Mateo 24

Jesús rgixhjë'e ki ulukin'je gdou'

(Mr 13:1-2; Lc 21:5-6)

1Jesús burooje gdou' ati chi zuwëëje, kati bënni useed kie' gulabiige'e ga ze' len tului'de le' yu'u gdou'. 2Na' Jesús gudxe leke:

¿Ba rle'i'li yugute' le ni? Blikz'da rea' lbi'ili ki ti jga'an tu giaj lau'i ye tu giaj. Gdu'te jgin'j.

Le lunn'be' ki chi za' ga'la dza uudx

(Mr 13:3-23; Lc 21:7-24; 17:22-24)

3Chi nak ka', yajake Gia'a ki Olivos. Jesús grë'e ati bënni useed kie' gulabiige'e ga ze' naar gulunaab'de le' kiizi:

—Re'eni'tu kixhji'du netu batxh gak le ni. ¿Bixh'le gak le gunn'be' ki chi zuzo'u len chi bdxin dza tzu'u lu uudx ki yëdz'lyu ni?

4Jesús bubi'e diidza.

—Gulun'chi'i kuin'li naar nutunu siye'i lbi'ili. 5Koma uladxiine bënni zian luune lsaki'i neda, lanáke: “Neda naka le' Cristo”, len bunach zian lazi'ye'i'de. 6Uyëëni'li diidza ki ga'ti'teez rak gdil; san ti gungaadxi kuin'li, koma ka rala'kz gak; san ti rdxiini dza tzu'u lu uudx ki yëdz'lyu. 7Tu yëdz xhën len ye tu yëdz xhën uladil, len tu yëdz gun gdil len ye tu yëdz; ati tzu'u yëla rdun len gaaz ladëëd ka' utit xhën. 8San le ni nak le jkie'la'z lau'i yëla rsaka'zi' xhën'te.

9»Na' ludëëde lbi'ili lu naa'ke bunach ki lusaka'zi'ke lbi'ili; len uludëëd'de lbi'ili ati gdu'te yëdz'lyu lalei'de lbi'ili nia'a kia'. 10Na' gdxin dza'a bënni zian ludabaaga'ke yëla rajle' kieke, len ludëëd'z ka' lza'a'ke lu naa'ke bunach len ti lale'i dxia'a lza'a'ke. 11Bënni zian layas'ke len uludëëd kuin'ke ka bënni rue'e diidza ulaaz kie' Dios len bunach zian lazi'ye'i'de. 12Udëëd'kz be'i gak le ku nak, ati le ni gun ga zian'ke lanitie' yëla nadxi'i lze'i. 13San bënni sue' tzutzu nakati gdxin'r lu uudx ki, bënni'a yule'. 14Len gdu yëdz'lyu lagixhjë'ke diidza kub dxia'a ki yëla rnabe', naar yugute' yëdz xhën lumbe'ke ley; len chi nak ka' tzu'u lu uudx ki yëdz'lyu.

15»Bënni rul'e tzajni'i'de le bzooje Daniel bënni be'e diidza ulaaz kie' Dios, kati bzooje ki le zgut'a. Kati lbi'ili gle'i'li ley lu Latj La'ay, 16Na'ar bënni nakua'ke Judea rala laxhunj'ke gia'a, 17len bënni ze' ikju'ul kie', ti wëtje bi tzajliije kie'; 18len bënni yu'e dxin gixi, ti wëëde dujxi'e xhe'. 19¡Na' gdxin dza'a bayechi lak'knu nguul'a zek'nu zi'i len nguul'a tugaadxi'nu'bi bi'i kiek'nu! 20Gulunaab'de Dios ki na' gdxin dza'a rala gxhunj'li ti gak beu' bë'gi' len ti gak dza tu'ueak'laadxi'ke bënni Judea; 21Koma yëla rsaka'zi' xhën'te tzu'u'tzka le gat'ga ryui'ini'kz glaal de yëdz'lyu, len gat'gar tzu'u na' tëëd'a. 22Len xhki Dios ti gze'che'e dza'a, nutunu ulákz; san lu yëla nadxi'i kie' len bënni'a le' grë'e uze'che'e dza'a.

23»Ati xhki nu gie'tza lbi'ili: “Guluyu', ni zue' le' Cristo”, u “Guluyu', ni' zue'”, ti tzajle'li. 24Koma bënni zian bënni gxhi'ye' liide luune lsaki'i nak'ke Cristo len luune lsaki'i nak'ke bënni tui'ke diidza ulaaz kie' Dios; len uluune le tunn'be' len yëla wak xhën, naar lazi'ye'i'de bunach, len xhki gunn lekz'ka' lazi'ye'i'de bënni'a Dios chi grëe'. 25Chik'z gdixhji'da lbi'ili zia'at. 26Lena'a xhki le'ke lbi'ili: “guluyu'tzka, ni' zue', lu yu biidx”, ti tziaj'li; u ka nak lanáke: “Guluyu'tzka, ni nuka'chi' lau'e”, ti tzajle'li. 27Koma ka rak kati rep'yës le rze'ni ga rlen gbiidz len rdxin'te ga rbia gbiidz, ka' gak kati le' Xi'ine Bënni wëëde. 28Ga de' bënni nat'a na' luduub'ba laab.

