Zawxkauq 14

Bauxloah Daj Baznahbaz Yuq Ndaw Yixgoznenj Chaenh

1 Bauxloah daj Baznahbaz bae taeng Yixgoznenj chaenh, paenqdix zaemh bae rownzndawcowq puj Yaeuhtaiq koanx kauqfaengz dij Sen dwk daenh. Hoakzaqnaeh miz puj Yaeuhtaiq daj puj yowngh ndai#14:1 Inxnaeh ndaw sw hax: puj Cizlah. Inxnaeh puj Cizlah zoq zawh hax sowh dij goanz mboq zawh puj Yaeuhtaiq naeh. lai taeuq sinq Yezsuz. 2Gaj puj Yaeuhtaiq sowh puj mboq sinq, mboq biak Yezsuz naeh coak puj yowngh ndai hwnq cohsaenz Yezsuz. 3Doiqdix yuq dih naeh ndowj ndauj ux, paenqdix maengx Zaeuj, ngoah taeuq, koanx kauq dij Sen. Zaeuj aeu mungz paenqdix hoak sowh saenh yaengh saenh naeh, hawj daenh ruxndeq diauq dij Sen yumq doiq dij goanz ndae naeh zawh zaeh. 4Dij goanz ndaw chaenh byaeg baenz song boangx, mbangj goanz nowngz puj Yaeuhtaiq, mbangj goanz nowngz dij goanz zawxkauq Yezsuz. 5Zwz naeh, sowh puj mboq sinq naeh, miz puj Yaeuhtaiq daj puj yowngh ndai, yaq puj saeq paenqdix, daengzle tomj maz, daz hawj dij goanz zawxkauq Yezsuz laizlom najyaij, daz aeu tin saeuh paenqdix tai. 6Bauxloah daj Baznahbaz ruxndeq yaq, zoq gowx mwz mbanj Loixgauznih, zoq zawh mwz Luqsezdowh chaenh, Towhbiq chaenh daj haenzhenz le dih naeh, 7yuq le dih naeh koanx kauqfaengz dij Sen dwk daenh.

Yuq Ndaw Luqsezdowh

8Ndaw Luqsezdowh chaenh miz goanz ux song ka mboq miz doakriangz, swn daeuj zoq bwnz baenzgvez, naengz mboq sanz rux daeq. 9Dix biak Bauxloah koanx kauqfaengz dij Sen. Bauxloah caqsiq lez dix, leztaen dix sinq Zaeuj rux jeuq dix, 10Bauxloah zoq caqsiq daj dix hax: "Dwnq maz, song ka in swh!" Goanz gaengnaeh yoanghyangh dwnq maz, daeq loh. 11Goanzlai leztaen sowh saeh Bauxloah hoak naeh, zoq aeu kauq mbanj Loixgauznih hax: "Miz dij sen byenqbaenz dij goanz loangz daeuj zawjraeuz yah!" 12Yaq paenqdix zoq rongx Baznahbaz hoak Zaeuqsez, laux sen dwx paenqdix naeh. Damz zawh Bauxloah daj goanzlai hax kauq, paenqdix zoq rongx Bauxloah hoak Cizexmix, laux zawxkauq Zaeuqsez naeh. 13Haenz chaenh miz aen meuh Zaeuqsez ux. Goanz mbud Zaeuqsez naeh zoq zung dij moaz, tw goangh ndog'va maz baeglongq, daz daj goanzlai zaemh mbud doiq naeh. 14Baznahbaz daj Bauxloah song goanz zawxkauq Yezsuz naeh ruxnyinz, zoq riag sowj hoakri,#14:14 Paenqdix riag sowj hoakri zawh hax paenqdix hax goanzlai hoakzaqnaeh hoak loang dwx, paenqdix yuqyaix taeuq. lenh bae jeh daengzle, caqsiq rongx: 15"Daengzle aj, gaenqsu baenzzaqrawz hoakzaqnaeh mux? Gaenqpiu goj zawh dij goanz, goj daj su dungzlumj. Gaenqpiu maz inxnaeh koanx kauqfaengz dij Sen dwk su, yaix su ni sowh gaenq mboq miz gaeng luq naeh, dauh maz doq dij Sen jing, dij Sen miz daengznauq, dij Sen chauq fax, dihndin, haij daj daengzle sowh gaenq yuq ndaw paenqdix naeh. 16Koax daekgoanq zoh rawz gojvenj, dij Sen jizzaz puj yowngh ndai su ngaiq hoakrawz zoq hoakrawz. 17Gajlej dix naengz zwzzwz aeu yowngh aeu yowngh, hoak saeh ndae hawj dij goanz ruxndeq miz dix zaeh, hawj paen daeq ndaw fax daeuj, hawj kaeujpyaek yawz, hawj su jin imqdwngq, hawj zaw su yuqzaih." 18Song goanz dix hax suq kauq naeh yaq, zux daeg daeg lanx ndaej gaj goanzlai mboq mbud doiqdix.

