Matyu 22

Kaani Si Got i Kunggo

1Yeso hum lak ti kaani nin nyai, 2“Kaitat i kyel fit ma fota makai nin, ima mati got i kunggo ii al ames. 3Ro yarai ames wa kyel ɗufal ima laiyus wa kunggoi ɓa si yes. Ta takfai, si nggwes i yes.

4“Unai hum ro ti shini yaraiyi hwak i hai ni, ‘Lak hun som ima i laiyus kunggoi nyai, cwa nung, si lyaf mbayai i randwang ima si ngye fwet. Got nung ɗamam si hya nggya-nggya mwashi. Yehun gotti kwani.’

5“Si mu'usi kwa fweng, si wis ti andek-andek, shini si wis yangang ames, shini kyel woor ames. 6Si ka' som i roi si ndash si fwarus ya.

7“Unai makai mas futut fwet. Ro som ɓwol ames si wa si fwar ti ɗufal ani ya, si ngyesh ashwa ames ya.

8“Unai lak som i ro amesi ni, ‘Gotti nung, som ima i laiyusi ɗat ɓa si yes kwa. 9Lang hun ta ashwa, hu lai shak maɗufal ima hu wisus.’ 10Unai som i roi si lang ta ashwai, si suɓut ɗufal ima si wisi, muɗesani ta mufwashani, ahom i gotti hya ti mwalmwat.

11“Myan ima makai yes ɓa u ɗing mwalmwat, ɗing maɗufal nin ta, ima wa' ru' arom i gotti. 12Unai lulus ni, ‘A mwen, ha mas atini ha yes nati kaciwa' ru' ti arom i gotti ya?’ Maɗufali far aɗeng i sheni wet.

13“Unai makaiyi lak som i ɗing ti ɗufali ni, ‘No' hu yus ra ta sisaiyi, hu hwiti ta saikyel, ta maɓing wi, ta kyel i kawa hu nggwaran ti anggurai.’

14“Ɓurti si lai hyang, si ben ndyong.”

Tal Ti Cef i Wufen wa Kyel i Makai

15Unai Farisiyawa si lak ngga' ima ɓa si ka' Yeso ta, ti findel ames. 16Si ro fe i ro ames akul hu ɗufal i Herod, si ni, “A makofiti, ni shangi a ha a maɗufal ma mwawei, ha ma kofti findel i DeeƁwe saa ti mwawei. Ha mu' findelal ima shini si laki kwa, ɓurti ha a ma ɓweti hai ta kyel i ɗufal kwa. 17Ɓurti andi, laka nin ambe' ama, a kiga' ni tal cef i wufen ta kyel i Makai a hun awet ya?”

18Yeso shang ambe' ames a mafwashi, unai ni, “Hun sukwai, ami kin hu ma mbasun ya? 19Kof hun na cef ima huti talan ti cef i wufeni.” Unai si kolus dinari. 20Unai lulus ni, “A mashilim i we mii hai ya? A asum i we mii hai ya?”

21Si matussi si ni, “Ii Makai, unai ni, ɓu hu fa Makai aɗeng ima mii Makai, hu fa DeeƁwe aɗeng ima mii DeeƁwe.”

22Myan ima si hal mai, si shok na fwai. Ɗak si honus ta kyeli si wis.

Lul Ta Si Muluk Fit ta Fiyai

23Ta si mwen mwandeki, Sadukiyawa ima si ni muluk fit ta fiyai mana kwa, si yes ti lul ta kyel i Yeso. 24Si ni, “A makofiti, Mosis lak nin ni, na maɗufal mot kaciwa' fe, a kanggang nusus u kunggo mbori ɓa si al nusus fe. 25Mwashi, shunus aminin shini pyoron si na saa nin ti. I bya'i mas kunggo ɗak motus, ɓurti mati fe kwa, hon mbori ta kyel i nusus. 26Nususi hwak motus, andi hwak mataati, wa sima pyoroni hai shak si mwatus. 27Ta dala, mbori ti motut. 28Mwen ti muluk fit, mbori ti wa mute a ti we ta saa ti ɗufal ani ya? Ɓurti si kunggot shak asussi.”

29Yeso matussi ni, “Mafwashi a yis nai, hu shang Worong, ahun a andok i DeeƁwe kwa. 30Mwen ti mulut fit, si wa masti kunggo, ahun si wa kunggoi ya kwa, si wa mute fota som lu' i DeeƁwe ta fit. 31Mangga' i muluk fit ta fiyai, hu mbe' aɗeng ima DeeƁwe laku ni, 32‘Ayin a DeeƁwe i Ibirai, DeeƁwe i Aizik, DeeƁwe i Jakop.’#22:32 Ɗing huni hwak: Mul 3:6. Yis a DeeƁwe i som mupweti, ii som ima si mwat kwa.”

33Myan ima suɓut i ɗufal si hal mai, si shok na fwai ti kofiti ames.

Anggut Mambai

34Myan ima Farisiyawa si hal Sadukiyawa si kat ti ɗama i sheni kwa, unai si suɓut ta kyel andek. 35Andek ta saa yusti ima shang anggut ndere, mbas ti lul moti ni,

36“A makofiti, anggi findeli ti mii ndi ta saa ti anggut ya?” 37Yeso matussi ni, “ ‘Ɓweta Deembai hu DeeƁwe ama ti shak mulut ama, hu shak mupwet ama, hu shak ambe' ama.’#22:37 Ɗing huni hwak: Muh 6:5. 38A mai mii bya' hu mbai i findel. 39Mapil ma fota yis, ‘Ɓweta nusa ima hu mute tikul fota hai sa.’#22:39 Ɗing huni hwak: Koc 19:18. 40Shak anggut hu kofiti i som i shit, sima nasi findelal apilal mii.”

Kristi a Al i We Ya

41Myan ima Farisiyawa si suɓut ta kyel andek, Yeso lulus lul ni, 42“Hu mbe'i atini ta si Kristi ya? A al i we ya?”

Si matussi nyai, “A al i Devid.”

43Unai matussi ni, “Ami kin Devid findel ti andok i Rin, lai Kristi ii ‘Deembai’ ya? Ɓurti Devid ni,

44“ ‘Deembai lak Deembai amen ni,

“Teha amun na ra i ucwa amen,

na i mbit kinti som ima si zansa ti wei

ta mabel ama tawe.” ’#22:44 Ɗing huni hwak: Nak 110:1.

45Na Devid laiyus ii ‘Deembai,’ atini u te ii al ames hwak ya?” 46Ɗeng hum matsus findeli kwa, tamwen andi wa wei ɗeng hum wis ti njeng i lulsus ɗama kwa.

Currently Selected:

Matyu 22: AlisIRonNT

Highlight

Copy