Mak 1

Jwon Mabatisma Ɗak ti Fisel ta

1Ngga' ima muro maɗesi i Yeso Kristi, Al i DeeƁwe fur ta mai. 2Si worong ta kaada i Ishaya mashit nyai,

“I wa ro ti mamuro amen u tong ta wei ti ha,

ɓa u ɗaka ti fisel ta,”#1:2 Ɗing huni hwak: Mal 3:1.

3“La ti ɗeng ti lai lai ta ya,

‘Ɗak hun ti Deembai fisel ta,

Tas hun fiselal si wa mangra ɓur sus.’ ”#1:3 Ɗing huni hwak: Ish 40:3.

4Jwon Mabatisma mata ya, yis mba ti findel i hatat, ɓa si mas ɗufal batisma i shwaiti mafwashani ames ya. 5Ɗufal ta ta' ti Judya, hu ashwa ti Yerushalima shak, si rangya si wa kyel i Jwon. Sin lak ti mafwashani ames ya, yis masus batisma ta Ɗara i Jodan. 6Jwon sok arom ima si masi ti fukut i rukumi, hu fata' ima no' ti ɗar ya, cwa ames a langgash hu ham i wan i kyel ta ya. 7Muro ames mai, “Ɗeng ma yes na takfai yunti ima ɓinun mbaitat, i ndok ɓa i cinggir i hwet mwinggi' i kpakasak ames ya kwa. 8Yin i masu batisma ti ham, yis ma wa masu batisma ti Rin Masapai.”

Batisma hu Amba i Yeso

9Myan ani Yeso yes ta Nazaret ta' ti Galili, ɗak Jwon masus batisma ta Ɗara i Jodan. 10Myan ima Yeso yis mulangya ta ham wi, ɗing fit maɓu ya, Rin Masapai ɗorus hai fota gurguta. 11Unai la nin ta fit ti ni, “Mai a Al amen, ima i ɓwetsus fwet, ima ti pipelat na mulut ɓursus.”

12Fo abet Rin Masapai tukus ta ya, 13te ta i mufi hure ɓaras, Shatan yis mbasus. Te ta yai hu loha i ya, som lu' i DeeƁwe sin ɗing sus.

Yeso Lai Som i Koltifai i Bya'

14Kamana ndai, si kin Jwon ta wur i shitam. Unai Yeso wa ta Galili, yis mba ti muro maɗesi i DeeƁwe. 15Ni, “Myan si ndok kong, kaitat i DeeƁwe her anggasi. Hatat hun hu fa mwawei nasi muro maɗesi i DeeƁwe!”

16Nin mweni ndai, Yeso yis ati ta fo i Yiir i Galili, ɗing hu Siman hu nusus Andru, sin shwaiti takal i gong ti gushe ta yiiri, ɓurti sin a som gong ti gushe. 17Yeso ni, “Yehun, kol hun fai asuni, hu mana ti gong ti gushe, yin i wa kofsu fisel i dul ti ɗufal yes kyel amen.” 18Fo abet si hon takalal ames ta, si kolfai asussi.

19Myan ima Yeso her ta wei vaat, unai ɗing Jemis al i Zebedi hu nusus Jwon ta wii kwang i ham, sin ɗak ti takalal ames ta. 20Fo abet laiyus sin hwak, si hon dees Zebedi hu som i roi ta kwang i hami wi, si kolfai asussi.

Yeso Re' Rin Mafwashi Ya

21Unai si wa Kapanahum, Mwen ti Lafos ti ru ndai, Yeso lang ta mare fur kofiti. 22Ɗufali si shok na fwai ti kofiti ima masi, ɓurti kofusti ti andok, te akat hu i som kofiti si anggut hai. 23Fo abet maɗufal nin ima mata marei, ima mati rin mafwashi yis gwa'an ti rafo nyai, 24“Ami ha ɓweti ti nin ya, a Yeso i Nazaret? Ha yes ɓa ha fwar nin ya haa? I shanga, ha a Masapai i DeeƁwe!”

25Unai Yeso ti' rini ra, ni, “Tya cakat! Langa ya na maɗufal mai wi!” 26Unai rin mafwashii mavwirik ya ta maɗufali wi mat shaat lang ya.

27Ɗufal si shok na fwai sin lul ti ɗiyai nyai, “Ami mai ya? Kwai ka hal kofiti mamwai ti mbaitat! Lak rin mafwashani ɓa si rangya, angga'i nai si halus si rangya.” 28Fo abet findel mai nggu' ya ti kikyali ta ta' ti Galili.

Yeso Fa Ɗufal Hyang Cala

29Ti mulangya a ames ta marei, si wa wur i hu Siman hu Andru, akul hu Jemis hu Jwon. 30Kasus ti Siman yit raki ti mwatan i mayel, unai si lak Yeso mangga' i mwatan ameti. 31Unai wa kyel amet, ka' ra amet fwangut ti luk fit. Mayeli catut ti ra, ti fas ɗama i cwai.

32Ti ango i mweni, ɗufal si kol Yeso shak som i mwatanan, hu som i rin mafwashi. 33Ɗufal ta ashwai shak si suɓut ta fo i kwap i wuri, 34unai Yeso fas cala, som ima si ti mwatanan akat-akat. Ngga rin mafwashi ya hyang, sha rin mafwashani findel, ɓurti si shangus.

Yeso Kang Ɗyus ya Fwal DeeƁwe

35Tamwen wititit, kaciwa' kyel ti ti kanang ya, Yeso luk fit, hon wuri, unai wis ta ya, fwal DeeƁwe ta kyel. 36Siman hu myayus si wa ɓa si farus, 37myan ima si wisus, si nyus, “Ɗufal shak si farsa!”

38Yeso matussi ni, “Ndakan ka wa ta shini kikyali hwak, ashwaha muyaiyi ima si mana anggasi, ɓurti ɓa i mba findel i DeeƁwe ta hwak. Aɗeng ima kolun na nai.” 39Unai at si ta' ti Galili shak, yis mba ti findel ta mareha ames, yis nggati rin mafwashani ya.

Yeso Fa Nggeter Cala

40Nin mweni ndai maɗufal nin yes kyel i Yeso. Maɗufal mai a nggeter, shu fwaran ta fisha fwalus, ni, “Na ha ɓwet, ha ndok ha sapa hun ya.”

41Yeso ɗing shum amesi, unai ti' ra ngge' ti nggeteri, nyus, “I ɓwet, i sapa ha ya.” 42Fo abet nggeterati honus, lo' ames wis cala.

43Yeso lak nggeteri ɓa u wis, dulus mwal nyai, 44“Halai, kan ha wa ha lak ɗeng mai aɗengi kwa. Ɓwa ha kof haisa ta kyel i makocok, ha tor kuna ima anggut i Mosis lak, ɓurti sapa ama, ɓa u kofus nyai ha wis sapai.” 45Nggwes i hali, ti mulangya ames, cu wei ti but ti aɗeng ima Yeso masusi. Ɓurti andi, Yeso wis mulang ta ashwai ta shishat i ɗufal kwa, tak mute ta saikyel tawe. Shak ta andi, ɗufal si cu wei ti yes kyel ames ta kikyal.

Currently Selected:

Mak 1: AlisIRonNT

Highlight

Copy