Mateo 26

Tuune diidza nakxh lazëëne Jesús

(Mr 14:1-2; Lc 22:1-2; Jn 11:45-53)

1Kati Jesús buudx pseed'de leke yugute' le ni, gudxe bënni useed kie':

2—Ka chi nëëzi'kz'li, ye chop dza'z ryaadzji ki gdxin lni ki Pascua, ati le Xi'ine Bënni uludëëde le' lu naa'ke bunach naar luda'ke le' lu yaag kruuz.

3La dza niiz, bënni tunabe'i'de pxuuz len bënni guul tuzeajni'i'de bënni Judea guludzaage lu yulau'i kie' Caifás, bënni pxuuz blou, 4len tazu'tabë'e nakxh luune lazi'ye'i'de Jesús naar lazëëne Le' ati ludëëd'de Le'. 5San tanáke:

—Ti sën'ru'ne tzal yu lni ni, naar ku lakua'ke ruzbë' bunach'a.

Tuunu nguul rlaalj'nu'ne le rla' xhixh Jesús

(Mr 14:3-9; Jn 12:1-8)

6Jesús zue' yëdz Betania, liidxe Simón, bënni'a gui'i'de we' nuudzu; 7na' gbiiga'nu ga ze' tuunu nguul nua'nu tu rë'ë giaj le yuudz le rla' xhixh le zaki'i'tzki. Tzal Jesús rë'e ga ta'we, leenu blaalj'nu ikje lea rla' xhixh. 8Kati bënni useed kie' gulale'i'de le guk, guladza'a'tzka'ke ati tanáke:

—¿Bixhkia' ben'ditji'nu ley? 9Gula'l to'u le ni ati lunne ki zxhëni dumi, naar gun gak'leen'ru'ne bënni yechi.

10Jesús byëën'de le ni ati gne':

—¿Bixhkia' rtza'a'li ikj'nu nguul ni? Lea ben'nu kia' nak le dxia'a. 11Koma bënni yechi ulakua'tekze ladj'li, san neda ti sua'leen'tekza lbi'ili. 12Le ben'nu nguul ni, na'a glu'u'nu neda le rla' xhixh, nak bupa'a'nu kia' nakati jga'cha'a. 13Blikz'da kati rnia' ki gdu gabi'i yëdz'lyu ga lagixhjë'ke diidza kub dxia'a, lekz'ka' lagixhjë'ke le ben'nu nguul ni, ati ka' tzajnei'kde'nu.

Judas rdëëde Jesús lu ne'e bunach

(Mr 14:10-11; Lc 22:3-6)

14Tue' kieke chin'nu'ke bënni useed kie' Jesús, bënni'a le' Judas Iscariote, yajyue bënni tunabe'i'de pxuuz 15ati gudxe leke:

—¿Gaka gun'li kia' na' gdëëda'ne Jesús lu naa'li?

Leke gulagiixhj'ke le' chi'urua' dumi plata. 16Na' gzulau'e rzu'rbë'e batxh gunn gdëëde Jesús lu naa'ke.

Xhtzë' kie' Xan'ru

(Mr 14:12-25; Lc 22:7-23; Jn 13:21-30; 1Co 11:23-26)

17Dza rgie'la' lni' ga ta'we yët'xhtiil le ti yu'u le rzaaxh ley, bënni useed kie' Jesús gulabiige'e ga ze' len gulunaab'de le':

—¿Gaxh re'en'du tzajpa'a'tu kiu' xhtzë' ki Pascua?

18Le' bubi'e diidza:

—Gultziaj la yëdz, liidxe bënni'a, len gultzajëëdxe: “Bënni Useed rne': Chi rdxin dza rala gatia', ati liidxu giida gagu'leen'ka'ne bënni useed kia' xhtzë' ki Pascua.” 19Bënni useed gluune ka gnabe'i'de leke Jesús len gulupa'a'ke xhtzë' ki Pascua.

