Luhzaz 6

Gawz Zawh Zaeuj Vaenz Cednoiq

1Miz vaenz ux, zawh Vaenz Cednoiq, Yezsuz gvaq zoah haenz naz kaeujmeg, cohsaenz dix daet rongz kaeujmeg, aeu mungz fitfu, yaq aeu maet dix jin. 2Miz jij goanz Fahliqsaiq ux hax: "Gaenqsu baenzzaqrawz hoak sowh gaenq Vaenz Cednoiq mboq hawj hoak naeh mux?" 3Yezsuz yaeng: "Zwz Daqvaeq daj sowh puj nowngz dix naeh dongxyaeg,#6:3 Daqvaeq zawh zwzpujjeq laux hongz Yixsowhleh ux. Lez Sw Saxmuxex Bwnz Daih Aet 21:1-6. dix hoakzaqrawz hoak su mboq sanz ndaej doag max? 4Dix ndonj mwz zangjpungh dij Sen, jin sowh binx aeu baiz doqnaj dij Sen naeh, goj aeu hawj sowh puj nowngz dix naeh jin ndoij. Sowh binx naeh mizgaj puj mbud dij Sen zux hawj jin, gvaqmaz puj ndai mboq hawj jin." 5Yezsuz daeuq daj paenqdix hax: "Gux Lug Dij Goanz zawh zaeuj Vaenz Cednoiq."

Yezsuz Hawj Goanz Qen Chaej Ux Ndae

6Goj miz Vaenz Cednoiq ux, Yezsuz ndonj mwz rownzndawcowq zau daenh, dih naeh miz goanz ux, qensa dix nyaeb, chaeg mboq baenz, liaksaemjse. 7Sowh lauxswz zau Sw Dij Sen naeh daj dij goanz puj Fahliqsaiq zawx cha saek yowngh gauq Yezsuz, paenqdix zoq lez Yezsuz rux mboq rux yuq sowh Vaenz Cednoiq naeh ya chaej. 8Yezsuz ruxndeq paenqdix nwh gaeng, zoq daj goanz qensa chaeg mboq baenz naeh hax: "Dwnq maz, in doqnaj daengzle!" Goanz gaengnaeh zoq dwnq maz. 9Yezsuz daj daengzle hax: "Gux cham su, Vaenz Cednoiq hawj hoak saeh ndae rux hawj hoak saeh raix mux? Hawj jeuq dij goanz rux hawj kaj dij goanz mux?" 10Yezsuz lez bae haenzhenz baenqbeq, zoq daj goanz gaengnaeh hax: "Ed mungz mawz maz!" Goanz gaengnaeh daeh ed mungz dix maz, mungz dix zoq ndae, baenzzaqgaeuq. 11Gaj dij goanz puj Fahliqsaiq daj sowh lauxswz zau Sw Dij Sen naeh jih taeuq, paenqdix dungzlaemh hoakrawz hoak mbowq dwk Yezsuz.

Yezsuz Lowg Sipngih Goanz Hoak Dij Goanz Zawxkauq Dix

12Ndauj gaengnaeh, miz mbaed ux, Yezsuz mwz ndaw bo, daengz hwnz daj dij Sen hax kauq. 13Fax rungh yaq, dix rongx cohsaenz dix maz, lowg sipngih goanz, rongx sipngih goanz naeh hoak dij goanz zawxkauq Yezsuz. 14Sipngih goanz naeh zawh: Cizmaenh, goanz Yezsuz daeuq nyaek hoak Bihdowh naeh, Anzdowhleh goanz nongx zaiz Cizmaenh naeh, Yaqgowh, Yezhanq, Faezliq, Bazdozloahmaix, 15Maxtaiq, Dozmax, Yaqgowh goanz lug zaiz Yaqlowhfaez naeh, Cizmaenh goanz yuq ndaw dangxpaiq Faenqroiq naeh,#6:15 Dangxpaiq Faenqroiqdaj Baih Cizlih zawh dangqbaih. Dangxpaiq naeh mboq venq biak fahlih Loahmax. 16Yaqgowh goanz lug zaiz Yaeuhdaq naeh, Yaeuhdaq goanz puj Zazyoah goanz daeklaeng aeu Yezsuz kai hawj sowh puj daj Yezsuz hoak dangqbaih naeh.

