Matyu 27

Judas Zule' Haisus Ya

1Tamwen wititit, mbayai i kocokak hu tabwa' shak, si pun uɓet ɓa si for Yeso. 2Si no'us, si langtus ya si fa Pailet makunggul i Rom.

3Myan ima Judas, ima cu kwinik, ɗingi si lef Yeso ɓur hai, kikyau na mulut. Humkyel ti cef i ugbwirik hure ataat ani ta kyel i mbayai i kocokak hu tabwa'. 4Lak ni, “I mas mafwashi, ɓurti i cu kwinik i maɗufal ima ra ames hara.”

Si ni, “Ami aminin ta ya? A kol asa ndai.”

5Unai Judas hwis ti cefi ta Wur i DeeƁwe ɗak hon kyeli. Unai wis, wa zule' haisus ya.

6Mbayai i kocokaki si zan cefi si ni, “A male' tasi anggut, ɓa si kin mai ta hot, ɓurti a cef i wash.” 7Si ɓetti ɓa si mas ro ti cefi, si pwak ti kyel i masti lungai, ɓa si lai mwalmwat ta. 8Ayis nai kin si laiyani ii Kyel i Wash yes kwai. 9Unai aɗeng ima Yeremya mashit lak hya, nyai, “Si zan ugbwirik mupeli hure ataat, a cef ima som i Isar'ila 10si ɓwet ɓa si tal tasi yis hai nai. Ɗak zan si pwak ti kyel i masti lungai, fota ngga' ima Deembai lakun ta.”#27:10 Ɗing huni hwak: Zak 11:2-13; Irm 19:1-13; Irm 32:6-9.

Yeso Ta Wei i Pailet

11Si yes ti Yeso ta wei i makunggul Pailet, ɗak makungguli lulus ni, “A ha a makai i som Ju haa?”

Yeso matussi ni, “Hei, fota ngga' ima ha lak ta.”

12Myan ima mbayai i kocokaki hu tabwa'a' si sya'us, matus findel nin kwa. 13Unai Pailet lulus ni, “Ha hal findelal ima si laki na hai ya ti kwani?” 14Yeso shenusi kwa fweng, makungguli shok na fo fwet.

15Myan i Got i Pissihai, Pailet makunggul mana wak ti maɗufal ii ra ima mata mano' wi, ima ɗufal si lul. 16Ta myan ani, si mati mashok ti hai nin ta mano' wi, ma asum Barabas. 17Myan ima suɓut i ɗufali si shwai, Pailet lulus ni, “Awe hu ɓweti ɓa i catu ii ra ya. A Barabas, hun a Yeso ima si lai ii Kristi ya?” 18Yis shangi a ɓurti nadon kin si fa Yeso ta ra yusti.

19Myan ima Pailet yis amun ta si kunggul ti ɓur asus, mbor asus ti ro muro ta kyel ames nyai, “Ka ha mas ɗama si maɗufal ima ra ames hara a mai kwa, ɓurti i kon woti shum fwet ta fiɗyat wi kwai, ɓursus.”

20Shak ta andi, mbayai i kocokaki hu tabwa' si shuk ɗufal ɓa si ni, a Barabas ni ɓweti ha wak nin ii ra, ha kin si for Yeso.

21Makungguli lulus ni, “Awe hu ɓweti ɓa i wak i ra na saa ti apilal mii ya?”

Si ni, “A Barabas.”

22Unai Pailet lulus ni, “Ami hu ɓweti ɓa i masi ti Yeso ima si lai ii Kristi ya?”

Si mati shak asussi si ni, “Nggwak hun yus si shanggam hai!”

23Pailet lulus ni, “Anggi mafwashii masi ya?”

Si mat raafo shak ti ambas nyai, “Nggwak hun yus si shanggam hai!”

24Myan ima Pailet ɗingi mati ɗama i masi kwa, ɗufal hwak sin ɓweti ring ti kyeli ya, unai zan ham sa ti ra ames ya ta wei i suɓut i ɗufali, lak ni, “Ra amen hara nasi wash i maɗufal mai. Andi a ro asu ndai!”

25Unai shak ɗufali si mati nyai, “Hona wash amesi u tena hai nin ti ta fe aminini!”

26Unai Pailet wakus Barabas ii ra. Ɗak kin si ndash Yeso, wakus i ra ɓa si nggwakus.

Som i Ɓwol si Gbaf Yeso

27Unai som i ɓwol i makungguli si zan Yeso si wa ti ta ɗom mbai ames, si suɓut shak som i ɓwoli si kinus ta saa yusti. 28Si mbwetus ya ɗak si ti'us fagin mujuwi nin, 29ɗak si lat rurwan i maren, si ru'usi ta hai. Si kinus cwang ta ra i ucwa, si shu fwaran ta wei yusti ɗak si gbafus, si ni, “Lo, a makai i som Ju!” 30Sin twafansus lyau ta shishat, ɗak si mat cwangi si sere'us ti ta hai. 31Takfai tima si gbafus ya, si zan fagin mujuwi ya, si ti'us arom ames. Unai si langtus ya ɓa si nggwakus si shanggam hai.

