YouVersion Logo
Search Icon

Tatanigaina 39

39
Zosepu Nia Ia Ghaseborona Potifa
1Leghuna tabari Zosepu ira mane bisinisi, maneri dike hio laoi Izipi dike la tatabara ghini ghu ka Potifa. Potifa mu kaikeu ka ira nona manefaa ia mane ginitaukela, neke manefaadi ghu ira mane magara ta kopu ka ia leghahai tolima ginitau.
2Vununa Iahova neke toka ghini Zosepu, neke boka riva va veha ghu manei, nia au tuna ka ia sugana ia faghina taghona ta tanina Izipi, neke ghua. 3Ia faghina ka Zosepu neke finini Iahova ta au taremehanana manei, neke toka ghinina ghu riva va vehana ka ira vahina leghutau neke riva ghidiro nga manei. 4Iahi neke va manemane ghini Potifa neke hioi ghu manei Zosepu mala kaike nona manerivana taghona. Potifa neke nai va kenui manei mala kopu ghinina ia kamotona suga ka taghona nia ira vahina leghutau neke taghoriro nga taghonai Potifa, e ghua. 5Tataniga ka ia fafata neke nai va kenuino Zosepu mala kopu ghidira vahina leghutau nga ka ia sugana Potifa nia ira vahina ta taghori nga manei, Iahova neke va vehari ira leghu noni nga dike auro ka ia suga Potifa, vununa ka ia riva ta veha Zosepu. Manei neke va doli vehari haro molamo ira nunuma ka Potifa. 6Potifa neke nai laori ghu ka ia kamena Zosepu ira vahina leghutau ta taghori nga taghonai. Ka ia kopu Zosepu, deo heve neke anga ghini ghenana manei ka ira vahina leghutau nga, nga ka heve kokolona ghano neke mala mahainina lama taghona.
Zosepu mu neke toraina gamoso va veha nia maneveha ghena. 7Vununa ka ianimu, keha fafatara leghunana ia ghaseborona Potifa neke tataniga age matomatoi manei kabai ghinina, neke fangai ghu ta la epu taremehanana.
8Ghe manei neke pake ghena neke kahe ghua ghu iahi, “Fini, ia faghina ka ara ne rangerangeau ara ta kopu ghidira vahina leghutau nga ka giliona kamotona suga iahi manei.” 9Deo hei ta kurui mana fuludu lao auna ara ka giliona suga iahi. Ia faghina ka ara e deo heve neke posi leghuina ka ara, nga agho lama, vununa agho mu ghaseborona manei. ?Heve ghu ghe, ga boka riva ghini nga ara kokolona leghutau ta muko iamu, ta sasakena ghu ara ka ia nahalina God? 10Geta papadi mo manei Zosepu leleghu ravata ghe, manei neke va sisiva ta au va ilolona ka manei.
11Ghe kaike ravata, ne lao ghu Zosepu gilio ka ia suga la riva ghidira ira nona riva, e deo kaike ghu ka ira noniriva ka sugana neke auna. 12Manei neke sakomo va gimai Zosepu ka ia nona poko va pepeghuru kahe ghuana iahi, “!Meha epu taremehagu!” neke ghua ghini. Ghe Zosepu neke pelo kave ghena ka ia suga, neke sipa kave ghu ia nona poko va pepeghuru au hinaena ka kamenani ia ghaseborona Potifa.
13Ne finini ghu manei ta au hinaena ka kamenani ia poko va pepeghuru ka Zosepu ka ia pelo kavena ka ia suga, 14manei neke kudori ira noniriva ka sugana kahe ghuana iahi, “!Finini iahi! Mane Hiburu neke hio mehai ini ia keraguau ara, ne meha va haghava ghita. Manei neke meha ka ringifota iahi ara neke va tutuufuau ghu ta mala epu taremehaguna, ghe ara nake azili va fafaa vona. 15Ne nomohi ghu manei azili fanga tokana ara, manei neke pelo kave nai hinaeina ka gheremegu ara poko va pepeghuru iahi.”
16Manei neke la sute taremehana ghu ia poko ka Zosepu neke vuhai sura ghu ia faghina ka manei. 17Ianimu tuna ghe neke va kahe ghini nga manei turi haro iahi la. “Ia mane Hiburu noke hio mehaio agho aiahi neke meha ka ringifota ini ara neke va haghavau ghu. 18Ghe na azili ghu ara fanga tokana, manei neke pelo lao peghuru nai hinaeina ka gheremegu ini ara pokona iahi.”
19Ia faghina ka Zosepu neke toraina hali fuludu nomohina manei ia turi ka ia ghaseborona ghinina heve neke riva ghinina Zosepu ia ta ghua ka manei. 20Manei neke sakomo hioi ghu Zosepu nakai haghelina ka pipiliga ka dike auro ira mane pipiliga ka ia mane ginitaukela, neke au ghu manei aianimu. 21Ghe Iahova neke hohoghona ka ia nona namaha vanani Zosepu. Ia manefaana pipiliga neke veha vanani ghu ka Zosepu. 22Manei neke nakaini Zosepu mala manefaadira ira leghu mane pipiliga nga nia neke are ghidira ira vahina leghutau neke riva ghidiro nga ka giliona ia pipiliga, e ghua. 23Ia manefaana pipiliga e deo heve neke anga ghinina ka ira leghutau neke mala riva ghidiro Zosepu, vununa Iahova neke au taremehana manei, mala riva ghidi va vehara vahina leghutau neke riva ghidiro nga manei.

Currently Selected:

Tatanigaina 39: kji

Highlight

Share

Copy

None

Want to have your highlights saved across all your devices? Sign up or sign in