Yezsuz Aeu Kauqfaengz Dij Sen Koanx Dwk Goanzlai

17 Yezsuz daj paenqdix loangz daeq ndaw bo daeuj, yuq ndaw doanghpiang in, miz yowngh boangx cohsaenz daj dix zaemh yuq, goj miz yowngh boangx dij goanz daeq ndaw mbanj Yaeuhdaq, Yezluqsaxlaengx chaenh, haenz haij Taiq'ex chaenh daj Cizdunq chaenh maz. 18Paenqdix biak Yezsuz koanx kauqfaengz dij Sen, vanz Yezsuz ya aen chaej paenqdix, sowh puj zoah dij pi mwz ndang naeh goj hawj dix ya ndae. 19Ndang Yezsuz miz doakriangz daeuj, ya aen chaej ndae, baenzzaqnaeh, daengzle gaj goanz gaj zawx bae lumh dix.

Sowh Dij Goanz Rawz Rux Ndaej Faengz

20 Yezsuz ngangh to lez mwz doq cohsaenz dix, hax:

"Puj baenzluk faengz yah, unj mwznaj Goh dij Sen zawh gaenq gaenqsu.

21"Puj dongxyaeg faengz yah, unj mwznaj dij Sen rux hawj su imq. Puj gongz, puj haej faengz yah, unj mwznaj gaenqsu ndaej ko.

22"Zwzrawz daenh cholaeng su daj gux Lug Dij Goanz hoak zaemh baih ej hwnq su, viangh su, mang su, moakndai su, gaenqsu zoq faengz yah. 23Unj gaenqsu yuq ndaw fax ndaej sowh gaenq dij Sen aeu hoak gaenq byauxyangh naeh lai taeuq. Su goj ruxndeq zwzpujjeq puj zawxkauq dij Sen goj zoah zuxzungz rownz paenqdix hoakzaqnaeh dwk.

Sowh Dij Goanz Rawz Rux Mizsaeh

24"Gaj puj baenzsaq aj, gaenqsu zoah yah! Unj sowh gaenq hawj gaenqsu zaih naeh haeuz nauq eh.

25"Puj jin imq aj, gaenqsu zoah yah! Unj mwznaj su rux zoah yaeg. Sowh puj ko naeh aj, gaenqsu zoah yah! Unj mwznaj gaenqsu rux ndaej gongz, ndaej haej.

26"Gawz goj haenh su zwzrawz, su zoq zoah yah. Unj zuxzungz rownz paenqdix goj zawh hoakzaqnaeh haenh puj zawxkauq dij Sen goanz zaj gaenqnaeh.

Gaenqsu Hoj Ngaiq Sowh Puj Daj Su Dangqbaih Naeh

27"Gux haxdoq sowh puj yuq inxnaeh biak gux koanx naeh: Nwh sowh puj daj su hoak dangqbaih naeh, doiq sowh puj hwnq su naeh ndae. 28Sowh puj mang su naeh, su vanz dij Sen gumx paenqdix, sowh puj hoak mbowq dwk su naeh, su saeh paenqdix vanz dij Sen. 29Jixzawh miz goanz saeuh naj mawz baih ux, mawz zoq ueq daengz baih gaengnaeh hawj dix saeuh. Jixzawh miz goanz aeu gongz sowj baihnog mawz, daengz gongz sowjndaw goj jizzaz dix aeu. 30Gawz dex mawz, zoq aeu hawj dix. Miz dij goanz aeu za'hoq mawz bae, zoq laek bae cham dix boiz. 31Gaenqsu zawx hawj daenh hoakzaqrawz doiq su, su zoq hoakzaqrawz doiq daenh.

32"Jixzawh su nwh gaj sowh puj nwh su naeh, su mboq suanq zawh gaeng. Daengz puj hoak loang goj nwh sowh puj nwh paenqdix naeh. 33Jixzawh su doiq gaj sowh puj doiq su ndae naeh ndae, su mboq suanq zawh gaeng. Daengz puj hoak loang goj doiq sowh puj doiq paenqdix ndae naeh ndae. 34Jixzawh su jeq gaeng hawj daenh, nwh gaj hawj dix boiz, su mboq suanq zawh gaeng. Daengz puj hoak loang goj rux jeq hawj puj hoak loang, paenqdix ngwz daenh boiz zaqgaeuq. 35Gaenqsu nwh sowh puj daj su hoak dangqbaih naeh, doiq paenqdix ndae. Jeq gaeng hawj daenh, laek nwh daenh aeu maz boiz. Hoakzaqnaeh gaenqsu zoq ndaej sowh gaenq dij Sen aeu hoak gaenq byauxyangh naeh lai yah, gaenqsu baenz lug zaiz laux Sen dwx nyeuz daengzle naeh, ndaej yaiz dix. Unj dij Sen goj doiq sowh puj mboq mbaiq dix naeh daj puj mbowq zawkau taeuq. 36Daenh doiq su ndae mboq ndae, su goj doiq daenh ndae, hoakzaq Dez ndaw fax su naeh."

