Tatanigaina 38

Zuda Nia Tamara

1Ka fafata ianimu Zuda neke ghahe kairi ira tahinamane neke la au taremehana ghu kaike manena Adula babaolonana Hira. 2Zuda neke la dufui ia tuunaghase kaike manena Kenani babaolonana Sua. Manei neke varihio ka ghase ianimu neke epu taremehana ghu, 3nia age pote tuna geke va urahi ghu kaike tuunamane vananina babaolo Era, neke ghua. 4Manei neke age pote leghuni neke va dolini ghu kaike tuunamane, neke vanani ghu babaolo Onani. 5Manei neke va urahini kaike tuunamane neke vanani ghu babaolo Sela. Aianihi Kezibi neke va urahina manei tuunamane iahi.

6Zuda neke hio vanani Era ia va kenuna tuunamane kaike ghaseborona babaolonana Tamara. 7Ghe Era mu neke kaike mane ta muko ka ia nahalina Iahova, neke atungi ghu manei.

8Kahe ghua tuna iahi neke ghua Zuda ka Onani ia tahinamane Era, “Agho o hioi ia fotati nabokona ka ia tahiumane ta leme o la epu taremehana ghu. Ka ghaghahena iahi lamu ta age va ghuduvina ia riva ka agho vananina ia fotati nou tutua ta mala ke nai vanani rekahana ghu ia pagusu ka ia tahiumane neke leme kainio manei.” 9Ghe Onani neke deo ge lao hihingona ghu ta nai rekaha ta deona ge age tuuna ghu taghonai. Leleghu fafata epu varighara maneri palu ia ghaseboro nabokona ka ia tahinamane, manei e oranga kairi ka kavao ira kolona mala va vuha rekaha taghona. Iahi mu neke age va nodoi ia fotati ta boka nai rekaha vananina ia keranau neke lemeo. 10Heve neke riva ghini iahi manei mu neke deo ge veha vanani ghu Iahova, neke atungi haro ghu molamo manei.

11Kahe ghua tuna iahi ka Tamara ia nona vasagha neke ghua Zuda, “Agho oke leghu la au naboko ma au ghu ka ia sugana nou mama e vuhai age faa vona ghu Sela ia tuugumane ara.” Neke kahei nga iahi manei mu, vununa manei neke maughena ke age lemenani Sela taghe dike ghuaro la ira keha palu tahinamane. Tamara neke leghu la au taremehana ghu nona mama.

12Leghudi keha komuhura, ia ghaseborona Zuda neke leme ghena. Ka leghuna ia au muko hihingo manei, maneri palu Hira ia mane baere ka taghonai ta tanina Adulamu dike lao Timina ka dike sengeriro maneri ira sipisipi ka manei.

13Kehara dike va kahe ghini Tamara neke to laona ani Timina ia nona mama ia keranau neke leme ghenao mala la sengerira ira nona sipisipi. 14Manei neke ngana avohi molamo neke to mane faana Sela, ghe nona mama deo geke vanani ghu mala ke hioina manei. Hio kairi tuna ira poko naboko ge toufi ghu taghona ka kaike poko mala toufu pau mala poikaina taghonai, neke ghua. Ianimu tuna ghe neke la nohe hinae nga manei ka ia gheremena hangana ka ia mala haghele lao Enaimi, kaike malau fafaana ka ia hangana ta lao Timina.

15Ne fini laoi ghu Zuda fotati ini, kaike ta kikirasei tabara bana nga neke ngana ghua ghini, vununa manei neke toufu kaputi ia hihilina. 16Zuda e deo geke avohi ghena ghu fotati ini mu ia nona vasagha taghonai ta ghuana, neke lao ghu ka gheremena hangana ta nohe ani manei neke la kahe ghua ghu iahi, “Meha, ara na kabai epu taremehau agho,” neke la ghua ghini.

“?Heve mu ta age vanaguna agho nato epu taremehau la ara? neke ghua notohona Tamara.

17“Ara a vananigho meha kaike rekahana gouti ka ira tagukava popohi ara,” neke ghua ghini.

