Matyu 26

Gbaf si Yeso hai

1Myan ima Yeso mbit lak ti ɗamam mii shak, lak fe i ro ames ni, 2“Fota ngga' ima hu shangi ta, Got i Pissihai kat mukon apil ta wei, si wa fati Al i Maɗufal ɓa si nggwakus.”

3Unai mbayai i kocokak hu tabwa'a' si mas mute ta wur i Kayafas makocok mbai, 4sin ɓeti ɓa si ka' Yeso i mufot ɓa si forus ya. 5Si ni, “A mwen ti Got i Pissihai kwa, ɓurti kan ɓin ti luk fit ta saa ti ɗufal.”

Si Shu Yeso Mbar ta Betani

6Myan ima Yeso yis ta Betani ta wur i maɗufal nin ma asum Siman Nggeter. 7Mbor nin ti yes kyel ames ti mbar macef fwet ta shigira, ima ti shussi ta hai myan ima yis cwai ti cwa.

8Myan ima fe i ro ames si ɗing mai, si mas futut, si lak ɗiyai ames nyai, “Ami kinti rafat mbar mai ya ya? 9Mbar mai naɗin si ɗif ya ti cef hyang, na si fa som i jyel cefi.”

10Ɓurti Yeso shang ambe' ames, lakus ni, “Ami kin hu buruk ti mbor moti ya? Ti mas ɗama maɗesi si yin hai. 11Ngang hu wa mute akul hu som jyel na saa yuti, ka wa mute akul hu yin ngang kwa. 12Myan ima ti shu mbar mai si yin hai, ti masi ɓa ti ɗak tun yes myan ima si wa laisun. 13I ma laksu mwawei, shak kyel ima si wa buti findel mai ta na naya, si wa lak ti aɗeng ima ti masi mai hwak, ɓurti mbe'i ti yit.”

Judas Ɓwet ɓa u Cu Kwinik i Yeso

14Unai andek ta saa ti hure mulang apil, ima si lai ii Judas Iskaryot, wa kyel i mbai i makocok 15lulus ni, “Ami ha wa fasun ti ɓweti i mulut ama, na i fu Yeso ta ra amu ya?” Ɗak si mbe'us cef i ugbwirik hure ataat. 16Ta myan ani Judas fur far ti ngga' ima ɓa u ka' Yeso ta u fas ta ra.

Yeso Cu Cwa i Pissihai

17Mwen ti bya' ti Got i Folok ima Ma kaciwa' Hong, fe i ro ames si yes kyel i Yeso si lulus lul nyai, “Ha ɓweti ka ɗaka ti kyel i cwai ti Got i Pissihaiyi a leya?”

18Lak fe i ro ames ni, “Lang hun ta wi ashwa ta kyel i maɗufal nin hu lakus nyai, ‘Makofiti ni, myan ima si kinuni kat vaat. I ɓweti ɓa i cu cwa i Got i Pissihai hu fe i ro amen ta wur ama.’ ” 19Unai fe i ro ames si masi ta ngga' ima Yeso lakus ɓa si ɗak ti Got i Pissihaiyi ta.

20Myan ima ango ti mas, Yeso yis cwai ti cwa akul hu sin hure mulang apili. 21Si te cwai lakus ni, “I laksu mwawei, andek na saa yuti, ma wa cwai ti kwinik amen.”

22Si mas futut fwet, si cu wei ti laksus ti andek-andek nyai, “Ayin haa, a Deembai?” 23Yeso matussi ni, “Ima ti' ra na kwang akul hu yin matun wa munggwya. 24Al i Maɗufal ma wa wa fota ngga' ima si worong ta hai ames. Mwe si maɗufal ima fa Al i Maɗufal! Ma wa ɓin sus ɗat naɗin kan si alus kwa.”

25Unai Judas ima ma wa cwai ti kwinik i Yesoi ni, “A hun ayin waak, a makofiti?”

Yeso ni, “Hei, a ha.” 26Sin ɗiri cwai ti cwa ndai, Yeso zan folok, palang ɗak nggyal fa fe i ro ames, ni, “Mat hun hu cu, mai a lo' amen.”

