Zawxkauq 3

Bihdowh Yuq Gumhhongh Rownz Dij Sen Koanx Kauqfaengz Dij Sen Dwk Daenh

1Miz vaenz ux, zang'vaenz sanz denx, zoq zawh sowh gau daj dij Sen hax kauq naeh, Bihdowh, Yezhanq mwz rownz dij Sen. 2Miz goanz ux, swn daeuj ka dix zoq bwnz ndiak, dix vaenz vaenz zoah daenh tam maz baegdu rownz dij Sen ux, baegdu naeh minxzwh rongx hoak: "Baegdu Yawz." Yuq dih naeh, goanz ka'ndiak naeh dex jenz sowh puj mwz rownz dij Sen naeh. 3Dix leztaen Bihdowh, Yezhanq mwz rownz dij Sen, zoq dex paenqdix. 4Bihdowh daj Yezhanq caqsiq lez bae doq dix, Bihdowh daj dix hax: "Lez maz doq piu!" 5Goanz gaengnaeh zoq caqsiq lez maz doq paenqdix, ngwz paenqdix aeu gaeng hawj dix. 6Gaj Bihdowh hax: "Jim, ngaenz gux gaeng goj mboq miz, gaj gux aeu sowh gaenq gux miz naeh hawj mawz: Gux aeu zwh Yezsuz Jizduz ndaw Nazsahlowh yaix mawz dwnq maz daeq!" 7Yaq Bihdowh zoq laeg qensa dix, fowz dix dwnq maz, ka dix daj nduk din dix cenq zaengx, miz doakriangz. 8Goanz gaengnaeh zoq yoanghyangh dwnq maz, in, daeq. Dix daj paenqdix zaemh mwz rownz dij Sen, menq daeq menq yoangh, biangz dij Sen. 9Goanzlai leztaen dix menq daeq menq biangz dij Sen, 10goj ruxndeq dix zawh goanz zwzzwz yuq baegdu Rownz dij Sen baegdu yawz naeh dexkaeuj naeh, zoq cholaeng aen chaej dix yumq ndaej hoakzaqnaeh ya ndae zoq zaemz, sawz taeuq.

11Gau goanz mbaednduq ka'ndiak naeh yuq aen yauj Soaxloahmaenh naeh gaem qen Bihdowh daj Yezhanq naeh, goanzlai sawz taeuq, lenh maz dih paenqdix naeh. 12Bihdowh leztaen goanzlai sawz, zoq daj goanzlai hax: "Puj Yixsowhleh aj. Su baenzzaqrawz cho mbaed saeh naeh sawz mux? Baenzzaqrawz lez piu daengz ta zow saw mux? Gaenqsu faeklaih gaenqpiu hawj goanz naeh daeq baenz zawh cholaeng gaenqpiu miz doakriangz nyeuz daenh maj? Raj gaenqpiu sinq dij Sen haenlaez-haenlih nyeuz puj ndai maj? 13Su aeu puj koij dij Sen Yezsuz hawj Bihlazdoz, #3:13 Bihlazdoz zawh puj saeq gvanx puj kaenglauz, dix gvanx mbanj Yaeuhdaq. vanz Bihlazdoz kaj dix. Bihlazdoz hax zoangq dix, gaj su yuq doqnaj Bihlazdoz viangh dix nauq. Gaj dij Sen Yaqboahlazhanq, Yitsaeg, Yaqgowh naeh,#3:13 Yaqboahlazhanq, Yitsaeg, Yaqgowh, sam goanz naeh zawh zuxzungz puj Yixsowhleh. Lez ndaw Sw Zwz nduq 12. zoq zawh dij Sen puj jeq rownz raeuz naeh hawj Yezsuz miz najtai. 14Gaenqsu viangh Yezsuz, goanz sawrik, goanz gaemz hax mboq miz naeh, naengz gajfa daeuq vanz Bihlazdoz zoangq goanz luanq kaj dij goanz ndaej mwz kaeng naeh hawj su. 15Gaenqsu kaj Zaeuj chauq aen mingh naeh, gaj dij Sen hawj dix tai yaq daeuq zaeu. Gaenqpiu ndaej ta taen mbaed saeh naeh singjringh. 16Gaenqpiu sinq zwh Yezsuz rux hawj aen chaej dix ndae, baenzzaqnaeh Yezsuz zoq hawj goanz naeh ndae, zoq zawh hawj goanz su ruxnaj naeh zaengx. Yezsuz hawj gaenqpiu sinq dix, baenzzaqnaeh goanz naeh yuq doqnaj su ndae nauq. 17Paenq bihnongx aj, gux ruxndeq su hoakzaqnaeh hoak zawh gaenqsu mboq ruxndeq, daengz puj saeq su goj zawh venj naeh. 18Gaj dij Sen hawj puj zawxkauq dix hax, hax Jizduz rux zoah daenh haiq tai, doaklaeng dij Sen zoq hawj baenzzaeh. 19Baenzzaqnaeh, gaenqsu yauq gaix, dauh maz nowngz dij Sen, hawj dix yangq gaenq hoakloang su. 20Hoakzaqnaeh, dij Sen zux daeuq hawj gaenqsu yuqzaih, Zaeuj goj nemz Jizduz Yezsuz goanz dix haeuz lowg hawj su naeh daeuj. 21Jizduz baenz yuq ndaw fax, taengdiak zwz dij Sen hawj gaj yowngh gaj daeuq mawq baenzzaq mbaednduq naeh. Daeq chauq fax chauq dihndin maz dij Sen haeuz hawj paenq dij goanz dix paenq puj zawxkauq dix hax yaq. 22Baenzzaq gaenq Moahciz ndaejdaj puj Yixsowhleh raeuz hax naeh: ‘Zaeuj, dij Sen su, yaeuj bihnongx su goanz ux hoak puj zawxkauq dix, daj gux dungzlumj. Goanz naeh dix daj su hax gaeng gojndae, su hoakrawz goj biak dix. 23Gawz mboq biak goanz puj zawxkauq dij Sen naeh, zoq byaeg dix, mboq hawj dix hoak dij goanz dij Sen.’ 24Daengzle puj zawxkauq dij Sen, daeq zwz Saxmuxex naeh maz, nanghgaj gawz hax sowh saeh mwznaj naeh, gawz goj hax zoah ndauj zawjraeuz. 25Gaenqsu zawh luglan puj zawxkauq dij Sen, dij Sen daj puj jeq rownz su dungzdingq. Dix daj Yaqboahlazhanq hax: ‘Dij goanz dihndin, changz rawz goj ndae laeng luglan mawz.’#3:25 Gaemz kauq naeh haeuz yuq Sw Zwz nduq 12:3. 26Dij Sen yaeuj puj koij dix,#3:26 Gaemz kauq naeh goj ingj hoanx naeh hax: "Dij Sen hawj puj koij dix daeuq zaeu." nemz dix daeuj dih su daekgoanq, hawj su ni gaenqndog, dauh maz doq dij Sen."

Currently Selected:

Zawxkauq 3: ZHN

Highlight

Copy