Nggwaki

32Myan ima sin wa ndai, unai si shwai hu maɗufal nin ta Sairin, ma asum Siman, si kinus kpak ɓa u ha' shanggami. 33Si wa ti Yeso ta kyel nin ima si lai i Golgota, (nyai a Kyel i Kyas i hai). 34Ta kyeli si fa Yeso ham i manggɓu', ima si futi ɗama ma ɓoli, takfai tima hali, nggwes i woi. 35Myan ima si nggwakus, si kaar arom ames ta fisel ti hwiti aben. 36Takfai ti andi si te amun, sin ɗingsus ta kyeli. 37Ta hai yusti si worong ta nyai, YESO MAI, A MAKAI I JU. 38Si nggwakus hu asher apilal, andek ta ra i ucwa, andek ta ra i ukutyal. 39Som ima si musata sin laksus findel i gbya' hai, sin kinggit ti hihai ames nyai, 40sin nyai, “Gbaak! Ha ima ha ni ha wa nggul ti Wur i DeeƁwe ya, ha ta' ta takfai ti mukon ataat, ɗorakyel tasi shanggami hai, na ha a Al i DeeƁwe!”

41Andi hwak mbayai i kocokak, hu som kofiti si anggut hai, hu tabwa' si gbafus ya. 42Si ni, “Bum shini, ɗak ndok ɓa u bum haisus kwa! Yis makai i Isar'ila! Ɓa u ɗorkyel ta si shanggami hai, ɗak ka fa mwawei si yis hai. 43Fa mwawei si DeeƁwe hai, ɓa DeeƁwe bumus mwashi na yis ɓwetsus, ɓurti ni, ‘Yin a Al i DeeƁwe.’ ” 44Andi hwak asher ima si nggwakus tikul si sya'us fwet.

Mot i Yeso

45Sai i ren, maɓing vo wufen ya shak, wa shitam ataat ti ango. 46Ta shitam ataati, Yeso kawa ti la munjengi ni, “Eloi, Eloi lama sabaktani?” Ma nyai, “A DeeƁwe amen, a DeeƁwe amen, ami kin ha mas gbya' ti yin ya?”#27:46 Ɗing huni hwak: Nak 22:1.

47Myan ima som ima si mangrai ta kyeli si hal mai, si ni, “Ma lai ti Iliya.”

48Fo abet andek ames tital wa jop dafok ta ham macani wi, ti' tasi yit ti nzong hai, ti' Yesoi ɓa u wo. 49Anggumi si ni, “Mwashi hon hun yus ahwes ɓa ka ɗingi ahun Iliya nan u yes u bumus.”

50Unai Yeso hum kawa ti la mbai, unai muluti ti ɗuk.

51Ta myan ani fagir i Wur i DeeƁwe matkaar apil ta fit wa fisha. Fisha rwa, afyai si ɓaak. 52Fiyai si matɓu, ɗufal musapai hyang ima si mwat si luk fit ti mupwet. 53Takfai tima Yeso luk fit ta mot, si lang ya ta fiyai, si wa ta ashwa masapai, ɗak si pwak ya ta kyel i som hyang.

54Mbai i som ɓwoli hu ima sima akul, sin ɗing ti Yeso ta. Myan ima si ɗing aro i ta' hu shak ɗamam ima fur ta kyeli, myanat ka'us, si cu wei ti nyai, “Mwawei, mai a Al i DeeƁwe!”

55Arof hyang sin ta kyeli, sin ɗingi ta maleng. Ai, si kolfai ti Yeso ta Galili ɓa si talus myatat. 56Ta saa yusti a Uryam ta Magdala, hu Uryam nati Jemis hu Josep, hu nati fe i Zebedi.

Lai i Yeso

57Myan ima ango ti mas, maɗufal masufat nin ta Arimatya, ma asum Josep, ima ti haisus te ii makoltifai ti Yeso. 58Wa kyel i Pailet, lul funat i Yeso, unai Pailet kin ɓa si fas. 59Josep zan funati nggi' ta lukul i lai mapeli wi, 60ɗak kin ta fiyai ames ima yong ta afung wi. Tuk mbai i mafung ta fo i fiyaiyi ɗak wis. 61Uryam ta Magdala hu Uryam mwandeki sin amun ta nggas ti fiyaiyi.

Maɗing Ti Kyel Ya Ta Fiyai

62Wasan, Mwen ti Lafos, mbayai i kocokak hu Farisiyawa si wa kyel i Pailet. 63Si ni, “A dee, ni mbe' myan ima yis ɗiri mushet mafyarat ani ni, ‘Takfai ti mukon ataat i wa muhum muluk fit.’ 64Kina ɓa si ɗing fiyaiyi ta yes mwen mutaat. Na andi kwa, ka fe i ro ames si yes si shir funati ya, ɗak si lak ɗufal nyai, luk fit ta mot. Dang i dala mai ma wa ɓin ti i bya' rafat.”

65Pailet matussi ni, “Zan hun maɗing ti kyel ya hu wa, ɗing hun fiyaiyi ndere ngga' ima hu shangi ta.” 66Unai si wa si lis fo i fiyaiyi ya, si kin maɗing ti kyel ta.

Currently Selected:

Matyu 27: AlisIRonNT

Highlight

Copy