27Ɗak zan cunjoi palang, fas ni, “Wo hun ta cunjoi wi, shak asui. 28A wash amen i dakwa, ima si shuya ɓurti ɗufal shak, ɓa si shus mafwashi ya. 29I laksu, i wa muhum woti ham i manggɓu' kwa, nasi mwashi, na myan ima kaitat i Deen yes tawe, ɗak i wo akul hu hun.”

30Takfai tima si lak ador, si lang ya wa ta Anggash ti Yitat i Mbar.

Yeso Lak Ɓwinggil ima Pita ma wa Masi

31Yeso lakus ni, “Shak asui hu wa fwaran ti fo' moti, ɓurti si worong nyai,

“ ‘I wa pati maɗing ti tutwai,

tutwayi si wa matɓasan.’#26:31 Ɗing huni hwak: Zak 13:7.

32“Myan ima i luk fit ta fiyai, i yu wa mutong ta Galili.”

33Pita matussi ni, “Na si fur shak ɓursa, yin i wa mufur kwa.”

34Yeso ni, “I laksa mwawei, ti fo' amoti, ha wa ɓwinggil i shangsun sa ataat, ɗak korong tutol.”

35Pita matussi ni, “Na yin wa mot akul hu ha, i mot kek, i wa ɓwinggil i shangsa kwa.” Anggum i fe i roi shak si lak ɗama andek.

Fwal i Yeso ta Gatsemani

36Unai Yeso wa akul hu fe i ro ames ta kyel ima si lai ii Gatsemani, ɗak lakus ni, “Tehun nanati, yin i ɗuya tasi haiyi te', ɓa i fwal DeeƁwe.” 37Zan Pita hu fe i Zebedi apilal, Jemis hu Jwon akul hu yis, ɗak hya ti mbai tirim hu kikyauwat na ɗar. 38Ɗak nyus, “I hal ti tirim fwet na mulut amen fota ɓa i motun, tehun akul hu yin nati, hu te ti shingat.”

39Her ta wei vaat, shu i mafwaran ta fisha cu wei ti fwal ti DeeƁwe ni, “A Dee, naɗin ɓweti a wisi, naɗin ha zanun cunjo ti shum moti ya, a ɓweti amen kwa, a ama.”

40Ɗak hum kyel ta kyel i fe i ro ames wisus sin yus raki. Lul ta Pita ni, “Hu ndok hu ɗing kyel akul hu yin kwa haa? 41Tehun ti shingat hu fwal DeeƁwe, ka hu fur ta amba wi. Rin ma ɓweti, lo' nggwes.”

42Humkyel hum fwal mapil ni, “A Dee, na ma wa mas ɓa cunjo moti ti langun hai kwa, na a kpak ɓa i wo, ɓa aɗeng ima ha ɓweti u te andi.”

43Myan ima humkyel, wisus sin ɗarak, ɓurti arak ka'us fwet. 44Hum honsus takyeli wa fwal mataat hwak, yis lak ti ɗama mandeki.

45Unai humkyel ta kyel i fe i roi lakus ni, “Huma hai raki ta lafosi haa? Ɗing huni, myan si ru na nggas, si wa fati Al i Maɗufal ta ra i som i masti mafwashi. 46Luk hun fit kawa! Ma cwai ti kwiniki ma yes!”

Si Ka' Yeso

47Myani yis ɗiri findel, Judas andek ta saa ti hure mulang apili, pwakus hai. Male' suɓut i ɗufal ima si ti ɗam i ɓwol, hu awal, hu yalal. A mbayai i kocokak hu som kofiti si anggut hai, hu mbayai i ashwa si rohus. 48Mwashi, ma cwai ti kwiniki si ɗak ti ngga' ima si wa masi si ka'us ta. “Ima i wa a to'us too' i myatat, a yis hu wa ka'i.” 49Fo abet ti wa ames ta kyel i Yeso, Judas ni, “I to'a a makofiti!” Ɗak furus hai.

50Yeso matussi ni, “A mwen, masa aɗeng ima ha yes masi.”

