Mateo 25

Diidza run lsaki'i kiek'bi chiibi bi raban'dou

1»Yëla rnabe'e ki yewayuba wak ki ka guk lu lni ki utzag'na': chiibi bi nguul raban'dou gulazi'bi li'kbi le ryuudz za len gularoj'bi yajtzaagk'bi'ne bënni'a rala ktzag'ne'e. 2Ga'yu'bi bi raban'dou ni ti nayajni'ik'bi len ye ga'yu'bi nayajni'ik'bi. 3Bi'i ti nayajni'ik'bi gulazi'bi li'kbi, san ti glua'bi za naar ludza'bi ley yubl ka'; 4san bi'a nayajni'ik'bi gulazi'bi li'kbi len kiizi glua'bi za lu bëëga'du. 5Ati bënni'a rala ktzag'ne'e gdzeir'de, yugute'bi glak chigask'bi len glas'bi. 6Kati za rdxin laadxi'yeel, byën nu biskua': “¡Chi ze'e bënni'a rala ktzag'ne'e! ¡Guluroj ki tzajxi'li'ne!” 7Yugute'bi bi raban'dou ni gulayas'bi len gulupa'a'bi li'kbi. 8Na' bi'a ti nayajni'ik'bi yajëëdxk'bi bi'a nayajni'ik'bi: “Gulgun kietu lati za kieeli'a, koma chi zuak'z ru'ul li'tu.” 9San bi'a nayajni'ik'bi gulubi'i'bi diidza: “Ti gak, koma xhki na'a ti gaki kietu len ti gaki kieeli. Wak'l dxia'a tziaj'li ga tuti'i'ke ley, na' si'li kieeli.” 10San tzal zjak'bi zajxik'bi zaa, bdxiine bënni'a rala ktzag'ne'e, len bi'a nayajni'ik'bi'a gulayaaz'lemi'ne lu lni ki utzag'na' ati gyeyj puert. 11Buudx'a guludximi bi'a ti nayajni'ik'bi, tanaabi: “Xan, xan, psaalj puert'a!” 12San le' bubi'e diidza: “Blikz'da rnia' ki ti numbe'a lbi'ili.”

13»Gulsuátekz si'na, —gne' Jesús—, koma ti nëëzi'li batxh gdxin dza'a len batxh'tek gak.

Diidza run lsaki'i ki dumi

(Lc 19:11-27)

14»Yëla rnabe' ki yewayuba wak ki ka guk kie' tue' bënni, kati chi zuak'z tziije yëdz yubl, bliidze bënni wendxin kie' len bzue' lu naa'ke xhdumie' ki lun'chi'ke ley. 15Kie' tue' bnëëdzje ga'yu' mil dumi'a, kie' ye tue' bnëëdzje chop mil len kie' ye tue' bnëëdzje tu mil: ki kieke bnëëdzje le lazaki'de lun'chi'ke. Na' gze'e ziije. 16Bënni wendxin'a gxhi'e ga'yu' mil bguune ley dxin len beene ikji ye ga'yu' mil ka'. 17Lekz'ka' bënni'a gxhi'e chop mil bguune ley dxin len beene ikji ye chop mil ka'. 18San bënni'a gxhi'e tu mil, pchë'ëne tu yeru lyu na' pka'che'e xhdumie' bënni xaane'a.

19»Gdëëd zian dza, budxiine laadze bënni xan'ke bënni wendxin'a, len grë'leene leke naar labeki'xhbei'de. 20Zia'a bënni'a gxhi'e ga'yu' mil bdxiine, len bunëëdzje len bënni xaane'a ye ga'yu' mil ka', ati gudxe le': “Xan, li' bzu' lu na'a ga'yu' mil ati na'a, ni de ye ga'yu' mil ka' le beena ikji.” 21Bënni xaane'a gudxe le': “Dxia'a'te beenu, naku tue' bënni wendxin tzawi len tuuz'laadxu'u nak, zala lati'iz gxhi'u tuuz'laadxu'u guk, lena'a zxhëni gzua lu no'u. Gyaaz len budziiji len neda.” 22Buudx'a bdxiine ye tue' bënni wendxin, bënni'a gxhi'e chop mil, len gne': “Xan, li' bzu' lu na'a chop mil, ati ni de ye chop mil ka' le beena ikji.” 23Bënni xaane gudxe le': “Dxia'a'te beenu, naku tue' bënni wendxin tzawi len tuuz'laadxu'u nak, zala lati'iz gxhi'u tuuz'laadxu'u guk, lena'a zxhëni gzua lu no'u. Gyaaz len budziiji len neda.”

