Matyu 23

Mwe sa Pyoron

1Unai Yeso lak suɓuti hu fe i ro ames ni, 2“Som i kofiti si anggut hai hu Farisiyawa si te amun si kunggul ti Mosis hai. 3Ɓurti andi, a kpang hu mas shak aɗeng ima si ni ɓa hu masi. Ka hu mas aɗeng ima si masi kwa, ɓurti si hya aɗeng ima si laki kwa. 4Si no' ɗam manggahi si kin ɗufali ta la, sin ti haisus si fwangussi ta ti foti ra kwa.

5“Shak aɗeng ima si masi, si masi ɓa ɗufal si ɗingus. Si no' mbayai i ɗamam ta ɓosas si shu mbayai faginan ta jikoti yis kwetleng. 6Si ɓwet kikyal i ngye ta kyel i got hu kikyal mbayai ta mareha. 7Si ɓweti ɓa si to'us ta matof hu ɓa ɗufal si laiyus ii ‘som kofiti.’

8“Ɗat ɓa si laiyu ii ‘som kofiti’ kwa, ɓurti hu mati Deembai andek hun shak a shunus i ɗiyai. 9Ka hu lai ɗeng na naya ii ‘dee’ kwa, ɓurti hu mati dee andek je, mat ta fit. 10Kan si laiyu ii ‘som kofiti’ kwa, ɓurti hu mati makofiti andek, a Kristi. 11Ma mbai ta saa yuti ma wa mute ii yere. 12Ɓurti shak maɗufal ima fa haisus ngye si wa komsus ya, maɗufal ima kom haisus ya, si wa fasus ngye.

13“Mwe asui, som kofiti si anggut hai hu Farisiyawa, hun som i rere! Hu vo fo i mahom i kaitat i kyel fit ya ta wei i ɗufal. Hun ti haisu hu lang ta kwa, hu hon som i ɓweti mulang ta, ɓa si lang ta kwa.#23:13 Shini kaadahai si ti wa. 14 Mwe asui, som kofiti si anggut hai hu Farisiyawa, hun som i rere! Hu nggar wurai i arof gorai ɓa hu kof haisu hun masti fwal masyai. Ɓurti andi hu wa mati andash mavweleleli.

15“Mwe asui, som kofiti si anggut hai hu Farisiyawa, hun som i rere! Hu ati ti ta'a'i hu yiir ɓa hu wis som ima si wa mute fota hun, myan ima hu wis andek, hu hatus sa apil, ii al i man fota hun.

16“Mwe asui, som i zul ti manzyauwau nzong, ima hun a manzyauwau hwak! Hu nyai, ‘Na ɗeng shiɗat ti Wur i DeeƁwe, a ɗama kwa, ɗak na ɗeng shiɗat ti ugbwirik mujuwi ti Wur i DeeƁwe, ma wa masti aɗeng ima shiɗat ni ma wa masi.’

17“Hun halyang i manzyauwau! Anggi mii mbai ya, a ugbwirik mujuwi, ahun a Wur i DeeƁwe ima kin ugbwirik mujuwi si te ti sapa ya? 18Hu hum laki hwak nyai, ‘Na ɗeng shiɗat ti mbong, a ɗama kwa, ɗak na ɗeng shiɗat ti mal amet, ma wa masti aɗeng ima shiɗat ni ma wa masi.’ 19Hun manzyauwau! Anggi mii mbai ya, a mal ahun a mbong ima kin mali te ti sapa ya? 20Ɓurti andi, yis ima shiɗat ti mbong, shiɗat ti shak aɗeng ima mii hai. 21Hu yis ima shiɗat ti Wur i DeeƁwe, shiɗat si yis ima mii hai, 22hu yis ima shiɗat ti fit, shiɗat ti kunggul i mute i DeeƁwe, hu yis ima ma amun i hai.

23“Mwe asui, som kofiti si anggut hai hu Farisiyawa, hun som i rere! Hu fai andek ta saa ti hure i ɗamam muyayi, ima si shwayani ta cwa wi. Shak ta andi, hu nggyu i masti ɗamam ima si ɓin ɗat i anggut, fota mwawei, gu'ti ashur, hu hya ti findel. Ɗat ames a hya ti mbayaiyi, kaciwa' honti ɓwayi nin. 24Hun som i zul ti nzong, manzyauwau shini! Hu ngga kunggwyash ya, ɗak hu ɗul rukumi.

25“Mwe asui, som kofiti si anggut hai hu Farisiyawa, hun som i rere! Hu sahan ti fai i cunjo hu ɓeleng ya, ɗak wiiyi hyas ti yok hu ɓweti hai. 26A Farisiyawa manzyauwau! Na hu sa wi i cunjo hu ɓeleng ya tawe, ɗak takfaiyi cinjangya.

27“Mwe asui, som kofiti si anggut hai hu Farisiyawa, hun som i rere! Hu ma fota fiyayai ima si fyalus ya ti haf, te ii maɗesi na saikyel ɗak wiiyi hyas ti kyasas i funatat, hu shak ɗamam i zuruk. 28Andi hwak, na saikyel hu te fota ɗufal ima si ti mwawei, ɗak ta wi hyas ti rere hu ambe mafwashi.

29“Mwe asui, som kofiti si anggut hai, hun Farisiyawa, hun som i rere! Hu ɗakan ti fiyai ta ndere ɓurti som i shit, hu shu ɗam i malem ta si fiyai i som i mwawei. 30Hu nyaiyan, ‘Na ai nin na myan i hu deemukan i ɓele, na ai ni wisus ti, ni fwar som i shit ya kwa.’ 31Mwashi hu lak ti fo amu nyai, hun a fe i som ima si fwar som i shit ya. 32Cuhun wei ti masti aɗeng ima kaya amu i ɓele si masi!

33“Hun ɗamafwashi! Hun suɓut i sukwai i ɗamafwashi! Hu wa masi atini hu pwet ta wur i man ya? 34Ɓurti andi, i wa ro ti som i shit na kyel amu, hu som i shingat, hu som kofiti. Hu wa for ti shini, hu nggwak shini ta si shanggam hai, hu ndash shini ta mare amu, hu ngga shini ta ashwa wa ashwa. 35Ɓurti andi, shak wash i ɗufal munderei ima si shuya na naya, tasi wash Ebel maɗufal manderei yes wash i Zakarya al i Berikya, ima hu fwar ta saa ti Wur i DeeƁwe hu kyel tor ti kuna.

36“I ma laksu mwawei, shak mai ma wa mufur na myan mai.

37“Woro a Yerushalima, Yerushalima! Shish tima shi for som i shit hu hwyai som ima si ros na kyel amu ti afyai! A sa awen yin ɓweti ɓa i suɓutu na fiɗya' amen fota ngga' ima shukor ti suɓwat fe amet ta kurya amet wi ya? Shak ta andi hu nggyu. 38Ɗing huni, wurai amu katus kyot kaciwa' ɗeng. 39Ɓurti andi i ma laksu, hu wa muhum ɗingsun kwa, na huni, ‘Disyo' si maɗufal ima yes ti asum i Deembai tawe.’#23:39 Ɗing huni hwak: Nak 118:26.”

Currently Selected:

Matyu 23: AlisIRonNT

Highlight

Copy