Mateo 22

Diidza run lsaki'i ki gwi'i'waagu xhën ki utzag'na'

(Lc 14:15-24)

1Yubl ka bui'leene leke diidza Jesús len diidza run lsaki'i. Gudxe leke:

2«Yëla rnabe'e ki yewayuba rak ki ka guk kie' tue' bënni rnabe'e, beene gwi'i'waagu xhën naar ktzag'naa'bi bi'i kie'. 3Psë'le'e bënni wendxin kie' tzajliidze bënni'a nuliidze, san bënni'a nuliidze'a ti gle'en'de tzjake. 4Yubl psë'le'e ye la'ke bënni wendxin kie', gudxe leke: “gultzajëëdx'ke bënni'a nuliidz'ka'ne ki chi gba'a la'wa'gu. Chi gnabe'a ludëëd'de'ba xhpeedxa len yugute' chi naba'a; guldá gia'aj'gaag'li.” 5San bënni'a nuliidze'a ti yajake. Tue' gyiije layeel kie', ye tue' gyiije wendxin kie', 6len ye la'ke gulazëëne bënni wendxin kie' bënni rnabe'a len gulusaka'dë'ke leke ati guludëëd'de leke. 7Na' bënni rnabe'a bdze'i'tzki'de, len gnabe'e bënni rajake gdil kie' ludëëd'de bënni'a guludëëd'de bënni wendxin kie' len luzeegie yëdz kieke. 8Na' buudx'a gudxe bënni wendxin kie': “Gwi'i'waagu chi naba'a, san bënni'a nuliidz'ka'ne ti nak'ke bach layaazie. 9Gultziaj la nëëz xhën, len gululiidze yugute'ke bënni tzajxaka'li'ne.” 10Bënni wendxin kie' gularooje la nëëz len gulutzaage yugute'ke bënni'a guludzaage, ley bënni tuune le nak dxia'a ley bënni tuune le ku nak, ati ka' bdza' yu'u ga tuune lni ni.

11»Kati bënni rnabe'a yajyue bënni'a nuliidze'a, ble'i'de tue' bënni ti nakue' laari le takue' kati rajake lni ki utzag'na'. 12Ati gudxe le': “Bë'cha'a, ¿Nakxh beenu gyaaziu liidxa xhki ti naku laari le takue' kati rajake lni ki utzag'na'?” San bënni'a ti bubi'e diidza. 13Na' bënni rnabe'a gudxe bënni wendxin kie', “Gulguuga' ni'a'ne'e len gulubiije rayu'ul ga nak'tzka chul. Na' sulau'e këëdxe len ktil la'a'ye.” 14Koma zian'ke bënni rliidz'ka'ne san lati'iz'ke bënni kë'ka'ne.»

Yëla rnaab ki laaz'sua'ke

(Mr 12:13-17; Lc 20:20-26)

15Na' buudx'a, bënni fariseo gluune diidza dzaag nakxh luune lazi'be'e Jesús naar gui'e diidza le gunn ludxie' le' xhgia'. 16Na' gulusë'le'e la'ke bënni da'ke leke dzaag'ke la'ke bënni da'ke Herodes, ki le'ke le':

—Bënni useed, nëëzi'tu ki diidza rui'u nak diidza li, Li' rseed'du ka'teez nak nëëz kie' Dios, ti rzenaagu le taná bunach, koma ti rbiaj'je'idu bunach. 17Bixh rnou' li': ¿Nak dxia'a kiixhj'tu laaz'sua'tu kie' César u ti nak? 18Jesús guk'be'i'de ki yu'u xhe'e ikj'lau'ke, ati gudxe leke:

—Nak'li ka bënni nuda' blo'u, ¿Bixhkia' rsi'be'li neda? 19Gulului'i'tzki neda tu dumi le rgiixhji'li laaz'sua'li ki Roma.

Na' yajxi'ke tu dumi, 20Ati Jesús bnaab'de leke:

—Nuxh lau'rui'i da' ni len nuxh lei' nayoj ni?

21Leke gulubi'ke diidza:

Kie' César.

Na' Jesús gudxe leke:

Gulunëëdzj kie' César le nak kie' César, len gulunëëdzj kie' Dios le nak kie' Dios.

