Zawxkauq 2

Jeng Kaeuj Mawq Minghkoan Dij Sen Daeuj Ndang Cohsaenz Yezsuz

1Taeng Jeng Kaeuj Mawq,#2:1 Puj Yaeuhtaiq gvaq Jeng Gvaq hajsip vaenz yaq, zoq taeng Jeng Kaeuj Mawq, paenqdix jin Jeng Kaeuj Mawq biangz dij Sen, biangz dij Sen hawj paenqdix miz gaenqjin. paenqdix maz zaemh yuq. 2Hubhaeb miz hiang ux daeq ndaw fax daeuj, sowh hiang naeh chung daj miz chaq laemz dwx ux baeuq dungzlumj, aen rownz paenqdix yuq naeh, daengz aen mizgaj sowh hiang naeh. 3Paenqdix leztaen sowh ux daj mbaw linx dungzlumj, daj faez dungzlumj. Sowh naeh banh bae now to paenqdix, now to gawz goj miz. 4Minghkoan dij Sen dumh daengz ndang paenqdix, sowh gaunaeh Minghkoan dij Sen hawj paenqdix rux hax kauq yowngh ndai.

5Zwz naeh, yuq Yezluqsaxlaengx chaenh miz puj Yaeuhtaiq sowh puj ruxndeq mbu dij Sen naeh ndowj. Paenqdix daeq dihrawz raeuh maz. 6Hiang naeh daeh chung, dij goanz zoq og maz tomj lai taeuq, gawz goak sowh kauq rawz, gawz zoq ruxnyinz cohsaenz Yezsuz hax sowh kauq rawz, dangq goanz dangq ruxnyinz sowh kauq dih hoakri goak naeh. Paenqdix ndaej mbaed tukzaw ux. 7Paenqdix sawzsowq se, hax: "Sawz gaiq eh, boangx hax kauq inxnaeh zawh dij goanz Zazliqliq naeujmax! 8Gaenqraeuz baenzzaqrawz dangq goanz dangq ruxnyinz paenqdix goak kauq dih raeuz mux?" 9-11Sowh dij goanz yuq haenz biak cohsaenz Yezsuz hax kauq naeh zawh puj Yaeuhtaiq, mbangj goanz bwnz zawh puj Yaeuhtaiq, gaj mbangj goanz mbaednduq mboq zawh puj Yaeuhtaiq, zawh doaklaeng byenqbaenz puj Yaeuhtaiq.#2:9-11 Zwz naeh sowh dij goanz mboq zawh dij goanz Yaeuhtaiq naeh, jixzawh paenqdix gawz zawx byenqbaenz dij goanz Yaeuhtaiq, paenqdix zoq baenz hoak diauq zauh soiq naeh, mwz rownz dij Sen mbud dij Sen, heh naeng baeg dij noag, hoak daengz sam yowngh naeh zoq byenqbaenz dij goanz Yaeuhtaiq. Daeklaeng hoj biak fahlih Moahciz. Paenqdix goanz ux daeq baih ux daeuj. Mbangj goanz daeq mbanj Paqtihyaq, mbanj Mixdixyaq, mbanj Yixlanh daj mbanj Maexsoahbuqdahmixyaq maz. Naengz miz dij goanz daeq mbanj Yaeuhdaq, mbanj Zazpaqdozzaz, mbanj Baenxduz, mbanj Yaqciqyaq, mbanj Fuhloixzaz, mbanj Panghfaezliqyaq, mbanj Aizjih maz. Naengz miz dij goanz daeq haenzhenz Guxliqyaq chaenh ndaw mbanj Liqbixyaq naeh, daeq Loahmax chaenh maz leuh naeh, daeq Kowhlixtowh, daeq mbanj Azlazboah maz. Sowh dij goanz yuq haenz biak cohsaenz Yezsuz hax kauq naeh paenqdix hax: "Gaenqraeuz dangq goanz dangq ruxnyinz paenqdix goak kauq dih hoakri raeuz, paenqdix goanz ux lej aeu sowh kauq ux koanx sowh saeh dwx dij Sen hoak naeh." 12Daengzle sawz taeuq, goanz lej cham goanz: "Baenzzaqrawz baenzzaqnaeh mux?" 13Gaj mbangj goanz kosaemj hax: "Zawh paenqdix ndut laeuj mawq lai gvaq laeujmiz naeujgoah!"

14 Bihdowh daj sip'aet goanz dij goanz zawxkauq Yezsuz naeh dwnq maz, dix caqsiq daj daengzle hax: "Sowh dij goanz yuq ndaw mbanj Yaeuhdaq ndowj naeh aj, daj sowh dij goanz yuq ndaw Yezluqsaxlaengx chaenh ndowj naeh aj, gaenqsu ruxndeq mbaed saeh naeh zuxbaenz, gaenqsu ndingq chu biak gux hax. 15Gannaeh zux zawh zangnaw jeux denx, paenqdix mboq zawh daj gaenqsu hax naeh dungzlumj ndut laeujmiz. 16Gaenq gaenqsu taen gannaeh daj gaemz kauq zwzpujjeq puj zawxkauq dij Sen Yezex hax naeh dungzlumj:

17"‘Dij Sen hax: Jeh doaklaeng naeh,

Gux aeu minghkoan gux bae ndaw ndang sowh dij goanz rawz gojmbaeuq,

mwznaj gux hawj lug zaiz su, lug nyingz su zawx kauq gux,

Mwznaj gux hawj puj reauh daj paen'hwnz dungzlumj taen sowh gaenq gux hawj paenqdix ruxndeq naeh,

mwznaj gux hawj puj jeq paen'hwnz ruxnyinz kauq gux.