“Ne veha mo, ghe agho o toraina vanagu kaike leghutau ta mala suteina ara vuhai va mehai ghu agho rekahana gouti ta naiungene ghini nia agho,” neke ghua ghini.

18“?Heve ghu ta vananighona ara ta mala suteina agho ta vuhai va mehaina ghu ara rekahana gouti ani?” neke ghua Zuda.

“O vanagu vavadihi ta kuru medolona babaolou iamu agho nia totongono ta posini iamu agho, e ghua,” neke ghua ia fotati ungene tughuna. Vanani lao tuna ge epu taremehana ghu, nia age pote tuna neke ghua manei. 19Leghunana, Tamara neke leghu lao ka suganao neke la hio kaini ghu ia poko totoufuna ia pauna, neke va vona leghuri ghu ira poko naboko ka taghona.

20Zuda neke tuhu laoi Hira ia mane baere ka taghona mala hio laoina kaike gouti mala boka ke la hio leghurira ira leghutau ka taghona neke posiriro Tamara, ghe Hira neke deo ge boka la dufui ghu manei. 21Manei neke notohori ghu ira mane dike auro aianimu, “?Hae mu ia ghase ta kikirasei tabara neke auno ka gheremena hanganana iahi Enaimi?”

“Aiahi mu toraina e deo kaike fotati ta kikirasei tabara ghu neke auna,” dike ghua ghini.

22Hira neke leghu lao ghu ka Zuda la kahe ghuana iahi, “Ara e deo ma gake boka la dufui ghu. Nia ira mane ta au aianimu dike kahei ta torai deona aianimu ge au ghu kaike fotati ta kikirasei tabara ghu.”

23Zuda neke kahe ghua iahi, “Veha mo e suteri ghu manei leghutau ari. E deo gada kabai ghidi ghu ghita ira noni ta pagho ghitana. Ara nake va sisiva mo ta tabarina manei, ghe agho deo goke boka la dufui ghu.”

24E nona au ka lito hihile leghunana, kehara dike va kahe ghini Zuda, “Ia nou vasagha Tamara, taghe kaike ta kikirasei tabara neke ghuano manei, neto pote ghatunaina.”

“!Hio kavei o la saliga va lemei ghu!” neke ghua ungene va gigimana Zuda.

25Ka ia hio kavei maneri mala la atungina, manei neke va ghahe lao ngengene ka ia nona mama ia keranau neke lemeo. “Ara mu na pote ka ia mane ta kutamadi leghutau irahi. O matori o finiri ghu nona hei mo mu vavadihi ta kuru medolona babaolo iahi nia totongono ini e ghua.”

26Zuda neke fini avohori neke kahe ghua ghu iahi, “Manei mu e noni lotorona fuluduau ara, vununa ara e deo gake va varihioi ghu ka Sela ia tuugumane.” Nia deo tuna ke epu taremehana leghunani Tamara neke ghua Zuda.

27Ne dufu ghu ia fafata mala va doli rekaha, manei neke hadu kavei ta sua ghidira taghona palu rekahamane. 28Ne va doli rekaha ghu manei, kaikeu ka maneri palu neke nai kavei ia kamena. Ia fotati mala va doli rekaha neke sakomi neke va piliga ghini lao ghu ka kamenani kaike naroho ta busaka kahe ghuana iahi, “Iahi mu neke kusu doli mehana.” 29Ghe manei neke koroho leghu hagheli ia kamena, nia ke kusu doli tuna ia keha tahinamane mo neke ghua. Kahe ghua tuna iahi neke ghua ia fotati ta mala va doli rekaha, “!Tagai kusu doli!” Perezi#38:29 Perezi: Fafahakanana babaolo iahi ka Hiburu mu “tagai kusu doli.” Mane ginitaukela Deveti mu neke meha ka ia pagusu Perezi. dike ghua ghini ghu maneri baolina. 30Ianimu tuna ghe neke doli nga ia tahinamane neke va piliga ghini lao naroho ta busakao ia kamena. Zera#38:30 Zerafafahakanana ka Hiburu mu “pelara.” dike ghua ghini ghu balolina.

Currently Selected:

Tatanigaina 38: kji

Highlight

Copy