Matyu 25
25
Kaani si Afwar Hure
1“Tasi myan ani, kaitat i kyel fit ma wa mute fota afwar hure ima si har bal-bal ames, si lang ya ɓa si shwai hu zalang makunggo. 2Hara ta saa yusti a halyang, hara a som shingat. 3Halyangi si har bal-balal ames kaciwa' mbar nin ta ra. 4Ima si shangati, si har shigiraha i mbar ames ta ra, ta bal-balal amesi. 5Zalang makunggoi yes kaang kwa, shak asussi si ka' shingit ti arak, si wa si rak.
6“Ti sarang i fo' swel ti kawa, ‘Zalang makunggoi mai! Rang hun ya hu shwaiyus!’
7“Unai shak afwari si ɓusho, si ɗak ti bal-balal ames ta. 8Halyangi si lak ima si shingati, si ni, ‘Fahun nin mbar amu ta, bal-balal aminin si yus mufot.’
9“Si matussi si ni, ‘Wayou, ma wa ndok sinin ta hun yi hwak kwa. Naɗin hu wa ta kyel i som ima si juwili ya hu juwil amu.’
10“Si te wa pwak ti mbar amesi, zalang makunggoi ru. Afwar ima si sinzam ɗyus, si lang ta kyel i kunggoi akul hu zalangi. Ɗak si vo fo i mahomi ya.
11“Ta takfai halyangi si yes hwak. Sin nyai, ‘A Deembai! A Deembai!’
12“Unai matussi ni, ‘I ma laksu mwawei, i shangu kwa.’
13“Ɓurti andi, tehun ti shingat, ɓurti hu shang mwen hu myan kwa.
Kaani si Aɗeng i Masi
14“Kaitat i kyel fit ma fota maɗufal ima ma wa huni, ɗak lai som i ro ames kaarus sufat ames, ɓurti kinti mulut si sin hai. 15Fa andek kukwal i cef hara, fa andek kukwal apil, fa andek kukwal andek, shak asussi fas kiga' hu njeng ames. Ɗak wis ɗa'at ames. 16Maɗufal ima mat kukwal hara ani, mas woor ti ames, wis hara i hai. 17A andi hwak, maɗufal ima mat kukwal apil, wis apil i hai. 18Maɗufal ima mat kukwal andek, wa yong kyel lai cef i mawur ames ya ta.
19“Takfai tima ka yash ya, mawur i som roi humkyel ta huni, unai si te amun ɓa si mas ambe' tikul hu sin. 20Maɗufal ima mat kukwal harai yes ti hara ii hai nyus, ‘A Dee, ha fan kukwal hara, i wis hara i hai.’
21“Unai mawur amesi nyus, ‘Awindee, a ha a maro maɗesi! Ha hya aɗeng ima i ni ɓa masi. Ha mas mwawei si ɗama mandyongi, i wa kinsa si mahyangi hai. Ya ha jakak akul hu mawur ama!’ 22Maɗufal ima mat apil yes nyus, ‘A Dee, ha fan kukwal apil, i wis apil i hai.’
23“Unai mawur amesi nyus, ‘Awindee, a ha a maro maɗesi! Ha hya aɗeng ima i ni ɓa ha masi. Ha mas mwawei si ɗama mandyongi, i wa kinsa si mahyangi hai. Ya ha jakak akul hu mawur ama!’
24“Unai maɗufal ima mat kukwal andek yes nyus, ‘A Dee, i shangi ha a maɗufal manjengi, ha karaat ta kyel ima wa' ha lai, ha suɓwat ta kyel ima wa' ha but ta. 25Ɓurti andi i mwen, i lang ya i wa i lai kukwal tima ha fan ya ta ta'wi. Aɗeng ima mii ama mai.’
26“Mawur ames matussi ni, ‘Ha ma gbaf, hu njwang i maro! Ha shangi yin i karaat ta kyel ima wa' i lai, i suɓwat ta kyel ima wa' i but ta. 27Ami kin ha wa ha kinun cef ta bangki, kyel ima na i humkyel i mat ta hami kwa ya?
28“ ‘Mat hun kukwal ya ta kyel ames hu fa maɗufal ima mati hure ani. 29Ɓurti shak maɗufal ima mati, ayis si faiyus i hai, ɓa u kol hyang. Maɗufal ima mati kwa, si mat ali ima mati ya ta kyel ames. 30Hwi hun ti maɗufal i gbya' mai ta saikyel, ta maɓing makyawi wi, ta kyel ima si wa kawa sin nggwaran ti anggurai ya ta.’
Tutwi hu Shiken
31“Myan ima Al i maɗufal ma wa yes ta saa ti mbaitat ames, shak som lu' sin akul hu yis, ma wa mute si kunggul ti kaitat asus tasi cinjangat ames i kyel ta fit. 32Shak Ramam ti wa suɓut ta mabel ames, ɗak ɓel ɗufal ya ti andek-andek, fota ngga' ima maɗing ti ɗam ma ɓyalan ti tutwai ya ta saa ti shikyan. 33Ma wa kinti tutwai ta ra i ucwa, u kin shikyan ta ra i ukutyal.
34“Ɗak Makai lak ima si ta ra i ucwa u ni, ‘Yehun, hun ima Deen kinu maɗesi, zan hun kop amu, kaitati tima ɓursu tasi bya' i naya. 35Ɓurti ai, hwem yit hansun, hu fan cwa. Myaf yit hansun, hu fan ham i wo. I yes mwalmwat, hu kinun ta ɗom. 36Yin ambwiriti, hu fan arom i ru'. Yin anggori, hu wa hu ɗingun. Yin ta mano', hu yes hu ɗingun.’
37“Ɗak som munderei si wa mati si ni, ‘A Deembai, ni ɗinga ha halti hwem a tami ni fa cwa, ahun ni ɗinga hati myaf a tami ni fa ham ha wo ya? 38Ha yes mwalmwat a tami ni kina ta ɗom, ahun ambwiriti a tami ni fa arom ya? 39Ni ɗinga anggori a tami, ahun ha mano' a tami ni wa ni ɗinga ya?’
40“Makai ma wa mati u ni, ‘I ma laksu mwawei, shak aɗeng ima hu mas andek mavaati ta saa ti shunun, hu masun ayini.’
41“Ma wa lak ti ima si ta ra i ukutyal u ni, ‘Hun wa nanati, hun ima si kinu ra hai, ta wi man i myan hu myan ima si masi ɓurti Shatan hu som lu' ames. 42Ɓurti ai, hwem yit hansun, hu fan cwa kwa. Myaf yit hansun, hu fan ham i wo kwa. 43I yes mwalmwat, hu kinun ta ɗom kwa, Yin ambwiriti, hu fan arom i ru' kwa. Yin anggori, Yin ta mano' wi hwak, hu yes hu ɗingun kwa.’
44“Sin hwak si wa mat ti si ni, ‘A Deembai, ni ɗinga a tami ti hwem, ahun myaf, ahun ha yes mwalmwat, ahun ambwiriti, ahun anggori, ahun ta mano' wi, ni buma kwa ya?’
45“Ma wa mati u ni, ‘I ma laksus mwawei, shak aɗeng ima hu mas andek mavaatii ta saa ti mii kwa, hu masun ayini kwa.’
46“Unai si wa ta shum i myan hu myan, ɗak som munderei si wa ta mupwet i myan hu myan.”
Currently Selected:
Matyu 25: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
