Mateo 23

Jesús rdil'leene bënni fariseo len bënni useed xhba kie' Dios

(Mr 12:38-40; Lc 11:37-54; 20:45-47)

1Gdëëd le ni, Jesús gudxe bunach nakua'ke'a len bënni useed kie': 2«Bënni useed xhba kie' Dios len bënni fariseo tuseed'de len yëla rnabe' le za kie' Moisés. 3Lena'a, guluzenaag'de len gulgun gdu le tuseed'de lbi'ili; san ti gun'li le tun'ke, koma ti tun'ke le tuseed'de. 4Tudxia'ke yua' zi'i le nutunu rzaki'i gua', ati tugua'ke bënni yubl len leke tibi tuda'kz naa'ke ley. 5Yugute' le ni tun'ke naar lale'i'de leke bunach. Tadaan'de luuga'ke raxhga'ke len yen naa'ke laari ga nayoj'k lati Diidza La'ay, len takue' xha'ke len yalj tunn. 6Tagiilje labë'ke latj dxia'a'te ga ryu'u gwi'i'waagu len labë'ke lau'it yu'u useed, 7len tazelaadxi'i'ke ki bunach lui'ke leke bala'an la nëëz len le'ke leke bënni useed.

8»San lbi'ili ti rala selaadxi'li ki bunach le'ke lbi'ili bënni useed, koma yugute'li rak bë'chi'li len tuuze Bënni Useed nap'li'ne. 9Len nutunu gie'li xuuza lu yëdz'lyu ni, koma tuuze Xuuz'li zue': len zue' yewayuba. 10Lekz'ka' ti selaadxi'li ki bunach le'ke lbi'ili xan, koma tuuze Cristo nake Xan'li. 11Bënni nak're blou ladj'li rala guune dxin kie' bënni lze'e. 12Koma bënni rnëëzi kuine xhën uluxhëxhje' laadxe'e, ati bënni nëxhj'laadxi uluune le' xhën.

13»¡Bayechi nak'tzka'li, bënni useed xhba kie' Dios len bënni fariseo, nak'li ka bënni nuda blo'u!, koma rsiaj'li puert ki yewayuba naar ye la bunach ti layaazie. Len kuin'kz'li ti ryaaz'li len ti ruik'li'ne latj layaaz'ke bënni te'en'de layaazie. 14[¡Bayechi nak'tzka'li bënni useed xhba kie' Dios len bënni fariseo, nak'li ka bënni nuda blo'u! Koma rguaali le de kiek'nu nguul uzeeb, len xhtzei rui'leen'li'ne diidza Dios naar nutunu gak'be'i le run'li. Lena'a uzi'li yëla rsaka'zi'.]

15»¡Bayechi nak'tzka'li bënni useed xhba kie' Dios len bënni fariseo, nak'li ka bënni nuda blo'u! Koma gdu gabi'i yëdz'lyu rajtiilj'li'ne bënni dujte'e lbi'ili, len kati chi bdzëëli'li'ne, run'li ga bënni ni gyali'ir gake bach tziije lu gi'gabil ka lbi'ili.

16»¡Bayechi nak'tzka'li, nak'li bënni lau'chul ati re'eni'li kche'li bunach! Rnaali: “Xhki tue' bënni rxënelaadxe'e bënni yubl len gne', blikz'da gdou'; ti ryui'i le ni, san xhki gne', blikz'da oro ki gdou', na'ar ryui'i lea pxënelaadxe'a.” 17¡Bënni tzawat len lau'chul! ¿Bixh nak'r blo'u: oro, u gdou'a lea run'la'ay oro ni? 18Lekz'ka' rnaali: “Xhki tue' bënni rxënelaadxe'e bënni yubl len gne', blikz'da pkuugu ki gdou', ti ryui'i le ni, san xhki gne', blikz'da gun le xhua lu pkuugu ki gdou', na'ar ryui'i lea pxënelaadxe'a.” 19¡Bënni lau'chul! ¿Bixh nak'r blou: gun, u pkuugu'a lea run'la'ay gun'a? 20Xhki tue' bënni rne' blikz'da pkuugu ki gdou', keg ley'z rga'le'e, lekz'ka' rga'le'e yugute' le xhua lu pkuugu'a; 21len xhki tue' bënni rne' blikz'da gdou', keg ley'z rga'le'e, lekz'ka' rga'le'e Dios, koma na' zue' Le'. 22Len xhki tue' bënni rne' blikz'da yewayuba, re'en'de gne' blikz'da xhlatje Dios, len blikz'da'ne Dios, koma na' rbë'e Le'.

