Zawxkauq 22

1"Daengzle, le goz aj, le cuh aj, vanz gaenqsu biak gux hax, gux aeu suq saeh gux laemh dwk su."

2Goanzlai ruxnyinz dix hax kauq paenqdix, kauq Cizboahlaiz, zoq gajfa byaek. Bauxloah hax:

3"Gux zawh puj Yaeuhtaiq, gux zawh dij goanz ndaw Jizliqzaz, gux yuq ndaw Daqsuq chaenh zowngx, gaj gux yuq inxnaeh dwx. Zazmaxleh lauxswz naeh zau gux, dix hawj gux zwzzwz caqsiq biak fahlih puj jeq rownz raeuz. Gux aeu najta dij Sen nyaengx daekgoanq daengzle, daj gaenqsu vaenznaeh dungzlumj. 4Gux ndaej vazkuz sowh dij goanz daeq ka loh Zaeuj naeh, puj zoah kaj goj miz, puj zaiz gojndae, puj nyingz gojndae, puk bae kaeng ndaw lauz. 5Jixzawh gawz mboq sinq, gawz zoq mwz cham puj mbud dij Sen goanz saeq dwx nyeuz daengzle naeh daj dij goanz ndaw hoiq Yaeuhtaiq naeh, paenqdix ruxndeq. Gux naengz ndaej daj paenqdix aeu sowh cinq laiz bae hawj puj Yaeuhtaiq raeuz sowh puj yuq ndaw Daqmaxseqgowh chaenh ndowj naeh, bae goangz dij goanz dih naeh sowh puj sinq Yezsuz naeh, puk paenqdix maz Yezluqsaxlaengx chaenxfah paenqdix, vazkuz paenqdix.

6"Vaenz gux daeq bae zaekgaj taeng Daqmaxseqgowh naeh, teq ngaiz sai ux naeh, hubhaeb miz longz ux daeq ndaw fax rungh daeuj, zauq daeuj doq gux daj haenzhenz gux. 7Gux laemx bae dihndin, miz hiang kauq daj gux hax: ‘Sauxloah, Sauxloah, mawz baenzzaqrawz vazkuz gux, haiq gux?’ 8Gux yaeng: ‘Zaeuj aj, mawz zawh gawz ah?’ Dix hax: ‘Gux zoq zawh Yezsuz ndaw Nazsahlowh, goanz mawz vazkuz daj haiq naeh!’ 9Sowh puj daj gux zaemh daeq naeh, leztaen longz daeq ndaw fax rungh daeuj naeh, gaj mboq ruxndeq hiang kauq goanz daj gux hax naeh zawh hax gaeng. 10Gux cham: ‘Zaeuj aj, gux hoj hoakzaqrawz hoak mux?’ Zaeuj hax: ‘Dwnq maz, mwz ndaw Daqmaxseqgowh, mwz dih naeh haeggaj miz goanz haxdoq mawz mawz hoj hoak gaeng.’ 11Longz gaengnaeh rungh gvaq, ta gux zoq mbud, sowh puj daj gux zaemh daeq naeh zoq zung gux mwz Daqmaxseqgowh.

12"Yuq ndaw Daqmaxseqgowh, miz goanz ux minxzwh rongx hoak Yaqnahnihyaq. Dix nowngz dij Sen biak fahlih haen laez haen lih, puj Yaeuhtaiq sowh puj yuq ndaw Daqmaxseqgowh ndowj naeh daengzle haenh dix. 13Dix maz lez gux, in yuq haenz gux, daj gux hax: ‘Sauxloah, dij Sen hawj mawz rux leztaen eh.’ Gux daeh ngangh to lez, leztaen dix zaeh. 14Dix daeuq hax: ‘Dij Sen puj jeq rownz raeuz lowg mawz, hawj mawz ruxndeq sowh gaenq dix daz naeh, hawj mawz ndaej taen Yezsuz, goanz gaemz hax mboq miz naeh, hawj mawz ruxnyinz hiang kauq dix. 15Dix hoakzaqnaeh hoak zawh hawj mawz aeu sowh gaenq mawz ndaej taen daj sowh gaenq mawz ndaej ruxnyinz naeh haxdoq dij goanz dawjfax, haxdoq daenh dix zoq zawh Jizduz. 16Gannaeh mawz naengz taj gaeng mah? Dwnq mawz, aeu Yezsuz hoak dij Sen maengx, aeu zwh dix hoak diauq zauh soiq naeh, sauz gaenq hoakloang mawz ni.’"

