Luhzaz 5

Yezsuz Rongx Jijgaj Goanz Cohsaenz

1Miz mbaed ux, Yezsuz in yuq haenz kow Gowhnihsaxlowh#5:1 Aen kow Gowhnihsaxlowh naeh goj rongx hoak kow Zazliqliq., daenh nyenj maz haenz dix, biak dix laemh kauqfaengz dij Sen. 2Dix leztaen miz song aen lowz yuq haenz kow ced, puj dwkbya ni aen lowz bae sauz mowngx. 3Miz aen ux zawh aen Cizmaenh, dix zoq kwnj mwz, dix hawj Cizmaenh uaij aen lowz ni dihliangx bae ixux. Yezsuz zoq naengh daeuj, yuq ndaw lowz zau daeuj doq daenh. 4Dix zau gah, zoq daj Cizmaenh hax: "Uaij lowz mawz bae dih naemx ndaek, yaq gaenqsu sauq mowngx dwkbya." 5Cizmaenh hax: "Lauxswz aj, gaenqpiu kux yaengh hwnz, gaeng goj dwk mboq ndaej, gaj gux venq biakkauq mawz sauq mowngx dwkbya." 6Paenqdix zoq sauq mowngx dwkbya, dwk ndaej dij bya lai taeuq, daengz mowngx zaekgaj kaed saw. 7Paenqdix zoq mungzvaed rongx dungzbownh aen lowz ndai maz saeh. Paenqdix maz yaq, zoq aeu dij bya laep daengz song aen lowz daem nauq, daengz lowz zaekgaj zaem saw. 8Cizmaenh, goanz goj rongx hoak Bihdowh naeh, leztaen suq saeh naeh, zoq gvih bae doqnaj Yezsuz, daj Yezsuz hax: "Zaeuj aj, gux zawh puj hoak loang, vanz mawz ni gux ndeh." 9Cizmaenh-bihdowh daj sowh puj daj dix zaemh yuq naeh, taen aen mowngx naeh dwk ndaej dij bya lai baenzzaqnaeh, gaj goanz gaj sawz taeuq. 10Dungzbownh Cizmaenh, doiq lug zaiz Cizpihtaiq: Yaqgowh daj Yezhanq goj zaemh sawz taeuq. Yezsuz daj Cizmaenh hax: "Laek mbu! Daeq vaenz naeh mwz, mawz ndaej dij goanz yah." 11Paenqdix aeu daengz song aen lowz maz dihliangx yaq, zoq jizzaz daengzle nauq, nowngz Yezsuz, hoak cohsaenz Yezsuz.

Yezsuz Ya Pujchaej Ndae

12Miz mbaed ux, Yezsuz yuq longq ux, miz goanz daengz ndang baenznux ux leztaen dix, gvih bae dihndin, vanz dix: "Zaeuj aj! Jixzawh mawz venq, mawz rux hawj koij ndae, rux hawj koij sawrik mboqyaq." 13Yezsuz ed mungz bae baed dix, hax: "Gux venq, mawz sawrik ndeh!" Nux ndaw ndang goanz naeh cenq ni dix, dix zoq ndae, zoq sawrik. 14Yezsuz saengq dix mboq hawj dix haxdoq gawz, daeuq daj dix hax: "Mawz cenq mwz hawj puj mbud dij Sen saeh mawz lez, yaq hoak zaq sowh gaenq Moahciz hax naeh aeu doihdo mwz mbud dij Sen,#5:14 Inxnaeh doihdo zawh hax dij noag daj dij mbej ix. Ndaw Sw Liqvaeq 14:1-32, Moahciz laiz jixzawh miz dij goanz gawz baenz nux yaq ya ndae, dij Sen yaix puj mbud dij Sen hoj hoakrawz hoak hawj daenh ruxndeq sowh goanz baenz nux naeh haeuz ndae yaq. hawj daenh ruxndeq nux mawz haeuz ndae yaq."

Yezsuz Kwnz Bae Ndaw Doanghmowz Daj Dij Sen Hax Kauq.

