Zawxkauq 21

Bauxloah Dauh Mwz Kaixsaxliqyaq Chaenh

1Gaenqpiu daj daengzle dungzbyaeg yaq, zoq naengh lowz mwz taengdeg Goazseq haixdaux, vaenzlaeng mwz taeng Loahdix haixdaux, daeq dihnaeh mwz Paqdaqlaz chaenh. 2Yuq ndaw Paqdaqlaz, gaenqpiu mex aen lowz ux bae mbanj Faeznihjiz, gaenqpiu zoq kwnj mwz aen lowz naeh, naengh aen lowz naeh bae. 3Bae taeng dih ux, gaenqpiu leztaen Saiqpuxluqsez haixdaux yuq baih qen saix piu, gaenqpiu naengh lowz gvaq dih naeh, naengh bae baih mbanj Ciqliqyaq, doaklaeng lowz bae taeng Taiq'ex chaenh hih za'hoq nyaengx, gaenqpiu zoq yuq ndaw Taiq'ex loangz lowz. 4Yuq ndaw Taiq'ex, piu cha mex cohsaenz Yezsuz, zoq daj paenqdix zaemh ndowj jiat vaenz. Minghkoan dij Sen hawj paenqdix ruxndeq Bauxloahrux miz saeh, paenqdix zoq daj Bauxloah hax: "Laek mwz Yezluqsaxlaengx." 5Gvaq jiat vaenz naeh yaq, piu daeuq daeq mwz naj. Cohsaenz Yezsuz dih naeh, paenqdix daj mezlug paenqdix soangq piu bae haenz chaenh. Gaenqpiu daengzle yuq dihliangx haenz haij gvih bae dihndin daj dij Sen hax kauq, yaq gaenqpiu daj puj ndai dungzbyaeg, 6kwnj mwz ndaw lowz, paenqdix dauh mwz rownz. 7Gaenqpiu daeq Taiq'ex naengh lowz bae taeng Dozliqmaix chaenh, mwz taennaj bihnongx dihnaeh, daj paenqdix zaemh ndowj vaenz ux. 8Vaenzlaeng, gaenqpiu bae Kaixsaxliqyaq chaenh. Bae taeng Kaixsaxliqyaq, gaenqpiu bae rownz Faezliq goanz aeu kauqfaengz dij Sen koanx dwk daenh naeh ndowj, dix zawh jiat goanz koax daekgoanq gaem jenz gaem gaenqjin naeh goanz ux. 9Dix miz siq goanz lug nyingz, gawz goj naengz mboq kai, dij Sen hawj paenqdix zawx kauq dix. 10Gaenqpiu yuq dih naeh ndowj ndaej jij vaenz ux yaq, miz goanz puj zawxkauq dij Sen ux, minxzwh rongx hoak Yaqzazbuq, daeq mbanj Yaeuhdaq daeuj. 11Dix maz dih piu naeh, aeu sairaengx Bauxloah qiat dinmungz hoakri dix, yaq hax: "Minghkoan dij Sen haxdoq gux: ‘Sairaengx naeh zawh sairaengx gawz, gawz zoq zoah puj Yaeuhtaiq yuq ndaw Yezluqsaxlaengx hoakzaqnaeh puk, yaq zoah aeu hawj puj yowngh ndai.’" 12Gaenqpiu daj cohsaenz Yezsuz dih naeh ruxnyinz yaq, zoq caqsiq chownq Bauxloah laek mwz Yezluqsaxlaengx. 13Gaj Bauxloah yaeng: "Gaenqsu baenzzaqrawz hoakzaqnaeh haej, hawj gux yuqraix mux? Gux cholaeng laemh dwk daenh Yezsuz zawh Zaeuj, mboq zangx hax gaj zoah daenh puk, daengz yuq ndaw Yezluqsaxlaengx tai gux goj venq." 14Gaenqpiu ruxndeq Bauxloah mboq biak piu chownq, gaenqpiu zoq mboq hax gaeng, hax gaj: "Zaeuj daz hoakzaqrawz zoq hoakzaqrawz neh." 15Gvaq jij vaenz ux yaq, gaenqpiu dox ndae'ndowq, loangzdin mwz Yezluqsaxlaengx. 16Cohsaenz Yezsuz ndaw Kaixsaxliqyaq, miz jij goanz ux daj piu zaemh mwz, gaenqpiu mwz taeng dih ux, paenqdix zowz piu bae rownz Nahsaenz ndowj, goanz Nahsaenz naeh goakrownz dix yuq ndaw Saiqpuxluqsez haixdaux, dix haeuz sinq Zaeuj ndowj.

