Mak 6

Mashit Kaciwa' Ngye

1Yeso lang ta kyeli wis ashwa ames, som koltifai asussi sin tifai. 2Myan ima Mwen ti Lafos ti ru, fur kofiti ta mare. Ɗufal hyang ima si halus yis kofiti, si shok na fwai, sin luli nyai, “Maɗufal mai wis ɗamam mii ii ta leya? Awe fas musut i pirisi mai, ima ma masti ɗamam i shok na fo ati ya? 3Ka nyai a al i manggwak ti kikyal ani hoo? Mai a al i Uryam ima shunus a Jemis, hu Josep, hu Jud, hu Siman kwa haa? Shunus murwafi sima tikul hu kan kwa haa?” Unai si nggwetus.

4Yeso lakus ni, “Mashit wyas ngye ta kikyal shak, a ta ashwa, hu gung, hu wur ames je, wyas ngye ta kwa.” 5Wis njeng i masti ɗamam i shok na fo nin ta kwa, a ndyong je ima sima kaciwa' cala kinus ra hai, si wis cala. 6Yis hwak aɗengi fas shok na fo ti ngga' ima si nggwes i fati mulut ta.

Yeso Ro Hure Mulang Apili

Unai Yeso yis nggaari ta hweng wa hweng yis kofiti.

7Lai mulang apili yes kyel ames, ɓa u rohus apil-apil, fas mbaitat ta si rin mafwashi.

8Lakus findel mai ni, “Kan hu zan ɗama i wa ɗa'at kwa, kan hu zan folok, hu rukul, hu mala i cef kwa, a cwang je hu wa zani. 9Ru' hun kpakasak, ka hu har faginan apil kwa. 10Shak wur ima hu ɗorkyel ta, tehun ta kyeli yes mwen tima hu wa honti ashwai. 11Shak kyel ima si matu ta kwa, ahun si halu kwa, tabwathun ɓura i sisai amu ya hu wu, ɓa u kof si nggwes i halsu.”

12Andi si lang ya, sin mba findel i DeeƁwe nyai, ɓa ɗufal si hatat. 13Sin nggati rinan mafwashi ya ta ɗufal wi, sin fyal ti som i kaciwa' cala hyang mbar sin wis ti cala ames.

Si De' Hai ti Jwon Mabatisma Ya

14Ai Makai nin ma asum Herod, hal ɗamam ima Yeso masi, ɓurti asum i Yeso kawa ta kikyal hyang. Shini sin nyai, “A Jwon Mabatisma luk fit ta mot wi, a yis nai kin ma masti ɗamam i shok na fo mai.”

15Anggum i ɗufali si ni, “A Iliya.” Shini hwak si ni, “Mai a mashit i DeeƁwe, fota andek ta saa ti som ima ai i hwer.”

16Myan ima Herod hal mai, lak ni, “A Jwon ima i de' hai ames ya, a yis luk fit ta mot wi!”

17Ai, Herod ti haisus, ro muro ɓa si ka' Jwon si no', si kin ta wur i shitam. Mas mai ɓurti ai, kunggo Uhirodya mbor tima ai ti nusus Filip. 18A aɗeng ima kin nai, Jwon lak Herod ni, “Le' ɓa ha kol mbor ti nusa.” 19Uhirodya ti ka' Jwon ta mulut, yit ɓweti for sus. Kaciwa' kinti ra i Herod, ti wis njeng kwa, 20ɓurti Herod ma fwang ti Jwon. Ma myanatsus fo ɓurti shangi Jwon a manderei hu masapai. Myan ima Herod hal Jwon ringus ti ambas, shak ta andi ɓyat ɓa u halus. 21Ta dala Uhirodya ti wis kyel. Mwen i mbe'i ti al i Herod ti ru, unai ɗi got. Lai kaya, hu mbayai i som ɓwol, hu mbayai i ɗufal i Galili. 22Ta kyel i gotti, al ti Uhirodya ti lang ador, ɗat Herod hu mwalmwat ames ta si ɓwi.

Unai Makai Herod lak ali ni, “Lul shi shak aɗeng ima shima ɓweti i wa fashush.” 23Unai fat kintiɓwi ti shiɗat nyai, “Shak aɗeng ima shi lulun i wa fashush, ima kol ɓwai i kaitat amen.”

24Ti lang ya ti wa kyel i nasut ti nyut, “Ami i wa luli ya?” Unai ti matuti ti ni, “Hai ti Jwon Mabatisma tasi kunggwang hai.”

25Fo abet ali ti humkyel ta kyel i makaiyi ti ni, “I ɓweti ha fan hai ti Jwon Mabatisma tasi kunggwang hai mwashi.”

