Lucas 12

Jesús rseed'de kieke bënni'a nak'ke ka bënni nuda' blo'u

(Mt 10:26-27)

1Tzal'za guladzaag zian gayua' bunach, tzka'ti'ga bunach zian nak'ke tarëli'z lza'a'ke. Jesús gzulau'e gudxe zia'a bënni useed kie': «Gulun'chi'i kuin'li ki le rzaaxh leke bënni fariseo, le ni re'e'ni gna le nak'ke ka bënni nuda' blo'u. 2Gat'ga de le rak baga'chi'z ku gnëëz, len gat'ga de le naga'chi' ku gdxin glui' lau'i. 3Lena'a yugute' le chi gnaali ga nak chul, uyën lau'i dza; len le gnaali ga naga'chi'tzka len ga nak yu'u yeij, udu'kz yëdz'lyu gnëëzi.

Nuxh rala gaadxi'ru

(Mt 10:28-31)

4»Lbi'ili, bënni rdzaaga dxia'a, rgixhji'da lbi'ili ki ti rala gaadxi'li nu tudëëdi bunach, ati tëëd'a tirbi rak lun'ke 5Neda kixhji'da lbi'ili nuxha' rala gaadxi'li: Gulgaadxi'de bënni'a uudx kue' yëla naban kieeli, nape yëla wak ku'e lbi'ili lu gi'gabil. Le' rala gaadxi'li'ne

6»¿Naru keg ga'yu'ba bginn tuti'i'ke'ba ki chop dumi las'du? San keg tuuba nal'laadxe'e'ba Dios. 7Le rak lbi'ili lekz'ka' tu tu gitza ikj'li le' nulaabe. Lena'a ti rala gaadxi'li: Lbi'ili zaki'i'rli ka ziank'ba bginn'du.

Si'lunaa'ru naki'ru kie' Cristo lau'k bunach

(Mt 10:32-33; 12:32; 10:19-20)

8»Rea' lbi'ili ki xhki nu rzi'lu'ne'i neda lau'k bunach, lekz'ka' le' Xi'ine Bënni uzi'lu'ne'e le' lau'ke gbaaz la'ay kie' Dios; 9Ati bënni ti si'lu'ne'e neda lau'k bunach, lekz'ka' ti si'luna'a'ne lau'ke gbaaz la'ay kie' Dios.

10»Dios uzi'xhëëne zala bënni bi gne' kie' le' Xi'ine Bënni; san ti si'xhëëne bënni bi gne' kie' Bë' la'ay kie'.

11»Kati luche'ke lbi'ili lu yu'u useed, lau'ke bënni tuchuug'be'e len lau'ke bënni tunabe'ke, ti suáli bagi'i nakxh gun'li uzi'li kuin'li u bixh gnaali, 12Koma kati gdxin dza rala gneeli, le' Bë' La'ay kie' Dios gzeajni'i'de lbi'ili le gnaali.»

Banaadx le nuche' yëla tzawi ki yëdz'lyu ni

13Tue' bënni ze' ladj bunach'a gudxe Jesús:

—Bënni useed, gudxe bënni bë'cha'a gunne laaza le rala gaki kia'.

14Ati Jesús bubi'e diidza:

—Bë'cha'a, ¿Nuxh bzua neda kchuug'be'a len gun'gatzj'a le de kieeli?

15Lekz'ka' gne':

—Gulun'chi'i kuin'li ki yëla rzelaadxi'i dumi; koma ti ya'awi'ru yëla naban kieeru.

16Na' blaabe kieke tu diidza run lsaki'i: «Gzue' tue' bënni de'tzka yëla tzawi kie', len zxhëni buzi'tzke lu xhyue'a. 17Bënni ni gudxe ikj'laadxi'dau'e: “¿Bixh guuna? Ti zua ga gun'chi'a lea buzi'a lu xhyua' ni.” 18Len gudxe kuine: “Chi nëëz'da bixh guuna. Jkin'jka liidx yëëz kia' len un'ka ley le xhën, naar gun'chi'a gdu lea buzi'a len gdu le de kia'. 19Chi nak ka gie'a ikj'laadxi'dau'a: ki zian iz chi nun'chi'tzku; bueak'laadxu'u, gwi'i, gdaagu, buzi'xhbei yëla naban kiu'.” 20Ati Dios gudxe le': “Bënni ti nayajni'i, na'dzë' gatiu' len yugute' le chi nun'chi'u, ¿Nuxh ki gaki?” 21Ka rak kie' bënni'a rkudi'i'ze kie' yëla tzawi, san lau'e Dios ti lzaki'de.»