Bauxloah Haxdoq Cohsaenz Yezsuz Sowh Puj Yuq Yezluqsaxlaengx Naeh Dix Hoak Gaeng

17Gaenqpiu mwz taeng Yezluqsaxlaengx, bihnongx ndaw zauqhoiq dih naeh daengzle zaemz piu taeuq. 18Vaenzlaeng, Bauxloah daj piu bae lez Yaqgowh, sowh puj gvanx dij goanz zauqhoiq naeh daengzle goj yuq dih naeh. 19Bauxloah daj daengzle dungz taennaj yaq, dix zoq laemh dwk paenqdix dij Sen aeu dix bae jeh puj yowngh ndai hoak gaengraeuh, dix koanx hoak yowngh hoak yowngh. 20Paenqdix biak yaq, zoq biangz dij Sen. Yaq hoakzaqnaeh yaix Bauxloah: "Laux bih aj, mawz lez, puj Yaeuhtaiq sinq kauqfaengz Yezsuz miz jijgaj fanh goanz, paenqdix caqsiq biak fahlih Moahciz. 21Paenqdix ruxnyinz miz dij goanz hax, hax mawz yaix puj Yaeuhtaiq sowh puj yuq dih puj yowngh ndai ndowj naeh, yaix paenqdix biak fahlih Moahciz gah, yaix paenqdix mboq saeh lug zaiz paenqdix hoak diauq zauh heh naeh, goj yaix paenqdix mboq biak sowh gaenq puj Yaeuhtaiq zauh naeh. 22Paenqdix ruxndeq mawz maz inxnaeh mboqyaq, hoakzaqrawz hoak mux? 23Mawz zoq biak piu bae hoak, inxnaeh miz siq goanz mbaednduq ndaej daj dij Sen haxgoak daekgoanq hoak puj cej ndauj ux. 24Mawz zowz paenqdix bae, daj paenqdix zaemh hoak sowh gaenq zauh hawj hoakri saw naeh, mawz saeh paenqdix kae jenz, hawj paenqdix ndaej ead to.#21:24 Puj Yaeuhtaiq mbangjzwz rux daj dij Sen haxgoak daekgoanq, aeu ndauj ux hoak puj cej, mboq jinx hoakri ead to, mboq jinx ndut laeuj, mboq jinx jin maegkaeu'it, mboq jinx lumh do tai daj puj tai. Hoak mowd zwz rawz paenqdix zoq rux hoak gaenq ux hoak daiqbiaux, baenzzaq ead to aj naeh. Lez Sw Anq Dij Goanz Yixsowhleh 6:1-8. Hoakzaqnaeh hawj daengzle ruxndeq mawz caqsiq biak fahlih, goj ruxndeq sowh saeh mbaednduq paenqdix ruxnyinz daenh hax zawh mawz hax naeh zawh saeh zaj. 25Cohsaenz Yezsuz sowh puj zawh puj yowngh ndai naeh, gaenqpiu haeuz laiz cinq hawj paenqdix, saengq paenqdix, mboq jinx jin sowh kaeujpyaek aeu mbud dij sen zaj naeh, mboq jinx jin lowd daj sowh doihdo jenjhoz tai naeh, puj nyingz daj puj zaiz mboq zawh po'mez mboq jinx zaemh noanz." 26Bauxloah zoq zowz siq goanz naeh mwz, vaenzlaeng daj paenqdix zaemh hoak sowh gaenq zauh hawj hoakri saw naeh, yaq mwz rownz dij Sen, haxdoq puj mbud dij Sen, haj goanz paenqdix mowd jiat vaenz zauh hawj hoakri saw naeh zwzrawz, mowd zwzrawz saeh paenqdix mbud sowh gaenq aeu mbud dij Sen naeh.