15Gaj zwh Yezsuz gaj laeng gaj leuz bae gvae, dij goanz maz haenz dix baenz boangx se, maz biak dix koanx kauqfaengz dij Sen daj hawj dix ya aen chaej. 16Gaj dix kwnz bae ndaw doanghmowz sowh dih mboq miz gawz naeh daj dij Sen hax kauq.

Yezsuz Hawj Goanz Mungz Din Mboq Rux Chaeg Ux Ndae

17Miz vaenz ux, Yezsuz zau goanzlai, dij goanz Fahliqsaiq daj sowh lauxswz zau Sw Dij Sen naeh goj yuq haenz naengh.#5:17 Baih Fahliqsaiq zawh dij goanz puj Yaeuhtaiq. Paenqdix hax paenqdix biak fahlih Moahciz, gaj paenqdix goj zau daenh sowh zwzpujjeq zauh naeh. Dij goanz Fahliqsaiq daj sowh lauxswz aeu Sw Dij Sen zau daenh naeh zawh daeq mbanj Zazliqliq longq rawz raeuh maz, daj mbanj Yaeuhdaq longq rawz raeuh maz, daeq Yezluqsaxlaengx daeuj. Doakriangz Zaeuj daj Yezsuz zaemh yuq, hawj dix rux ya chaej. 18Miz dij goanz aeu faz tam goanz puj chaej din mungz mboq rux chaeg ux maz, daz tam ndonj mwz ndaw rownz, aeu nyaengx doqnaj Yezsuz. 19Gaj dij goanz lai gvaq, ndonj mwz mboq baenz, paenqdix zoq kwnj mwz nyiangzrownz, aj jik nyiangzrownz, aeu goanz puj chaej naeh daj faz dix kven zoangq bae doqnaj Yezsuz. 20Yezsuz leztaen paenqdix mizzaw sinq dix taeuq, zoq daj goanz puj chaej hax: "Mbauqreauh, gux yangq gaenq hoakloang mawz eh." 21Sowh lauxswz zau Sw Dij Sen naeh daj dij goanz Fahliqsaiq zoq dungzcham: "Goanz naeh zawh gawz, hax sowh kauq naeh ngah? Mizgaj dij Sen, gvaqmaz mboq miz gawz rux yangq gaenq hoakloang dij goanz. Baenzzaqnaeh gaenqdix hoakzaqnaeh hax, dix aeu hoakri hoak dwx daj dij Sen baenzndeu, dix zawh hoak loang dij Sen!" 22Yezsuz ruxndeq paenqdix dungzcham gaeng, zoq daj paenqdix hax: "Gaenqsu baenzzaqrawz hoakzaqnaeh dungzcham mux? 23Hax: ‘Yangq gaenq hoakloang mawz eh!’ Raj hax: ‘Dwnq maz, daeq ndeh,’ song yowngh naeh yowngh rawz hoak ngaih nyeuz mux?#5:23 Nganq puj Yaeuhtaiq maz hax, song yowngh naeh mizgaj dij Sen rux hoak baenz. 24Gaj mbaenqnaeh gux ya goanz naeh hawj su lez, hawj su ruxndeq gux Lug Dij Goanz,#5:24 Yezsuz kwnzkwnz aeu aen minxzwh Lug Dij Goanz naeh nyaek hoakri. Aen minxzwh Lug Dij Goanz naeh yuq Sw Danqyixlix 7:13-14. Pujzawxkauq dij Sen, Danqyixlix, hax: Zang'haemh gux daj paen'hwnz dungzlumj leztaen miz goanz ux daj lug dij goanz dungzlumj. Dix kviq pajfax maz dih dij Sen bwnzmiz miz daengznauq naeh. Daenh zoq lingz dix mwz doqnaj dij Sen naeh. Gaenqdix ndaej dawjfax sowh rux gvanx daengzle naeh, gaj goanz gaj biangz dix, gaj goanz gaj biak dix. Hoakzaqnaeh, goh rawz gojvenj, changz rawz gojvenj, dij goanz hax sowh kauq rawz gojndae daengzle biangz dix, nwngz dix. Lug dij Goanz gvanx daenh daengznauq, mboq miz gawz hawj goh dix lown. yuq dihndin miz qenhliq yangq gaenq hoakloang dij goanz." Hax gaemz naeh yaq, dix daj goanz puj chaej din mungz mboq rux chaeg naeh hax: "Gux nemz mawz dwnq maz, gaem faz mawz, mwz rownz ndeh." 25Goanz gaengnaeh cenq yuq doqnaj daengzle dwnq maz, gaem faz dix, biangz dij Sen, dauh mwz rownz. 26Daengzle menq sawz menq zaemz, biangz dij Sen, ndaw zaw mbu taeuq, hax: "Vaenz naeh gaenqraeuz taen sowh saeh mboq sanz taen naeh eh!"

