Zawxkauq 8

Sauxloah Vazkuz Dij Goanz Zauqhoiq

1Daenh kaj Sowztihfanx, Sauxloah goj zoahdowh hoh. Daeq vaenz gaengnaeh mwz, dij goanz zauqhoiq ndaw Yezluqsaxlaengx zoah daenh vazkuz, mizgaj dij goanz zawxkauq Yezsuz, gvaqmaz cohsaenz Yezsuz daengzle nauq byaeg bae mbanj Yaeuhdaq daj mbanj Saxmaxliqyaq dih rawz gojmbaeuq. 2Sowh puj nowngz dij Sen haen laez haen lih naeh mbangj goanz aeu Sowztihfanx bae moak, haej dix vauhvauh. 3Sauxloah daz ndaep dij goanz zauqhoiq, mwz hoak rownz hoak rownz goangz sowh puj sinq Yezsuz naeh, aeu daengz zaiz daengz nyingz kaeng bae ndaw lauz.

Dij Goanz Saxmaxliqyaq Ndaej Ruxnyinz Kauq Dij Sen

4Puj sinq Yezsuz sowh puj byaeg bae dihndai naeh, bae taeng rawz zoq aeu kauqfaengz dij Sen laemh dwk rawz. 5Faezliq bae Saxmaxliqyaq chaenh, koanx gaenq Jizduz dwk daenh. 6Goanzlai biak dix koanx, goj ndaej ta'taen dix hoak sowh saenh yaengh saenh naeh, zoq hoak zawdoag biak kauq dix. 7Unj sowh puj zoah dij pi mwz ndang naeh miz goanz lai taeuq, Faezliq saeh paenqdix daem dij pi, dij pi caqsiq rongx, zoq daeq ndaw ndang paenqdix og daeuj. Naengz miz sowh puj chaej ndang nyaeb chaeg mboq baenz naeh, puj ka'ndiak, goanz lai taeuq, dix goj ya paenqdix ndae nauq. 8Yuq ndaw Saxmaxliqyaq chaenh, dij goanz dih naeh faengz nyauznyauz.

9Miz goanz ux, minxzwh rongx hoak Cizmaenh, dix daeq ndowj maz bwnz yuq ndaw chaenh naeh hoakbang. Dix hax hoakri dix haen zawzmboqraeuh, dix hoakbang hawj dij goanz ndaw chaenh menq zaemz menq sawz. 10Dij goanz ndaw chaenh, pujdwx puj'ix daengzle biak dix nauq, daenh hax: "Goanz naeh haen taeuq, zawh doakriangz dwx dij Sen." 11Dix daeq ndowj maz, dix hoakbang, daenh menq zaemz menq sawz, baenzzaqnaeh, dij goanz ndaw chaenh caqsiq biak sowh dix hax naeh. 12Doaklaeng, Faezliq laemh sowh kauqfaengz laemh goh dij Sen daj laemh Yezsuz Jizduz naeh, laemh dwk paenqdix, paenqdix sinq, puj zaiz puj nyingz goj maz hoak diauq zauh soiq naeh. 13Cizmaenh hoakri dix goj sinq, dix goj maz hoak diauq zauh soiq naeh, kwnz daj Faezliq zaemh yuq. Dix taen Faezliq hoak sowh saeh saenh yaengh saenh naeh daj hoak sowh saeh miz riangz dwx naeh, menq zaemz menq sawz.

14Dij goanz zawxkauq Yezsuz yuq ndaw Yezluqsaxlaengx ruxnyinz puj Saxmaxliqyaq biak kauqfaengz dij Sen, zoq nemz Bihdowh daj Yezhanq bae dih puj Saxmaxliqyaq naeh. 15-16Zwz puj Saxmaxliqyaq hoak diauq zauh soiq naeh, paenqdix zux aeu gaj zwh Yezsuz Zaeuj hoak diauq zauh soiq naeh, Minghkoan dij Sen naengz mboq daeuj ndang paenqdix. Baenzzaqnaeh, Bihdowh daj Yezhanq bae taeng yaq, saeh paenqdix daj dij Sen hax kauq, hawj paenqdix ndaej Minghkoan dij Sen. 17Bihdowh daj Yezhanq aeu mungz baed bae now paenqdix, paenqdix zoq ndaej Minghkoan dij Sen.

18 Cizmaenh taen dij goanz zawxkauq Yezsuz daeh aeu mungz baed, dij Sen zoq aeu minghkoan dij Sen hawj, dix zoq aeu jenz hawj dij goanz zawxkauq Yezsuz, 19dix hax: "Vanz su aeu sowh qenhliq naeh hawj gux, hawj gux aeu mungz baed gawz, gawz zoq ndaej Minghkoan dij Sen." 20Bihdowh hax: "Mawz daj jenz mawz zaemh lown ndeh! Unj mawz gaenq faeklaih sowh gaenq dij Sen yumq aeu hawj naeh aeu jenz swx baenz wzngah! 21Yuq doqnaj dij Sen sai'zaw mawz mboq hoj, mboq hawj mawz daj piu zaemh hoak eh. 22Mawz hoak loang yauq rux gaix, ni gaenqndog, vanz Zaeuj, mbangjbaez Zaeuj rux yangq gaenqndog ndaw zaw mawz. 23Unj gux lez ndaej og, mawz naengzgaj ta'ndaem daenh taeuq, zoah gaenq ndog nwk." 24Cizmaenh hax: "Vanz su saeh gux vanz Zaeuj, hawj sowh saeh gaenqsu hax naeh, mboq miz saek yowngh daeuj ndaw ndang gux."

