Mateo 27

Tudëëde Jesús lu ne'e Pilato

(Mr 15:1; Lc 23:1-2; Jn 18:28-32)

1Kati gyeni, yugute'ke bënni tunabe'i'de pxuuz len bënni guul tuzeajni'i'de gluune diidza dzaag nakxh luune ludëëd'de Jesús. 2Gluuga'ke Le' len guluche'e Le' lau'e Pilato, bënni rnabe' ki Roma.

Judas ratie'

3Judas bënni'a bdëëde Jesús lu naa'ke bunach, kati ble'i'de ki chi nun'ke ludëëd'de Jesús, buaagu le' ati bunëëdzje le chi'urua' dumi plata len bënni'a tunabe'i'de pxuuz dzaag'ke bënni guul tuzeajni'i'de, 4gudxe leke:

—Zea' dula bnëëdzja'ne tue' bënni tibi nuune ki ludëëd'de Le'.

San leke gulubi'e diidza:

—Chi nak len li', tibi zuakz kietu netu.

5Na' Judas bzale dumi ni lu gdou', len yajga'le'e xhyalje.

6Bënni tunabe'i'de pxuuz guluzi'e dumi'a, len gulanake:

—Dumi ni ti nak bach ku'u'ru ley lu gi'in ki gun, koma nak le gxha'ki'i yëla naban kie' tue' bënni.

7Na' gluune diidza dzaag la'awe len dumi ni tu yu le nazi' lei' Layeel kie' Bënni Ruune Rë'ë, naar ga'ta kieke tu latj ga luka'chi'ke bënni zitu. 8Lena'a ni ziiji na'a nazi' lei' yu ni Layeel Rën. 9Ka guk yajtzaag diidza le bzooje Jeremías bënni be'e diidza ulaaz kie' Dios kati gne': «Gulazi'ke chi'urua' dumi plata ni, tzka lea guluzua'ke laaxhje bënni Israel, 10ati len ley gla'awe layeel kie' bënni'a ruune rë'ë, ka'teez gnabe'i'de neda Xan'ru.»

Jesús rdxiine lau'e Pilato

(Mr 15:2-5; Lc 23:3-5; Jn 18:33-38)

11Yajua'ke Jesús lau'e bënni rnabe', len le' bnaab'de le':

—¿Ati li' naku Bënni Rnabe' kieke bënni Judea?

—Li' buudx gnou' —bubi'e diidza Jesús.

12Tzal bënni'a tunabe'i'de pxuuz len bënni guul tuzeajni'i'de tudxia'ke Le' xhgia', Jesús tibi rubi'e diidza. 13Lena'a Pilato bnaab'de Le':

—¿Naru ti ryëën'du ka'ti'ga nak diidza tanéke kiu'?

14Ati Jesús tibi bubi'e diidza; lena'a bënni rnabe' ni bubaani'tzki'de.

Tuchuug'be'e gatie' Jesús

(Mr 15:6-20; Lc 23:13-25; Jn 18:38—19:16)

15Lu lni'a, bënni rnabe' naleeb'de rsaane tue' bënni nadzuune liidx'gia bënni'a layaazlaadxi'ke le' bunach. 16Len nadzuune liidx'gia tue' bënni le' Jesús Barrabás; 17len ga nakua'ke nudzaag'ke, Pilato bnaab'de leke:

—¿Nuxh'lke re'eni'li ksaana'ne kieeli: Jesús Barrabás, u Jesús, bënni'a te'ke le' Cristo?

18Koma guk'be'i'de ki pxuuz'a lu yëla rdi'i kieke le' guludëëde le' lu ne'e.

19Tzal Pilato rë'e latj ga tabeki'xhbei'de, nguul kie' psë'la'nu nu tzajëëdx le': «Ti jgutzu'u le rak kie' bënni dxia'a ni, koma tibi nak'kz le gney'da yeel ndzë'i nia'a kie'.»

20San bënni tunabe'i'de pxuuz len bënni guul tuzeajni'i'de gulagu'u'yële'e bunach'a naar lunaabe ksaane Barrabás len ludëëd'de Jesús. 21Bënni rnabe' ni bunaab'de leke:

—¿Nuxh'lke kieke chope' ni ksaana'ne?

—Leke gulanake:

—¡Barrabás!