Jem Hoakri Goanq

37"Gaenqsu laek pyaemj daenh, gaenqsu zoq mboq zoah dij Sen pyaemj. Daenh hoak loang gaeng, laek hax dix hoj tw'taeb gaenq hoakloang dix. Hoakri su hoak loang gaeng, dij Sen goj zux mboq hax su hoj tw'taeb gaenq hoakloang su. Su yangq gaenq hoakloang daenh, dij Sen zoq yangq gaenq hoakloang su mboqyaq. 38Su aeu hawj daenh, zoq miz gaenq aeu hawj su mboqyaq. Su aeu gaeng chau hawj daenh, dij Sen zoq aeu gaeng chau hawj su mboqyaq, naengz fa gaemh nyedred, daek daemdw hawj su."

39 Yezsuz aeu bixliq daj paenqdix hax: "Puj ta'mbud hoakrawz saeh puj ta'mbud lingzloh mux? Jixzawh puj ta'mbud haeggaj saeh puj ta'mbud lingzloh, rux hawj daengz song goanz laemq roangj mboqyaq. 40Cohsaenz mboq rux dwx nyeuz lauxswz, daengz daj lauxswz doag gah zwzrawz, goj zux dwx daj lauxswz dungzlumj naeuj. 41Baenzzaqrawz leztaen ndaw ta bihnongx miz i nyaebnyangj ux, ej lez mboq taen ndaw ta hoakri miz yaengh ndeaj maex mux? 42Mawz lez mboq taen ndaw ta hoakri miz maex, hoakrawz ej daj bihnongx mawz hax: ‘Bihnongx, hawj gux aeu nyaebnyangj ndaw ta mawz ni’? Mawz naeh ah, baeg daj zaw mboq dungzlumj! Aeu maex ndaw ta hoakri ni daekgoanq, zux leztaen singjringh, hoakzaqnaeh zux aeu nyaebnyangj ndaw ta bihnongx mawz ni baenz.

Puj Ndae Hoak Gaenq ndae, Puj Mbowq Hoak Gaenq mbowq

43"Maex ndae mboq rux miz maeg ndog, maex ndog mboq rux miz maeg ndae. 44Lez maeg zoq ruxndeq zawh maex ndae rux zawh maex ndog. Maex nam mboq rux miz maeg'vowh, kaeunam goj mboq rux miz maegkaeu'it. 45Ndaw zaw nwh gaeng, ndaw baeg zoq hax gaeng. Ndaw zaw puj ndae nwh gaenq ndae, dix zoq hax gaenq ndae. Ndaw zaw puj mbowq nwh gaenq mbowq, dix zoq hax gaenq mbowq.

Song Yowngh Dij Goanz Daengj Rownz

46"Gaenqsu baenzzaqrawz rongx gux ‘Zaeuj aj, Zaeuj aj’ gaj mboq biak kauq gux bae hoak mux? 47Nanghgaj gawz maz haenz gux, biak kauq gux yaq bae hoak, gux haxdoq su dix zawh sowh dij goanz rawz. 48Dix daj goanz ux daengj rownz dungzlumj, mbut dej dix ndaek, hawj dej dix bae daeux dih miz tin. Naemxnongz daeuj zwzrawz, daengh zoah aen rownz naeh, goj mboq rux hawj aen rownz naeh vae. Unj aen rownz naeh dix daengj zoah dih hoj, zoah dih miz tin vwnx. 49Gaj sowh goanz biak yaq mboq bae hoak naeh, zoq daj sowh dij goanz yuq now namh saiz daengj rownz naeh dungzlumj, mboq miz tin'dinsaeu. Naemxnongz daeh daengh, zoq cenq laemx, vaihveh nauq."

Currently Selected:

Luhzaz 6: ZHN

Highlight

Copy