Dios run'chi'e bënni xi'ine

(Mt 6:25-34)

22Buudx'a gudxe bënni useed kie': «Le ni rea' lbi'ili: Ti suáli bagi'i bixh gia'aj'gaag'li tzal suáli yëdz'lyu, ti suáli bagi'i bixh laari gaku'li. 23Yëla naban kieeli zaki'i'r ka le gia'aj'gaag'li len zaki'i'r xhpeela'li ka laari raku'li. 24Guluyu'tzka'ba beikj: ti taaz'ba len ti talap'ba, tibi liidx yëëz len keg bi da'a xhua zua kiek'ba, san Dios rga'we'ba. ¡Gakati zaki'i'rli lbi'ili ka yugu bua' tazuuba! 25Len zala gakati kë'li bagi'i, ¿Naru gunn kxhën'li ye tu dza tzka za'li yëdz'lyu? 26Len xhki ti runn gun'li le ni, nak'te lati'iz, ¿Bixhkia' rbë'li bagi'i ki le ti nak lzaka'?

27»Guluyu' ka taxhën yaj: ti tunn dxin len ti taab yeel. San, rea' lbi'ili ki Salomón nak'te gu'ta'tzka bi gu'ta kie', ti benn'kz gne'e ka tana' yugu yaj'a. 28Xhki Dios ruune ga tana' ka' yaj'a rë' lau'gixi len ru'ueikj dza'a ryeegi, ¡naxh'gaar guune kieeli, lbi'ili bënni nayaadzji'li yëla rajle'! 29Len ti suáli bagi'i, kiilj'tekz'li le gia'aj'gaag'li. 30Koma yugute' le ni tabë'ke bagi'i bënni yëdz'lyu ni, san lbi'ili zue' Xuuz'li chi nëëz'de ki nayaadzji'li ley. 31Gulugi'i le nak ki yëla rnabe' kie' Dios, len le' gdxia'gbeedxe kieeli yugute' le ni.

Yëla tzawi ki yewayuba

(Mt 6:19-21)

32»Ti gaadxi'li bëku'xhiila'du kia', lati'iz'li nak'li, san Le' Xuuz'li lu yëla rak'len kie' bdzag'laadxe'e gunne kieeli yëla rnabe' kie'. 33Gulgu'ti' le de kieeli len gulunëëdzj kieke bënni nayaadzji'kde; gulgun bayuudx ga ga'ta kieeli yëla tzawi ki yewayuba le ti yu'u lu'uudx ki, len gulun'chi'i ga ti gak'ditji'kz, ga bënni gban ti gunn tzaazie len ga ti kë'ba be. 34Koma ga zua yëla tzawi kieeli, na' sua lekz'ka' laadxi'dau'li.

Rala suáru si'na

35-36»Gulgak ka bënni wendxin tabëëze yudxiine bënni xan'ke ziije gwi'i'waagu ki utzag'na', nakua'ke si'na len nugala'az'ke gi' ati nakua'kuase lusaalje yu'u ka yudxin'ze bënni ni. 37Bixhgaba'ke bënni wendxin'a bënni'a kati udxiine bënni xan'ke udzëël'de leke tana'ze. Le nak'te rea' lbi'ili ki bënni xan'ke ni guune ga labë'ke len sulau'e ke'e lindu'ke. 38Bixhgaba'ke, xhki yudzëël'de leke tana'ze zala yudxiine laadxi'yeel u ziil'bal. 39Le ni rala gnëëzi'li: nar'la bënni xaani yu'u nëëz'de batxh'tek giide bënni gban, ti gui'e latj nu tzaaz liidxe kuan le de kie'. 40Lbi'ili lekz'ka' gulsua si'na; koma kati nutunu nun'kz le' lëëz le' Xi'ine Bënni wëëde.»