19Gaj miz puj Yaeuhtaiq daeq Anztih'az chaenh daj Yixgoznenj chaenh maz, coak goanzlai. Paenqdix zoq aeu tin saeuh Bauxloah, faeklaih dix tai yaq, laeg dix bae haenz chaenh. 20Gau cohsaenz Yezsuz tomj haenz dix naeh, dix dwnq maz, daeq mwz ndaw chaenh. Vaenzlaeng dix daj Baznahbaz mwz ndaw Towhbiq chaenh.

Bauxloah Daj Baznahbaz Dauh Maz Anztih'az

21Paenqdix yuq dih naeh aeu kauqfaengz dij Sen koanx dwk daenh, miz dij goanz lai taeuq sinq Yezsuz, hoak cohsaenz Yezsuz. Yaq paenqdix daeuq dauh maz Luqsezdowh chaenh, Yixgoznenj chaenh, Anztih'az chaenh, 22hawj cohsaenz Yezsuz kaem'zaw daeq ka loh dij Sen, zau paenqdix kaemjzaw sinq taeng mowd, goj daj paenqdix hax: "Gaenqraeuz sowh puj daeq ka loh goh dij Sen naeh, rux ndaej jinkaem lai taeuq." 23Bauxloah daj Baznahbaz bae aen zauqhoiq rawz goj saeh zauqhoiq lowg sowh puj gvanx dij goanz zauqhoiq naeh. Daengzle jenjkaeuj hoakri vanz dij Sen yaq, doiqdix zoq vanz Zaeuj paenqdix maengx naeh zauzhuz paenqdix.

24Doiqdix gvaq zoah mbanj Pihcizdix, maz taeng mbanj Panghfaezliqyaq. 25Yuq ndaw mbanj Panghfaezliqyaq aen chaenh rongx hoak Behzaz naeh aeu kauqfaengz dij Sen koanx dwk daenh, zoq bae mbanj Yaqdaqliq. 26Yuq ndaw Yaqdaqliq naengh lowz dauh maz Anztih'az chaenh. Anztih'az chaenh zoq zawh dih koax daekgoanq dij goanz zauqhoiq aeu doiqdix nyaengx mwz ndaw mungz dij Sen, vanz dij Sen yumq saeh doiqdix hoak sowh gaenq doiqdix hiamq hoak ndae naeh. 27Doiqdix maz taeng Anztih'az yaq, rongx dij goanz zauqhoiq maz, haxdoq daengzle, dij Sen aeu doiqdix bae hoak gaeng raeuh, dij Sen hoakrawz aj ka loh hawj puj yowngh ndai goj sinq Zaeuj baenz. 28Doiqdix yuq dihnaeh daj cohsaenz Yezsuz zaemh ndowj yaengh ndauj.

Currently Selected:

Zawxkauq 14: ZHN

Highlight

Copy