23»¡Bayechi nak'tzka'li bënni useed xhba kie' Dios len bënni fariseo, nak'li ka bënni nuda blo'u!, koma xhwiaj, aniis len komiino rbiaj'li ley chi len rnëëdzj'li kie' Dios tu, san rdëëd'zli ka le blou le rseedi ro'u xhba kie' Dios, le ni nakgak, yëla rbë'xhbei dxia'a, yëla ruwechilaadxi'i, len yëla rajle'. Le ni run bayuudx gun'li, len ti jka'an'li gun'li lea ye tu'a. 24¡Lbi'ili nak'li bënni lau'chul ati re'eni'li kche'li bunach, rdëëd'li'ba bë'ë'yu'du san ria'aj'li'ba kameyo!

25»¡Bayechi nak'tzka'li bënni useed xhba kie' Dios len bënni fariseo, nak'li ka bënni nuda blo'u! Rxhi'li kuudzi'il le ri'i'ji'ru len yë'ën ra'wi'ru, san ikj'laadxi'dau'li nadze'iz yëla gban len yëla rzelaadxi'i dumi. 26¡Fariseo bënni lau'chul: bxi zia'a le'il le ri'i'ji'du, ati ka' ueak dxia'a kuudzi'il!

27»¡Bayechi nak'tzka'li bënni useed xhba kie' Dios len bënni fariseo, nak'li ka bënni nuda blo'u! Nak'li ka ba, lea rna' nanei'tzki len naba'a'tzka zga lau'il, san le'il nadze'iz dxit kieke bënni nat len yugu le nuudzu. 28Ka nak'li: lau'iz run'li nak'li bënni dxia'a, san lu ikj'laadxi'dau'li nadze'iz'li yëla xhe'e len nak'li ka bënni nuda blo'u.

29»¡Bayechi nak'tzka'li bënni useed xhba kie' Dios len bënni fariseo, nak'li ka bënni nuda blo'u!, run'li ba kieke bënni glui'ke diidza ulaaz kie' Dios len ruchil'li ba kieke bënni dxia'a, 30chi nak ka' rnaali: “Nar'la netu gzua'tu zia'a, kati gulakua'ke xuuz'xhtau'tu guul, ti gun'leen'tu'ne tuuz bënni'a guludëëd'de bënni glui'ke diidza ulaaz kie' Dios.” 31Len lea rnaali'a, rzi'lu'naa'li ki nak'li xi'in'xhzua'ke bënni'a guludëëd'de bënni glui'ke diidza ulaaz kie' Dios. 32¡Gulusiuudx gun'li lea gulazulau'e xuuz'xhtau'li guul!

33»¡Bel'! ¡Xi'in bel'! ¿Nakxh gunn gxhunji'li ki yëla rsaka'zi' ki gi'gabil? 34Lena'a ksë'la'ka'ne kieeli bënni lui'ke diidza ulaaz kie' Dios, bënni nayajni'i, len bënni useed. San lbi'ili udëëdik'li'ne, ati la'ke bënni ni udak'li'ne lu yaag kruuz, len ye la'ke gutk'li'ne lu yu'u useed ati ulaagk'li'ne yëdz yëdz. 35Lena'a ikj'li tzajdxia rën kieke bënni'a tibi glun'ke, le gzulau len xhchëëne Abel len bdxin'te len Zacarías, bënni xi'ine Berequías, bënni'a bdëëd'li'ne gatzj'lau'i ki pkuugu la'ay len yu'u gdou'. 36Blikz'da rea' lbi'ili, ki ikj'ke bënni'a nakua'ke dza zuaaru na'a tzajdxia yëla rsaka'zi' ki yugute' le ni.

Jesús rbëëdxe ki yëdz Jerusalén

(Lc 13:34-35)

37»¡Jerusalén, Jerusalén, rdëëd'kdu'ne bënni tue'e diidza ulaaz kie' Dios len rchiaj'ku'ne giaj bënni gbaaz kie' Dios! ¡Balti'i lzu gu'un'da yutuuba'bi bi kiu' ka ruma ikjed'bna' rgieedx'ba xi'in'ba, san ti gu'un'du! 38Guluyu'tzka, liidx'li ulal'laadxi'ke; 39len rea' lbi'ili ki tir yule'i'li neda nakati gdxin'r dza gnaali: “¡La'ay nake bënni ze'e ulaaz kie' Xan'ru!”»

Currently Selected:

Mateo 23: PZD

Highlight

Copy