Tatanigaina 37

Ira Epu Baghunai Ka Zosepu

1Zekopu neke la au hinaeni ka ia kavana Kenani ka neke auno nona mama sepao.

2Iahi mu ia tuturidi ira pagusu ka Zekopu.

Zosepu mu neke kaike mane foforu ta tazoi vitu komuhuna, neke kopuna ghidiro ira sipisipi nia gouti taremehadi ira tahinamane, ira tuudimane Biliha ghe Zilipa ira keha ghaseborona nona mama. Manei neke va tuturi ka nona mama ghidi keha leghutau ta muko dike riva ghidiro ira tahinamane.

3Ka fafata iahi, Zekopu neke toraina namaha ghini Zosepu fuludurira ira keha tuunamane, vununa Zosepu neke doli ka ia neke to mamanekusuno taghona. Manei neke riva vanani ghu kaike poko sodu ta sodu kakamena ta veveha ghena. 4Di finini ghu ira tahinamane ta namaha ghini fuluduna manei nodi mama fuludu laoina hei ka taghodi, maneri dike kikipana ghini, dike deo ghu boka va kahe ghinina kaike ngengene ta veha ghu.

5Kaike redu Zosepu neke fini kaike epu baghunai. Ne va kahe ghidi ghu manei ira tahinamane ghinina epu baghunai ani, maneri dike toraina kikipana ghini laoni manei. 6“Nomohi epu baghunai iahi ka ara,” neke ghua ghidi. 7“Ghita haroharo dake au ka ia nunuma witi piliga varighara ghidira ira hekedi ta kuru fuadi ka sopai piliga hure. Ia piliga hure ka ara mu neke tetu vona va lotoro nia ira piliga hure ka ghau gedi ke au lilohi ghu tau ani ka ara, maimanihi hinae laona ka manei, dike ghua.”

8“?Nganganauna agho mu, taghou o age kaike mane ginitaukela o age ginitau kaputu ghai ghu ghai, no ghua?” dike ghua ira tahinamane notohina. Maneri dike toraina muko vanadi fuludu laoni ghu ka manei, vununa ka ghidi ira epu baghunai ka manei nia ka heve neke kaheriro manei ghidira epu baghunai ari ka manei, e ghua.

9Zosepu neke fini keha epu baghunainani neke va kahe ghidi ghu ira tahinamane, “Ara nake fini keha epu baghunainani. Ia taunu, ia hihile nia tazoi kaike babaghunu e ghua dike mamainihi hinae meha ka ara,” neke ghua ghidi.

10Manei neke va kahe ghini haro molamo nona mama epu baghunai iahi: “?Heve kokolona epubaghunai mu iamu? Nganganauna agho mu, nou uke, ira tahiumane nia ara e ghua a meha maimanihi hinae ka agho, no ghua?” 11Ira tahinamane dike kakabai ghini manei, ghe nona mama neke hadu ghini ngangana ma neke au ghu heve mo fafahakadira epu baghunai ari.

Ira Tahinamane Zosepu Dike Tatabara Ghini Zosepu

12Kaike ravata ira tahina ta faa Zosepu dike ghahe la kopu ghidi ira sipisipi nia gouti ka nodi mama gheremena Sekemu, 13neke kahe ghua ghu iahi Zekopu ka Zosepu, “Ara na kabai ghinigho ta laona Sekemu ka ta kopu ghidi ari ira sipisipi nia gouti ira tahiumane,” neke ghua ghini.

“Ne veha mo ara nato vatana,” neke ghua ungene tughuna Zosepu.

14Va kahe ghini tuna neke ghua nona mama, “Lao o la finiri ghu ira tahiumane taremehadira ira sipisipi nia gouti, di vehamo maneri ta ghuana, nia ke leghu meha va kahe ghinagu tuna e ghua.” Nona mama neke va ghahei ghu manei sipana ka ia Lovete Heboroni.

Ka ia la sabarana manei ani Sekemu, 15kaike mane neke finini ghahe lao mehana manei ka ira galahedi kava sesehu neke notohi ghu, “?Heve mu no haduina agho?” neke ghua ghini.

16“Na haduri ira tahigumane. ?Boka va kahe ghinagu mo agho hae di valiharira maneri ira sipisipi nia gouti ka maneri?” neke ghua notohina.

17Ia mane neke kahe ghua iahi, “Maneri dito ghahe aiahi. Ara nake nomohori dike turi mala laona maneri ani Dotani,” neke ghua ia mane.

Zosepu neke ghahe leghu laori ghu ira tahinamane neke la dufuri ghu namodira Dotani. 18Neke la meha nga manei varihau, dike fini avoho laoi ghu maneri. To kusu vato ghini tuna ta mala atungina dike ghua, ghe neke la dufuri nga manei.