Kati wëëde le' Xi'ine bënni

(Mr 13:24-37; Lc 17:26-30,34-35; 2:25-33)

29»Ka uudx ladëëd dza ki yëla rsaka'zi' ni, uchul lau'i gbiidz, beu'a tir gunn yeni, ulëxhj'ba bëlj'a dxiaaba lu xhba len yugu bë' xëwi le tunabe' yewayuba ulaxhiiz. 30Na' gla' lu xhba le gunn'be' kie' le' Xi'ine Bënni, ati tzka'ti'ga laadxi yugute' yëdz ki yëdz'lyu, ulabëëdx'tzka'ke, len ulale'i'de le' Xi'ine Bënni zuze'e lu buaj len yëla wak xhën'te len yëla ba. 31Len le' ksë'le'e gbaaz la'ay kie' len tu trompet xhën, naar lutzaag'ke bënni le' grë'e ki gdu gabi'i yëdz'lyu, le ki gdu yewayuba.

32»Guluseed ki yaag higuera: Kati rula xhuuzi'i yulu len chi tula' xhlaagi'i, rak'be'i'li ki chi zua gdxin beu' ba. 33Lekz'ka' nak kati gle'i'li yugute' le ni, wak'be'i'li ki le' Xi'ine Bënni chi zuza'ga'le'e. 34Le nak'te rea' lbi'ili ki ti tëëdi dia'dza ni xhki ti lak yugute' le ni. 35Xhba len yëdz'lyu uladëëdi, san xhtiidza'a ti tëëdi.

36»San nutunu nëëzi bixh dza u batxh'tek gak, keg gbaaz la'ay, len keg Xi'ine, tuuze Xuuz'ru nëëz'de.

37»Ka guk dza kati gzue' Noé, lekz'ka' gak kati le' Xi'ine Bënni wëëde. 38Dza ni' kati'a zia'a gaal giaj ziil len na' bdxin'te dza gyaazie Noé lu barku, bunach tia'aj'ta'we len tutzag'naa'ke. 39San kati ti nun'gakze lëëz, bdxin giaj ziil len bdëëdi leke yugute'ke. Lekz'ka' gak kati le' Xi'ine Bënni wëëde. 40Na' gdxin dza'a, kieke chope' bënni dzë'ë'ke dxin gixi, tue' yude'le'e len tue' jga'ane. 41Ki chopk'nu nguul dzë'ë'nu wetu, tuunu yude'la'nu len tuunu jga'an'nu.

42»Gulzua'tekz si'na, koma ti nëëzi'li bixh dza wëëde Xan'li. 43San le ni rala gnëëzi'li, ki nar'la bënni xaani yu'u nëëz'de batxh'tek giide bënni gban, ti gui'e latj nu tzaaz liidxe kuan le de kie'. 44Lena'a lbi'ili lekz'ka' gulzua'tekz si'na; koma kati'a nutunu nun'kz le' lëëz le' Xi'ine Bënni wëëde.

Bënni wendxin nak tuuz'laadxe'e len bënni wendxin nak chop'laadxe'e

(Lc 12:41-48)

45»¿Gaxh zue' bënni'a wendxin'a nake nu kxënilaadxi'i le' len rui'laadxe'e kati bënni xaane rka'ane lu ne'e bënni nakua'ke liidxe, naar gnëëdzje le la'we kati rala la'we? 46Bixhgabe' bënni wendxin'a kati yudxiine bënni xaane len udzëël'de le' ruune le rala guune. 47Blikz'da rnia' ka' ki bënni xaane'a uzue' le' gun'chi'e zura yëla tzawi kie'. 48San xhki bënni wendxin ni, nake bënni xhe'e len guuni le' ki bënni xaane'a rdzeir'de yudxiine, 49len sulau'e ksaka'dë'e ye la'ke bënni wendxin'a ati gdzaage bënni tuzuudxi kuin'ke len lia'aj'la'we, 50dza kati ti nun'kze le' lëëz len kati ti nëëz'de, udxiine bënni xaane'a 51len ksaka'zi'e le', ati kchuug'be'e kie' ktzaage ka tutzaage bënni nak'ke ka bënni nuda' blo'u. Na' lazulau'ke labëëdx'ke len lutil la'ya'ke.

Currently Selected:

Mateo 24: PZD

Highlight

Copy