Luhzaz 7

Yezsuz Hawj Goanz Puj koij Lenhzangx Ux Ndae

1 Yezsuz daj daengzle hax nauq suq kauq naeh yaq, zoq ndonj mwz ndaw longq Zazbowhnungh. 2Dih naeh miz goanz leanhzangx ux,#7:2 Yuq ndaw Goh Loahmax, goanz leanhzangx ux gvanx baeg goanz bin ux. goanz leanhzangx naeh miz goanz puj koij ux baenzchaej, zaekgaj tai, goanz puj koij naeh yuq ndaw zaw leanhzangx zawh goanz ux. 3Lenhzangx ruxnyinz suq saeh Yezsuz naeh, zoq qingj jij goanz puj Yaeuhtaiq sowh puj jeq gvanx rownzndawcowq naeh bae dih Yezsuz naeh, vanz Yezsuz maz ya goanz puj koij dix. 4-5Sowh puj Yaeuhtaiq puj jeq gvanx rownzndawcowq naeh zoq maz dih Yezsuz naeh, vanz Yezsuz zaeh zaeh. Paenqdix hax: "Goanz leanhzangx naeh ngaiq puj Yaeuhtaiq raeuz, saeh raeuz daengj rownzndawcowq, dix paeq hawj mawz saeh." 6Yezsuz zoq daj paenqdix zaemh mwz. Gau Yezsuz zaekgaj mwz taeng rownz leanhzangx naeh, leanhzangx qingj dungzbownh dix jij goanz ux daeuj hoakzaqnaeh hax: "Zaeuj aj! Mahfanh mawz gvaq eh, gux mboq paeq hawj mawz haeggaj maz rownz gux, 7gux goj mboq paeq bae taen mawz. Nanghgaj mawz hax gaemz kauq ux, puj koij gux zoq ndae mboqyaq. 8Gux goj yuq baihdawj daenh hoak saeq, baenz biak daenh hoak, gaj baihdawj gux goj miz bin, bin baenz biak gux hoak. Gux daj bin gux goanz naeh hax: ‘Bae!’ Dix zoq bae. Gux daj goanz mawq hax: ‘Maz’ dix zoq maz. Gux daj puj koij gux hax: ‘hoak gaenq naeh!’ Dix zoq hoak." 9Yezsuz ruxnyinz suq kauq naeh, zoq menq sawz menq zaemz, ueqlaeng bae daj boangx nowngzlaeng dix naeh hax: "Gux haxdoq su, dix mizzaw sinq gux baenzzaqnaeh, daengz puj Yixsowhleh gux naengz mboq sanz taen gawz mizzaw sinq gux baenzzaqnaeh."#7:9 Inxnaeh dij goanz Yixsowhleh zoq zawh hax dij goanz Yaeuhtaiq. 10Sowh puj leanhzangx qingj daeuj naeh dauh mwz taeng rownz, leztaen goanz puj koij gaengnaeh haeuz ndae yaq.

Yezsuz Yuq Ndaw Longq Nahyinz Naeh Hawj Goanz Tai Ux Daeuq Zaeu

11Doaklaeng Yezsuz bae longq ux, longq naeh minxzwh rongx hoak Nahyinz, miz cohsaenz dix daj yaengh boangx goanz dwx daj dix zaemh bae. 12Gau Yezsuz zaekgaj bae daeux baeg longq naeh, daenh tam goanz puj tai ux daeuj. Goanz puj tai naeh rownz dix zux miz goanz zaiz doag dix, dez dix goj haeuz tai yaq, meh dix zawh yahmaij, ndaw longq dix miz yaengh boangx goanz hoak bownh meh dix daeuj. 13Zaeuj leztaen yah po haeuz tai yaq naeh, zoq zawchaej dix, daj dix hax: "Laek haej!" 14Yaq Yezsuz daeq mwz naj, aeu mungz lumh zaqmaex tam goanz puj tai naeh, sowh puj tam naeh zoq ced. Yezsuz hax: "Mbauqreauh, gux nemz mawz dwnq maz!" 15Goanz puj tai naeh zoq dwnq maz naengh, aj baeg hax kauq. Yezsuz aeu dix hawj meh dix. 16Daengzle menq sawz menq mbu, biangz dij Sen hax: "Zawjraeuz miz goanz puj zawxkauq dij Sen ux yah, dix haen taeuq." Yaq daeuq hax: "Dij Sen daeuj zauzhuz dij goanz dix yah!" 17Yaq gaenq Yezsuz hoak naeh zoq leuz daengz mbanj Yaeuhdaq daj sowh longq haenzhenz naeh nauq.

