Mak 7
7
Saiya hu Kaciwa' Saiya
1Farisiyawa hu som kofiti si anggut hai ima si yes ta Yerushalima, si suɓut si nggar Yeso ya ta saa. 2Si ɗing shini ta saa ti som koltifai asussi sin cwai ti cwa kaciwa' sati ra ya, ima si lai ii, “kaciwa' sapai.” 3(Sin Farisiyawa hu shak som Ju si cwai cwa kaciwa' sati ra ya kwa, lakan ames kofusti andi tasi som i ɓele ames. 4Na si humkyel ta matof, si cwai cwa kaciwa' sati ra ya kwa. Si ti lakan hyang ima si mat ta kyel i som i ɓele, fota sati cunjoha ya, hu ɓyalang, hu lungai.)
5Unai Farisiyawa hu som kofiti si anggut hai, si lul ta Yeso si ni, “Ami kin som koltifai ama si masti mute i lakan i kaya kwa ya? Si cwai ti cwa ames ti ra, ‘kaciwa' sai ya.’ ”
6Yeso matussi, “A kiga' Ishaya ai lak findel i som shit na hai yuti, hun som rere, fota ngga' ima worong ta,
“ ‘Ɗufal mii sima fasun ngye ti a ɓwish ames kyek,
mulwat ames mas maleng ti yin.
7Si cwaisun afut a gbya',
kofiti ames,
a lakan ima si kofi a laki i ɗufal kyek.’#7:7 Ɗing huni hwak: Ish 29:13.
8“Hu hon laki i DeeƁwe, hu ka' lakan i ɗufal.”
9Lakus ni, “Hu shingat fwet ima hu zan findel i DeeƁwe hu kin ya ta ɓwai, ɓa hu kin mulwat tasi lakan i ɗufal hai! 10Ma fota ngga' ima Mosis lak ta, ‘Fa dya hu nasa ngye,’#7:10 Ɗing huni hwak: Mul 20:12; Muh 5:16. hu ‘Shak maɗufal ima se' dees ahun a nasus, a kpak si forus.’#7:10 Ɗing huni hwak: Mul 21:17; Koc 20:9. 11Shak ta andi, hun hu ni, a kiga' ɓa ɗufal si lak hu dees hu nasus si ni, ‘Shak bum ima hu nin wa mati na kyel amen, hu wa wisi kwa, ɓurti tii fa DeeƁwe ya.’ 12Unai hu honus ɓa u bum dees ahun a nasus ti ɗama kwa. 13Ɓurti andi hwak hu kin findel i DeeƁwe tes i ɗama i gbya', a lakan amu ɓin shak. Hu mas ɗamam hyang fota mai.”
14Unai Yeso hum lai ti ɗufal ta kyel ames, ɗak ni, “Hal huna shak asui, ɓa hu ka' mai ta hai. 15A cwa ima ha kin ta fo ama kyan ha te ‘kaciwa' sapai’ kwa, a aɗeng ima lang ya ta mulut i maɗufal, kyan u te ‘kaciwa' sapai.’ ” 16Maɗufal ima mati mwal i hali, u hali.
17Takfai tima hon ɗufali, lang ta wur. Som koltifai amessi si lulus mangga' i kaani mai. 18Lakus ni, “Hun hwak hu ka' mai ta hai kwa haa? A cwa ima ha kin ta fo ama kyan ha te ti ‘zuruk kwa.’ 19Ɓurti laang ii ta mulut ama kwa, a ta ɗar ama kyek, u lang ya.” Ti lak ti mai, Yeso ni shak cwaha si mati “sapa.”
20Unai cu wei ti nyai, “A aɗeng ima lang ya ta mulut i maɗufal a yis kyanus u te ‘kaciwa' sapai.’ 21Ɓurti shak ɗamam mii si yias ii ta wi i mulut i maɗufal, ambe' mafwashi, arak i zuruk, shir, hu for ti maɗufal, hu raki hu mbor ti ɗeng, 22komam, muk, yok, dang, se', ngye na hai, hu halngyat. 23Shak ɗamam mafwashani mii si yes ii ta mulut, a sin si kyan maɗufal u te ‘kaciwa' sapai.’ ”
Fati Mulut i Mbor ta Surofinikya
24Takfai ti andi, Yeso hon kyel ani wa ta' ti Taya, wa lang ta wur nin, ɓwet ɓa ɗeng u shangi mata wuri kwa. Shak ta andi, ɗufali si shangi mata wuri. 25Fo abet mbor nin tima al asut mu vaati ti mati rin mafwashi, ti hali Yeso mata wuri. Ti wa ti fur ta mabel ames, 26ti fwalus ɓa u re' al asut rin mafwashii ya. Mbori a moti Girik, si alut ta ta' ti Surofinikya.
27Yeso nyut, “Hon shi fe si kaf tawe, ɓurti a kiga' si fa kyara cwa i fe kwa.”
28Ti matussi ti ni, “Angga'i nai a Deembai, shak ta andi, kyara si cwai anggum i cwa i fe ima ndaak ta fisha.”
29Unai nyut, “Ɓurti muro maɗesi amesh mai, ɓwishush wur, rin mafwashii tuu hon al ashushi.”
30Unai ti wit wur, ti wis al asut yit raki ta kyel marak, ma rin mafwashii tuu wis.
Yeso Fa Mandu' Cala
31Unai Yeso hon Taya wa Saidon, ta fo Yiir i Galili, hu ta' ti Dekapolis. 32Ta kyeli, ɗufal shini si kol Yeso maɗufal nin ima a mandu', hu findyal kwa, si fwalus ɓa u kin maɗufali ra hai.
33Takfai tima Yeso her ti maɗufali ya ta ɓwai, ɗak ti' fe i ra ames ta mwal i maɗufali, tuf lyau ta foti ra ngge' ti alis ames. 34Yeso ɗing kyel ta fit dul lafos, ɗing shum asussi ni, “Efata” ma nyai, “Matɓu ha!” 35Fo abet mwal i mandu'i si matɓu, alis ames mahwet fur findel kparara.
36Yeso ni hus kan si lak ɗeng kwa. Shak aɗeng ima lak, te fota ni ɓa si cu wei ti buti ndai.
37Ɗufal si jakak fwet ta shok na fwaiyi nyai, “Mas shak ɗamam ames ndyas! Ɗing huni, mandu' hal findel ɗak mandu' findel kparara.”
Currently Selected:
Mak 7: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
