Zawxkauq 4

1Gau Bihdowh, Yezhanq doiqdix daj goanzlai hax kauq naeh, puj mbud dij Sen, yaq goanz puj saeq dawz rownz dij Sen naeh, yaq dij goanz Saxduzgaiz,#4:1 Baih Saxduzgaiz zawh baih puj Yaeuhtaiq ux. Sw Dij Sen paenqdix sinq gaj haj bwnz sw Moahciz laiz naeh. Paenqdix mboq sinq miz bin dij Sen, miz minghkoan, dij goanz tai yaq rux daeuq zaeu. paenqdix daeq maz zawj, 2ruxnyinz dij goanz zawxkauq Yezsuz zau goanzlai, haxdoq daenh Yezsuz tai yaq daeuq zaeu. Baenzzaqnaeh paenqdix zoq jih taeuq. 3Paenqdix zoq goangz Bihdowh daj Yezhanq. Gaj gaunaeh fax haeuz ndaem, paenqdix zoq aeu Bihdowh daj Yezhanq kaeng taeng vaenzlaeng. 4Sowh puj biak dij goanz zawxkauq Yezsuz koanx naeh, miz dij goanz lai taeuq sinq. Taeng vaenz gaengnaeh, sowh puj sinq Zaeuj naeh, puj zaiz daengzle miz teq haj tiang goanz ux naeh.

5Vaenzlaeng, sowh puj saeq gvanx puj Yaeuhtaiq naeh, yaq sowh laux jeq miz najta naeh, yaq sowh lauxswz zau Sw Dij Sen naeh, paenqdix maz Yezluqsaxlaengx zaemh yuq, 6naengz miz Yaqnah, goanz gvanx puj mbud dij Sen goanz saeq dwx nyeuz daengzle naeh, yaq Gaizyaqfah, Yezhanq, Yaqlihsanzdaq, sam goanz naeh zawh bihnongx Yaqnah. Yaqnah naengz miz bihnongx ndai tem goj maz, daengzle yuq dih gaengnaeh. 7Paenqdix yaix dij goanz zawxkauq Yezsuz in jinghzang daengzle, jinj paenqdix: "Gaenqsu hawj goanz gaengnaeh ndae, zawh aeu sowh doakriangz rawz, zawh aeu zwh gawz hoak?" 8Zwz naeh, Minghkoan dij Sen dumh daengz ndang Bihdowh, dix zoq daj paenqdix hax: "Puj saeq puj Yaeuhtaiq daj puj jeq aj! 9Piu saeh goanz ka'ndiak gaengnaeh hoak saeh ndae, baenzzaqnaeh gannaeh su jinj piu hoakzaqrawz hawj goanz ka'ndiak gaengnaeh ndae. 10Gaenqsu daj daengzle dij goanz Yixsowhleh gaj goanz gaj ruxndeq zuxbaenz, goanz in doqnaj su naeh ndae yah, zawh ndaelaeng zwh Yezsuz Jizduz ndaw Nazsahlowh. Goanz Yezsuz Jizduz naeh, su aeu dengdinz doag dix mwz maexngamzchaz. Gaj dij Sen hawj dix tai yaq daeuq zaeu. 11Goanz Yezsuz naeh zoq daj kvaix tin ndaw Sw Dij Sen hax naeh dungzlumj. Ndaw Sw Dij Sen hax:

"‘Kvaix tin puj hoak zangh su aeu viangh naeh,

haeuz baenz tin'dinsaeu kvaix zungqyauq nyeuz daengzle naeh.’#Lownx 118:22.

12Daengz dawj fax nauq, mizgaj zwh Yezsuz, gvaqmaz dij Sen mboq aeu zwh gawz hawj raeuz maengx dix ndaej jeuq. Baenzzaqnaeh, mizgaj dix rux jeuq, gvaqmaz mboq miz gawz."

13Paenqdix leztaen Bihdowh daj Yezhanq ngoah taeuq, goj ruxndeq doiqnaeh mboq ndaej doag sw lai, zoq sawz taeuq, goj nwh ndaej doiqnaeh ndaej nowngz Yezsuz. 14Paenqdix goj leztaen goanz zoah ya ndae yaq naeh daj doiqdix zaemh in, zoq mboq miz gaemz yaeng. 15Yaq paenqdix zoq yaix doiqnaeh bae baihnog ndaw hoiq puj Yaeuhtaiq. Daeuq hoakzaqnaeh dungzcham: 16"Mbaed saeh paenqdix hoak naeh, zawh sowh saenh yaengh saenh naeh singjringh, nanghgaj zawh sowh dij goanz yuq ndaw Yezluqsaxlaengx ndowj naeh, daengzle ruxndeq nauq, gaenqraeuz hax mboq miz goj hax mboq baenz. Baenzzaqnaeh, gaenqraeuz hoj aeu paenqdix hoakzaqrawz hoak mux? 17Cho laek hawj mbaed saeh naeh gaj laeng gaj leuz bae gvae, gaenqraeuz cog paenqdix zuxbaenz, laek hawj paenqdix aeu zwh Yezsuz koanx dwk daenh." 18Yaq paenqdix zoq rongx Bihdowh daj Yezhanq maz, yaix doiqdix mboq jinx laemh zwh Yezsuz, mboq jinx aeu gaenqnaeh zau daenh. 19Bihdowh daj Yezhanq yaeng: "Yuq doqnaj dij Sen, biak kauq su hoj nyeuz rux biak kauq dij Sen hoj nyeuz, gaenqsu haeggaj daeg neh! 20Gaenq gaenqpiu taen naeh daj gaenq gaenqpiu ruxnyinz naeh, piu mboq hax mboq baenz!"