Yezhanq Nemz Song Goanz Cohsaenz Dix Bae Dih Yezsuz Naeh

18Cohsaenz Yezhanq aeu suq saeh Yezsuz hoak naeh dauh mwz haxdoq Yezhanq. Yezhanq zoq rongx cohsaenz dix maz song goanz, 19yaix paenqdix mwz dih Zaeuj naeh, hoakzaqnaeh hax: "Zwzpujjeq, puj zawxkauq dij Sen hax rux daeuj goanz ux jeuq dij goanz. Goanz naeh zawh mawz vah? Rux naengz hawj piu taj puj ndai ah?" 20Song goanz naeh mwz taeng dih Yezsuz naeh, hax: "Yezhanq goanz saeh daenh hoak diauq zauh soiq naeh yaix piu maz cham mawz: ‘Mawz zawh goanz daeuj jeuq dij goanz naeh vah? Rux naengz hawj piu taj puj ndai ah?’"#Maxlazjiz 3:1. 21Laemh gau naeh, Yezsuz ya ndae puj baenzchaej, ya ndae sowh puj baenzchaej naek naeh goanz lai taeuq, daem sowh dij pi mwz ndang naeh ni, hawj puj ta'mbud rux leztaen goanz lai taeuq. 22Yezsuz yaeng paenqdix: "Gaenqsu dauh mwz, aeu sowh gaenq su leztaen naeh daj sowh gaenq su ruxnyinz naeh haxdoq Yezhanq. Zoq zawh puj ta'mbud rux leztaen, puj ka'ndiak ka dix daeuq ndae rux daeq yaeb'yaeb, puj baenznux ndaej ndae sawrik, puj chu'nog rux ruxnyinz, puj tai rux daeuq zaeu, puj baenzluk ndaej ruxnyinz kauqfaengz dij Sen. 23Gawz leztaen sowh gaenq gux hoak naeh, goj naengz zaemz gux, gawz zoq faengz yah."

Yezsuz Laemh Yezhanq

24Sowh puj Yezhanq yaix daeuj naeh dauh mwz yaq, Yezsuz zoq laemh Yezhanq dwk daengzle, dix hax: "Jeh Yezhanqyuq ndaw doanghmowz naeh, gaenqsu bae ndaw doanghmowz lez gaeng mux? Lez sowh maexoaj laemz baeuq vae bae vae dauh naeh maj? 25Gaenqsu og bae lez gaeng mux? Lez sowh puj nungh ndangnungh yawz, zaijjenz faihfog naeh maj? Sowh goanz naeh lej yuq ndaw rownzhongz ndowj mbezneh. 26Haenx, gaenqsu og bae lez gaeng mux? Lez puj zawxkauq dij Sen raj? Wnh. Gux haxdoq su, Yezhanq mboq daeg daeg zawh gaj puj zawxkauq dij Sen. 27Ndaw Sw Dij Sen hax: ‘Mawz lez, gux nemz puj zawxkauq gux, mwznaj hawj gaenqdix bae daekgoanq mawz, saeh mawz lauh ka loh,’ gaemz naeh zawh hax dix.#7:27 Gaemz kauq naeh haeuz yuq Sw Yixsaiqyaq 40:3. 28Gux haxdoq su, nanghgaj zawh dij goanz,#7:28 Nanghgaj zawh dij goanz gaemz naeh, bwnz aeu kauq Cizlah laiz naeh zawh hoakzaqnaeh hax: Nanghgaj zawh puj nyingz zowngx. mboq miz gawz dwx nyeuz Yezhanq, gaj yuq goh dij Sen, daengz sowh puj mboq miz najta saek'i naeh naengz dwx nyeuz dix." 29Sowh puj ndaej hawj Yezhanq saeh hoak diauq zauh soiq naeh daj sowh puj caeu coiq ndaej hawj Yezhanq saeh hoak diauq zauh soiq naeh naeh, ruxnyinz gaemz kauq naeh, zoq hax dij Sen hoak hoj zaeh. 30Gaj dij goanz puj Fahliqsaiq daj sowh lauxswz aeu Sw Dij Sen zau daenh naeh, paenqdix mboq ndaej hawj Yezhanq saeh hoak diauq zauh soiq naeh, paenqdix zoq mboq daeq ka loh dij Sen dox nyaengx hawj paenqdix naeh. 31Yezsuz daeuq hax: "Gux aeu dij goanz gannaeh bij hoak gaeng nix? Paenqdix lumj gaeng nix? 32Paenqdix daj sowh engliak naengh zang hw naeh dungzlumj, goanz lej rongx goanz, hax: ‘Gaenqpiu saeh su baeuq naeuz, gaenqsu ej mboq tiauq. Gaenqpiu lownxhaej, gaenqsu ej mboq haej.’ 33Zoq zawh hax: Yezhanq goanz saeh daenh hoak diauq zauh soiq naeh daeuj, mboq jinkaeuj, mboq ndut laeuj, gaenqsu hax dix zoah dij pi mwz ndang. 34Gux Lug dij Goanz daeuj, jin niz jin, ndut niz ndut, gaenqsu hax: ‘Goanz naeh maeux laeuj, maeux jin, daj puj caeu coiq, daj puj hoak loang hoak dungzbownh.’ 35Gaj aen gvai dij Sen zoq zawh aen gvai dij Sen, daenh leztaen sowh puj biak aen gvai naeh, daenh zoq ruxndeq aen gvai dij Sen zawh zaeh."

