Luhzaz 9

Yezsuz Nemz Sipngih Goanz Dij Goanz Zawx Kauq Dix Bae Zau Daenh

1 Yezsuz rongx daengz sipngih goanz dij goanz zawxkauq dix maz, aeu doakriangz daj qenhliq hawj paenqdix, hawj paenqdix rux ndaem dij pi, sowh dij pi rawz goj rux ndaem, hawj paenqdix rux ya chaej, 2nemz paenqdix og bae, aeu kauqfaengz Goh dij Sen koanx dwk daenh daj saeh daenh ya chaej. 3Yezsuz daj paenqdix hax: "Gaenqsu og bae, laek laep gaeng bae, laek tw maexdaeux, laek laep daeh, laek laep gaenqjin, laek laep jenz, goj laek laep sowh sowj aeu lwh ndang naeh, 4yuq rownz gawz ndowj, zoq ndowj taengdiak su ni. 5Jixzawh miz dij goanz mboq venq hawj su ndowj, su ni longq naeh zwzrawz, chaeuq mowdmoanz ndaw din su ni, hoakzaqnaeh zawh hax paenqdix hoak mboq hoj." 6Yaq paenqdix zoq og bae, bae longq bae longq, koanx kauqfaengz dij Sen dwk daenh, saeh daenh ya chaej.

Cizlih Mboq Ruxndeq Yezsuz Zawh Gawz

7 Cizlih goanz yuq baihdawj laux hongz Goh Loahmax hoak hongz naeh, dix ruxnyinz suq saeh Yezsuz hoak naeh, mboq ruxndeq zawh gaeng saeh. Cizlih baenzzaqrawz mboq ruxndeq gaenq Yezsuz hoak naeh zawh gaeng saeh, zawh dix ruxnyinz miz dij goanz hoakzaqnaeh laemh Yezsuz: "Dix zawhYezhanq tai yaq daeuq zaeu." 8Goj ruxnyinz miz dij goanz hax: "Dix zawh Yixliqyaq, Yixliqyaq daeuq daeuj yah." Naengz ruxnyinz miz dij goanz hax: "Dix zawh zwzpujjeq puj zawxkauq dij Sen goanz ux daeuq zaeu." 9Cizlih hax: "Gux haeuz daet to Yezhanq yaq, gux ruxnyinz Yezsuz gannaeh hoak sowh saeh naeh, dix zawh gawz nix?" Yaq dix zoq nwh bae taen Yezsuz.

Suanq Gaj Puj zaiz, Yezsuz Hawj Haj Tiang Goanz Jin Imq

10Dij goanz zawxkauq Yezsuz dauh maz, paenqdix og bae hoak gaeng raeuh, paenqdix laemh dwk Yezsuz, Yezsuz zoq zowz gaj paenqdix haeggaj bae longq Boahsaiqdaq. 11Puj ndai ruxndeq goj nowngz dix bae. Paenqdix daeuj, Yezsuz zaemz paenqdix, laemh Goh dij Sen dwk paenqdix, ya puj chaej. 12Sowh gau tang'vaenz laij doangh naeh, sipngih goanz dij goanz zawxkauq Yezsuz maz daj Yezsuz hax: "Inxnaeh zawh ndaw doanghmowz, hawj paenqdix dungzbyaeg ej, hoakzaqnaeh hawj paenqdix mwz le longq haenzhenz inxnaeh cha dih ndowj, cha gaenqjin." 13Yezsuz hax: "Gaenqsu aeu gaenqjin hawj paenqdix jin mah!" Paenqdix yaeng: "Gaenqpiu zux miz haj aen binx daj song do bya, jixzawh mboq mwz swx gaenqjin tem mboq doh goanz lai baenzzaqnaeh jin." 14Zwz naeh, suanq gaj puj zaiz zoq miz teq haj tiang goanz ux naeh. Yezsuz daj cohsaenz dix hax: "Yaix paenqdix hoak boangx hoak boangx naengh, boangx ux teq hajsip goanz ux naeh." 15Cohsaenz zoq biak kauq dix bae hoak, yaix daengzle naengh. 16Yezsuz gaem haj aen binx daj song do bya, ngangh to lez mwz ndaw fax, mbaiq dij Sen, peg binx daj dij bya, yenh hawj cohsaenz dix, aeu hawj daengzle. 17Daengzle gaj goanz gaj jin imq, gaenq low zaep ndaej sipngih ka choiq.