20Kati chi za' ral, Jesús len chin'nu'ke bënni useed kie' rë'ke ga ta'we; 21ati tzal ta'we, Jesús gudxe leke:

—Blikz'da rnia', ki tuuli lbi'ili udëëd'li neda lu naa'ke bunach.

22Ben'yechi'tzka leke, len tu tu'ke gulunaabe:

—Xan, ¿Ku nak'tza neda?

23Jesús bubi'e diidza:

Tue' bënni rla'pe'e yët'xhtiil kie' ga rla'pa'a ley neda, le' gdëëde neda lu naa'ke bunach. 24Le' Xi'ine Bënni, chi nak ka rala gak kie', ka rna Diidza La'ay; san ¡bayechi nake bënni'a gdëëde le' lu naa'ke bunach! Wak'l kie' dxia'a nar'la ti gzua'kze yëdz'lyu.

25Na' Judas, bënni'a rdëëde Jesús lu naa'ke bunach, bnaab'de le':

—Bënni useed, ¿Ku nak'tza neda?

—Jesús bubi'e kie' diidza—Li' chi gnou'.

26Tzal ta'we, Jesús gde'le'e yët'xhtiil len gdëëd be'e yëla dexhken Dios, bxhuuxhje len bnëëdzje kieke bënni useed kie', gudxe leke:

—Gulsi ati gulgaagu, le ni nak xhpeela'a.

27Chi nak ka' gde'le'e xhiiga len gdëëd be'e yëla dexhken Dios, bdëëde ley kiegake ati gne':

—Yugute'li gulgia'aj le yuudz xhiiga ni, 28koma le ni nak xhchëëna len ley rxënalaadxi'li diidza kub dxia'a, rën le rlaalja ni'a kieeli naar si'li yëla rzi'xhën ki xhtu'la'li. 29San rea' lbi'ili ki tir gi'i'ja nup uva ni, nakati gdxin'r dza gi'i'ja nup uva kub len lbi'ili lu yëla rnabe' kie' Xuuza.

Jesús rgiixhje ki Pedro ti si'lu'ne'e ki numbe'e le'

(Mr 14:26-31; Lc 22:31-34; Jn 13:36-38)

30Gdëëd gulagu'u'ke ba Dios, yajake Gia'a ki Olivos. 31Ati Jesús gudxe leke:

—Nadzë' yugute'li nit'li yëla rajle' kieeli len neda. Ka rna' Diidza La'ay: “Udëëd'da'ne bënni'a run'chi'e'ba bëku'xhiila len bëku'xhiila'a ulas'laz'ba.” 32San kati neda ubaana lu yëla gut, yubl utzaaga lbi'ili Galilea.

33Pedro bubi'e diidza:

—Zala yugute'ke luka'ane Li' tuuzu, neda ti jka'ana Li' tuuzu.

34Jesús gudxe le':

—Blikz'da rnia' ki nadzë', kati zia'a këëdx'ba xi'in'druuz, tson lzu ti si'luno'u ki numbe'u neda.

35Pedro gne':

—Zala gun'tza bayuudx gat'leena li', ti gna ku si'luna'a ki numbe'a li'.

Len yugute'ke bënni useed kie' tuuz ka gulanake.

Jesús rui'leene diidza Dios

(Mr 14:32-42; Lc 22:39-46)

36Chi nak ka Jesús gyiije len bënni useed kie' tu latj ga nazi' lei' Getsemaní len gudxe leke:

—Ni gulki'i tzal tzaje'leena'ne diidza Dios.

37Len pche'e Pedro dzaage grop'te'ke bënni xi'ine Zebedeo, len gzulau'e rnëëz'de kuine bayechi len bui'i'ni'de. 38Ati gudxe leke:

—Rnëëzi'tzki'da kuina bayechi len chi rnëëz'da yëla gut kia'. Niiz guluga'an len ti gas'li.

39Chi nak ka Jesús gze'e ye lati, bzechu ikje lyu't len be'leene diidza Dios, rne': «Xuuza, xhki gunn, buslá neda ki yëla rzi'be' ni; san ti gak le ryaazlaadxa'a neda, gak le ryaazlaadxu'u li.»