Yezsuz Rongx Liqvaeq Nowngz Dix

27Gvaq ndauj ux yaq, Yezsuz og bae, dix leztaen goanz caeu coiq ux, minxzwh rongx hoak Liqvaeq, yuq dih caeu coiq naeh naengh. Yezsuz daj dix hax: "Maz nowngz gux!" 28Liqvaeq zoq jizzaz daengzle nauq, maz nowngz dix, hoak cohsaenz dix. 29Yaq Liqvaeq yuq rownz dix hoak gaenqjin lai taeuq, qingj Yezsuz jin, goj miz puj caeu coiq lai taeuq, naengz miz puj ndai tem daj paenqdix zaemh jin. 30Dij goanz Fahliqsaiq daj sowh lauxswz zau Sw Dij Sen naeh zoq hax cohsaenz Yezsuz, paenqdix hax: "Gaenqsu baenzzaqrawz daj puj caeu coiq daj puj hoak loang zaemh jin zaemh ndut mux?" 31Yezsuz yaeng: "Puj mboq baenzchaej yungq mboq zoah puj ya chaej, mizgaj puj baenzchaej zux yungq zoah puj ya chaej. 32Gux mboq zawh daeuj cha sowh puj gaemz hax mboq miz naeh, zawh daeuj cha puj hoak loang, hawj puj hoak loang ndaw zaw dix gaix."

33Dij goanz Fahliqsaiq daj sowh lauxswz zau Sw Dij Sen naeh hax: "Cohsaenz Yezhanq jenjkaeuj hoakri, cohsaenz puj Fahliqsaiq gojvenj, gaj cohsaenz mawz jin niz jin, ndut niz ndut." 34Yezsuz hax: "Goanz raep mez naeh daj puj qiag zaemh yuq, su hoakrawz hawj puj qiag jenjkaeuj mux? 35Gaj taeng zwz maz, goanz raep mez naeh zoah daenh gaep mwz, ni paenqdix, taeng zwz naeh, paenqdix zoq jenjkaeuj hoakri." 36Yezsuz daeuq koanx aen bixliq ux hawj paenqdix biak, gaenqdix hax: "Mboq miz gawz riag sowj mawq daeuj kvaix paeng ux, yaq aeu kvaix paeng naeh bae pung sowj gaeuq. Jixzawh hoakzaqnaeh, hawj sowj mawq riag, yaq kvaix paeng riag daeq sowj mawq daeuj naeh daj sowj gaeuq goj mboq dungzpaeq. 37Goj mboq miz gawz aeu laeuj mawq nyaengx ndaw daehnaeng gaeuq. Jixzawh aeu laeuj mawq nyaengx daeh naeng gaeuq, laeuj mawq gawh gau rawz rux hawj daeh naeng gaeuq tiag. Hoakzaqnaeh, laeuj goj roh nauq, daeh goj vaih. 38Baenzzaqnaeh, laeuj mawq aeu nyaengx ndaw daeh naeng mawq. 39Laeuj gaj nyaengx ndaej lai bi lej gaj van, gawz goj hax laeuj gaeuq van, gawz ndut laeuj gaeuq yaq, gawz goj mboq zawx ndut laeuj mawq."

Currently Selected:

Luhzaz 5: ZHN

Highlight

Copy