Bihdowh Hax Yezsuz Zawh Jizduz

18Miz mbaed ux, sowh gau Yezsuz goanzdoag haeggaj daj dij Sen hax kauq naeh, cohsaenz dix daeq maz henz dix, dix cham paenqdix: "Daenh hax gux zawh gawz?" 19Paenqdix yaeng: "Mbangj goanz hax mawz zawh Yezhanq goanz saeh daenh hoak diauq zauh soiq naeh, mbangj goanz hax mawz zawh Yixliqyaq, mbangj goanz hax mawz zawh zwzpujjeq puj zawxkauq dij Sen goanz ux daeuq zaeu." 20Dix daeuq cham paenqdix: "Gaenqsu hax gux zawh gawz?" Bihdowh yaeng: "Zawh goanz dij Sen aeu hoak Jizduz naeh!" 21Yezsuz saengq paenqdix laek aeu mbaed saeh naeh haxdoq gawz. 22Daeuq hax: "Gux Lug Dij Goanz ndaej jinkaem taeuq zuxbaenz. Mwznaj sowh puj saeq gvanx puj Yaeuhtaiq naeh, sowh goanz gvanx puj mbud dij Sen naeh, sowh lauxswz zau Sw Dij Sen naeh, paenqdix viangh gux, kaj gux, vaenz daih sam gaenqgux zux daeuq zaeu."

23 Yezsuz daeuq daj daengzle hax: "Jixzawh gawz zawx nowngz gux, zoq aeu gaenq gux nyaengx daekgoanq, aeu gaenq hoakri nyaengx doaklaeng, vaenz vaenz baz maexngamzchaz hoakri maz nowngzlaeng gux. 24Gawz zawx jeuq aen mingh dihndin naeh, gawz zoq laem aen mingh daengznauq naeh. Gaj jixzawh gawz zawh cholaeng gux viangh aen mingh dihndin naeh, gawz zoq jeuq ndaej aen mingh daengznauq naeh. 25Jixzawh dij goanz gawz ndaej daengz dawjfax nauq, gaj dix zawh aeu aen mingh dix bae lwh, hoakzaqnaeh daengz ndaej goj bowhbowh ndaej. 26Gannaeh gawz aeu gux daj kauq gux hoak gaenq laizlom, mwznaj gux Lug dij Goanz miz najta hoakri, miz najta Dez ndaw fax, miz najta boangx bin dij Sen naeh loangz daeuj zwzrawz, gux goj aeu dix hoak gaenq laizlom. 27Gux haxdoq su swhlit: in yuq inxnaeh, miz dij goanz naengz mboq tai rux ndaej taen goh dij Sen."

