Lucas 14

Jesús ru'uune tue' bënni nëtje gi

1Guk tu dza tu'ueak'laadxi'ke bënni Judea, Jesús yajta'we liidxe bënni blou kieke fariseo, len ye la'ke fariseos tauyuudxe le'. 2Lekz'ka' zue' ni' lau'e Jesús tue' bënni nëtj gi ni'a'ne'e. 3Jesús bnaab'de bënni useed xhba kie' Dios len bënni fariseo:

—¿Ba de lsenz un'ru'ne bënni we', dza tu'ueak'laadxi'ke bënni Judea, u ti de?

4Ati leke ti gulane'. Na' le' gde'le'e bënni we' ni, buune le' len busë'le'e le'. 5Len gudxe bënni fariseo:

—¿Nuul'li xhki bua' beedx kieeli labixh'ba lu yeru nis, ti rubiaj'te'li'ba, zala nak dza tu'ueak'laadxi'ke bënni Judea?

6Ati ti glake lubi'e diidza.

Bënni nuliidze tu gwi'i'waagu xhën

7Kati Jesús byue' ka tuune tabë'ke latj nak'r dxia'a ki ga ta'we, be'leene leke diidza:

8—Kati tue' bënni gliidze li' gwi'i'waagu xhën ki utzag'na', ti kë'u lu latj blou, ka gna gdxiine ye tue' bënni nak're xhën ka li'; 9len bënni bliidze lbi'ili grop'li lni ni gun gie' li': “Bnëëdzj xhlatju kie' bënni ni.” Na' de ki tziiju len yëla stou' tzajchë'u xhanti. 10San kati luliidze li' gri'i xhanti, naar kati giide bënni'a nuliidze li', gne': “Bënni rdzaag dxia'a, gdëëd latj nak'r blou.” Ka gunn si'u bala'an lau'ke bënni'a rë'leen'ke li ga raag'li. 11Koma bënni run xhën kuine, uzi'e yëla stou'; len bënni nëxhj'laadxi, uzi'e bala'an.

12Lekz'ka' re' bënni'a bliidze le':

—Kati gnëëdzju tu gwi'i'waagu xhën, ti gliidz'ku'ne bënni rdzaag'ku'ne dxia'a, ti gliidz'ku'ne bënni bë'chu'u, ti gliidz'ku'ne bënni nak'li tuuz dia', ti gliidz'ku'ne bënni nakua'ke ga'la ga zu' len rë'tzka xhdumi'ke; koma leke lekz'ka' ululiidze li', ati uzi'tiu xhbei lea beenu'a 13Kati li guunu gwi'i'waagu xhën, bliidz'ke bënni yechi, bënni xhi, bënni natzj, bënni lau chul; 14Len udziij'du. Koma leke ti gun lagiixhje li', san li uzi'u xhbei dza kati bënni tuune le nak dxia'a la'we Dios lubaane lu yëla gut

Diidza run lsaki'i ki tu xhtzë' xhën

(Mt 22:1-10)

15Kati byëën'de le ni tue' bënni rë'e ga ta'we, gudxe Jesús:

—¡Bixhgabe' bënni'a sue' lu gwi'i'waagu xhën ki yëla rnabe' kie' Dios!

16Jesús re' le':

—Tue' bënni beene tu xhtzë' xhën, len bliidze bunach zian. 17Kati gzulau xhtzë' ni psë'le'e bënni wendxin kie' tzajliidze bënni'a nuliidze: “Gultza', chi de xhtzë'.” 18Ati yugute'ke bënni'a gulazulau'ke tunaabe yëla rzi'xhën. Bënni zia'a gne': “Labuudx'kz gu'uwa xhyua', len rala tzajyua' ratayui'da li' si'xhëënu neda.” 19Ye tue' gne': “Gu'uwa'ba ga'yu' nëëz'ba beedx len rala tzajxibe'ka'ba. Ratayui'da li' si'xhëënu neda.” 20Len ye tue' gne': “Labuudx'kz ptzag'na'a len ti runn sa'a.” 21Bënni wendxin ni' budxiine len blaabe kie' bënni xaane'a ka gulanake. Bënni xaane'a bdze'e, len re' bënni wendxin kie': “Gyaj ka'teez zu' lu nëëz xhën len nëëz laz ki yëdz xhën ni len yajxi'ke bënni yechi, bënni xhi, bënni lau chul len bënni natzj.” 22Guk tuchi'i, bënni wendxin kie' gne': “Xaana, chi beena ka gnou', len deer latj.” 23Na' xaane'a re' bënni wendxin ni: “Gyaj gap dzë'ëz nëëz xhën len gap nak nëëz laz, len ben ga layaazie bënni yubl naar gdza' liidxa ni. 24Koma rgixhji'da lbi'ili ki nutunu bënni'a bliidz'ka'ne zia'al la'we le nuuna xhtzë'.”

Le zaki'i tziaj'leen'ru'ne Cristo

(Mt 10:37-38)

25Bunach zian zjak'leene Jesús; len le' bueikje len gne': 26«Xhki nu bënni re'en'de giid'leene neda len ti nadxi'ir'de neda ka xuuze, ka xhne'e, ka nguul kie', ka bi kie', ka bënni bë'che'e, ka nguul zaane len ka kuin'kze, ti gunn gake bënni useed kia'. 27Len bënni ti rue'e yaag kruuz kie' len rza'leene neda, ti gunn gake bënni useed kia'. 28Xhki ladj'li ni zue' tue' bënni re'en'de guune tu yu'u sib, ¿Naru ti rbë'e zia'a ksake'e gaka ktë'e, naar gak'be'i'de xhki de le ksiuudx'de? 29Koma xhki jkue'e xhliibi len chi nak ka ti ksiuudxe, yugute'ke bënni lale'i'de le' lazulau'ke lutitj'de le', 30lanáke: “Bënni ni gzulau'e ruune yu'u, ati ti buudx'de ley.” 31Xhki tue' bënni rnabe'e rala tziije tzajtil'e len ye tue' bënni rnabe'e. ¿Naru ti rbë'e zia'a ksake'e xhki len chi mil'ze bënni gdil gun tzajxaka'lau'e bënni'a nuche'e galj mil'ke bënni gdil? 32Len xhki ti gunn tzajxaka'lau'e, kati zia'a ze'e zitu ye tue' bënni rnabe'e, ksë'le'e bënni gbaaz kie' naar lunaabe yëla rë'dxi. 33Ka nak, nuti'il'li xhki ti jka'an'li le de kieeli, ti gunn gak'li bënni useed kia'.

Kati zëdi' rsan nak sna'a

(Mt 5:13; Mr 9:50)

34»Le dxia'a zëdi'a; san xhki tir nak sna'a, ¿Nakxh wak un dxin? 35Gat'ga sua ga gun ki yu len ti nak bach gun beeb. Taru'un'ze ley. Tzka'li zua naag'li guluzenaag.»

Currently Selected:

Lucas 14: PZD

Highlight

Copy