Luhzaz 8

Le Yah Nowngz Yezsuz Naeh

1Mboq ndowj lai, Yezsuz bae ndaw chaenh, bae ka'mowngz, koanx kauqfaengz goh dij Sen dwk daenh, sipngih goanz cohsaenz dix daj dix zaemh yuq. 2Goj miz jiq yah nyingz ux daj dix zaemh yuq, le yah naeh koax daekgoanq paenqdix mbangj goanz zoah dij pi mwz ndang, mbangj goanz miz aen chaej, doaklaeng zoah Yezsuz ya ndae. Le yah naeh miz yah ux zawh Maxliqyaq ndaw longq Moahdaqlaz naeh, Yezsuz ndaej saeh dix daem jiat do pi ni ndang dix. 3Miz yah ux zawh Yezyaqnah yah mijmez Guxsax naeh. Goanz Guxsax naeh saeh laux hongz Cizlih gvanx ndaw rownz. Miz yah ux zawh Suzsanznah, naengz miz lai yah tem, paenqdix aeu ngaenzjenz hoakri saeh Yezsuz daj cohsaenz Yezsuz.

Aen Bixliq Sauq Kaeujmeg Naeh

4Miz vaenz ux, miz dij goanz lai taeuq yuq henz Yezsuz, goj naengz miz dij goanz daeq mbanj rawz raeuh maz, Yezsuz zoq aeu aen bixliq ux koanxdwk paenqdix, dix hax: 5"Miz goanz puj hoak gaengx ux bae sauq kaeujmeg. Gau dix sauq naeh, mbangj maet doak bae ka loh, zoah dij goanz nyanx, zoah dij noag jin nauq. 6Mbangj maet doak bae jeh tin, mboq miz naemx, kawq gvaq, faenzkaeuj daeh ngaed zoq choj nauq. 7Mbangj maet doak bae jeh nyaj,#8:7 Inxnaeh mbaednduq zawh hax: Mbangj maet doak bae jeh nam, nam daeh roak maz, zoq yaz nauq. nyaj daj go kaeuj zaemh maj, doaklaeng go kaeuj zoq zoah yaz nauq. 8Mbangj maet doak bae dih namh yawz, zoq kwnj maz, baenz jin, ndaej lai nyeuz baeg daep." Dix hax suq kauq naeh yaq, zoq caqsiq hax: "Miz mbawchu rux biak, zoq caqsiq biak!"

Baenzzaqrawz Yezsuz Aeu Bixliq Koanxdwk Daenh

9Cohsaenz dix cham dix aen bixliq naeh zawh hax gaeng. 10Yezsuz hax: "Goh dij Sen, koax daekgoanq dix mboq hawj gawz ruxndeq, gannaeh dix hawj su ruxndeq, gaj puj ndai dix naengz mboq hawj ruxndeq. Daj puj ndai gux aeu bixliq koanxdwk paenqdix, hawj paenqdix lez lej lez, gaj lez mboq taen, biak lej biak, gaj mboq ruxndeq.

Aen Bixliq Sauq Kaeujfaenz Naeh Zawh Hax Gaeng

11"Aen bixliq naeh zawh gaenq naeh: Faenzkaeuj zawh hax kauq dij Sen. 12Sowh maet doak bae ka loh naeh zawh hax: dij goanz ndaej biak kauq dij Sen yaq, do gvanx dij pi naeh cenq maz longx kauq dij Sen daeq ndaw zaw paenqdix bae,#8:12 Laux hongz dij pi minxzwh dix rongx hoak "Sazdanz." hawj paenqdix mboq sinq mboq ndaej jeuq. 13Sowh maet doak bae jeh tin naeh zawh hax: dij goanz ndaej biak kauq dij Sen yaq, ndaw zaw faengz, zoq cenq sinq kauq dij Sen ndauj ux, gaj kauq dij Sen yuq ndaw zaw paenqdix daj go kaeuj mboq miz laeg dungzlumj, daeh ciq paenqdix, paenqdix zoq zoangq. 14Sowh maet doak bae jeh nyaj naeh zawh hax: dij goanz ndaej biak kauq dij Sen yaq,#8:14 Inxnaeh mbaednduq zawh hax: Sowh maet doak bae jeh nam naeh zawh hax dij goanz biak kauq dij Sen yaq. gaj pyej gaenq dihndin lai yowngh gvaq, zoah ngaenzjenz, gaenqzaih gaenqfaengz tumj nauq, zoq mboq miz maet maeg. 15Gaj sowh maet doak bae dih namh yawz naeh, zoq zawh dij goanz ndaej biak kauq dij Sen yaq, zawswh zaw ndae dawz dix, hoj sanq hoj taj, taengdeg dix baenz jin.