Unai ɗufali si her ta wei, si ka' Yeso, si kpukpongus. 51Ti andi, andek ta saa ti ima sima akul hu Yeso, ka' kwai asus, re' ya tel ti maro i makunggul i makocoki, fetus mwal ya.

52Yeso lakus ni, “Humuskyel ti awal ta fatal wi, ɓurti shak maɗufal ima re' awal ya, a awal ma wa forsus. 53Hu ɗingi na i lai Deen, ma wa ro ti som lu' ima si ɓin hure mulang apil na kyel amen kwani? 54Ɓurti andi, Worong ti wa hya atini, ima ni a kanggang ɗamam mii si fur na fisel mai ya?”

55Myan ani Yeso lak suɓut i ɗufali ni, “Yin a kpok i masher ani? A kpak hu yes ti awal ta yalali ɓa hu ka'un haa? Ngang i ma amun na Wur i DeeƁwe yin kofiti, hu ka'un kwa. 56Shak mai fur a ɓurti ɓa worong i mashit u hya.” Unai shak fe i ro ames si honus si titalus.

Yeso ta Wei i Tabwa'

57Som ima si ka' Yeso si watus ta wur i Kayafas, mbai i makocok, ta kyel ima som kofiti si anggut hai hu tabwa' si suɓut ta. 58Pita yis koltifai asussi ta maleng, wa ta taya i mbai i makocok. Te amun ta kyel i maɗing ti kyel ɓa u ɗing aɗeng ima ma wa.

59Mbai i kocokaki hu som Sanhedirin shak si far ti fyarat ta si Yeso hai, ɓurti ɓa si forus, 60si wisi kwa. Shini som i fyarati hyang si yes.

Ta dala som apil si yes. 61Si ni, “Mai ni, ‘I ndok i nggul Wur i DeeƁwe mai ya, i ta' ta saati mukon ataat.’ ”

62Unai makunggul i makocok luk fit lak Yeso ni, “Ha wa mati kwa? Anggi findeli mai ɗufal mii si laki na hai ya ti ya?” 63Yeso tes cakat.

Unai makunggul i makocoki lakus ni, “I ma laksa, saati asum i DeeƁwe mapweti, laka nin nyai ha a Kristi, Al i DeeƁwe.”

64Yeso matussi ni, “Hei, fota ngga' ima ha lak ta. I ma laksu shak, myan ma yes hu wa ɗing ti Al i Maɗufal yis amun ta ra i ucwa i Mambaitat, yis yes ta ri' i fit.”

65Unai makunggul i kocoki gwyak arom ames ya ɗak ni, “Lak findel ale'! Ami kin ka far ti shini ɓa si findel hwak ya? Ɗing huni, mwashi hu hal findel i ale' ima lak, 66hu ɗingi atini ya?”

Si mati si ni, “A kiga' ɓa u mot.”

67Unai si tufus lyau hai ta shishat, si saramus ti cwereng. Shini si pas ta kapak, 68ɗak si ni, “Laka nin findel i som i shit, ha Kristi, awe pa ya?”

Pita Ɓwinggil Yeso

69Pita yis amun ta taya, unai yamwan muro ta wuri ti yes ta kyel ames, ti nyus, “Ha ma akul hu Yeso i Galili.”

70Ɓwinggil ta wei ames shak, lak ni, “I shang aɗeng ima hu laki kwa.”

71Unai wa ta fo i kwap, yamwan nin ti hum ɗingsus, ti lak som ima sita kyeli tini, “Maɗufal mai ma akul hu Yeso i Nazaret.”

72Hum ɓwinggil, ta shiɗati ni, “I shang maɗufal mai kwa!”

73Takfai ti myan ndyong, sin ima sima mangrai ta kyeli si yes kyel i Pita si ni, “A awei, ha andek ta saa yusti, ɓurti findel ama kof andi.”

74Unai Pita lang shiɗat yis nyai, “I shang maɗufal mai kwa fweng!” Fo abet korong tutol. 75Unai Pita mbe' findel ima Yeso lak nyai, “Ha wa ɓwinggil si yin hai sa ataat ɗak korong tutol.” Unai lang ya ta saikyel kawa sisya'.

Currently Selected:

Matyu 26: AlisIRonNT

Highlight

Copy