Matyu 24

Ɗamam ima Si Wa Matkof Myan i Dala

1Yeso hon Wur i DeeƁwe yis yus wa, myan ima fe i ro ames si ɗuya si wisus ɓa si kofus ti ta'a' i Wur i DeeƁwe. 2Lulus ni, “Hu ɗing shak ɗamam mii haa? I ma laksu mwawei, si wa honti afung nin si tusut hai kwa, si wa ɓaasan ti ya shak.”

3Yeso wa te amun ta Anggash i Mbar, fe i roi si wisus i mufot, si ni, “Laka nin, a tami mii ɗamami si wa mufur ya? Ami ma wa kofi nyai, a myan i dala mai ya?”

4Yeso matussi ni, “Tehun ti shingat, ka ɗeng dangu kwa. 5Ɗufal hyang si wa yes ti asum amen sin nyai, ‘Ayin a Kristi,’ si wa dang ti ɗufal hyang. 6Hu wa hal ti mangga' i ɓin hu ndurum i ɓin, shak ta andi, ka hu mwen kwa. Ɗamam mii a kanggang si fur, shak ta andi, dalai ti ti yes kwa tawe. 7Ɓin ma wa mulang si ta' hu ta' hai, kaitat hu kaitat. Si wa masti hwem hu aro i ta' ti kikyali hyang. 8Shak mii a mahalal i shum.

9“Si wa kinsu ta ra i som ima si tu wa munggwya, si foru ya hwak, hu shak ɗufal si wa ɗingsu shit ɓursun. 10Ta myan ani, hyang si wa hatat ta si kinti mulut wi, si te i som cwai ti han si nggwes ti ɗiyai, 11som i shit i fyarat hyang si wa mupwak ya, si dang ɗufal hyang. 12Ɓurti ngye i mafwashi, matɓwet i ɗufal hyang ma wa tiɗya, 13maɗufal ima te mangra gbwenjeng wa dala ma wa mupwet. 14Muro Maɗesi i kaitat mai, si wa mbai ta Ramam i naya shak, ɓa u te ii shit wa kyel shak ɗufal, ɗak dala yes.

15“Myan ima hu ɗingi ‘Sin masti ɗama i zuruk ima kwal rafati ya’#24:15 Ɗing huni hwak: Dan 9:27; Dan 11:31; Dan 12:11. ta kyel masapai, ima Dangyel mashit lak, (ɓa ma ambe'i u shangi), 16ɗufal ima si mata Judya si pak wa ɗanggash. 17Maɗufal ima mata si hai i wur ames hai ka ɗorkyel ɓa u zan ɗama ta wii wuri kwa. 18Ka ɗeng ima mata ya ni ɓa u zan mogo ames kwa. 19Myan mii shum ma wa ɗat ɗingi si arof ima si ti harai hu ima si fati fe fof kwa! 20Fwal hun kan tital amu fur ta si myan i humbil kwa, na andi kwa myan i lafos i Judas kwa. 21Myan ani, shum mavweleleli ima si wa kaani hu nin kwa, ta si tongi i naya yes mwashi, si wa muhum kaani ti nin kwa hwak. 22Naɗin lef myani ya kat ndyong kwa, naɗin ɗeng u pwet kwa, ɓurti som ima si ben ayis nai kin myani te ndyong.

23“Tasi myan ani na ɗeng nyu, ‘Ɗing huni, Kristi mai!’ Ahun si ni, ‘Unai ta te'!’ Ka hu fa mwawei kwa. 24Kristi i fyarat hu som i shit i fyarat hyang, si wa mupwak ya, si wa masti mbayai i ɗamam i lum ti fo ya hu ɗamam i shok na fo, ɓa si dang ɗufal ima DeeƁwe ben, na yis wa mas. 25Ɗing huni, i laku a ci tuu fur.

26“Ɓurti andi na ɗeng nyu, ‘Unai ta ya,’ ka hu wa kwa, ahun na si ni, ‘Ɗing huni u mai na ɗom,’ ka hu fa mwawei kwa. 27Na kyel ti nzilwit na ɓwai yai si wa ɗingi ta ɓwai wur, andi yes i Al i Maɗufal ma wa mute ta. 28Kyel ima funat mata a kyeli vokshik wai ta.

