Zawxkauq 15

Yuq Ndaw Yezluqsaxlaengx Dwkgangz

1Miz jij goanz ux daeq mbanj Yaeuhdaq daeuj. Paenqdix hoakzaqnaeh zau bihnongx zauqhoiq: "Jixzawh gaenqsu mboq hoakzaq fahlih Moahciz hax naeh, hoak diauq zauh heh naeh, gaenqsu zoq mboq ndaej jeuq." 2Bauxloah, Baznahbaz daj paenqdix laemh bae laemh dauh, dungzjinj jinx taeuq. Doaklaeng daengzle zoq nemz Bauxloah, Baznahbaz daj zauqhoiq dih naeh jij goanz ux, nemz paenqdix mwz Yezluqsaxlaengx daj dij goanz zawxkauq Yezsuz, yaq sowh puj gvanx dij goanz zauqhoiq naeh dungzcham mbaed saeh naeh. 3Dij goanz zauqhoiq dihnaeh zoq soangq le Bauxloah loangzdin. Le Bauxloah zoq gvaq mwz mbanj Faeznihjiz, mbanj Saxmaxliqyaq, haxdoq daenh puj yowngh ndai goj sinq Zaeuj. Bihnongx zauqhoiq daengzle zaemz taeuq. 4Le Bauxloah mwz taeng Yezluqsaxlaengx, dij goanz zauqhoiq, yaq dij goanz zawxkauq Yezsuz, yaq sowh puj gvanx dij goanz zauqhoiq naeh daeuj raep paenqdix. Le Bauxloah haxdoq daengzle dij Sen daj paenqdix hoak gaeng raeuh. 5Gaj sowh puj sinq Zaeuj naeh, miz jij goanz puj Fahliqsaiq ux dwnq maz hax: "Saeh puj yowngh ndai sowh puj hoak cohsaenz Yezsuz hoak diauq zauh heh naeh, nemz paenqdix biak fahlih Moahciz zuxbaenz." 6Dij goanz zawxkauq Yezsuz daj sowh puj gvanx dij goanz zauqhoiq naeh maz zaemh yuq dungzcham mbaed saeh naeh. 7Laemh bae laemh dauh yaq, Bihdowh dwnq maz hax: "Daengzle, gaenqsu ruxndeq, boangx raeuz naeh, dij Sen haeuz bwnz lowg gux, hawj puj yowngh ndai daeq baeg gux ruxnyinz kauqfaengz dij Sen, hawj paenqdix ndaej sinq Zaeuj. 8Dij Sen laux ruxndeq ndaw zaw dij goanz naeh, dix aeu minghkoan dix hawj paenqdix, daj koax daekgoanq aeu hawj raeuz naeh dungzlumj, hawj dij goanz ruxndeq dix goj aeu puj yowngh ndai hoak dij goanz dix. 9Gawz sinq dij Sen, dij Sen zoq hawj gawz saw, dix doiq paenqdix daj doiq gaenqraeuz mboq miz gaeng mboq dungzlumj. 10Gannaeh gaenqsu baenzzaqrawz daeg dij Sen, baenzzaqrawz aeu sowh taeb puj jeq rownz raeuz daj raeuz tw mboq ndaej naeh gaemh mwz rongzmbaq cohsaenz Yezsuz mux? 11Mboq zawh hoakzaqnaeh gah. Diauq gaenqraeuz sinq naeh zoq zawh gaenqraeuz goj daj paenqdix dungzlumj ndaej jeuq zawh cho'mbaiq Zaeuj raeuz Yezsuz, zawh cholaeng dix yumq doiq raeuz ndae."

12Daengzle byaekrik, mboq goak gaemz rawz, biak Baznahbaz daj Bauxloah laemh sowh saenh yaengh saenh dij Sen aeu paenqdix bae jeh puj yowngh ndai hoak naeh. 13Doiqdix hax gah, Yaqgowh zoq dwnq maz hax: "Daengzle bihnongx aj, biak gux hax jij gaemz ux. 14Gaunduq Cizmaenh laemh baez nduq dij Sen hoakzaqrawz daeuj zauzhuz puj yowngh ndai, dij Sen lowg paenqdix hoak dij goanz dix. 15Daj zwzpujjeq puj zawxkauq dij Sen hax naeh dungzlumj. 16Ndaw Sw Dij Sen hoakzaqnaeh laiz:

"Dij Sen hax: ‘Gvaq le gaenqnaeh yaq, gux daeuq dauh daeuj,

Aen zangjpungh Daqvaeq haeuz laemx yaq,

gux daeuq daengj dix, daeuq zoih dix.

17Hoakzaqnaeh hawj puj ndai,

zoq zawh hawj sowh puj yowngh ndai yuq dawj zwh gux naeh, daengzle ruxndeq ceu Zaeuj, cha Zaeuj.

18Gaenqnaeh zawh dij Sen hax, daeq zwzndowj maz dix haeuz bwnz hawj dij goanz ruxndeq.’#Azmoahswz 9:11-12.

19Baenzzaqnaeh gux nwh maz, raeuz mboq baenz hawj puj yowngh ndai sowh puj hoak cohsaenz Yezsuz naeh hoakraix. 20Gajlej laiz cinq hawj paenqdix, saengq paenqdix mboq jinx jin sowh gaenq aeu mbud dij sen zaj naeh, puj nyingz daj puj zaiz mboq zawh po'mez mboq jinx zaemh noanz, mboq jinx jin lowd, mboq jinx jin sowh doihdo jenjhoz tai naeh. 21Unj, daeq zwz puj jeq maz, longq rawz goj miz dij goanz doag sw Moahciz laiz naeh, Vaenz Cednoiq, rownzndawcowq rawz goj miz dij goanz doag hawj daengzle biak."