Yezsuz Yangq Goanz Puj Nyingz Hoakloang Ux

36Miz goanz dij goanz Fahliqsaiq ux, qingj Yezsuz mwz rownz dix daj dix zaemh jinkaeuj, Yezsuz zoq mwz. 37Longq naeh miz goanz nyingz ux zawh puj hoak loang, dix ruxndeq Yezsuz maz rownz dij goanz Fahliqsaiq jinkaeuj, zoq gaem aen pinh viq ux maz, ndaw pinh laep gaenq ux hom taeuq, 38dix in yuq baihlaeng Yezsuz, yuq haenz din Yezsuz haej, naemxta lae bae daengz din Yezsuz yaij nauq, dix aeu koanto dix jiat kawq, aeu baeg dix zup din Yezsuz, aeu gaenq hom daz din Yezsuz. 39Goanz dij goanz Fahliqsaiq qingj Yezsuz mwz jinkaeuj naeh leztaen, ndaw zaw nwh: "Goanz nyingz naeh zawh puj hoak loang, jixzawh Yezsuz zawh puj zawxkauq dij Sen, dix toj ruxndeq goanz lumh dix naeh zawh puj hoak loang, zawh sowh puj nyingz rawz." 40Yezsuz daj dix hax: "Cizmaenh, gux miz kauq daj mawz hax." Cizmaenh yaeng: "Lauxswz, mawz hax." 41Yezsuz hax: "Miz goanz ux, miz song goanz baznij dix, goanz ux baznij dix haj baeg dowhnah ngaenz, goanz ux baznij dix hajsip dowhnah ngaenz.#7:41 Zwz naeh goanz puj hoak gaengx ux hoak gaengx vaenz ux zoq ndaej dowhnah ngaenz ux. 42Daengz song goanz boiz mboq qix, goanz gaengnaeh zoq mboq hawj doiqdix boiz, yangq nij doiqdix. Mawz hax, song goanz baznij naeh, goanz rawz ngaiq goanz yangq nij doiqdix naeh nyeuz?" 43Cizmaenh yaeng: "Gux nwh maz ingj zawh goanz zoah yangq lai nyeuz naeh." Yezsuz hax: "Mawz hax hoj yah." 44Yaq Yezsuz ueqnaj bae doq goanz nyingz gaeng naeh, daj Cizmaenh hax: "Mawz leztaen goanz nyingz naeh vah? Gux maz rownz mawz, mawz mboq aeu naemx hawj gux soiq din, gaj goanz nyingz naeh aeu naemxta lae bae daengz din gux yaij nauq, aeu koanto dix jiat kawq. 45Mawz mboq hoakzaq dungzbownh bihnongx naeh zup naj gux, gaj goanz nyingz naeh, daeq gaenqgux maz rownz mawz, zoq zup din gux bae dauh bae dauh. 46Mawz mboq aeu yuz maeghit lup to gux, gaj goanz nyingz naeh aeu gaenq hom daz din gux. 47Baenzzaqnaeh gux haxdoq mawz, goanz nyingz naeh hoak loang lai taeuq, gaenq hoakloang dix yowngh rawz goj zoah yangq nauq, gaenqdix zoq ngaiq lai nyeuz. Gawz zoah yangq ix, gawz zoq ngaiq ix." 48Yezsuz daj goanz nyingz naeh hax: "Gaenq hoak loang mawz zoah yangq yah." 49Sowh puj daj dix zaemh jinkaeuj naeh ndaw zaw nwh: "Goanz naeh zawh gawz ah? Dix rux yangq gaenq hoakloang dij goanz maj?" 50Yezsuz daj goanz nyingz naeh hax: "Mawz sinq gux, mawz ndaej jeuq yah, dauh mwz vangqdangh ndeh!"

Currently Selected:

Luhzaz 7: ZHN

Highlight

Copy