24»San kati bdxiine bënni wendxin bënni'a gxhi'e tu mil, gudxe bënni xaane'a: “Xan, nëëz'da ki naku bënni bixhj, ki rla'pu ga ti guuzu, len ruzi'u le ti pxu'. 25Lena'a guudxi'da li', ati yajka'cha'a xhdumiu' xhan yu. San ni de le nak kiu'.” 26Bënni xaane'a bubi'e diidza: “bënni xhweed len bënni wendxin xhe'e naku, xhki nëëz'du ki rla'pa ga ti guuza, len ruzi'a ga ti pxua', 27gula tzajlu'u xhdumia' ga rak'chi'i dumi, naar kati udxiina uzi'a ley gdu len ikji.” 28Len gudxe bënni nakua'ke na': “Gulkua le tu mil'a lea be'a'ne len gulunëëdzj kie' bënni'a de kie' chi mil. 29Koma bënni'a de kie' uzi're zxhëni; san bënni'a ti de kie', zala lati'du'z le de kie' ulaguáke. 30Len guluzale' rayu'ul ga nak chul bënni wendxin ni ti nake bi guune. Na' sulau'e këëdxe len ktil la'a'ye.”

Yëla rchuug'be'e ki yëdz xhën

31»Kati le' Xi'ine Bënni wëëde, yëla yeni xhën'te gli'iji le' len dzaage yugute'ke gbaaz la'ay kie', ati kë'e lu xhlatje xhën'te. 32Bunach ki yugute' yëdz uludzaag lau'e, kuekie leke ki kieke, ka ruune bënni run'chi'e'ba bëku'xhiila, rbekie'ba kieez'ba bëku'xhiila len kieez'ba chiib. 33Ubekie'ba bëku'xhiila kuiti'le'e yubeel len chiib kuiti'le'e yëëgl. 34Len Bënni Rnabe'e gie' nu nakua' kuiti'le'e yubeel: “Guldá lbi'ili, bënni ben'la'aye lbi'ili Xuuza; gulsi yëla rnabe' le chi zua rbëëz lbi'ili ka gu'ta'grë'z yëdz'lyu ni. 35Koma gduuna ati lbi'ili ben'li le gda'wa, gbiidxa ati ben'li le gi'i'ja, gda' ka tadáke bënni zitu ati gxhi'li neda liidx'li. 36Gda' xhgiid'za ati bgaku'li neda xha', kati gui'i'da biid'li kia'; kati gyu'a liidx'gia dujyu'li neda.” 37Na' bënni'a gluune le dxia'a lunaab'de le': “Xan, ¿Batxh ble'i'tu li' rduunu ati ben'tu le gdaagu? ¿U batxh ble'i'tu li rbiidxu ati ben'tu le gi'i'ju? 38¿Batxh ble'i'tu li' rdo'u ka bënni zitu ati gxhi'tu li' liidx'tu, u batxh bgaku'tu li' xhou'? 39¿Batxh ble'i'tu li' re'i'du u gyu'u liidx'gia ati dujyu'tu li'?” 40Bënni Rnabe' ubi'e diidza: “Blikz'da kati rnia' ki yugute' le ben'li kieke bënni'du ni, kie'kza ben'li ley.”

41»Chi nak ka' Bënni Rnabe' gie'e bënni nakua'ke kuiti'le'e yëëgl: “Gultziaj ki'il, bënni nak'li bach gbaaga'li xhgia'; gultzajtzu'u lu gi'gabil le chi zua rbëëz le bënni xëwi len gbaaz kie'. 42Koma gduuna ati lbi'ili ti ben'li le gda'wa, gbiidxa ati ti ben'li le gi'i'ja, 43Gda' ka tadáke bënni zitu ati ti gxhi'li neda liidx'li, xhgiid'za ati ti bgaku'li neda xha', kati gui'i'da len gyu'a liidx'gia ti dujyu'li neda.” 44Na' leke lunaab'de Le': “Xan, ¿Batxh ble'i'tu li' rduunu u rbiidxu u rdou' ka bënni zitu u xhgiid'zu u re'i'du u gyu'u liidx'gia ati ti guk'leen'tu li'?” 45Bënni Rnabe' ubi'e diidza: “Blikz'da kati rnia' ki yugute' le ti ben'li kieke bënni'du ni, lekz'ka' ti ben'li ley kia'.” 46Bënni'a tzjake lu yëla rsaka'zi' tzalzu, ati bënni dxia'a tzjake lu yëla naban tzalzu.»

Currently Selected:

Mateo 25: PZD

Highlight

Copy