Bauxloah Yuq Rownz Dij Sen Zoah Puj Yaeuhtaiq Goangz

27Jiat vaenz gaengnaeh zaekgaj mowd, puj Yaeuhtaiq sowh puj daeq mbanj Ciqliqyaq daeuj naeh leztaen Bauxloah yuq rownz dij Sen, zoq coak goanzlai, jenj dix. 28Paenqdix rongx: "Dij goanz Yixsowhleh aj, maz saeh naeuz kvaiq ux owh! Goanz naeh bae dih bae dih zau daenh dix puj Yaeuhtaiq raeuz, dix fahlih raeuz daj dix rownz dij Sen inxnaeh. Dix naengz zowz dij goanz Cizlah mwz rownz dij Sen, hawj rownz dij Sen mboq saw." 29Paenqdix baenzzaqrawz hax Bauxloah zowz dij goanz Cizlah mwz rownz dij Sen, zawh paenqdix ndaej yuq ndaw chaenh leztaen Towhloahfaezmoah daj Bauxloah zaemh yuq. Towhloahfaezmoah zawh dij goanz ndaw Cizlah, yuq aen chaenh rongx hoak Yixfuhsoax naeh. Paenqdix faeklaih Bauxloah zowz goanz naeh mwz rownz dij Sen. 30Daengzle biak yaq, daengz chaenh zoq luanq mbukmbuk. Goanzlai zaemh lenh maz, jenj Bauxloah, laeg dix ni rownz dij Sen, yaq cenq ngaemz baegdu rownz dij Sen nauq. 31Gau paenqdix zaekgaj kaj Bauxloah naeh, miz dij goanz mwz haxdoq yinhzangx, hax: "Yezluqsaxlaengx daengz chaenh luanq nauq yah!" 32Yinhzangx cenq zowz bin dix daj jij goanz leanhzangx ux lenh mwz dih paenqdix naeh. Goanzlai leztaen yinhzangx daj bin, zoq dup Bauxloah gah. 33Yinhzangx daeq mwz baihnaj jenj Bauxloah, nemz dij goanz aeu song saenj tiksaed puk dix, cham dix zawh puj gaeng, hoak gajraeng. 34Dij goanz dih naeh goanz ux lej hoakzaq ux rongx, daengzle luanq mbukmbuk. Yinhzangx cham mboq ndaej gaemz rawz, mboq ruxndeq zawh gaeng saeh, dix zoq nemz dij goanz zowz Bauxloah dauh mwz dih paenqdix yuq naeh. 35Gau Bauxloah daeq mwz taeng mboaklae naeh, goanzlai daj mboq aeu aen mingh dungzlumj nyenj maz doq paenqdix, boangx bin dih hoakrawz mboq miz, zoq tam Bauxloah daeq. 36Goanzlai nyenj baihlaeng, rongx: "Kaj dix tai!"

Bauxloah Daj Goanzlai Hax Kauq

37Gau paenqdix zowz Bauxloah mwz taeng baegdu dih yinhzangx daj bin yuq naeh, Bauxloah daj yinhzangx hax: "Hawj gux daj mawz hax jij gaemz kauq ux mah?" Yinhzangx hax: "Mawz goj rux hax kauq Cizlah wx? 38Mawz mboq zawh goanz Aizjih, goanz vaenzranz coak dij goanz mboq biak puj saeq, goanz zowz siq tiang goanz sowh dij goanz luanq hoak luanq bae naeh lenh gowx bae ndaw doanghmowz naeh naeux?" 39Bauxloah hax: "Mboq zawh gah, gux zawh puj Yaeuhtaiq, gux zawh dij goanz ndaw mbanj Jizliqzaz, zawh dij goanz ndaw Daqsuq chaenh, gux mboq zawh daeq mwngz ndoang rawz daeuj. Vanz mawz hawj gux daj goanzlai hax jij gaemz ux." 40Yinhzangx awj dix, Bauxloah in mboaklae, yaeuj mungz dix, daengzle zoq mboq zuk, Bauxloah aeu kauq goakrownz dix, kauq Cizboahlaiz, daj daengzle hax:

Currently Selected:

Zawxkauq 21: ZHN

Highlight

Copy