18Ndauj gaeng naeh, gux goj aeu Minghkoan gux bae ndang puj koij zaiz gux daj ndang puj koij nyingz gux,

hawj paenqdix zawx kauq gux.

19Gux yuq ndaw fax hoak sowh saenh yaengh saenh naeh, gux yuq dihndin hoak sowh saeh mboq sanz taen naeh.

Miz lowd, miz faez, miz yailaeuh.

20Tang'vaenz rux byenq ndaem,

Aen hai rux byenq ndiang daj lowd dungzlumj,

daekgoanq vaenz Zaeuj su daeuj naeh, miz suq saeh naeh mboqyaq. Vaenz gaengnaeh daj vaenz ndai mboq dungzlumj, sowh vaenz naeh dawj fax naengz mboq sanz miz.

21Taeng zwz naeh, nanghgaj gawz aeu Zaeuj hoak dij Sen maengx, gawz zoq ndaej jeuq mboqyaq.’"#2:21 Gaemz naeh haeuz yuq ndaw Sw Yezex 2:28-30.

22 Bihdowh daeuq hax: "Puj Yixsowhleh raeuz aj, gaenqsu biak gaemz kauq naeh: Gaenqsu ruxndeq, dij Sen hawj Yezsuz ndaw Nazsahlowh yuq haenz su hoak saeh dwx, hoak sowh saenh yaengh saenh naeh, hoak sowh saeh ndaw fax naeh, hawj su ruxndeq Yezsuz zawh goanz dij Sen nemz daeuj naeh. 23Yezsuz zoah aeu hawj su, zawh dij Sen daeq zwz nduq maz haeuz bwnz ruxndeq, zawh gaenqdix daz. Yezsuz zoah aeu hawj su yaq, su hawj puj mbowq aeu dengdinz doag dix lamh mwz maexngamzchaz tai. 24Gaj dih puj tai naeh jenj dix mboq ndaej, baenzzaqnaeh dij Sen zoq mboq hawj diauq tai yuqraix naeh goq goq gvanx dix, hawj dix daeuq zaeu. 25Laux hongz Daqvaeq hoakzaqnaeh hax dix:

"‘Zaeuj gux yuq doqnaj gux daengznauq,

dix yuq baih qensa gux luz gux, hawj gux mboq rux vae.

26Baenzzaqnaeh, ndaw zaw gux faengz taeuq,

baeg gux hax kauq faengz, ndang gux miz dih maengx.

27Unj, mawz mboq rux jizzaz minghkoan gux yuq dihndaem.

Goj mboq rux hawj ndang dij goanz mawz goanz sawrik naeh naeuh.

28Mawz hawj gux ruxndeq ka loh ndaej aen mingh naeh;

hawj gux ndaej yuq doqnaj mawz faengz daengz gaemz hax mboq miz nauq.’#2:28 Le gaemz naeh haeuz yuq ndaw Sw Lownx 16:8-11.

29"Bihnongx gux aj, puj jeq rownz raeuz Daqvaeq, gux haxdoq su swhlit, dix tai yaq, aeu haem yaq, taengdeg vaenzzawjraeuz moh dix goj naengz yuq inxnaeh. Gaenq naeh gux mboq yaem hax, gaenqsu gaj goanz gaj ruxndeq. 30Dix zawh puj zawxkauq dij Sen, goj ruxndeq dij Sen ndaej daj dix haxgoak daekgoanq, hax hawj luglan dix goanz ux daeb dix hoak hongz. 31Dix haeuz ruxndeq Jizduz rux tai yaq daeuq zaeu,#2:31 Jizduz zawh hax: "Goanz zoah aeu yuz maeghit zoaj ndaw to naeh." Zwzndowj, dij Sen lowg puj Yixsowhleh goanz rawz hoak puj mbud dix, raj lowg goanz rawz hoak hongz puj Yixsowhleh, dix nemz puj Yixsowhleh aeu yuz maeghit zoaj ndaw to sowh goanz dix lowg naeh. Dij Sen tungzgoaq puj zawxkauq dix yinq dij goanz dix, yinq hawj paenqdix goanz Jizduz ux, hawj goanz Jizduz naeh daeuj dihndin jeuq dij goanz daj gvanx dij goanz. dix hoakzaqnaeh hax Jizduz rux tai yaq daeuq zaeu, dix hax:

"‘Minghkoan dix mboq rux zoah aeu viangh bae dihndaem,

ndang dix goj mboq rux naeuh.’"