Dwkgangz Hoakzaqrawz Hoak

22Zwz naeh, dij goanz zawxkauq Yezsuz, sowh puj gvanx dij goanz zauqhoiq naeh, daj daengz dij goanz zauqhoiq nauq zoahdowh hoj, paenqdix zoq lowg song goanz daj Bauxloah, Baznahbaz zaemh bae Anztih'az. Song goanz paenqdix lowg naeh zawh sowh puj gvanx dij goanz zauqhoiq naeh. Song goanz naeh miz goanz ux rongx hoak Yaeuhdaq, miz goanz ux rongx hoak Cizlaz. Goanz rongx hoak Yaeuhdaq naeh goj rongx hoak Bazsaxbaz. 23Paenqdix laiz cinq hawj paenqdix tw bae, ndaw fungcinq naeh hoakzaqnaeh laiz: "Gaenqpiu zawh dij goanz zawxkauq Yezsuz daj sowh puj gvanx dij goanz zauqhoiq naeh, gaenqpiu laiz cinq hawj gaenqsu paenq bihnongx puj yowngh ndai yuq ndaw Anztih'az, Ciqliqyaq, Jizliqzaz naeh. Gaenqsu yuqndae naeujbojleh? 24Gaenqpiu ruxnyinz, miz jij goanz ux daeq zawj piu og bae, bae zawj su yaix su hoak diauq zauh heh naeh daj biak fahlih Moahciz, hawj gaenqsu yuq mboq vangq. Gaj gaenq naeh mboq zawh piu yaix paenqdix hoak. 25Baenzzaqnaeh, gaenqpiu daengzle zawh zawdoag. Gaenqpiu lowg jij goanz ux, hawj paenqdix daj Baznahbaz, Bauxloah doiq gaenqpiu nwh taeuq naeh bae dih su. 26Doiqdix cholaeng zwh Zaeuj raeuz Yezsuz Jizduz daengz aen mingh naengz mboq aeu saw. 27Gaenqpiu nemz Yaeuhdaq daj Cizlaz daj paenqdix zaemh bae, hawj paenqdix baeg ndiang daj su hax le gaenq naeh. 28Minghkoan dij Sen daj gaenqpiu mboq rux aeu taeb naek yowngh ndai nyaengx mwz rongzmbaq su, gaj miz jij yowngh ux su hem zuxbaenz, 29zoq zawh mboq jinx jin sowh gaenqjin aeu mbud dij sen zaj naeh, mboq jinx jin lowd, mboq jinx jin sowh doihdo jenjhoz tai naeh, puj nyingz daj puj zaiz mboq zawh po'mez mboq jinx zaemh noanz. Le gaenqnaeh su laek hoak zoq baenz ej. Ngwz gaenqsu yuqndae!" 30Siq goanz nemz bae naeh, bae taeng Anztih'az, paenqdix rongx daengzle cohsaenz Yezsuz maz, aeu cinq hawj paenqdix. 31Daengzle doag yaq, gaj goanz gaj faengz laeng sowh kauq ndaw cinq byongz paenqdix naeh. 32Yaeuhdaq daj Cizlaz goj zawh puj zawxkauq dij Sen, hax lai taeuq byongz cohsaenz Yezsuz, hawj paenqdix kaem'zaw daeq ka loh dij Sen mwznaj. 33Doiqnaeh yuq ndaw Anztih'az ndowj ndauj ux yaq, doiqnaeh zoq dauh mwz Yezluqsaxlaengx, bihnongx dihnaeh zoq bae soangq loh paenqdix, doiqdix zoq dauh mwz vangqdangh. 34#15:34 Mbangj bwnz miz gaemz naeh: Gaj Cizlaz yuq ndaw Anztihlaz, mboq dauh mwz Yezluqsaxlaengx. 35Gaj Bauxloah daj Baznahbaz naengz gaj yuq ndaw Anztih'az ndowj, doiqdix daj puj ndai lai taeuq zaemh zau daenh, koanx kauqfaengz dij Sen dwk daenh.

Bauxloah Daj Baznahbaz Goanz Ux Bae Dih Ux

36Gvaq ndaej ndauj ux, Bauxloah daj Baznahbaz hax: "Gaenqraeuz daeuq dauh bae le aen chaenh koax daekgoanq raeuz aeu kauqfaengz dij Sen laemh dwk daenh naeh, bae lez cohsaenz Yezsuz ndauj zawjraeuz baenzzaqrawz." 37Baznahbaz zawx hawj Yezhanq goanz goj rongx hoak Maxkowh naeh zaemh bae. 38Gaj Bauxloah hax mboq baenz zowz Maxkowh zaemh bae. Unj koax daekgoanq Maxkowh yuq ndaw Panghfaezliqyaq ni paenqdix, mboq daj paenqdix zaemh hoak taeng mowd. 39Doiqdix dungzjinj, daengz dungzbyaeg saw. Baznahbaz daj Maxkowh, naengh lowz bae Saiqpuxluqsez haixdaux. 40Bauxloah lowg Cizlaz, goj loangzdin. Cohsaenz Yezsuz daengzle aeu dix nyaengx mwz ndaw mungz Zaeuj, vanz Zaeuj yumq saeh dix hawj dix hoak najgaengx dij Sen baenz ndaej. 41Bauxloah daeq daengz mbanj Ciqliqyaq, mbanj Jizliqzaz nauq, hawj dij goanz le aen zauqhoiq naeh kaem'zaw daeq ka loh dij Sen mwznaj.

Currently Selected:

Zawxkauq 15: ZHN

Highlight

Copy