1 Pedro 4

Ac'a tuunuc te majt'aniletique

1Jich yu'un, te bit'il c'ax swocol ta sbaq'uetal ta jwentatic te Cristoe, ja' ya sc'an te jichuc co'tantic uuc te bit'il yo'tan stuquele. Yu'un te mach'a c'axix swocol ta sbaq'uetale, jich la stsalix te mulile. 2Te jayeb xan c'aal cuxule, ja' ya xbajt'ix ta yo'tan spasel te sc'anjel yo'tan te Diose, ma ja'uc ya spasix te bila ya sc'an te sbaq'uetale. 3Tic' a te ch'ay bayal c'aal awu'unic ta neelal to ta spasel te bila mulanbil yu'un te mach'atic ma sna'beyic sba te Diose. Ja' bi ja' te chijubele, bic'tal-o'tanil, yacubel, q'uinwej, slajinel taq'uin te ma'yuc swentaile, soc xch'uunel lotil diosetic te ilaybil yu'un te Diose. 4Ta ora to amen ya yilex yu'un te bit'il ma x'ac'an ajoin abaic soc ta sleel te biluc nax mulil te ya smulanic spasele. Jich ya yixtac'optayex yu'un. 5Ja'uc me to, ya me x'ilbot yat'elic yu'un te Mach'a yich'oj yat'el ta chajbanwanej ta stojol spisil te mach'a cuxajtique soc spisil te mach'atic lajemique. 6Ja' swentail te la yich' cholel ta stojolic te lec yach'il c'op te mach'atic lajemique, swenta yu'un ya xju' ya yich'ic chajbanel jich nix te bit'il mach'atic cuxulic to soc sbaq'uetalic ta balumilale, soc jich me ya xcuxinic soc xch'ulelic jich te bit'il cuxul stuquel te Diose.

7Nopol sta yorail te ya xlaj spisil. Jich yu'un, ya me sc'an te ya ana'ic q'uinal ta leque. Wiq'uiluc me asitic spisil ora soc c'oponaic me te Diose. 8Ja' tulan sc'oplal stuquel te ma p'isbiluc nax c'ux ya awaiy abaic ta awo'tanic, melel te c'uxul-o'tanile, ya xch'ay bayal ta jten mulil yu'un.#Pr 10.12; 1 Co 13.7. 9Binuc nax me awo'tanic te ya awic' ochel ta anaic te mach'a ya xtal yilexe. Ma me xjajch' ta aiyej awo'tanic yu'un.#Ro 12.13. 10Jech abatina abaic juju-jtul, chican bila majt'anil ac'bilex yu'un te Diose. Melel ya sc'an te ya awac' abaic ta abatinel ta stojol te yantique, chican te bit'il ac'bilex yu'un te Diose. 11Te mach'a ya sna' lec aiyeje, ja' me ac'a xchol te bila yaloj te Diose. Te mach'a ya sna' abatinele, ac'a me yac' sba ta abatinel soc yip sbaq'uetal te ya x'ac'bot yu'un te Diose. Jich yu'un spisil te bila ya spasique, ja'uc me lec sc'oplal ya xc'ot yu'un te Diose ta swenta te Jesucristoe te sbajt'el q'uinal ay yutsilal soc yu'el ya xmandalaj stuquel. Jichuc.

Ya xc'ax jwocoltic te bit'il jch'uunejtic te Cristoe

12Quermanotac te c'uxex ta co'tane, ma me x'ayan awo'tanic teme ay awocolic yu'un te yiljibal awo'tanic te bayal xc'uxul jich bit'il c'ajc' te ya xc'ot ta awentaique. Ma me xacuyic te ma'yuc bay jich ya xc'ot ta stojol te yantique. 13Jich yu'un bayaluc me sbujts' awo'tanic yu'un uuc te bit'il ayex ta woclajele, jich bit'il woclaj stuquel te Cristoe. Jich me c'axem to xan ya xbujts'naj awo'tanic yu'un te c'alal ya xchicnaj tel soc yutsilal ya awilique.#Ro 8.17; 1 P 4.1. 14Teme ta scaj te ach'uunejic Cristo te ayex ta bolc'optayele, bin nax me awutsilic yu'un, te melel xojobajem ta atojolic te yutsilal te Espíritu yu'un te Diose. Amen sc'oplal yu'unic te Diose; yan te ja'exe, lec sc'oplal awu'unic stuquel. 15Teme ay ya ata awocolique, ma me ja'uc ta swenta te la awaiyic milaw, elec', soc teme ay yan te bila amen ya apasique. Soc ma me ja'uc ta swenta te atic'oj abaic tey a ta banti ma awentauc spasele. 16Yan teme ya ata awocolic yu'un te bit'il ach'uunejic te Cristoe, ma'yuquex ta q'uexlal yu'un. Ja' ya sc'an te ya awalbey yutsilal Dios yu'un te bit'il ayex ta woclajel ta swenta te Cristoe.

17Yu'un yorailix te ich'el ta c'ope. Ja' neel ya x'ilbot yat'elic te alnich'anetic yu'un te Diose. Teme ja' neel ya quich'tic ich'el ta c'op te jo'otique, ¿bit'il ya xc'ot ta loq'uel stuquel te mach'atic ma sc'an xch'uunic te lec yach'il c'op yu'un te Diose? 18Teme wocol ya xcolic te mach'atic toj ayique, ¿ja'uc to balix a te mach'atic c'aemic ta mulil te ma sna'ic te Diose?#Pr 11.31. 19Jich yu'un teme ay mach'a ya xc'ax swocolic ta swenta sc'anjel yo'tan te Diose, ma me xquejch'anic spasel te bila leque. Soc ac'a me yac' sbaic ta canantayel soc xch'ulelic ta stojol Dios te ja' Jpaswaneje, te jun yo'tan ta jtojoltic stuquele.

Currently Selected:

1 Pedro 4: TZOXCH

Highlight

Copy