21-22Goanz hawj sowh saenh yaengh saenh ya ndae naeh ndaej siqsip lai bi, dix haeuz ka'ndiak ndaej siqsip lai bi, gannaeh ndaej ya ndae. Daengzle zoq biangz dij Sen. Hoakzaqnaeh, puj saeq dih aeu Bihdowh daj Yezhanq hoakrawz mboq miz, paenqdix daeuq cog Pihnowh daj Yezhanq mbaedmawq, zoq zoangq doiqdix.

Cohsaenz Yezsuz Vanz Zaeuj Hawj Paenqdix Miz To'zaw

23 Bihdowh daj Yezhanq zoangq daeuj yaq, zoq dauh mwz dih dij goanz hoakri naeh. Doiqdix haxdoq dij goanz hoakri sowh goanz gvanx puj mbud dij Sen naeh daj sowh puj saeq gvanx puj Yaeuhtaiq naeh hoakzaqrawz cog doiqdix, doiqdix gaeng goj laemh dwk paenqdix nauq. 24Paenqdix biak yaq, daengzle zawdoag, caqsiq daj dij Sen hoakzaqnaeh hax: "Zaeuj aj! Mawz zawh dij Sen chauq fax, dihndin, haij daj daengzle nauq naeh! 25Mawz ndaej hawj Minghkoan mawz yaix puj koij mawz, puj jeq rownz piu laux hongz Daqvaeq, hoakzaqnaeh hax:

"‘Gohzaz ndai baenzzaqrawz luanq mbukmbuk mux?

Dij goanz dawj fax baenzzaqrawz daz sowh saeh baenz mboq ndaej naeh mux?

26Puj hoak hongz paenqdix maz zaemh yuq,

Puj saeq paenqdix maz dihndeu dwkgangz,

dix Yez'hoahhuah daj goanz dix aeu hoak Jizduz naeh.’#4:26 Jizduzgoj rongx hoak Mihsaiqyaq. Jizduz daj Mihsaiqyaq, song aen minxzwh naeh zoq zawh hax: "Goanz ndaej aeu yuz lup naeh." Zwz naeh aeu yuz lup zoq zawh hax hawj dix hoak hongz. #4:26 Suq kauq naeh haeuz yuq Sw Lownx 2:1-2.

27 Laux hongz Cizlih daj Baenxdeuz-bihlazdoz, puj Yixsowhleh daj puj yowngh ndai yuq chaenh naeh zaemh yuq zaeh, dix puj koij mawz Yezsuz, goanz mawz aeu yuz lup hawj dix hoak hongz naeh. 28Paenqdix yuq ndaw mungz mawz hoak sowh saeh mawz haeuz bwnz daz naeh. 29Zaeuj aj, paenqdix cog piu, gannaeh vanz Zaeuj lez singjringh, vanz mawz hawj puj koij mawz miz to'zaw, mboq mbu gaeng bae koanx kauq mawz. 30Vanz mawz ed mungz mawz aeu zwh Yezsuz goanz puj koij mawz goanz sawrik naeh ya aen chaej, hoak sowh saeh ndaw fax naeh daj sowh saeh mboq sanz taen naeh." 31Paenqdix daj dij Sen hax kauq gah, dih paenqdix zaemh yuq naeh fenz, honz, Minghkoan dij Sen dumh daengz ndang paenqdix. Paenqdix zoq miz to'zaw, mboq mbu gaeng bae koanx kauq dij Sen.

Gaeng Goj Aeu Hawj Daengzle Zaemh Yungq

32Sowh puj sinq Yezsuz naeh daengzle zawdoag, zaemh gaemz, mboq miz gawz hax za'hoq dix zawh gaenq hoakri, yowngh rawz goj zaemh yungq. 33Dij goanz zawxkauq Yezsuz miz doakriangz taeuq, paenqdix haxdoq daenh paenqdix ndaej taen Yezsuz, Zaeuj tai yaq daeuq zaeu. Dij Sen gumx daengzle sowh puj sinq Yezsuz naeh. 34-35Paenqdix gawz miz raehnaz daj rownz, gawz zoq kai, aeu sowh ngaenz paenqdix kai ndaej naeh maz, aeu nyaengx doqnaj dij goanz zawxkauq Yezsuz, gawz mboq doh zoq aeu hawj gawz, baenzzaqnaeh, paenqdix mboq miz gawz cha gaeng. 36Miz goanz puj Liqvaeq ux, yuq ndaw haixdaux Saiqpuxluqsez zowngx, minxzwh rongx hoak Yezsowh. Dij goanz zawxkauq Yezsuz rongx dix hoak Baznahbaz. "Baznahbaz" zawh hax: "Puj byongz." 37Dix miz raehnaz, goj kai, aeu ngaenz maz, nyaengx bae doqnaj dij goanz zawxkauq Yezsuz.

Currently Selected:

Zawxkauq 4: ZHN

Highlight

Copy