32 Bihdowh daeuq hax: "Goanz Yezsuz naeh, dij Sen haeuz hawj dix daeuq zaeu, gaenqpiu gaj goanz gaj ndaej taen. 33Dix zoah yaeuj mwz baih qensa dij Sen. Dez ndaw fax yinq aeu Minghkoan dix hawj Yezsuz, Yezsuz deq Minghkoan dij Sen yaq, dix aeu Minghkoan dij Sen sauq daeuj hawj piu. Minghkoan dij Sen sauq daeuj ndang piu yaq, baenzzaqnaeh gannaeh gaenqsu zoq leztaen daj ruxnyinz piu rux hax sowh kauq dih su naeh. 34Mboq zawh ndang Daqvaeq mwz ndaw fax, gaj dix hax:

"‘Dij Sen daj Zaeuj gux hax:

"Mawz naengh baih qensa gux,#2:34 Naengh baih qensa gux zawh hax: "hawj mawz najta dwx nyeuz daengzle."

35taj gux aeu sowh puj daj mawz hoak dangqbaih naeh hoak sowh daengq sowq dej din mawz naeh."’#2:35 Gaemz naeh haeuz yuq Sw Lownx 110:1.

36Baenzzaqnaeh, daengzle dij goanz Yixsowhleh aj, gaenqsu ruxndeq zuxbaenz, Yezsuz, goanz su aeu dengdinz doag dix mwz maexngamzchaz, dij Sen hawj dix hoak Zaeuj, hoak Jizduz yah."

37Sowh puj biak Bihdowh hax kauq naeh, paenqdix ruxndeq Bihdowh hax zoah dih, ndaw zaw yuqraix. Miz dij goanz zoq daj Bihdowh daj dij goanz zawxkauq Yezsuz goanz ndai hax: "Bihnongx aj, gaenqpiu naengz hoakrawz baenz ndaej mbaeuq mux?" 38Bihdowh hax: "Gaenqsu gaj goanz gaj yauq gaix, yaq aeu zwh Yezsuz Jizduz hoak diauq zauh soiq naeh,#2:38 Hoak diauq zauh soiq naeh zawh hax gaenq ux baenzzaqnaeh, zoq zawh sowh puj hax venq sinq Yezsuz naeh dix yuq doqnaj goanzlai yinq Yezsuz hoak Zaeuj, yaq miz goanz zoq aeu dix yup bae ndaw naemx, rux aeu naemx sauq yuq now to dix. hoakzaqnaeh dij Sen zux yangq gaenq hoakloang su, dij Sen zux aeu minghkoan dix hawj su. 39Unj gaenq dij Sen yinq aeu hawj naeh, zawh aeu hawj su daj lug su daj dij goanz dihndai, zoq zawh aeu hawj sowh dij goanz Zaeuj, dij Sen raeuz, rongx maz nowngz dix naeh." 40Bihdowh naengz hax lai yowngh taeuq, saengq paenqdix, dix chownq daengzle, hax: "Gaenqsu baenz jeuq hoakri ni zoh mbowq tai mbowq naeuh naeh!" 41Yaq sowh puj biak dix chownq naeh, gaj goanz gaj hoak diauq zauh soiq naeh, vaenz gaengnaeh, cohsaenz Yezsuz za teq sam tiang goanz ux naeh. 42Paenqdix caqsiq goq biak biak gaenq dij goanz zawxkauq Yezsuz zau naeh, daengzle hoak boangx ndeu, goanz lej saeh goanz, daengzle peg binx nyen Yezsuz,#2:42 Paenqdix peg binx nyen Yezsuz zoq zawh hax paenqdix zaemh jin binx, zaemh ndut laeuj maegkaeu'it, nyen Yezsuz how dij goanz tai, daj Yezsuz saengq paenqdix hoakzaqnaeh hoak dungzlumj. Lez ndaw Sw Maxkowh Laiz Kauqfaengz Yezsuz 14:22-25, Sw Luhzaz Laiz Kauqfaengz Yezsuz 22:14-19. daj dij Sen hax kauq.

Le Gaenq Cohsaenz Yezsuz Vaenz Vaenz Hoak Naeh

43Ndauj gaengnaeh, daengzle mbu, dij Sen hawj dij goanz zawxkauq Yezsuz hoak sowh saeh mboq sanz taen naeh daj sowh saeh ndaw fax naeh. 44Sowh puj sinq naeh, daengzle maz zaemh yuq, gawz miz za'hoq gaeng goj zaemh yungq, 45paenqdix goj miz puj kai raehnaz, za'hoq, aeu sowh ngaenzjenz naeh saeh paenqdix sowh puj mboq doh naeh. 46Paenqdix vaenz vaenz hoak zawdoag maz rownz dij Sen zaemh yuq, bae hoak rownz hoak rownz peg binx nyen Yezsuz, zaemh jin faengz taeuq, goanz lej hoak swh dwk goanz, 47zaemh biangz dij Sen, ndaej hawj daenh zaemz. Zaeuj gaj vaenz gaj hawj dij goanz ndaej jeuq, hawj dij goanz paenqdix gaj vaenz laeng gaj raengh.

Currently Selected:

Zawxkauq 2: ZHN

Highlight

Copy