Zawxkauq 23

1 Bauxloah lez mwz doq dij goanz ndaw hoiq gau ux, hax: "Bihnongx, daeq zwzrawz maz, gux hoaksaeh gojndae, hoakgoanz gojndae, yuq doqnaj dij Sen, gux doiq hoakri mboq miz gaemz gaeng." 2Yaqnahnihyaq goanz puj mbud dij Sen goanz saeq dwx nyeuz daengzle naeh zoq nemz sowh puj yuq haenz in naeh saeuh baeg Bauxloah. 3Bauxloah daj dix hax: "Mawz baeg daj zaw mboq dungzlumj, mbaenqnaeh dij Sen saeuh mawz yah! Mawz naengh inxnaeh zawh aeu fahlih saenxpanq gux, gaj mawz ej daeuqfa mboq biak fahlih nemz dij goanz dup gux maj?" 4Sowh puj in yuq haenz naeh hax: "Mawz ganz mang puj mbud dij Sen goanz saeq dwx nyeuz daengzle naeh maj?" 5Bauxloah hax: "Bihnongx, gux mboq ruxndeq dix zawh puj mbud dij Sen goanz saeq dwx nyeuz daengzle naeh gux zux hoakzaqnaeh hax, gux goj ruxndeq ndaw Sw Dij Sen hax: ‘Mboq jinx mang puj saeq su.’#23:5 Gaemz kauq naeh haeuz yuq Sw Ni Aizjih 22:28." 6Yaq gau Bauxloah leztaen sowh dij goanz yuq haenz naeh, mbangj goanz zawh dij goanz paiq Saxduzgaiz naeh, mbangj goanz zawh dij goanz paiq Fahliqsaiq naeh, dix zoq nwh taeng diauq ux. Dix yuq ndaw hoiq hax chungndae taeuq: "Bihnongx, gux zawh dij goanz paiq Fahliqsaiq, gux goj zawh luglan dij goanz paiq Fahliqsaiq, gux gannaeh zoah saenxpanq, zawh cho gux ngwz taeng vaenz dij Sen hawj puj tai daeuq zaeu naeh." 7Dix daeh hax gaemz kauq naeh, dij goanz Fahliqsaiq daj dij goanz Saxduzgaiz zoq dungzjinj, ndaw hoiq cenq baenz song paiq. 8Baenzzaqrawz baenzzaqnaeh mah? Dij goanz Saxduzgaiz loah'ej mboq sinq dij goanz tai yaq rux daeuq zaeu, mboq sinq miz Bin dij Sen daj miz minghkoan, gaj dij goanz Fahliqsaiq loah'ej hax miz daengz jij gaj yowngh. 9Yaq ndaw hoiq gaj laeng gaj zuk chungndae, miz jij goanz lauxswz Fahliqsaiq ux dwnq maz, hax: "Gaenqpiu lez mboq og goanz naeh hoak loang gaeng. Jixzawh miz minghkoan rux miz Bin dij Sen daj dix hax kauq zaeh, hoakzaqrawz hoak mawj?" 10Dungzjinj gaj laeng gaj chungndae, yinhzangx mbu Bauxloah zoah paenqdix laeg nownzcumj, zoq nemz bin bae dih goanzlai naeh longx Bauxloah dauh maz, zowz dix dauh mwz dih paenqdix yuq naeh.

11Haemh gaengnaeh, Zaeuj in haenz Bauxloah, daj dix hax: "Laek mbu, mawz hoakzaqrawz yuq ndaw Yezluqsaxlaengx haxdoq daenh gaenqgux zawh Jizduz, mawz toj goj zaemh hoakzaqrawz yuq ndaw Loahmax haxdoq daenh mboqyaq."