29“Fo abet takfai ti shum makwiyi i myan mai,

“ ‘Ɓwe ti wa fati maɓing,

ture ma wa fati kweneng kwa,

ɓyar si wa ndakan ta fit,

ɗamam ima si ta fit si wa muro.’#24:29 Ɗing huni hwak: Ish 13:10; Ish 34:4.

30“Tasi myan ani, si wa ɗing ti ɗama ima ma kofti yes i Al i Maɗufal ta ri' wi, shak Ramam i naya si wa kawa ɓurti myanat. Si wa ɗing ti Al i Maɗufal yis yes ta ri' wii ta fit, ti andok mbai, hu cinjangat. 31Ma wa ro ti som lu' ames si fu' ngyef ti la mbai, si suɓut ɗufal ima si ben ta nggwaha i naya shak.

32“Mwashi, wis hun shangi mai tasi yit ti makambong. Na ti ɓak ra, ti sa mwal mumwai, hu shangi fu ti kat ndyong ndai. 33Andi hwak, na hu ɗing shak ɗamam mii, hu shangi mana nggas ti fo i mahom. 34I ma laksu mwawei, myan mai ma wa mulang ta kwa, na ɗamam mii si fur tawe. 35Fit hu fisha si wa mumbit, findelal amen si wa mumbit kwa fweng.

Ɗeng Shang Mweni hu Myani Kwa

36“Ɗeng shang mweni hu myani kwa. Som lu' i kyel ta fit hu Al i DeeƁwe shak si shang myani kwa. A Deehi je shangi. 37Fota ngga' ima ai yis ta, tasi myan i Nowa, angga'i nai ma wa mufur ta si myan i yes i Al i Maɗufal. 38Ɓurti ta myan ima ham ti fyal naya ya, ɗufal sin cwai sin woi, sin kunggo sin kunggoi ya, wa mwen tima Nowa lang ta kwang i ham wi. 39Si shang aɗeng ima ma mufur kwa, ham yes lang fyalsus ya shak tawe. Angga' ima ma wa mufur ta nai myan ima Al i Maɗufal ma wa mupwak ya. 40Ɗufal apil si wa mute ro ta yang, si wa zan ti andek ya si hon andek ta. 41Arof apil si wa mute nuk, si wa zan ti andek ya si hon andek ta.

42“Ɓurti andi, tehun ti shingat, ɓurti hu shang mwen tima Deembai amu ma wa yes kwa. 43Shang hun mai, naɗin mawur shang myan ima asher ma wa yes saa ti fo', nan u te ti shingat u hon si yes si mbukus fo i kwap ya kwa. 44Hu te mweret, ɓurti Al i maɗufal ma wa yes ta si myan ima wa' hu kinɓwi ma wa yes.

45“Ma hya ti findel, a yis mii yere mashingat ima mawur ames ma wa honsus wur ames ta ra, u fwang shak ta yarai i wuri ɓa u fas cwa tasi myan hai. 46Maɗesi mata si yere ima mawur ames ma wa yes u wisus yis masti ro ames. 47I ma laksu mwawei, ma wa kinsus u te ii mbai maɗingsus ɗam i kyel ta wuri shak. 48Na maroi a mafwashi i maɗufal, ma wa lak ti haisus u ni, ‘Maɓwai amen wis ɗa'at ti maleng ma wa muhumkyel kaang kwa,’ 49ɗak cu wei ti ndash ti shunus som i roi, u cu wei ti cwai ta woiyi hu som i woti likit. 50Mawur i maro ani ma wa muhumkyel tasi mwen ima wa' kinɓwi ma wa muhumkyel hu myan tima wa' shangi. 51Mawuri ma wa masus andash mafwashi, u kinus ta kyel ima sukwai si ta, ta kyel ima si wa kawa sin nggwaran ti anggurai.

Currently Selected:

Matyu 24: AlisIRonNT

Highlight

Copy