26Lo' i makaiyi tidyas ti mai findeli. Ɓwet ɓa u nggwes i hya ti aɗeng ima lak kwa, ɓurti shiɗat ima masi ta wei i mwalmwat ames. 27Fo abet ro al i muro ames ɓa u de' hai ti Jwon. Unai lang ta wur i shitam de' hai ti Jwon, 28yes ti tasi kunggwangi hai, fa ali, ɗak ti fa nasut. 29Ti hal ti aɗeng mai, som koltifai ti Jwon si wa si zan funati, si lai.

Yeso Cu ti Ɗufal Nggal Hara

30Takfai tima Som Muro i Yeso si humkyel, si mbas shak ɗamam ima si masi hu ima si koftii. 31Unai Yeso nyus, “Yehukan ka wa si ɓwai ɓa ka lafos.” Yis lak mai, ɓurti ɗufal hyang ima si yes ta muhumkyeli si shas wis ti myan i cwai ti cwa.

32Unai si rang ta kwang i ham si wis ta kyel ima ɗeng mata kwa. 33Shak ta andi, ɗufal hyang ima si ɗingus sin mulangya, si shangus, si rang ti titalal i sisai ta ashwaha, si tongus muru ta kyel ima si wa ta. 34Ti muɗorkyel i Yeso ta kwang i hami, ɗing suɓut i ɗufal hyang ta kyeli, ɗing shum asussi ɓurti si te fota tutwai ima si yus kaciwa' maɗingsus. Unai fur kofsus ti ɗamam hyang.

35Nasi myan mai, ango ti mas, som koltifai asussi si wa kyel Yeso, si nyus, “Kyel mai a ya, mwashi ango ti mas. 36Ti' hun ɗufal mii ya, si lang na ashwaha ima si na nggas mii, si juwil cwa si cu.” 37Unai Yeso matusi ni, “Hun fa hu yus ɗamanin si cu.” Si nyus, “Ni ti amiya? Aɗeng ima ma wa cwai ti ɗufal mii, a cef i ro i wil, ɗak cu tus!” 38Yeso nyus, “A folok awen hu mati ya? Ɓu hu ɗingi.”

Myan ima si wa si ɗingi, si nyus, “A folok hara hu gushe apil.”

39Yeso lak som koltifai ames ɓa si kin ɗufali si te amunan si falan hai ti gikak-gikak. 40Andi si te amunan abet, shini ndik andek (100), shini hure hara (50). 41Zan folok hara hu gushe apili, ɗing kyel ta fit, palang DeeƁwe. Unai nggyal foloki, fa som koltifai amesi, si kaar ɗufali. Andi hwak kaar shak ɗufali gushei. 42Ɗufal si cu si kaf shak asussi. 43Som i koltifai ames si har ruruk i foloki hu gushei ima kati, kol cet hure mulang apil. 44A arya nggal hara si cu foloki.

Yeso At si Ham Hai

45Fo abet Yeso kin som koltifai ames, ɓa si lang ta kwang i ham, ɓa si cu wei ti wa Betsaida, yis u ti' ɗufal ya tawe. 46Takfai tima honus, ɗu tasi ɓwai i anggash ɓa u fwal DeeƁwe.

47Ti ango fing-fing, kwang i ham yis ta saa ti yiir, Yeso kat ahwesi ta fisha. 48Ɗingus sin mba ti tuk ti kwang i hami wet, ɓurti se manjengi mayus sha ti ɗa'at. Myan ima mwen ti kat ndyong ɓwai, unai wa ta kyel ames yis ati ta si hai i ham. Masi fota mayus mulang ii hai. 49Si ɗingus yis ati si hami hai, si ni ashang a malu' nin, si gu' raafo. 50Myan ima shak asussi si ɗingus, si langus ta wi.

Fo abet findelus ni, “Kan hu mwen kwa! Ayin, rwish hun ya.” 51Unai ɗu ta kwang i hami, ɗak sei kat ya. Si shok na fwai fwet, 52ɓurti si ka' aɗeng ima Yeso masi ti folok ani ta hai ndere kwa, ɓurti njeng na hai ames.

53Myan ima si pis ta fit ashwa ti Jenesaret, si no' kwang i hami ya ta fit. 54Ti mulangya asus ta kwang i hami, ɗufal si shangi a Yeso. 55Si lang titalal ta ta'i, sin har ti som i mwatanan si ɗam i marak ames hai, sin yes ti shak ta kyel ima si hali mata. 56Shak kyel ima lang ta hu wi ashwa, mbai hu ali, sin kol sus som i mwatanan tasi lapanan hai ta matof. Si fwalus ɓa si ngge' fo i fagin ames kyek. Unai shak maɗufal ima ngge'us, wis cala.

Currently Selected:

Mak 6: AlisIRonNT

Highlight

Copy