Mak 3

1Myan nin hum mulang ta mare, maɗufal mashoki ra nin yis ta kyeli. 2Som ima si nadon ti Yeso si far ti ngga' ima ɓa si wisus ti mafwashi, unai si shus shishat hai, ɓa si ɗingi a hun ma wa fati mashok ra mai cala Mwen ti Lafos ɗak. 3Yeso lak mashok rai ni, “Lukka fit ha te mangra na wei i ɗufal.” 4Unai Yeso lulus ni, “Anggi ma kiga' si anggut tasi Mwen ti Lafos ya? A masti maɗesi ahun a masti mafwashi ya? A bum ti mupwet ahun a fori ya?” Unai si kat ryot. 5Shus shishat hai, ɗingus tarara ti futut, ta kikyawat ti muluti hwak ɓurti njeng na mulut ames. Unai lak mashoki rai nyus, “Tasa ra ama.” Unai tas rai, wis cala. 6Unai Farisiyawa si lang ya ta kyeli, fo abet si mas suɓut i ka'ti man hu ɗufal i Herod, si findel si ngga' ima ɓa si for Yeso ta.

Suɓut i Ɗufal Si Kolfai Ti Yeso

7Yeso hu som koltifai asussi si hon kyeli, wa ta foi yiir, ɗufal hyang ta ta' ti Galili hu Judya si kolfai asussi. 8Ta Yerushalima hu ta ta' ti Idumya, hu fit i Ɗara i Jodan, hu ta kikyal i Taya hu Saidon, male' ɗufal si yes kyel ames, ɓurti si hal ɗamam ima maasi. 9Ɓurti ɗufal si ɓal, Yeso lak som koltifai asussi ɓa si farus kwang i ham nin u te i hai, kan ɗufal si vohus ya. 10Ɓurti ai fa som hyang cala i lo'a' ames, som mwatanan si twak kikyal ɓa si ngge'us. 11Myan ima rin mafwashi si ɗingus, si fwar ta mabel yusti, sin rafo nyai, “A ha a Al i DeeƁwe!” 12Ti'us ra kan si lak yis awe kwa.

Yeso Ben Som i Muro Ames

13Yeso ɗu ta ɓwai i ɗanggash nin, lai som shini ima ma ɓwet sus, unai si yes. 14Ben ɗufal hure mulang apil ta saa yusti, kinus asum ii Som Muro. Benus ɓa si te tikul hu yis, ɓa u rohus si wa si mba findel i DeeƁwe ta kikyal, 15ɓa si wis andok i nggati rin mafwashi ya.

16Mii a ɗufal hure mulang apil ima benus. Siman (ima Yeso fas asum Pita), 17Jemis hu nusus Jwon a fe i Zebedi (ima fas asum Bowanejis, ima ma kofi nyai sin a Fe Bara),

18Andru,

Filip,

Batolomi,

Matyu,

Toma,

Jemis al i Alfyus,

Tadyus,

Siman ma nadon,

19Judas maɗufal i Iskaryot,

ima ta takfai cu han i Yeso.

Yeso hu Ba'alzabul

20Unai Yeso lang ta wur, male' ɗufal si suɓut hwak, kol ta kyel ima yis hu som koltifai asussi, si wis myan i cwai ti cwa kwa. 21Myan ima shunus si hal aɗeng mai, si wa ɓa si zanus ya, ɓurti sima nyai, “Wanganus.”

22Som i kofiti si anggut ima si ɗor ta Yerushalima si ni, “Ba'alzabul langus hai! A ti njeng i makai i rin mafwashi ma nggati rinan mafwashani ya.”

23Unai Yeso laiyus, lakus findel i kaani nin ni, “Atini Shatan u ngga Shatan ya? 24Na kaitat matkar u zan wei ti ɗyus, kaitat ani ma wa mute mangra kwa. 25Andi hwak na wur ti matkar ti zan ti wei ti ɗyut, wur andi ti wa mute mangra kwa. 26Na si ni Shatan zan wei ti ɗyus, kof yis hwak matkarus. Mawa masi atini u te mangra ya? Anggwe' asus ti ru ndai. 27I laksu ndai, awe ma wa mulang ta wur i maɗufal manjeng u harus ɗamam ya ya? A maɗufal ima ɓin njeng ma wa no'sus ya tawe, ɗak har ɗam i wuri ya.

28“I ma laksu mwawei, DeeƁwe ma wa shwaiti shak som mafwashani ames ya, hu findelal i ale'. 29Shak ta andi, maɗufal ima lak findelal i ale' ta si hai i Rin Masapai, DeeƁwe ma wa shwaisusi ya kwa fweng. Musut i mafwashi mai, i myan hu myan.”

30Lak mai ɓurti sima nyai, “Ama rin mafwashi.”

Naa ti Yeso hu Shunus

31Unai naa ti Yeso hu shunus si ru na takfai, si te mangrai ta saikyel, si ro ɗeng ɓa u lang ta wii u laiyus. 32Male' i ɗufal sin amunan si nggarus ya, unai si lakus si ni, “Nasa hu shuna si mata saikyel, sima farsa.”

33Yis matussi ni, “A hu we si mii nasun hu shunun ya?” 34Unai hatat ɗing ɗufal ima si nggarus ya ni, “Ɗing hun hu nasun hu shunun mi nati! 35Shak maɗufal ima mas aɗeng ima DeeƁwe ma ɓweti, a yis mii nusun, ti mii tusun, ti mii nasun.”

Currently Selected:

Mak 3: AlisIRonNT

Highlight

Copy