25Daeklaeng, Bihdowh daj Yezhanq saengq paenqdix, doiqdix goj koanx kauqfaengz Zaeuj dwk daenh, yaq paenqdix dauh maz Yezluqsaxlaengx, doanh loh, paenqdix bae mbanj Saxmaxliqyaq lai longq taeuq koanx kauqfaengz dij Sen.

Faezliq Koanx Kauqfaengz Dwk Goanz Ndaw Yizsoahpihyaq Ux

26Miz vaenz ux, bin dij Sen daeuj daj Faezliq hax: "Bae ndeh, mawz bae baih nanhfangz, daeq ka Yezluqsaxlaengx bae Zazsah chaenh naeh bae." Ka naeh zawh ndaw doanghmowz. 27Faezliq cenq loangzdin bae. Doanh loh, dix mex goanz dij goanz Yizsoahpihyaq ux, goanz naeh zawh sowh puj don yaq hoak saeq dwx taeuq naeh, dix yuq baihdawj Ganzdaqjiz yah hongz Yizsoahpihyaq naeh gvanx ngaenz, dix mwz Yezluqsaxlaengx biangz dij Sen dauh daeuj. 28Dix naengh ndaw chowz, doag sw puj zawxkauq dij Sen gut Yixsaiqyaq laiz naeh. 29Minghkoan dij Sen nemz Faezliq: "Mawz daeq mwz naj, daeq mwz haenz aen chowz gaengnaeh!" 30Faezliq lenh mwz haenz goanz gaengnaeh, ruxnyinz dix doag sw puj zawxkauq dij Sen gut Yixsaiqyaq laiz naeh, zoq cham dix: "Mawz ruxndeq gaenq mawz doag naeh zawh hax gaeng vah?" 31Dix yaeng: "Mboq miz gawz yaix gux, gux hoakrawz ruxndeq ah?" Yaq dix qingj Faezliq mwz ndaw chowz daj dix zaemh naengh. 32Gaenq gaunduq dix doag naeh zawh:

"Dix daj sowh dij mbej zoah daenh zung mwz kaj naeh dungzlumj,

dix goj daj sowh dij mbej ix zoah daenh daek koan naeh dungzlumj,

dix yumq hoakzaqnaeh byaek rik byaek rih,

dix yumq hoakzaqnaeh mboq aj baeg.

33Dix zoah daenh lez uaj,

daenh paeg saeh dix paeg mboq piang.

Daenh kaj dix tai, dix mboq miz lug,

mwznaj mboq miz gawz rux laemh luglan dix."#8:33 Gaemz kauq naeh haeuz yuq Sw Yixsaiqyaq 53:7-8.

34Goanz don yaq naeh cham Faezliq: "Cham mbaed ux, suq kauq puj zawxkauq dij Sen inxnaeh hax naeh zawh hax gawz ah? Zawh goanz laiz naeh haeggaj hax hoakri dix rux hax daenh ah?" 35Faezliq aj baeg, daeq le gaemz gaunduq naeh goq daeuj daeuj, aeu kauqfaengz Yezsuz koanx dwk dix. 36Doiq dix daeq mwz baihnaj, mwz taeng dih ux miz naemx, goanz gaengnaeh hax: "Mawz lez, inxnaeh miz naemx, gux hoak diauq zauh soiq naeh mboq miz gaeng naeujbojleh?" 37#8:37 Mbangj bwnz miz gaemz naeh: Faezliq hax: "Nanghgaj mawz aeu daengz zaw sinq, zoq hoak diauq zauh soiq naeh baenz." Dix yaeng: "Gux sinq Yezsuz Jizduz zawh lug zaiz dij Sen!" 38Yaq dix yaix chowz ced, song goanz dix zaemh loangz bae ndaw naemx, Faezliq saeh dix hoak diauq zauh soiq naeh. 39Gau paenqdix daeq ndaw naemx kwnj maz naeh, minghkoan Zaeuj yaeuj Faezliq mwz, goanz gaengnaeh zoq lez mboq taen Faezliq. Yaq dix daeq mwz naj, ndaw zaw faengz nyauznyauz. 40Doaklaeng miz dij goanz yuq ndaw Yaqsoaxduz taen Faezliq, Faezliq yuq dih naeh, longq dwx longq ix, koanx kauqfaengz dij Sen dwk daenh, bae taengdeg Kaixsaxliqyaq chaenh.

Currently Selected:

Zawxkauq 8: ZHN

Highlight

Copy