Puj Yaeuhtaiq Daz Deq Bauxloah Kaj

12Nawlaeng, puj Yaeuhtaiq maz zaemh yuq dwkgangz. Paenqdix daengzle zaemh haxgoak daekgoanq, hax mboq kaj Bauxloah paenqdix zoq mboq jin mboq ndut. 13Sowh puj maz dwkgangz naeh miz siqsip lai goanz. 14Paenqdix mwz dih sowh puj gvanx puj mbud dij Sen naeh daj sowh puj jeq miz najta naeh, hax: "Gaenqpiu haeuz haxgoak daekgoanq yaq, jixzawh mboq kaj Bauxloah, gaenqpiu zoq mboq jin gaeng. 15Gannaeh gaenqsu daj dij goanz ndaw hoiq Yaeuhtaiq rongx yinhzangx maz, yaix dix zowz Bauxloah maz dih su inxnaeh, hoakdoi hax daz jinj sowh saeh Bauxloah naeh naeuz tiq ux. Gaenqpiu haeuz dox ndae'ndowq, dix naengz maz mboq taeng zawj, gaenqpiu zoq kaj dix yah." 16Lug zaiz jex Bauxloah ruxnyinz paenqdix daz hoakzaqnaeh, zoq mwz dih yinhzangx daj bin yuq naeh, mwz haxdoq Bauxloah. 17Bauxloah rongx goanz leanhzangx ux maz, daj dix hax: "Mawz zowz maeng naeh mwz dih yinhzangx naeh mbaed'ux, dix miz kauq haxdoq dix." 18Goanz leanhzangx gaengnaeh zoq zowz maeng naeh mwz dih yinhzangx naeh, daj yinhzangx hax: "Goanz Bauxloah yuq ndaw lauz naeh rongx gux bae, vanz gux zowz maeng naeh maz dih mawz inxnaeh, dix miz kauq haxdoq mawz." 19Yinhzangx gaem mungz maeng naeh, daeq bae baih ux, lupliamx cham dix: "Mawz miz gaeng kauq haxdoq gux ah?" 20Dix yaeng: "Puj Yaeuhtaiq haeuz dwkgangz ndae'ndowq, daz vaenzbig yaix mawz zowz Bauxloah bae ndaw hoiq puj Yaeuhtaiq, paenqdix daz hoakdoi jinj sowh saeh Bauxloah naeh naeuz tiq ux. 21Gaj mawz laek biak paenqdix, paenqdix miz siqsip lai goanz yuq ka loh deq taj, paenqdix haeuz haxgoak daekgoanq yaq, jixzawh mboq kaj Bauxloah paenqdix zoq mboq jin mboq ndut. Paenqdix haeuz dox ndae'ndowq, taj gaj mawz gaemz ux neh." 22Yinhzangx saengq maeng gaengnaeh: "Laek haxdoq gawz gaenqmawz aeu mbaed saeh naeh haxdoq gux." Yaq nemz dix dauh mwz.

Bauxloah Zoah Aeu Bae Dih Goanz Rongx Hoak Faezlihsez Naeh

23Yinhzangx rongx maz song goanz leanhzangx, saengq paenqdix: "Gaenqsu bae dox taj, zunxbiq sowh bin aeu din daeq naeh song baeg goanz, sowh bin kviq max naeh jiatsip goanz, sowh puj tw chog naeh song baeg goanz, haemhzawjraeuz jeux denx loangzdin bae Kaixsaxliqyaq. 24Goj aeu dij max hawj Bauxloah kviq, soangq dix bae dih Faezlihsez goanz gvanx daengz mbanj Yaeuhdaq inxnaeh." 25Yinhzangx laiz fung cinq ux, ndaw cinq hoakzaqnaeh hax:

26"Gux zawh Kowhlauhdiq-loixcizyaq. Faezlihsez laux saeq dwx aj, mawz yuqndae naeujbojleh? 27Goanz gux soangq bae naeh zoah puj Yaeuhtaiq goangz, zaekgaj zoah kaj. Gux ruxndeq dix suhyih dij goanz Loahmax goh, zoq zowz bin bae jeuq dix maz. 28Gux zawx ruxndeq puj Yaeuhtaiq baenzzaqrawz gauq dix, zoq zowz dix bae ndaw hoiq puj Yaeuhtaiq paenqdix. 29Yaq gux ruxndeq paenqdix gauq dix zawh cholaeng dungzjinj fahlih paenqdix, gaj dix mboq hoak gaeng hoj puk rux hoj tai. 30Doaklaeng miz dij goanz maz haxdoq gux, hax puj Yaeuhtaiq daz hoakgoix kaj dix, gux zoq cenq soangq dix bae dih mawz, goj saengq sowh dij goanz gauq dix naeh bae dih zawj mawz gauq dix."

31Yaq bin zoq hoakzaq puj saeq paenqdix saengq naeh, qeu'hwnz soangq Bauxloah bae Anztihpaqdix chaenh. 32Vaenzlaeng, hawj sowh bin kviq max naeh soangq Bauxloah bae naj, sowh bin aeu din daeq naeh zoq dauh maz dih yinhzangx daj bin yuq naeh. 33Sowh bin kviq max naeh bae taeng Kaixsaxliqyaq, aeu cinq hawj goanz gvanx daengz mbanj Yaeuhdaq naeh, goj aeu Bauxloah hawj dix. 34Goanz gvanx daengz mbanj Yaeuhdaq naeh doag fung cinq gaengnaeh yaq, zoq cham Bauxloah zawh dij goanz mbanj rawz. Dix ruxndeq Bauxloah zawh dij goanz Jizliqzaz yaq, 35zoq hax: "Taj sowh dij goanz gauq mawz naeh daeuj taeng, gux goanq saeh su paeg." Yaq nemz dij goanz aeu Bauxloah bae kaeng aen rownz hongz Cizlih daengj naeh.

Currently Selected:

Zawxkauq 23: ZHN

Highlight

Copy