Zawxkauq 16

Bauxloah Zowz Tihmoaxtaiq Zaemh Bae

1 Bauxloah maz taeng Towhbiq chaenh, daeuq bae taeng Luqsezdowh chaenh. Yuq ndaw Luqsezdowh miz goanz cohsaenz Yezsuz ux, minxzwh rongx hoak Tihmoaxtaiq. Goanz naeh meh dix zawh puj Yaeuhtaiq, sinq Zaeuj, gaj dez dix zawh dij goanz Cizlah. 2Bihnongx sowh puj yuq ndaw Luqsezdowh daj Yixgoznenj naeh daengzle haenh Tihmoaxtaiq taeuq. 3Bauxloah daz zowz Tihmoaxtaiq bae koanx kauqfaengz dij Sen. Gaj puj Yaeuhtaiq dihnaeh gaj goanz gaj ruxndeq dez Tihmoaxtaiq zawh dij goanz Cizlah, cholaeng hawj puj Yaeuhtaiq venq biak sowh gaenq Tihmoaxtaiq koanx naeh, Bauxloah zoq saeh Tihmoaxtaiq hoak diauq zauh heh naeh. 4Paenqdix bae longq bae longq koanx kauqfaengz dij Sen, bae taeng rawz zoq yaix daenh biak sowh gaenq dij goanz zawxkauq Yezsuz daj sowh puj gvanx dij goanz zauqhoiq yuq ndaw Yezluqsaxlaengx nemz naeh. 5Hoakzaqnaeh aen zauqhoiq rawz goj gaj laeng gaj sinq vwnxcih, dij goanz gaj vaenz laeng gaj miz lai.

Dij Sen Hawj Bauxloah Daj Paen'hwnz Dungzlumj Taen, Hawj Dix Bae Mbanj Maxqihdunq

6Minghkoan dij Sen daet paenqdix, mboq hawj paenqdix gannaeh yuq mbanj Yaqciqyaq koanx kauqfaengz dij Sen, paenqdix zoq gvaq koax mbanj Fuhloixzaz, mbanj Zazlaztaiq naeh. 7Paenqdix maz taeng haenz mbanj Maexcizyaq, daz ndonj mwz ndaw mbanj Biqtoiznih, gaj Minghkoan Yezsuz mboq jinx paenqdix mwz. 8Paenqdix zoq gvaq Maexcizyaq, bae taeng Towhloahyaq chaenh. 9Haemh gaengnaeh, dij Sen hawj Bauxloah daj paen'hwnz dungzlumj, leztaen miz goanz mbanj Maxqihdunq ux in vanz dix: "Vanz mawz daeuj Maxqihdunq saeh piu." 10Bauxloah leztaen gaenq dij Sen hawj dix paen'hwnz taen naeh, gaenqpiu zoq ruxndeq dij Sen rongx piu bae Maxqihdunq aeu kauqfaengz dij Sen koanx dwk daenh, gaenqpiu zoq cenq daz bae dih naeh.

Loixdixyaq Sinq Zaeuj

11Gaenqpiu naengh lowz daeq ndaw Towhloahyaq bae taengdeg Saxmoahtowhlaz, vaenzlaeng bae taeng Nihyaqpozlix. 12Gaenqpiu daeq dihnaeh bae taeng Faezlihbix chaenh. Faezlihbix chaenh zawh dij goanz Loahmax daengj, Faezlihbix yuq ndaw mbanj Maxqihdunq zawh aen chaenh dwx ux. Gaenqpiu yuq dih naeh ndowj jij vaenz ux. 13Vaenz Cednoiq, gaenqpiu ni ndaw chaenh bae haenz dah, piu nwh maz, dih naeh ingj miz saek dih zawh dih daj dij Sen hax kauq. Dih naeh miz mehrownz zaemh yuq biangz dij Sen, gaenqpiu zoq naengh daeuj koanx kauqfaengz dij Sen dwk paenqdix. 14Miz yah mehrownz ux minxzwh rongx hoak Loixdixyaq, dix zawh dij goanz ndaw Toizyaxtoizlaz chaenh. Goanz nyingz naeh zawh puj hoak gax, dix kai paeng zaemq. Dix mboq zawh puj Yaeuhtaiq gaj dix ruxndeq mbu dij Sen. Zaeuj lingz dix, hawj dix caqsiq biak sowh kauq Bauxloah koanx naeh. 15Dix daj rownz dix hoak diauq zauh soiq naeh yaq, zoq hoakzaqnaeh vanz gaenqpiu: "Jixzawh gaenqsu hax gux zawh sinq Zaeuj zaeh, gaenqsu zoq maz rownz gux ndowj." Yaq dix zoq lanx piu yuq rownz dix ndowj.

