Lucas 13

Run bayuudx ubi'i'laadxi'li

1Larakz dza ni lak bunach yajyu'ke Jesús, len gulagixhji'de le' ka beene Pilato pchixi'de rën kieke la'ke bënni Galilea len xhchën'kba bua'gixi, bua' guludëëd'kde'ba lau'e Dios.

2Jesús re' leke: «¿Rsaka'ali lbi'ili ki le guk kieke bënni Galilea ni, guk koma nakr'ke bënni dula ka ye la'ke bënni yëdz kieke? 3Rea' lbi'ili ti nak ka; ati xhki lbi'ili ti yubi'i'laadxi'li, lekz'ka' gak kieeli. 4¿Ba rsaka'ali lbi'ili ki zegak're dula bënni chixuunu'ke'a glat'ke kati yu'u sib ki Siloé yajbaaga leke ka ye la'ke bënni'a nakua'ke Jerusalén? 5Rea' lbi'ili ti nak ka; len xhki ti yubi'i'laadxi'li, lekz'ka' gak kieeli.»

Diidza run lsaki'i ki yaag higuera ti rbia

6Jesús blaabe kieke tu diidza run lsaki'i: «Tue' bënni gzua tu yaag higuera lu layeel kie', len gyiije yajyue xhki dxia, len tibi budzëël'de. 7Na' re' bënni'a run'chi'e layeel kie': “Byu'tzka, tson iz chi guk riid'tekza rduyua' yaag ni xhki ba dxia xhlu'li'i, len tibi rudzëël'da. Pchuug, ¿Bixhkz wen gunditji layeel ni?” 8Ati bënni'a run'chi'e layeel ni' bubi'e diidza: “Xan, pka'an ye tu iz; neda yu'zatza kuudzi'i len kui'i'da beeb. 9Naxhka kuia, len xhki ti kuia, na'ar kchuugu.”»

Jesús ru'uune'nu nguul we' dza tu'ueak'laadxi'ke bënni Judea

10Tu dza tu'ueak'laadxi'ke bënni Judea Jesús gzulau'e rseed'de lu yu'u useed; 11len zuaanu na' tuunu nguul chi guk chi'xuunu iz re'i'nu. Tu bë' xëwi ben ga bia'nu bëëgu, len gakati bi gun'nu ti ruli kuudzu'nu. 12Kati Jesús ble'i'de'nu, bliidze'nu len re'nu:

—Nguul, li' chi bueaku ki baya' kiu' ni.

13Na' pxua'ne'e'nu, ati buli'te'nu len gzulau'nu rgu'u'nu'ne ba Dios. 14Ati bënni zue' lau'i yu'u useed bdze'i'de, koma Jesús buune'nu nguul ni dza tu'ueak'laadxi'ke bënni Judea, len gne' gudxe bunach:

—Xop dza nakgak dza dxin; guldá dza'a naar ueak'li, keg dza tu'ueak'laadxi'ke bënni Judea.

15Xan'ru re' leke:

—Lbi'ili nak'li ka bënni nuda' blo'u, ¿Naru ti rseedx'li'ba bua' beedx kieeli kati nak dza tu'ueak'laadxi'ke bënni Judea, len raje'li'ba nis? 16Ati nguul ni nak'nu xi'in'xhzue' Abraham, len Bënni xëwi chi guk chi'xuunu iz nuge'e'nu lu baya' ni, ¿Naru ti rala usláaru'nu zala nak dza tu'ueak'laadxi'ke bënni Judea?

17Kati Jesús gne' le ni, bënni ti tale'i'de le' dxia'a gulazi'e yëla stou', san yugute' bunach tudziiji kati gulale'i'de yëla wak le le' ruune.

Diidza run lsaki'i ki xhsei mostaza

(Mt 13:31-32; Mr 4:30-32)

18Jesús gne' lekz'ka': «¿Bixh run lsaki'i yëla rnabe' kie' Dios, len bixh guuna ley lsaki'i? 19Nak ka tu xhsei mostaza le tue' bënni guuze lu layeel kie', ati rxhën len rak'te ka yaag xhën, len lu xhuuzi'i tuma liidx'kba bginn.»

Diidza run lsaki'i ki le rzaaxh

(Mt 13:33)

20Gne' Jesús lekz'ka': «¿Bixh gun guuna lsaki'i yëla rnabe' kie' Dios? 21Nak ka tu le rzaaxh le tuunu nguul rlaadxi'nu len tson gi'in yëëzj naar gzaaxh dera xhkuaanu'a.»

Puert'a nak gi

(Mt 7:13-14,21-23)

22Jesús yu'e nëëz ziije Jerusalén, len rseed'de yëdz yëdz ga rdëëde. 23Len tue' bënni bnaab'de le':

—Xan, ¿Naru lati'iz'ke bënni tule'?

Na' le' bubi'e diidza:

24—Gulgun bayuudx tzaaz'li puert'a nak gi; rea' lbi'ili zian'ke bënni le'en'de lane'ke, len ti gun. 25Kati chi gdëëd psiije ga ra'a'ru bënni xaani yu'u, lbi'ili tzka'li jga'an'li rayu'ul, uneeli len gnaali: “Xan, psaalj netu.” Na' le' ubi'e diidza: “Ti numbe'a gaxh bënni lbi'ili,” 26Na' sulau'li gnaali: “Gwi'i gdaagu'leen'tu li', len li' pseed'du la nëëz kietu.” 27Na' le' ubi'e diidza: “Ti numbe'a gaxh bënni lbi'ili. ¡Gultziaj ki'il, lbi'ili bënni run'li le ku nak!” 28Na' sulau'li këëdx'li len ktil la'ya'li, kati gle'i'li'ne Abraham, Isaac, Jacob len yugute'ke bënni glu'e diidza ulaaz kie' Dios nakua'ke lu yëla rnabe' kie' Dios, ati lbi'ili jga'an'li rayu'ul. 29Koma gdu gabi'i yëdz'lyu udujak bunach, naar labë'ke la'we lu yëla rnabe' kie' Dios. 30Guluyu'tzka bënni'a na'a nak'ke zelau ulak'ke bënni zia'al, len bënni'a na'a nak'ke zia'al ulak'ke bënni zelau.

Jesús rbëëdxe ki Jerusalén

(Mt 23:37-39)

31Lekz'ka' guladxiine la'ke fariseos, len gle'ke Jesús:

—Bxhunj, Herodes re'en'de gdëëd'de li.

32Le' bubi'e diidza:

—Gultziaj len gultzajëdx'ba bëëza'a: “Byu'tzka na'dza len kxhë rubiija bë' xëwi len ru'un'ka'ne bënni we', len wiidzj ru'uudx kia'.” 33Koma run bayuudx neda ugie'la'a xhnëëza na'dza, kxhë len wiidzj, koma ti gunn gatie' bënni rue'e diidza ulaaz kie' Dios ga ku nak yëdz Jerusalén.

34»¡Jerusalén, Jerusalén, rdëëd'kdu'ne bënni tue'e diidza ulaaz kie' Dios len rchiaj'ku'ne giaj bënni gbaaz kie' Dios! ¡Balti'i lzu gu'un'da yutuuba'bi bi kiu', ka ruma ikjed'bna' rgieedx'ba xi'in'ba, len lbi'ili ti gu'uni'li! 35Guluyu'tzka, liidx'li ulal'laadxi'ke; len rea' lbi'ili tir yule'i'li neda na' kati gdxin'r dza lbi'ili gnaali: “¡La'ay nake bënni ze'e ulaaz kie' Xan'ru!”»

Currently Selected:

Lucas 13: PZD

Highlight

Copy