Yezsuz Yuq Ndaw Bo Byenq Rungh Taeuq

28Gvaq hax suq kauq naeh ndaej teq biad vaenz ux naeh yaq, Yezsuz zowz Bihdowh, Yezhanq daj Yaqgowh mwz ndaw bo daj dij Sen hax kauq. 29Gau Yezsuz daj dij Sen hax kauq naeh, naj dix byenq, rux rungh daj tang'vaenz dungzlumj, sowj dix rux rungh, lownq taeuq. 30Sowh gau naeh, cohsaenz Yezsuz faekfongh daeh leztaen Moahciz daj Yixliqyaq, doiqnaeh daj Yezsuz laemhkauq,#9:30 Moahciz daj Yixliqyaq, doiq naeh zawh zwzpujjeq puj zawxkauq dij Sen. Moahciz mai fahlih dij Sen, Yixliqyaq hoak sowh saenh yaengh saenh naeh. Lez Sw Ni Aizjih, Sw Laux hongz Bwnz Daih Aet Naeh, Sw Laux hongz Bwnz Daih Ngih Naeh 31doiqdix yuq ndaw ngaeuz dij Sen, laemh gaenq saeh Yezsuz tai naeh, zoq zawh gaenq dix zaekgaj yuq Yezluqsaxlaengx hoak nauq naeh. 32Bihdowh daj dungzbownh dix tainoanz, saek ngut saek ngaenh. Paenqdix jinh yaq, leztaen Yezsuz rungh rowngzfwk, leztaen song goanz daj dix zaemh in naeh. 33Gau song goanz daz ni dix naeh, Bihdowh daj Yezsuz hax: "Lauxswz, gaenqpiu yuq inxnaeh ndae zaeh! Gaenqpiu daengj sam aen zangjpungh, aen ux hawj mawz, aen ux hawj Moahciz, aen ux hawj Yixliqyaq." Dix mboq ruxndeq hoakri dix hax gaeng. 34Gau dix hax gaemz kauq naeh, miz kvaix pajfax ux maz yaz paenqdix, paenqdix ndonj mwz ndaw pajfax. Cohsaenz gaj goanz gaj mbu. 35Miz hiang kauq daeq ndaw pajfax daeuj, hax: "Dix zawh lug zaiz gux, zawh gaenqgux lowg, gaenqsu yauq biak dix!" 36Hiang kauq mwz rawz yaq, Yezsuz goanzdoag dix haeggaj yuq dih naeh. Le vaenz gaengnaeh, cohsaenz mboq daj gawz laemh suq saeh paenqdix leztaen naeh.

Yezsuz Saeh Maeng Ux Daem Dij Pi Ni

37Vaenzlaeng, paenqdix daeq ndaw bo daeuj, miz yaengh boangx goanz daeq maz doq Yezsuz. 38Boangx goanz naeh miz goanz ux caqsiq rongx: "Lauxswz, vanz mawz saeh maeng lug zaiz gux mbaed'ux, gux zux mizgaj maeng lug zaiz doag naeh. 39Dij pi daeh jenj dix, dix zoq daeh rongx, yaq saenq rowdrowd, ndaw baeg miz fogfauz. Dij pi nyuk dix bae dauh bae dauh, damz zwzzwz jenj dix. 40Gux vanz cohsaenz mawz daem dij pi ni, gaj paenqdix hoak mboq taeng." 41Yezsuz hax: "Aeh! Dij goanz zoh su gannaeh yaeuq mbowq yaeuq mboq sinq dij Sen ah! Gux haeuz daj su zaemh yuq ndowj baenzzaqnaeh, gaenqsu naengz mboq sinq. Gaenqsu daz hawj gux daj su zaemh yuq taeng zwzrawz mux? Gux gaemx su taeng zwzrawz mux?" Yaq Yezsuz daj dez maeng gaengnaeh hax: "Zowz lug zaiz mawz maz dih gux inxnaeh ndeh." 42Gau maeng lug gaengnaeh daeq maz naeh, dij pi hawj dix laemx, hawj dix saenq rowdrowd. Yezsuz hwt do pi naeh, ya maeng lug naeh ndae, aeu dix hawj dez maeng gaengnaeh. 43Daengzle menq sawz menq zaemz doakriangz dwx dij Sen.

Yezsuz Mbaed Daih Ngih Hax Dix Rux Tai Yaq Daeuq Zaeu

Gau daengzle menq sawz menq zaemz suq saeh naeh, Yezsuz daj cohsaenz dix hax: 44"Gux Lug Dij Goanz mwznaj zoah aeu hawj daenh. Su aeu gaemz naeh nyaengx zaw." 45Dij Sen mboq hawj cohsaenz ruxndeq, hoakzaqnaeh paenqdix mboq ruxndeq gaemz kauq naeh hax gaeng, paenqdix goj mboq ganz cham.

