti aɗeng ima wisus. Fo abet ɗufal sin rangya ɓa si ɗing aɗeng ima wisus si. 15Ti yes ames ta kyel i Yeso, si ɗing maɗufal ima ai yis ti rin mafwashii. Yis amun ta mabel i Yeso, sok arom yis ta ambe' ames wi, unai myanat ka'us. 16Som ima si ɗing aɗengi, si lak ɗufal ngga' ima ma rin mafwashi wis cala, hu ngga' ima nggishashi si rang ta ham wi. 17Unai ɗufali si fur fwal ti Yeso ɓa u honus ashwa ames.

18Myan ima Yeso yis mulang ta kwang i ham ɓa u wis, unai maɗufal ima wis cala ta wangani, fwalus ɓa si wa tikul. 19Unai Yeso matussi kwa, shak ta andi nyus, “Ɓwa wur kyel i somma, ha lakus mbaitat i aɗeng ima Deembai masai, hu ngga' ima ɗing shum asai ta.” 20Unai maɗufali wa Dekapolis, lak mbayai i ɗamam ima Yeso masusi, ɗufal shak si shok na fwai.

Al Tima ti Mot hu Mbor Mumwatan

21Yeso pis ta fit ti hwak ta wii kwang i hami, yis ta fo i yiiri, male' ɗufal si nggarus ya. 22Unai mbai nin ta mare i DeeƁwe ma asum Jairus yis ta, ti ɗing ti Yeso fur ta wei ames, 23fwalus ti ambas. Yis nyai, “Al muvati asun tima fo i mot. Naɗin ha yes ha kinut ra hai, na ti wis cala ti pwet.” 24Unai si wa tikul hu Yeso.

Male' ɗufal sin koltifai asussi, sin mbwa'an sus. 25Ta saa ti ɗufali, mbor nin ti ta, ai yit ti mwatan ima wash yis waya, ima kol wilyal hure mulang apil. 26Ti wo shum fwet, ta kyel i som fati manda, ti pun sufat amet ya. Shak ta andi ti njeng kwa, mwatani cus wei ti muɓal. 27Myan ima ti hal mangga' i Yeso, unai ti yes ti salmwe' ta ɗufal wi, ti ngge' fagin ames. 28Ti lak ta mulut amet nyai, “Na i ngge' fo i fagin ames kyek, i wa njeng.” 29Fo abet wash ima ai yis wayai, kat ya, ti hali ta lo' amet ti wis cala.

30Fo abet Yeso hali njeng nin lang ya ta lo' ames, hatat ti fai ta suɓuti wi ni “Awe ngge' fagin amen ya?”

31Unai som koltifai ames si matussi si ni, “Ɗinga ngga' ima ɗufal si mbwa'an sa ta, shak ta andi ha nyai, ‘Awe ngge' un ya?’ ”

32Unai Yeso hatat ɗing kyel tarara ɓa u ɗing maɗufal ima mas ani aɗengi. 33Unai mbori ti shang aɗeng ima wis sut, ti yes ti fur ta mabel ames, ti myanat, lo'i yis yus muro, ti lak kus mwawei ya. 34Unai nyut, “A mbor, fati mulut amesh fash cala, shi njeng ta shum amesh, shish yush wa ti murak i mulut.”

35Yis ɗiri ti findel, unai shini ta wur i Jairus mbai i mare i DeeƁwe, si yes si ni, “Al asai ti motut, kan ha fa makofiti mai shum kwa.”

36Yeso ra'us hal ti aɗeng ima si laki kwa. Lak mbai i marei ni, “Ka ha mwen kwa, Faha mulut kyek.”

37Hon ɗeng kolfai asussi kwa, wa ti Pita hu Jemis hu nusus Jwon. 38Ti muru ames ta wur i Jairus, mbai i marei, hali sin rafo, ɗeng yis hal ti ɗeng kwa. 39Lang ta wi nyus, “A ɓurti mi huma rafo hun kawayai ya? Al amoti ti mot kwa, tima ɗarak.” 40Unai si musas sus.

Takfai tima nggas ya shak ta saikyel, unai ha' deet hu nasut hu som koltifai ames ima sima tikul, langtus ta kyel ima funat i ali mata. 41Ka' ra amet nyut, “Talita kumi!” Ma nyai, “A foti al, ima nyai shush, luk shi fit!” 42Fo abet ali ti luk fit ti at, si shok na fwai shak asussi. Ali a muwil hure mulang apil. 43Yeso lakus gbak-gbak, ka si lak ɗeng aɗeng ima si ɗingi kwa. Unai ni ɓa si fat cwa ti cu.

Currently Selected:

Mak 5: AlisIRonNT

Highlight

Copy