Bënni wendxin nake kxënilaadxi'ru'ne len bënni ti nake kxënilaadxi'ru'ne

(Mt 24:45-51)

41Pedro bnaab'de le':

—Xan, ¿Diidza run lsaki'i ni gnou' kietu'z, u lekz'ka' kieke yugute'ke?

42Gne' Xan'ru: «¿Gaxh zue' bënni'a run'chi'e yëla tzawi len nake nu kxënilaadxi'i le' len rui'laadxe'e kati bënni xaane rka'ane lu ne'e bënni nakua'ke liidxe, naar gnëëdzje le la'we kati rala la'we? 43Bixhgabe' bënni wendxin'a kati yudxiine bënni xaane len udzëël'de le' ruune yugute' le rala guune. 44Blikz'da rnia' ka' ki bënni xaane'a uzue' le' gun'chi'e zura yëla tzawi kie'. 45San xhki bënni wendxin ni, guuni le' ki bënni xaane'a rdzeir'de yudxiine len sulau'e ksaka'dë'e ye la'ke bënni wendxin'a len rbë'e ria'aj'ra'we len rsuudxi kuine, 46dza kati ti nun'kze le' lëëz len kati ti nëëz'de, udxiine bënni xaane'a len ksaka'zi'e le', kchuug'be'e kie' ktzaage ka tutzaage bënni dula.

47»Bënni wendxin bënni'a nëëz'de bixha re'en'de bënni xaane, san ti zue' si'na len ti rzenaage ulusaka'zi'e le' len ulagiine zian lzu. 48San bënni wendxin bënni'a ti nëëz'de ruune le nak bach si'e yëla rsaka'zi', lati'iz lagiine le'. Bënni'a tui'ke le' zxhëni lez zxhëni ka' lunaab'de le', len bënni'a tuxëni'laadxe'e le' le nak zxhëni, zxhëni ka' luki'i'de le'.

Jesús ruune ga lu'la'a bunach

(Mt 10:34-36)

49»Neda za'a jkie'la'a gi' yëdz'lyu ni; len ¡Labi'ki'da chi raaxh gi' ni! 50Tu le barsaki rala si'be' neda, len ¡rtzaag'tzka tzal gdxin! 51¿Rsaka'ali lbi'ili za'a nua'a yëla rë'dxi ki yëdz'lyu ni? Rea' lbi'ili ti nak ka', za'a zdu'la'a lbi'ili. 52Len na'a kie'la', koma ki tu yu'u, ga'yu'e lu'la'a lza'a'ke, tsone' ladil'e len ye chope', ati chope' ladil'e len ye tsone'. 53Bënni til'e len bi kie', len bi kie' til'bi len le', xhna'bi til'nu len bi nguul kieenu, len bi kieenu ni til'bi len lenu, nguul nutzag'na'nu til'nu len tau'nu, len tau'nu til'nu len lenu.»

Le runn'be' bixh gun tu tu dza

(Mt 16:1-4; Mr 8:11-13)

54Jesús lekz'ka' gudxe bunach: «kati lbi'ili rle'i'li tula' buaj zga ga rbia gbiidz rnaali waal giaj len raal giaj. 55Len kati rluub bë' za' dxi'il, rnaali ki wak tuxhla len rak tuxhla. 56¡Nak'li ka bënni nuda' blo'u! Xhki rak'be'i'li nakxh rna' lu xhba len yëdz'lyu, ¿Koma ti rak'be'i'li bixh dza zuaali na'a?

Rala suáru lu yëla rë'dxi len bënni ku tale'i'de ro'u dxia'a

(Mt 5:25-26)

57»¿Bixhkia' ti rchuug'be'u kuin'kzu le nak dxia'a? 58Xhki nu bënni rajzue' li' yulau'i len riaj'leenu'ne lau'ke bënni tunabe'ke, ben lu bayuudx ga kueki'xhbei'li le ni tzal ni de latj, naar ti kche'e li' len bënni rchuug'be'e, xhki na'a, bënni'a rchuug'be'e ni udëëde li' lu naa'ke bënni tun'chi'ke liidx'gia, len bënni ni lagu'e li' liidx'gia. 59Rea' li' ki ti yurooju liidx'gia'a nakati kiixhjr'u zura dumi'a tzka rala gdxiu'.»

Currently Selected:

Lucas 12: PZD

Highlight

Copy