Matyu 28

Muluk Fit ta Mot

1Takfai ti Mwen ti Lafos, tasi mwen ti bya' ti mukonan, Uryam ta Magdala hu Uryam mwandeki si wa ɓa si ɗing kyel ta fiyai.

2Kaciwa' shangi si mas a ro i ta' manjengi, ɓurti malu' i Deembai ɗor ta fit, wa ta fiyaiyi, tuk afungi ya ɗak te amun i hai. 3Mute ames ma fota nzilwit, ɗak arom ames pipel ya fota fyu. 4Som i ɗing ti kyel ya si mwenus fo fwet, si ro jiir, si tes fota funatat.

5Malu'i lak arofi ni, “Ka hu mwen kwa! I shangi hu far ti a Yeso, ima si nggwak tasi shanggam hai. 6Mana kwa, tuu lukus fit, fota ngga' ima lak ta. Yehun hu ɗing kyel ima ai si kinus ta. 7Ɗak hu wa kaang hu lak fe i ro ames, ‘Tuu luk fit ta mot, mata wei yuti wa Galili. A ta kyeli hu wa ɗingsus.’ I laku mwashi.”

8Unai si hon fiyaiyi, ti myanat, shak ta andi si hya ti jakak, si tital wa lak ti fe i ro ames. 9Kaciwa' shangi si shwai hu Yeso.

Lak ni, “Ti ɓu kongoo!” Unai si yes kyel ames, si ka' sisai ames, ɗak si cus afut.

10Unai Yeso nyus, “Ka hu mwen kwa. Ɓu hu lak shunun si wa Galili, a ta kyeli si wa ɗingsun.”

Laki i Som Ɗing ti Kyel ya

11Arofi si tes wa, shini som i ɗing ti kyel yai si wa ta ashwai, si lak mbai i kocoki shak aɗeng ima fur. 12Myan ima mbai makocoki si shwai hu kaya, si shima ti aɗeng i masi, si fa som i ɓwol male' cef hyang. 13Si laksus si ni, “Hu wa nyai, ‘Fe i ro ames si yes tafo' si shirus ya hun yu ɗarak.’ 14Na findel mai ru ta mwal i makunggul, ni wa laksus, ɓa ni zanu ya ta puɓwar wi.” 15Unai som i ɓwoli si mat cefi ɗak si masi ta ngga' ima si lakus ta. Ɗak jam mai nggar ta saa ti som Ju yes mwen moti.

Mbai Ro i Masi

16Unai fe i ro hure mulang andeki si wa Galili, ta anggash kyel ima Yeso lakus ɓa si wa ta.

17Myan ima si ɗingus, si cus afut, shak ta andi shini sin yus mulut apil. 18Unai Yeso yes kyel ames ni, “DeeƁwe fan shak mbaitat i fit hu i naya. 19Ɓurti andi, ɓu hu kin ɗufal si te ii fe i ro amen ta shak ramam i naya wi, hun masus batisma saa#28:19 Ɗing huni hwak: RSM 8:16; 19:5; Rom 6:3; 1Kor 1:13; 10:2; Gal 3:27. ti asum i Dee, hu i Al, hu i Rin Masapai. 20Hun kofusti ɓa si mas shak ɗamam ima i laku. I ma akul hu hun ngang wa dala i myan.”

Currently Selected:

Matyu 28: AlisIRonNT

Highlight

Copy