19“!Ta meha iahi ia manefaana epu baghunai!” dike kahe ghua ka varitaghodi. 20“Meha tuna, aria da atungi ghu, da kai haghele laoi ghu ka kaikeu ka seu ta karango irahi. Ghita da boka kahei mo neke ghanini kaike tagukava mauke ta ghuana. Ianimu tuna ghe gada age finini nga taghe heve ta meha ghuana ira epu baghunai ka manei.”

21Ne nomohi ghu Rubeni iahi, manei neke va sisiva hio va dolini Zosepu. “Ghita daka atungi ghu,” neke ghua ghidi. 22“Ghita daka atungi ghu. Da sakomo kai laoi ma ka korosa seu ta karango iahi ka malau koroghana ta karangona, nga daka posi laoi ghu.” Rubeni neke kahei iahi mala hio va dolinina ka maneri, nia ke va ghahe leghu laoi tuna ka nona mama e ghua, neke ghua.

23Ne meha dufu ghu Zosepu ka ira tahinamane, maneri dike reku kai tana ia nona poko sodu ta sodu kakamena ta veveha neke va vonaio manei. 24Ianimu tuna ghe dike sakomi nga dike kai laoi ghu ka giliona ia korosa seu ta karango.

25Leghuna ianimu maneri dike nohe hinae dike mahai ghu, ta ghuana mu, dito fini fata laoi ghu kaike pukuna mane bisinisi ka ia pagusu Isimaeli, dike ghahe sipadi Gilidi mala laona Izipi. Ira kamele ka maneri dike va haghe ghidi vahina kokolodi leghutau ta hurangi ghanoghanodi nga dike hio laoriro ani Izipi: ira gamu, bamu nia maa, e ghua.

26Zuda neke kahe ghua iahi ka ira tahinamane, “?Heve mu ta age hioina ghita dato atungi la tahidamane ini, nia poikai tuuna variatungu ianimu, ta ghuana? 27Aria da tatabara ghini age ghu ka mane bisinisi irani mala daka ngovali la ghu. Vununa manei mu tahidamane dake doli meha ma ka kaike noda mama mo.” Ira tahinamane dike veha vanadi mo ka neke kahei ani manei.

28Di ghahe meha ghu ira mane bisinisi tanidi Midiani, ira tahinamane dike koroho kavei Zosepu ka ia korosa seu dike tatabara ghini lao ghu ka varadaki kunegeledi siliva ka ira pagusuna Isimaeli, dike hio laoi ghu ani Izipi.

29Ka ia ke leghu mehana Rubeni ka ia korosa seu, ta deo ghu fininina Zosepu aianimu, mane neke rekuri ira pokona ka muko hihingo. 30Manei neke leghu lao ka ira tahinamane neke la kahe ghua ghu iahi, “!Ia rekahamane ne deo ge au ghu aianimu! ?Heve mo ta age boka riva ghinina ara ghatunaina?”

31Ianimu tuna ghe dike atungi nga kaike rekahana gouti dike va luduru laoi ghu ia poko sodu ta sodu kakamena ka Zosepu ka ia busakana. 32Maneri dike hio leghu laoi ka nodi mama ia poko sodu ta sodu kakamena dike la kahe ghua ghu iahi, “Ghai nake finini iahi. Fini va fafahaki ko, ge tau la ka ia tuumane agho,” dike ghua ghini.

33Manei neke fini avohi neke kahe ghua ghu iahi, “!Iahi mu poko sodu ta sodu kakamena ka ia tuugumane ara! Keha tagukava maukera dike ghaninina manei. Ia tuugumane Zosepu mu toke toraina ghani va samosamorei mamu.”

34Zekopu neke rekuri ira pokona ka muko hihingo neke va vona pokobaiki ghu. Tehi ravatani neke au muko hihingo ghinina manei ia tuunamane. 35Ira leghu tuunamane nga nia tuunaghase nga, dike la va sisiva kakapotina, ghe manei neke pake ghena. “Deo,” neke ghua, “Ara a au muko hihingo ma a lao ghu a vuhai holara taremehana ghu ia tuugumane ka ia beku.” Manei neke nakele muko hihingo ghini ma neke lao ghu Zosepu ia tuunamane.

36Ka fafata ianimu ira manedi Midiani dike tatabara ghini lao Zosepu ka Potifa ani Izipi, kaikeu ka ira nona mane ia mane ginitaukelana Izipi ta paudi ira mane magara ta kopu ghini ia leghahai tolima ginitau.

Currently Selected:

Tatanigaina 37: kji

Highlight

Copy