22Kati gulayëën'de le gne', gulubaani'tzki'de; guluka'ane le' ati ye'wa'ke.

Tunaabe xhki bënni nat tubaane yëla gut

(Mr 12:18-27; Lc 20:27-40)

23Larakz dza'a, la'ke bënni saduceo yajyu'ke Jesús. Leke tanáke ki bënni nat ti tubaane lu yëla gut, lena'a gle'ke Jesús:

24—Bënni useed, Moisés gne' ki xhki nu bënni gatie' len ti gulakua'bi bi kie' len nguul kie', bënni bë'chi' guulje rala si'e'nu ka nguul kie' nguul'a bugan'n uzeeb'nu naar gnëëdzje'bi bi kie', kie' bënni bë'che'a chi gutie'. 25Guk ki lu yëdz kietu, gulakua'ke gaadx bë'chi'ke, bënni naguul ptzag'ne'e, len gutie'. Ati le ti gulakua'bi bi kie', bënni burop'a gzua'leene'nu nguul uzeeb'a. 26Lekz'ka' guk kie' bënni burop'a len bënni bunn'a, len ka guk kieke gaadx bë'chi'ke ka'. 27Buudx'a, lekz'ka' gut'nu nguul'a. 28Na' kati bënni nat lubaane lu yëla gut, ¿Nuxh'lke gak nguul kie' nguul ni xhki gaadx'ke ka gulakua'leene'nu?

29Jesús bubi'e diidza:

—¡Nakchixi'tzki'li, koma ti numbe'li Diidza La'ay len yëla wak kie' Dios! 30Kati bënni nat lubaane lu yëla gut, bënni u nguul tir lutzag'naa'ke, koma ulak'ke ka gbaaz la'ay kie' Dios nakua'ke yewayuba. 31Ati le rak kieke bënni nat tubaane lu yëla gut, ¿Naru ti rul'i'li ki kuin'kze Dios gne': 32“Neda naka Dios kie' Abraham, kie' Isaac len kie' Jacob”? ¡Ati Le' ti nake Dios kieke bënni nat, nake Dios kieke bënni ban!

33Kati gulayëën'de le ni, bunach gulubaan'de ka rseed'de Jesús.

Xhba le nak'r blou

(Mr 12:28-34)

34Bënni fariseo guludzaage kati gulanëëz'de ki Jesús psiije rua'a'ke bënni saduceo, 35ati tue' bënni useed xhba kie' Dios, tzal gunn si'be'e Le', bnaab'de Le':

36—Bënni useed, ¿Lu xhba kie' Dios, bil xhba nak'r blou?

37Jesús gudxe le':

—“Bdxi'i'de Xaanu Dios gdu laadxi'dau'u, gdu laadxu'u len gdu ikj'lau'u.” 38Xhba ni nak'r le blou len le zia'a. 39De ye tu le nak blou ka nak le zia'a ni, len rna; “Bdxi'i'de bënni bë'chi' lzo'u ka nadxi'i'du kuinu.” 40Lu grop'te xhba ni nun'gak xhliibi gdu xhba kie' Dios len le guluzooje bënni glui'ke diidza ulaaz kie' Dios.

¿Nuxh xi'ini nake le' Cristo?

(Mr 12:35-37; Lc 20:41-44)

41Tzal bënni fariseo ni nudzaag'ke, 42Jesús bnaab'de leke:

—¿Bixh rnaali lbi'ili kie' Cristo? ¿Nuxh rak xuuze?

Leke gulubi'e diidza:

David nake xuuze.

43Na' Jesús gudxe leke:

—¿Ati bixhkia' David be'e diidza ulaaz kie' Bë' La'ay kie' Dios, ati re' le', Xan? Koma David gne':

44“Xan'ru gudxe Xaana”

Gri'i kuiti le'a yubeel,

tzal Neda guuna ki bënni'a ti tale'i'de li' dxia'a

lakua'ke xhni'u.

45¿Nakxh gunn gake le' Cristo xi'ine David, xhki kuin'kze David re' le' Xan? 46Nutunu bënni benn ubi'e diidza, ati le gde'la' dza ni, nuturnu buaaxhji bi gnaabi le'.

Currently Selected:

Mateo 22: PZD

Highlight

Copy