Mak 2

Yeso Fa Gundung Cala

1Takfai ti mukonan ndyong, Yeso hum mulang ta Kapanahum, unai ɗufal si hali nyai yes wur. 2Ɗufal hyang si suɓut ta wuri, kyel ti hya mbyalam wa fo i mahom, kaciwa' wis ti kyel i kinti sai. Unai Yeso lakus findel i DeeƁwe. 3Arya ɓaras shini si yes, sin ti mwes mashok lo' nin. 4Ɓurti si wis fisel i mulang ti ta kyel ima Yeso mata kwa, ɓurti mute hya i ɗufal, si ɓo ndung i mahom ima Yeso mata ya, si ɓu swai yi ya i mbai, si ɗor ti mashok lo'i ta si lapan i marak hai. 5Myan ima Yeso ɗing fati mulut ames, Yeso lak mashok lo'i ni, “A al amen, i shwa mafwashi ama ya.”

6Ta kyeli, som kofiti si anggut shini sin amunan, sin ɗambe' ta mulwat ames, nyai, 7“Ami kin maɗufal mai ma findel andi ya? A findel i ale' malaki! Awe ma wa shwaiti mafwashi ya, wa' DeeƁwe ya?”

8Fo abet, Yeso ta rin ames shang aɗeng ima si mbe'i. Lakus ni, “Ami kin huma mbe' ti ɗamam mii ya? 9Anggi ɓin mbwesh ɓa si ni, ‘I shwa mafwashi ama ya,’ sin hu ima si ni, ‘Lukka fit, nggi'a lapan ama, ha wa ya?’ 10Ɓa hu shangi nyai yin, a Al i Maɗufal, i mati mbaitat na naya, ɓa i shu mafwashi ya.” Unai Yeso lak mashok lo'i ni, 11“I lak sa, luka fit, zana lapan ama, ha wa wur.” 12Unai mashok lo'i luk fit, zan lapan ames, at sin ɗingi shak asussi. Aɗengi fa shak som ima si ta kyeli shok na fwai, sin ha' ti asum i DeeƁwe fit nyai, “Tini ɗing ɗama nin fota mai kwa!”

Yeso Lai Lawi

13Nin myani hwak Yeso hum mulangya, wa ta foi yiir, som hyang si yes kyel ames, fur kofsus ti. 14Myan ima yis nggaari, ɗing Livai al i Alfyus, yis mute ta kyel i mati cef i wufen. Yeso nyus, “Kolafai asuni,” unai Livai lukfit kolfai asussi. 15Mwen nin ndai, Yeso yis cwai ti cwa i mukon ta wur i Livai. Male' som i mati cef i wufen hu ima si laiyus ii som mufwashi, sin cwai ti cwa tikul hu yis, hu som koltifai asussi. Ɗufal hyang sin koltifai asussi. 16Som i kofiti si anggut hu ima si mii Farisiyawa, si ɗingus yis cwai ti cwa hu ima si laiyus ii som mufwashi, hu som i mati cef i wufen. Si lul ta som koltifai ti Yeso si ni, “A ɓurti mi ma cwai ti cwa hu som i mati cef i wufen, hu som i masti mafwashi ya?” 17Ti hal ti mai, Yeso nyus, “Maɗufal ima mati cala wai kyel i manda kwa, a mamwatan wai kyel i manda. I yes ɓa i lai a som ima a munderei kwa, a ima si ti mafwashi.”

Fisel Muwili hu Fisel Mumwai

18Som i koltifai i Jwon hu Farisiyawa si mana ti ka'ti fo ya ta si cwa hai, unai shini ɗufali si yes si lul ta Yeso nyai, “Atini som koltifai i Jwon hu i Farisiyawa si mana ti ka'an ti fo ya tisi cwa hai, ɗak ama si kaa' fo ya kwa ya?” 19Yeso matussi ni, “Atini mwalmwat i zalang makunggoi si wa ka'ti fo ya, yis zalangi yis ɗiri takyel ames ya? Si wa masi andi kwa, na zalang makunggoi yis ɗiri akul hu sin. 20Myan ma wa yes ima si wa zan ti zalang makunggoi ya ta kyel ames, a myani si wa ka'ti fo ya tasi cwa hai.

21“Maɗufal zaan ɓwai i fagin mamwayi, u tor tasi hai i fagin mawili kwa. Na masi andi, ɓwai mamwayi ma wa nggi' ti fagin mawili u gwyak ya, rafati u ɓin i ma aiyi. 22Maɗufal shwai ham i manggɓu' ta wii i rukul mawili kwa. Na masi andi, hami na can ma wa taɗas ti rukuli ya, u wis ya, rukuli hwak u rafatus. Wayou, maɗufali ma wa shwaiti ham i manggɓu'#2:22 ham i manggɓu' Si mas rukul i shwaiti ham i manggɓu'. Rukul mamwai ma ɓwayan ya, mawili shwakus. Nasi shu ham mamwai ta taɗasus ɓurti shok ames. ta rukul mamwai wi.”

Deembai i Mwen ti Lafos

23Mwen ti Lafos nin, Yeso yis ɗa'at ta yang i macwa nin. Myani som koltifai asussi sin tifai, si fur warat ti hihai i macwai sin cwai. 24Farisiyawa si nyus, “Ɗingai, ami kin si nggyel ti anggut ya ti masti mai, Mwen ti Lafos ya?”

25Yeso matussi ni, “Hu mbe' tasi Worong i DeeƁwe aɗeng ima ai Devid hu myayus si masi myan ima hwem hanus kwa haa? 26Myan ima Abyata yis i mbai i som i kocokak, Devid lang ta Wur i DeeƁwe, zan folok masapai ima a kocokak je si cwai, cu, fa myayus ta hwak.”

27Unai Yeso nyus, “DeeƁwe mas Mwen ti Lafos a ɓurti ɗufal, mas ɗufal a ɓurti Mwen ti Lafos kwa. 28Ɗing huni, Al i Maɗufal a yis mii Deembai i Mwen ti Lafos.”

Currently Selected:

Mak 2: AlisIRonNT

Highlight

Copy