Gaenq Aeu Gowx Ndae Mwznaj Miz Dij Goanz Ruxndeq

16"Mboq miz gawz diamj daeng yaq aeu aen raeng gumq, rux aeu nyaengx dawj tanj, ej mboq aeu nyaengx now zongz! Daeng aeu nyaengx now zongz, hawj puj ndonj maz zux leztaen rungh. 17Gaeng saeh gojvenj, daengz aeu gowx ndae gajrawz goj rux miz puj ruxndeq, gaeng saeh gojvenj, daengz aeu yaz ndae gajrawz goj rux miz puj ruxndeq. 18Gawz ruxndeq kauq dij Sen, dij Sen zoq hawj dix ruxndeq tem, gawz mboq ruxndeq kauq dij Sen, daengz gaenqdix hax gaenqdix ruxndeq naeh dij Sen naengz hawj dix mboq ruxndeq. Baenzzaqnaeh su caqsiq biak ndae'ndowq."

Gawz Zawh Dij Goanz Rownz Yezsuz

19Meh Yezsuz daj le nongx zaiz Yezsuz maz dih Yezsuz naeh, gaj miz dij goanz lai gvaq, paenqdix mwz haenz Yezsuz mboq baenz. 20Miz dij goanz haxdoq Yezsuz: "Meh mawz daj le bihnongx zaiz mawz yuq baihnog, paenqdix cha mawz." 21Yezsuz yaeng: "Gawz biak kauq dij Sen bae hoak, gawz zoq zawh meh gux, bihnongx zaiz gux."

Yezsuz Hawj Laemz Dwx Mbaet, Hawj Naemx Fowd Gah

22Miz vaenz ux, Yezsuz daj cohsaenz dix kwnj mwz ndaw lowz, dix daj paenqdix hax: "Gaenqraeuz uaij lowz bae doiqfaeg." Paenqdix zoq uaij lowz bae. 23Gau lowz chaeg naeh, Yezsuz noanzlaep. Ndaw kow hubhaeb miz laemz dwx, lowz zaekgaj zaem, nyinzndang taeuq. 24Cohsaenz Yezsuz byoak Yezsuz, daj dix hax: "Lauxswz, lauxswz, gaenqpiu zaekgaj tai yaj!" Yezsuz ruxndownq, zoq hwt laemz hwt naemx, laemz daj naemx zoq byaek zoq dingh. 25Yezsuz daj paenqdix hax: "Gaenqsu baenzzaqrawz naengz mboq sinq gux mux?" Cohsaenz dix mbu taeuq, sawz taeuq, goanz lej daj goanz hax: "Dix zawh gawz mux? Dix yaix laemz daj naemx, laemz daj naemx goj biak dix ngah."

Ya Ndae Goanz Gowhlazsaenz Zoah Dij Pi Mwz Ndang Naeh

26Paenqdix uaij lowz mwz taeng doiqfaeg aen kow Zazliqliq, dih dij goanz Gowhlazsaenz yuq naeh. 27Longq naeh miz goanz ux zoah dij pi mwz ndang. Gau Yezsuz hiamq mwz taeng dihliangx naeh, goanz dij pi mwz ndang naeh daeq maz doq Yezsuz. Goanz naeh haeuz ndowj taeuq mboq nungh ndangnungh, mboq yuq ndaw rownz ndowj, yuq gaj ndaw mohbujreuh ndowj. 28Dix daeh taen Yezsuz, zoq gvih bae doqnaj dix rongx: "Yezsuz, lug zaiz dij Sen dwx nyeuz daengzle naeh, mawz baenzzaqrawz daet gux? Vanz mawz laek vazkuz gux." 29Dij pi baenzzaqrawz hoakzaqnaeh hax, zawh Yezsuz haeuz nemz dij pi daeq ndaw ndang goanz naeh og daeuj. Laemh goanz naeh, dix kwnz zoah do pi naeh jenj, dix goj ndaej zoah daenh aeu tiksaed puk, yaq naengz miz dij goanz dawz, gaj dix tip daengz tiksaed kaed nauq, zoah dij pi daem bae ndaw doanghmowz. 30Yezsuz cham dix: "Minxzwh mawz rongx hoak gawz?" Dix yaeng: "Rongx hoak boangx." Unj, dij pi mwz ndang goanz naeh lai taeuq, minxzwh dix zoq rongx hoak Boangx. 31Paenq pi naeh vanz Yezsuz, laek daem paenqdix bae luh mboq miz dej naeh.

32Haenz bo paenqdix yuq naeh miz boangx mu ux jin gaenqjin. Paenqdix vanz Yezsuz hawj paenqdix mwz ndaw boangx mu naeh. Yezsuz zoq hawj paenqdix mwz. 33Dij pi daeq ndaw ndang goanz naeh og daeuj, mwz ndaw boangx mu naeh. Boangx mu naeh lenh bae aen ndanq haenz kow naeh, doak bae ndaw kow, daengzle zaem tai nauq.

