Tatanigaina 40

Zosepu Ne Va Fafahakari Palu Epu Baghunai

1Leghudi keha fafatara, ia manefaana kopui waeni nia ia manefaana rivai bereti vanani ia mane ginitaukela dike va halini ia mane ginitaukela. 2Manei neke hali ka palu maneriva ta kenu irahi 3neke nakai hagheleri ghu ka pipiliga ka ia sugana ia manefaadi ira mane magara ta kopu ghini ia mane ginitaukela, ka ia malau pipiliga neke au harono la Zosepu. 4Maneri palu dike to au sepa ka pipiliga neke nakai laori ghu ia manefaadi ira mane magara ta kopu ka ia kamena Zosepu.

5Kaike redu ia manefaana kopui waeni nia ia manefaana rivai bereti dike sopai fini epu baghunai ka giliona ia pipiliga ta haza ira fafahakadi.

6Ne la meha ghu Zosepu ka maneri palu ka ia keha fufughona, manei neke finiri ta fifini puina anga ghedira. 7Notohori tuna neke ghua manei, “?Ne heve ghe no fifini puina anga ghemu nga ravata ini?” neke ghua ghidi. 8“Ghai palu nake sopai fini epu baghunai, ghe ne deo hei aiahi ta boka va kahe vanamaina fafahakadira,” dike ghua ungene tughudira.

“God lama mu ta boka va fafahakarira ira epu baghunai. Va kahe ghinagu epu baghunai nira ka ghau palu,” neke ghua Zosepu.

9Ia manefaana kopui waeni neke kusu turi vanani ghu Zosepu ia epu baghunai ka taghonai, “Ka ia epu baghunai ara mu, kaike heke gerepi nake fininina ara kenugu mo. 10Heke gerepi ani mu e lito hobona. Sekere kave di ghua ghu ira kalana, to havoro ma manei nia to age omihi ma ira fuana heke gerepi, neke ghua. 11Ara mu nake posini ia panikeni ka ia mane ginitaukela, hiori tuna ira fuadi gerepi ga piriki haghele laori ghu ka ia giliona panikeni, ga vanani lao ghu ia mane ginitaukela, nake ghua.”

12“Iahi mu fafahakanana epu baghunai ani,” neke ghua ghini. “Ira lito hobona mu, lito ravata. 13Ka keha lito ravatani ma e age hio kaveigho ghu ka pipiliga ia mane ginitaukela eke nai leghuigho ghu ka ia papala agho, oke age hio vanani lao panekeni waeni ghu ia mane ginitaukela taghe noke riva ghinio la sepao ka ia fafata noke nona manefaana kopui waenio agho. 14Ghe ka ia age totonu va veha vananigho agho vahina leghutau nga, ta kave ghu ka pipiliga, agho oke ngana mehau nga ara. Va fini ghinagu ia nou varisute o turi vanani ghu ia mane ginitaukela ghinaguna ara, toka ghinagu ghu hio kave auna ka pipiliga iahi. 15Vununa ara mu dike siko ghaheau ka ia kava ira noni Hiburu, nia geta ghua ghu aiahi Izipi ghe, e deo haro ma leghutau ta mala pipiliga ghinina ara.”

16Ia manefaana rivai bereti ne finini ghu ta vehana ia va fafahaka ka Zosepu, manei neke kahe ghua iahi ka manei, “Ara nake epu baghunai molamo. Ara nake hureri lito maka bereti ka paugu ini. 17Ka ia maka ta fate mu, vahina kokolodi ghano ta toiri nga ka falao dike aura malana ka ia mane ginitaukela, ghe ira memeha dike meha mahairi.”

18“Iahi mu fafahakanana,” neke ghua Zosepu. “Ira lito maka mu, lito ravata. 19Ka keha lito ravatani ma, e age va kaveigho ghu ka pipiliga ia mane ginitaukela e age kodaka kaini ghu pau nia. Ianimu tuna ghe ge va reketigho nga ka kaike taghele nia meha tuna ira memeha gedi ghanini ghu vilahiu nia e ghua,” neke ghua ghini.

20Ka ia va litona ravata mu neke ravata dolina ia mane ginitaukela, neke riva ghini ghu manei kaike sarumahai vanadira ira leghu nona manefaa nga. Manei neke va kaveri ghu ka pipiliga ia manefaana kopui waeni nia ia manefaana rivai bereti e ghua neke hio laori ghu ka kenudi ira keha nona manefaa. 21Manei neke nai leghui ia manefaana kopui waeni ka ia papala riva manei. 22Nga ia neke manefaana rivai beretio mu, manei neke atungu va lemei, dike va reketi ghu ia tinina ka kaike heke leghuina taghe neke to kaheio lama Zosepu.

23Ghe ia manefaana kopui waeni deo ghe ke nganaina Zosepu, nga toke nganakaini ghena ma.

Currently Selected:

Tatanigaina 40: kji

Highlight

Copy