Bauxloah Yuq Ndaw Faezlihbix Zoah Mwz Kaeng Lauz

16Miz mbaed ux, gaenqpiu bae haenz dah dih daj dij Sen hax kauq naeh, miz goanz puj koij nyingz ux daeq maz doq piu. Goanz nyingz naeh ndaw ndang dix miz dij pi, dij pi hawj dix rux yaengjmyoaz, dix yaengjmyoaz hawj le zaeuj dix ndaej lih lai taeuq. 17Dix nowngzlaeng Bauxloah daj gaenqpiu, caqsiq rongx: "Le goanz naeh zawh puj koij dij Sen, zawh puj koij laux Sen dwx nyeuz daengzle naeh, koanx dij Sen hoakrawz jeuq dij goanz dwk su." 18Dungzdam jijgaj vaenz hoakzaqnaeh rongx, Bauxloah lez wngq gvaq, ueqlaeng bae daj do pi naeh hax: "Gux aeu zwh Yezsuz Jizduz, yaix mawz daeq ndaw ndang goanz naeh og daeuj!" Do pi gaengnaeh cenq og daeuj. 19Le zaeuj goanz puj koij nyingz naeh ruxndeq mbaedmawq maengx goanz puj koij nyingz naeh cha jenz mboq baenz, zoq jenj Bauxloah daj Cizlaz, laeg paenqdix mwz hangzhw dih puj saeq naeh. 20Gau zowz mwz taeng doqnaj puj saeq dwx naeh, paenqdix hax: "Paenqdix zawh puj Yaeuhtaiq, paenqdix maz ndaw chaenh raeuz coak daenh, 21koanx sowh gaenq dij goanz Loahmax raeuz mboq jinx sinq, mboq jinx nowngz naeh." 22Daengzle zoq zaemh maz saeuh paenqdix, puj saeq dwx tod sowj paenqdix, nemz sowh puj baihdawj dix naeh aeu maex saeuh paenqdix, 23aeu maex saeuh lai mbaed taeuq, yaq aeu paenqdix kaeng mwz ndaw lauz, puj saeq dwx nemz puj dawzdu dawz naeuz ndae ux. 24Pujdawzdu biak puj saeq dwx hoakzaq naeh hax yaq, zoq aeu paenqdix kaeng mwz ndaw lauz gowh ndaw nyeuz daengzle naeh, aeu song kvaix maex gaeb ka paenqdix, yaq aeu tiksaed lamh.

Goanz Gvanx Ndaw Lauz Naeh Daengz Rownz Dix Sinq Zaeuj

25Teq byonghhwnz ux naeh, Bauxloah daj Cizlaz daj dij Sen hax kauq, lownx biangz dij Sen. Pujkaenglauz ndai goj caqsiq biak. 26Hubhaeb miz mbaed diqzaenq ux dwx taeuq, daengz dinsaeu aen lauz fenz nauq, baegdu ndaw lauz daengzle aj nauq, daengz sowh tiksaed puk puj kaenglauz naeh goj lud nauq. 27Goanz gvanx ndaw lauz naeh daeh ruxndownq, leztaen baegdu ndaw lauz aj nauq, faeklaih puj kaenglauz lenh ni nauq, zoq it remz daz haeggaj kaj hoakri tai. 28Bauxloah caqsiq rongx goanz naeh: "Laek haiq hoakri, gaenqpiu daengzle yuq inxnaeh." 29Goanz gvanx ndaw lauz naeh cenq nemz dij goanz aeu daeng maz. Yaq dix lenh mwz ndaw lauz, saenq raeuhraeuh gvih bae doqnaj Bauxloah daj Cizlaz. 30Dix zowz doiqdix og daeuj yaq, cham doiqdix: "Lauxswz, gaenqgux hoakzaqrawz hoak zux ndaej jeuq mux?" 31Paenqdix hax: "Sinq Zaeuj, Yezsuz, mawz daj rownz mawz zoq ndaej jeuq mboqyaq." 32Yaq Bauxloah daj Cizlaz zoq aeu kauq Zaeuj laemh dwk goanz gvanx ndaw lauz naeh daj daengz rownz dix. 33Hwnz gaengnaeh, goanz gvanx ndaw lauz naeh lingz paenqdix og bae, saeh paenqdix sauz dihchaej. Dix daj daengz rownz dix cenq hoak diauq zauh soiq naeh. 34Dix qingj song goanz naeh mwz rownz dix, zawx kaeuj hawj paenqdix jin. Dix daj daengz rownz dix, cholaeng gannaeh sinq dij Sen, ndaw zaw gaj goanz gaj faengz taeuq.

35Taeng nawlaeng faxrungh maz, puj saeq dwx nemz bin maz daj goanz gvanx ndaw lauz naeh hax: "Zoangq song goanz gaengnaeh ndeh." 36Goanz gvanx ndaw lauz naeh daj Bauxloah hax: "Puj saeq dwx nemz dij goanz daeuj zoangq su, gannaeh su og ndaw lauz bae vangqdangh eh." 37Gaj Bauxloah daj paenqdix hax: "Piu suhyih dij goanz Loahmax, su hoj doiq piu daj doiq dij goanz Loahmax dungzlumj. Puj saeq naengz mboq yuq ndaw fahtinh saenxpanq piu, naengz mboq hax piu hoak loang gaeng, paenqdix zoq yuq doqnaj daengzle dup piu, aeu piu maz kaeng ndaw lauz, gannaeh daz lupliamx nemz dij goanz yaix piu ni maj? Baenz mboq ndaej oh! Yaix hoakri paenqdix haeggaj daeuj lingz piu og bae!" 38Bin dauh mwz haxdoq puj saeq dwx, puj saeq dwx ruxnyinz paenqdix zawh dij goanz Loahmax, zoq mbu taeuq, 39cenq daeuj ndaw lauz vanz Bauxloah daj Cizlaz laek aeu gaenq naeh nyaengx zaw yaj, yaq zowz paenqdix og ndaw lauz daeuj, vanz paenqdix ni chaenh naeh. 40Song goanz dix og ndaw lauz daeuj yaq, zoq mwz ndaw rownz Loixdixyaq, taen bihnongx, byongz paenqdix yaq, zoq ni dih naeh.

Currently Selected:

Zawxkauq 16: ZHN

Highlight

Copy