17"Doaklaeng, gux dauh maz taeng Yezluqsaxlaengx. Gau gux yuq rownz dij Sen daj dij Sen hax kauq naeh, dij Sen hawj gux daj paen'hwnz dungzlumj taen. 18Taen Zaeuj daj gux hax: ‘Gaenqmawz haxdoq dij goanz Yezluqsaxlaengx gaenqgux zawh Jizduz, paenqdix mboq rux sinq. Baenzzaqnaeh mawz ni Yezluqsaxlaengx naeuz kvaiq ux.’ 19Gux zoq hax: ‘Zaeuj aj, paenqdix ruxndeq gux ndaej aeu sowh dij goanz sinq mawz naeh kaeng mwz ndaw lauz, ruxndeq gux ndaej bae rownzndawcowq, bae hoak aen hoak aen saeuh sowh dij goanz sinq mawz naeh. 20Zwz Sowztihfanx haxdoq daenh gaenqmawz zawh Jizduz naeh, gaenqdix zoah daenh kaj, hoakri gux goj yuq haenz. Gux goj venq hawj daenh kaj dix, naengz saeh sowh puj kaj dix naeh dawz ndangnungh.’ 21Zaeuj daj gux hax: ‘Bae ndeh, gux nemz mawz bae dih gvae, bae dih puj yowngh ndai.’"

Yinhzangx Nemz Daenh Jinj Bauxloah

22Goanzlai goq goq biak Bauxloah laemh, gaj paenqdix daeh ruxnyinz Bauxloah laemh puj yowngh ndai, zoq caqsiq rongx: "Kaj dix ndeh! Sowh goanz naeh hoj tai, mboq hoj zaeu yuq dihndin!" 23Gau daengzle rongx uaxuax, aeu sowj faed bae dihndin, sauq mowdmoanz loaj naeh, 24yinhzangx zoq nemz dij goanz zowz Bauxloah mwz dih paenqdix yuq naeh, yaix dij goanz aeu zowg faed dix, jinj dix, zawx ruxndeq daengzle baenzzaqrawz hoakzaqnaeh rongx maz doq dix. 25Gau paenqdix aeu zowg puk dix naeh, Bauxloah daj goanz leanhzangx yuq haenz in naeh hax: "Gux suhyih dij goanz Loahmax goh. Puj saeq naengz mboq saenxpanq gux, naengz mboq hax gux hoak loang gaeng, gaenqsu yaengxgaj daz dup dix, gaenqsu hax gaenqsu hoj mbaeuq?" 26Lenhzangx ruxnyinz yaq, zoq ruxndeq Bauxloah zawh puj Yaeuhtaiq gaj suhyih dij goanz Loahmax goh. Lenhzangx mwz haxdoq yinhzangx: "Goanz naeh suhyih dij goanz Loahmax goh, mawz daz hoakzaqrawz hoak mux?" 27Yinhzangx zoq daeuj cham Bauxloah: "Haxdoq gux, mawz suhyih dij goanz Loahmax goh vah?" Bauxloah yaeng: "Gux zawh." 28Yinhzangx yaeng: "Gux kae jenz lai taeuq zux baenz dij goanz Loahmax goh." Bauxloah yaeng: "Gux bwnz suhyih dij goanz Loahmax goh." 29Yaq sowh puj yinhzangx nemz maz jinj Bauxloah naeh zoq cenq ni dix bae. Yinhzangx ruxndeq Bauxloah suhyih dij goanz Loahmax goh, ndaej puk Bauxloah mawj, zoq mbu.

Bauxloah Yuq Ndaw Hoiq Puj Yaeuhtaiq Daj Goanzlai Hax Kauq

30Vaenzlaeng, yinhzangx zawx ruxndeq puj Yaeuhtaiq baenzzaqrawz gauq Bauxloah, dix zoq hih dix, rongx sowh goanz gvanx puj mbud dij Sen naeh daj daengzle dij goanz ndaw hoiq puj Yaeuhtaiq maz zaemh naengh, yaix Bauxloah in doqnaj paenqdix.

Currently Selected:

Zawxkauq 22: ZHN

Highlight

Copy