Cohsaenz Dungzjinj Zawh Gawz Dwx Nyeuz Daengzle

46Cohsaenz dungzjinj yuq goh dij Sen paenqdix zawh gawz dwx nyeuz daengzle.#9:46 Yuq goh dij Sen: Gaemz kauq naeh zawh yuq Maxtaiq 18:1. 47Yezsuz ruxndeq paenqdix nwh gaeng, zoq zowz maz goanz lug eng ux, hawj dix yuq haenz hoakri in. 48Dix daj cohsaenz dix hax: "Nanghgaj gawz cho zwh gux ej doiq goanz lug eng inxnaeh ndae, zoq zawh doiq gux ndae. Nanghgaj doiq gaenqgux ndae, zoq zawh doiq laux nemz gux daeuj naeh ndae. Gaenqsu gawz hoak puj ix nyeuz gawz zoq baenz puj dwx nyeuz daengzle." 49Yezhanq hax: "Lauxswz, gaenqpiu leztaen miz goanz ux aeu zwh mawz daem dij pi, gaj gaenqdix mboq daj piu nowngz mawz, piu zoq daet dix, mboq hawj dix hoak." 50Yezsuz hax: "Laek daet dix, unj, gawz mboq daet su, gawz zoq zawh daj su zaemh baih."

Dij Goanz Saxmaxliqyaq Mboq Zaemz Yezsuz

51Zaekgaj taeng vaenz Yezsuz zoah raep mwz ndaw fax naeh, dix zoq mwz Yezluqsaxlaengx, mwz hoanhhoanh. 52Dix yaix dij goanz mwz daekgoanq dix, sowh dij goanz dix yaix mwz naeh mwz taeng mbanj Saxmaxliqyaq longq ux, dox dih ndowj taj dix. 53Yezsuz daeq mwz baih Yezluqsaxlaengx, mwz hoanhhoanh, baenzzaqnaeh dij goanz Saxmaxliqyaq mboq zaemz dix. 54Cohsaenz dix Yaqgowh, Yezhanq leztaen yaq, zoq hax: "Zaeuj aj, mawz hawj piu yaix faez daeq ndaw fax loangz daeuj pyaeu paenqdix lown nauq vah?" 55Yezsuz ueq dauh laeng hwt doiqdix. 56Dij goanz dihnaeh mboq zaemz paenqdix, paenqdix zoq mwz longq ndai.

Miz Dij Goanz Vanz Yezsuz Hawj Paenqdix Nowngz Dix

57Gau paenqdix daeq loh naeh, miz goanz ux daj Yezsuz hax: "Daengz mawz mwz rawz, gux goj nowngz mawz!" 58Yezsuz hax: "Ma'bo miz ruz ndowj, dij noag miz mungx ndowj, gaj gaenqgux Lug Dij Goanz lej daengz dih bomj naengz mboq miz neh." 59Yezsuz daj puj ndai goanz ux hax: "Mawz maz nowngz gux." Goanz naeh hax: "Zaeuj aj, hawj gux dauh mwz rownz taj mwznaj gux moak dez gux ndae'ndowq yaq, gux goanq daeuj nowngz mawz." 60Yezsuz hax: "Hawj sowh puj zaw haeuz tai naeh haeggaj moak puj tai paenqdix ndae'mah, mawz aeu kauqfaengz dij Sen bae koanx dwk daenh." 61Daeuq miz goanz ux hax: "Zaeuj aj, gux venq nowngz mawz, gaj hawj gux dauh mwz daj ndaw rownz dungzbyaeg goanq." 62Yezsuz hax: "Mungz gaem gaenz tae, ta lez bae baihlaeng, sowh dij goanz naeh mboq paeq yuq Goh dij Sen kvej."

Currently Selected:

Luhzaz 9: ZHN

Highlight

Copy