22Pilato bnaab'de leke:

—¿Ati nakxh guuna kie' Jesús, bënni'a te'ke le' Cristo?

—Yugute'ke gulanake:

—¡Bde'e lu yaag kruuz!

23Pilato gudxe leke:

—¿Bixh'le le ku nak beene?

San leke yubl ka guluskua'ke:

—¡Bde'e lu yaag kruuz!

24Kati Pilato ble'i'de ki ti rbë'xhbei, ati ryali'ir rak ruzbë', bnaabe tzajxi'ke kie' nis len gdiibe ne'e lau'ke yugute'ke, len gne':

—Chi nak len lbi'ili, ti gdxia'li ikja yëla gut kie' bënni ni.

25Yugute' bunach'a gulubi'ke diidza.

—¡Ikj'tu len ikjk'bi bi kietu tzajdxia yëla gut kie' bënni ni!

26Na' Pilato psaane Barrabás; len gdëëd gnabe'e lagiine Jesús, budëëde Le' lu naa'ke bunach naar lude'e Le' lu yaag kruuz.

27Bënni rajake gdil kie' bënni rnabe'a guluche'ke Jesús yulau'i len ga ze' ni gulutzaage yugute'ke bënni rajake gdil. 28Gululeikje xhe', len guluxua'ke kuudze'e tu laari gach le zaki'i'tzki 29len guludxie' ikje tu breegi yëtzi ati lu ne'e yubeel gulusëëne le' tu xuyaag. Chi nak ka' guluzechu xhiib'ke lau'e len tutitj'de Le' tanáke:

—¡Xhën'te nake Bënni Rnabe' kieke bënni Judea!

30Lekz'ka' tuchiije Le' xhëëna le larakz xuyaag'a tagiine ikje. 31Buudx gulutitj'de Le', guluguáke laari gach'a lea guluxua'ke kuudze'e, len gulugakue' Le' xha'kze ati guluche'ke Le' naar lude'e Le' lu yaag kruuz.

Tude'e Jesús lu yaag kruuz

(Mr 15:21-32; Lc 23:26-43; Jn 19:17-27)

32Kati gularoj'ke ni', guludzaage tue' bënni le' Simón, bënni yëdz Cirene, ati guludayë'li'de le gue'e yaag kruuz kie' Jesús.

33Kati guladxiine latj nazi' lei' Gólgota, (le re'e'ni gna, «Latj ki Dxit Ikji bunach»), 34glui'ke le' nup uva le nuchixhi'kde le sla' san kati blapa rue'e, Jesús ti gu'un'de gi'i'je.

35Kati chi gulude'e le' lu yaag kruuz, bënni'a rajake gdil gulukitj'ke le gunn'be' nuxh'lke la'la'ke xhe' Jesús. 36Chi nak ka' gulabë'ke'a naar lui'laadxi'ke Le'. 37Len zga ikj'le guluzooje lu blaag bixhkia' gbaage'e xhgia', le ni nayoj: «Le' nake Jesús, Bënni rnabe' kieke bënni Judea.»

38Lekz'ka' gulude'e lu yaag kruuz chop'ke bënni gban, tue' gulude'e le' kuiti'le'e yubeel len ye tue' gulude'e le' kuiti'le'e yëëgl. 39Bënni tadëëde na' tutzag'yuudxe Le' diidza, tu'ta'ke ikj'ke 40len tanáke:

—¡Keg Li'a gu'un'du jkin'ju gdou' len na' gak tson dza'z uchis'tiu' ley! ¡Xhki naku Xi'ine Dios, buslá kuinu len bëtj lu yaag kruuz'a!

41Lekz'ka' bënni tunabe'i'de pxuuz len bënni useed xhba ki Dios dzaag'ke bënni gul tuzeajni'i'de tutitj'de Le' tanáke:

42—Bënni yubl busle', san ti rake usle' kuine. Le' nake Bënni Rnabe' kieke bënni Israel: ¡Utzajle'ru'ne ka nak wëtje lu yaag kruuz'a! 43Dios nuxhënilaadxe'e: ¡Xhki leel nadxi'i'de Le' Dios na'a rala usle' Le'! ¿Naru keg rne' ki nake Xi'ine Dios?