34Puj dawz mu leztaen sowh saeh naeh zoq lenh ni, lenh mwz hangzhw, bae ka'mowngz haxdoq daenh mbaed saeh naeh. 35Daenh zoq maz lez zawh gaeng saeh, maz taeng dih Yezsuz naeh, leztaen goanz dij pi haeuz mboq yuq ndang naeh, nungh ndangnungh naengh doqnaj Yezsuz, yuq dih naeh dinghleuj. Paenqdix zoq mbu taeuq. 36Sowh puj ndaej taen mbaed saeh naeh zoq haxdoq paenqdix goanz zoah dij pi mwz ndang naeh hoakrawz ndaej ya ndae. 37Dij goanz mbanj Gowhlazsaenz naeh mbu taeuq, baenzzaqnaeh paenqdix daengzle vanz Yezsuz ni paenqdix. Yezsuz zoq naengh lowz dauh bae. 38Goanz dij pi haeuz ni dix naeh vanz Yezsuz, vanz Yezsuz hawj dix nowngz bae ndoij. Gaj Yezsuz nemz dix dauh bae, hax: 39"Mawz dauh bae rownz ndeh, bae laemh dij Sen saeh mawz hoak gaeng saeh." Goanz naeh zoq daeq daengz hangzhw nauq, laemh Yezsuz saeh dix hoak gaeng saeh.

Yezsuz Ya Goanz Nyingz Baih Dawj Baenz Sowh Lowd Lae Naeh Ndae

40Daengzle taj Yezsuz, gau Yezsuz dauh maz naeh, daengzle bae raep dix. 41-42Miz goanz ux rongx hoak Yeznuq, dix gvanx rownzndawcowq dih naeh, dix miz ndiq lug nyingz doag, ndiq lug nyingz dix ndaej teq sipngih bi ux naeh, ndiq lug nyingz dix zaekgaj tai. Baenzzaqnaeh dix gvih bae doqnaj Yezsuz, vanz Yezsuz bae rownz dix.

Gau Yezsuz daj dix bae naeh, miz dij goanz lai taeuq nyenj Yezsuz. 43Miz goanz nyingz ux, baihdawj dix gaj vaenz gaj baenz sowh chaej lowd lae naeh, haeuz baenz ndaej sipngih bi, dix bae dih bae lez aen chaej, jenz dix bae ndaw mungz puj ya chaej nauq, gaj mboq miz gawz ya dix ndae. 44Dix nyenj maz baihlaeng Yezsuz, lumh din sowj Yezsuz, sowh dih lowd lae dix naeh cenq mbaet. 45Yezsuz hax: "Gawz lumh gux ah?" Daengzle gawz goj mboq yinq. Bihdowh hax: "Lauxswz, daengzle nyenj mawz." 46Gaj Yezsuz hax: "Gux ruxndeq doakriangz gux daeq ndang gux bae, miz dij goanz lumh gux singjringh." 47Goanz nyingz gaengnaeh ruxndeq gowx mboq gvaq, saenq rowdrowd daeq maz doq Yezsuz, gvih bae doqnaj Yezsuz, yuq doqnaj daengzle haxdoq Yezsuz dix baenzzaqrawz lumh Yezsuz, yaq aen chaej dix hoakzaqrawz cenq ndae. 48Yezsuz daj dix hax: "Lugnyingz, mawz sinq gux, mawz ndaej jeuq yah, mawz dauh bae vangqdangh ndeh!"

Yezsuz Hawj Ndiq Nyingz Ux Daeuq Zaeu

49Gau Yezsuz hax kauq naeh, miz dij goanz daeq rownz Yeznuq goanz gvanx rownzndawcowq naeh maz, daj Yeznuq hax: "Lugnyingz mawz haeuz tai yaq, naengz mahfanh lauxswz hoak gaeng mah?" 50Yezsuz ruxnyinz zoq daj Yeznuq hax: "Laek mbu, nanghgaj sinq, lug nyingz mawz zoq ndaej jeuq." 51Mwz taeng rownz Yeznuq yaq, Yezsuz hawj gaj Bihdowh, Yezhanq, Yaqgowh, bohmeh ndiq nyingz naeh daj dix zaemh mwz ndaw rownz, gvaqmaz puj ndai mboq hawj mwz. 52Dij goanz dih naeh daengzle haej ndiq lug nyingz naeh, haej vauhvauh. Yezsuz hax: "Laek haej, ndiq naeh mboq zawh tai, zawh noanzlaep naeuj." 53Paenqdix ruxndeq ndiq naeh haeuz tai yaq zoq kosaemj dix. 54Yezsuz laeg qen ndiq naeh, rongx dix: "Lugnyingz, dwnq maz!" 55Minghkoan ndiq naeh dauh daeuj, ndiq naeh zoq cenq dwnq maz, Yezsuz yaix sowh puj yuq ndaw rownz naeh aeu kaeujpyaek maz hawj ndiq naeh jin. 56Bohmeh ndiq naeh sawz taeuq. Yezsuz yaix paenqdix laek aeu sowh saeh naeh haxdoq daenh.

Currently Selected:

Luhzaz 8: ZHN

Highlight

Copy