40Chi nak ka' bëëje ga nakua'ke bënni useed kie', len bënni ni tas'ke, ati gudxe Pedro:

—¿Naru tikz'bi pxikji'li gna'leen'li neda yeel? 41Gulgui'laadxi len gulgui'leene diidza Dios, ku si'be'e lbi'ili bë' xëwi. Lbi'ili rzelaadxi'li gun'li le nak dxia'a san ti rxikji'li.

42Burop lzu bëëje len ka' be'leene diidza Dios: «Xan, xhki gunn, buslá neda ki yëla rsaka'zi' ni; san ti gak le ryaazlaadxa'a neda, gak le ryaazlaadxu'u li.»

43Kati bule'e, yubl budzëël'de bënni useed kie' tas'ke, koma chik'z rdzuudi lau'ke tzka rak chigas'ke. 44Pka'ane leke na', le bunn lzu bëëje len larakz diidza'a bui'leene Dios. 45Na' budxiine ga nakua'ke bënni useed kie' ati gudxe leke:

—¿Naru ni ras'li len ni ru'ueak'laadxi'li? Chi bdxin dza kati Xi'ine bënni ludëëde le' lu naa'ke bënni dula. 46Gultzas, gultza', chi za' ga'le'e bënni'a gdëëde neda lu naa'ke bunach.

Tazëëne Jesús

(Mr 14:43-50; Lc 22:47-53; Jn 18:2-11)

47Ni ze' rue'e diidza Jesús kati Judas bdxiine dzaage bunach zian bënni nua'ke yaag len gia'a tuchi. Nusë'la'ke leke bënni xan'ke pxuuz len bënni guul tuzeajni'i'de. 48Judas bënni'a rala gdëëde Jesús lu naa'ke chi nagixhji'de leke ka rala guune, «Bënni'a ga'wa'ne bxhidu, bënni'a sën'li'ne.» 49Lena'a gbiige'e ga ze' Jesús, ati gudxe le':

—¡Padiuxh, Bënni useed!

Ati gda'we Le' bxhidu. 50Jesús gudxe le':

—Bë'cha'a, ben le rala guunu.

Na' bënni ye la'ke'a gulabiige'e ga ze' Jesús len gulazëëne le'.

51Tzal'za tue' bënni ze'leene Jesús gliije tu gia'a tuchi len pchuuge naage bënni wendxin kie' bënni pxuuz blo'u. 52Jesús gudxe le':

—Bugu'u gia'tuchi'a xhlatji, koma bënni'a tadil'e len gia tuchi, larakz len gia'tuchi'a ludëëd'de leke. 53¡Naru ti nëëz'du ki gunn gatayui'da'ne Xuuza ati Le' ksë'le'e kia' zian gayua'ke gbaaz la'ay kie'? 54San ¿Nakxh gak tzajtzaag diidza le chi nayoj lu Gich La'ay ki ka' rala gak?

55Na'teez Jesús bnaab'de bunach'a:

Bixhkia' za'li nua'li gia'tuchi len yaag zdujxën'li neda, ka'kz ka naka bënni gban? Yugu dza chi gzua' rseed'da lbi'ili lu gdou' len ti gxën'kz'li neda. 56San yugute' le ni rak naar tzajtzaag le gulanake bënni glui'ke diidza ulaaz kie' Dios.

Na'teez yugute'ke bënni useed kie' guluka'ane le tuuze len gulaxhunj'ke.

Jesús rdxiine lau'i dxin'lau'i blou

(Mr 14:53-65; Lc 22:54-55,63-71; Jn 18:12-14,19-24)

57Bënni'a gulazëëne Jesús guluche'ke le' liidxe Caifás, bënni pxuuz blou, ga nudzaag'ke bënni useed xhba kie' Dios len bënni guul tuzeajni'i'de. 58Pedro gyaj'leene le' zitu zitu, len bdxin'tie' la'chi rayu'u ki liidxe pxuuz blo'u, gyaazie len grë'leene bënni'a tun'chi'ke gdou', naar gle'i'de ga uudxi yugute' le ni.