44Lekz'ka' bënni gban'a da'ke kuiti'le'e lu yaag kruuz tutzag'yuudxe le' diidza.

Jesús ratie'

(Mr 15:33-41; Lc 23:44-49; Jn 19:28-30)

45Ka gyu'u wagbiidz len bdxin'te gdu rdëëd xhwë, kchul gdu yëdz'lyu. 46Larakz ur'a, Jesús bisku'e zidzj: «Elí, Elí, ¿lemá sabactani?» (Le ni re'e'ni gna: «Dios kia', Dios kia', ¿Bixhkia' psanlaadxu'u neda?»)

47La'ke bënni nakua'ke na' gulayëën'de Le' len gulanake:

—Elías bënni be'e diidza ulaaz kie' Dios rliidze.

48Na'teez, tue' kieke bënni'a rxiti'ze yajdiilje laari len buspise ley len nup uva zi na' beege'e ley lu yaag gy len bze' kie' Jesús naar gi'i'je ley. 49San bënni'a ye la'ke'a gle'ke le':

—Glëëz'gaar, gyu'tzka'ru xhki wiide Elías usle' le'.

50Jesús bisku'e zidzj yubl ka', len gutie'. 51Na'teez laari'a nuga'la'ke lu gdou' chop'di'il brëëza ka gde'la' ra'al bdxin'te dxi'it. Yëdz'lyu ptit len giaj gulala'a 52len gulayaalj ba ati zian'ke bënni nayajle'ke Dios gulubaane lu yëla gut. 53Len gdëëd bubaane Jesús lu yëla gut, gularooje lu ba kieke'a len gulayaazie yëdz la'ay Jerusalén, ga bënni zian gulale'i'de leke.

54Kati gulale'i'de utit xhën ni len yugute' le tak, bënni'a rnabe'i'de bënni'a rajake gdil len bënni'a nakua'leene le' tui'laadxi'ke Jesús, glaadxi'tzki'de len gulanake:

—¡Leel nake bënni ni Xi'ine Dios!

55Zitu'z nakua'knu tuyuunu ziank'nu nguul'a zak'leen'nu'ne Jesús yëdz't Galilea, nguul'a glak'leen'nu'ne. 56Ladjk'nu'a nakua'nu María Magdalena, María xhne'e Santiago len José, len nguul kie' Zebedeo.

Tuka'che'e Jesús

(Mr 15:42-47; Lc 23:50-56; Jn 19:38-42)

57Kati chi za' ral, bdxiine tue' bënni de'tzka xhdumie' le' José bënni yëdz Arimatea, len guke lekz'ka' bënni useed kie' Jesús. 58José yajyue Pilato len bnaabe lsenz ue'e Jesús. Pilato gnabe'e lunëëdzje le'. 59José gde'le'e le', len ptul'de le' laari dxia'a'te le zaki'i'tzki 60len glu'e le' lu ba kub le naki kie', le nuchë'ë'ne le'e giaj. Buudx psiije ba ni len tu giaj xhën, buze'e. 61Ati María Magdalena len María ye tuunu'a gulabë'nu ra baa.

Bënni rajake gdil gulun'chi'ke ba kie' Jesús

62Bueikj dza'a, dza tu'ueak'laadxi'ke bënni Judea, bënni tunabe'i'de pxuuz len bënni fariseos nadzaag'ke yajyu'ke Pilato, 63len gle'ke le':

—Xan, rusa'tu'laadxu'u ki bënni gxhi'ye' ni, kati'a ni zue' gne' ki nak gak tson dza ubaane lu yëla gut. 64Lena'a, psë'la nu ksiaj dxia'a baa tzal gza'a tson dza'a, ka gna liide bënni useed kie' len labaane Le', ati tëëd'a lanáke ki chi bubaane lu yëla gut. Ati ka nak'tza gak ka' uyali'ir le gak ka le chi guk na'a.

65Pilato gudxe leke:

—Na' nakua'ke bënni rajake gdil. Gultziaj len gultzajsiaj dxia'a baa tzka le gunn kieeli.

66Yajake len gulusiije dxia'a ba ni, gluuge'e ley len gulude'e guuna naar gunn'be' xhki chi byaalj; len guluka'ane ni' bënni'a rajake gdil naar lui'laadxi'ke.

Currently Selected:

Mateo 27: PZD

Highlight

Copy