59Bënni'a tunabe'i'de pxuuz len yugute'ke bënni dxin'lau'i blou, tugiilje nu gdxia' Le' xhgia' naar luchuug'be'e ki gatie' Jesús, 60san ti bdzëël nakxh luune, nak'te bënni zian tazi'ye'ke le rdujxaka'lau'ke kie'. Kan'ga kati guladxiine ye chope', 61bënni ni gulanake:

Bënni ni gne': “Neda gunn jkin'ja gdou' kie' Dios ati na' gak tson dza yubl yuchisa ley.”

62Na' pxuuz blou gzui'de len bnaab'de Jesús:

—¿Bixhkia' ti rubi'u diidza? ¿Chi byëën'du ka'ti'ga nak le tanáke kiu'?,

63Ati Jesús ti bubi'e diidza. Na' bënni pxuuz blou'a gudxe le':

—Lu Le' Dios Ban rnabe'i'da li' kixhji'du netu ka'teez nak. Gdixhjë xhki li' naku le' Cristo, Le' Xi'ine Dios.

64Jesús gudxe le':

—Li' buudx gnou'. Len neda rea' lbi'ili ule'i'li'ne Xi'ine Bënni rë'e kuiti'le'e yubeel kie' Dios nape gdu yëla wak, len zuze'e lu buaj ki xhba.

65Na' pxuuz blo'u pchëëze'e xhe' le benn'be' ki rdza'a ikje ati gne':

¡Diidza buudx be'e bënni ni, nak diidza ku nak lau'e Dios! ¿Naru ni nayaadzji'ru nuul giid dujxaka'lau? Chi byëëni'kz'li gne' diidza le ku nak; 66¿Bixh rnaali lbi'ili?

Leke gulubi'ke diidza:

—Dxie' xhgia' len rala gatie'.

67Na' guluchiije xhëëna lau'rue'e len glutie' le'. Ye la'ke gulaga'pe'e xage'e, 68te'ke le':

Li' naku le' Cristo, ¡Gneya'atzka nuxha' bet li'!

Pedro ti rzi'lu'ne'e ki numbe'e Jesús

(Mr 14:66-72; Lc 22:56-62; Jn 18:15-18,25-27)

69Tzal'za Pedro rë'e la'chi rayu'u. Na' tuubi nguul wendxin gbiiga'bi ga ze' len guudx'bi'ne:

Lekz'ka' li' bdzaagu'ne Jesús, bënni Galilea.

70Ati Pedro ti gxhi'lu'ne'e lau'ke yugute'ke len gne':

—Ti nëëz'da bixh diidza rui'u.

71Chi nak ka bëëje ra puert'a ga budzaage'bi ye tuubi bi nguul'du len lekz'ka' leebi guudx'bi'ne bënni'a ye la'ke'a:

—Bënni ni bdzaage Jesús, bënni yëdz Nazaret.

72Yubl ka' Pedro ti gxhi'lu'ne'e, gne': blikz'da'ne Dios,

—¡Ti numbe'a'ne bënni'a!

73Guk ye tuchi'i ka', bënni nakua'ke na' gulabiige'e ga ze' Pedro ati gle'ke le':

—Keg nu rzi'ye'z, lekz'ka' li' bdzaagu'ne Jesús, koma ka' tui'ke diidza bënni Galilea rui'u diidza.

74Na' Pedro gzulau'e rdiidza'le'e len gne': blikz'da'ne Dios,

—¡Ti numbe'a'ne bënni'a!

Na'teez grëëdx'ba tuuba xi'in'druuz, 75ati Pedro gyajnei'de ki Jesús gudxe le': «Kati zia'a këëdx'ba xi'in'druuz tson lzu ti si'luno'u ki numbe'u neda.» Na' Pedro burooje ni', ati rënkz grëëdxe.

Currently Selected:

Mateo 26: PZD

Highlight

Copy