Markus 9

1Om patangaronKu marong dikovu iti, do kivaropo piipiro dikovu songingkakat siti do aupo apatai om koontongpo di kuasa do Kinoringan do momorinta diti tulun,” kadi Yisus.

Minundaliu i Kojuvan di Yisus

(Mat. 17:1-13; Luk. 9:28-36)

2Om katalibpo dii onom tadau mantad di pinampanaan diolo, om angataino dii di Yisus i Pitrus, i Yakub om i Yaya do tinumakad siri kulud#9:2 kulud: kotud tasavat om bubugol dii iolo siri. Om korikot siri minundaliu dii i kojuvan di Yisus diri kaantangan diolo, 3do tinumitiu i sabungJo do opurak maamarong, om insan isopo tulun nga auso koilo popurak do sabung irad diri do siti vonuvo. 4Om kivaro dii duvo tulun mimvulai do kumituturan di Yisus. Ngaran nopo diolo nga i nabi Ilia, i popolombus di tinangaran do Kinoringan di pogulupo, om i Musa.

5Om pitangar i Pitrus di Yisus do ka, “Rabi! Songkuro kaandai do siti tokou nogi! Gaam mamaal ikoi do tolu sulap: iso Dika, iso di Musa om iso diIlia,” ka. 6Sabap nga au dii oilaan di Pitrus nong onu tangaronjo do nokorosi marong iolo.

7Om rundukno dii i kavut do tinumopuk diolo. Om kivaro dii norongou diolo di dolou mantad si saralom do kavut minitangar do ka, “Itino TanakKu do au kojuuanKu. Pongkinongou kouno di tangar Disido!” kadi Kinoringan. 8Om pogkovili diolo siri misoliput, om ausono dii naantangan diolo diIlia om i Musa, nga tinggalpo i Yisus kondiri do poingkakat siri.

9Om ontok diri rumuuk iolo mantad siri kulud,#9:9 kulud: kotud om bilinaino dii di Yisus iolo do, “Ioku nopo nga i Sinumiliu do Tulun. Nong aupo novijau Oku kavagu mantad si tulun nongapatai, nga ada mujuno sangkaabarai di tongotulun i naantangan muju,” kadi Yisus.

10Om iolo nga minangasip di tangar di Yisus do aui dii minangaabar di tulun vokon, nga poiduduat dii iolo do, “Nuu naku komoion di tinangar di Yisus diri do, ‘Ovijau kavagu mantad si tulun napatai,’ kaDisido?” kadi tongotulunJo. 11Om pongoduatno dii iolo di Yisus do, “Nokuro naku do minitangar iri tulun monunuduk do Undang-undang Ugama do misti rumikot iIlia mogulu mantad di Koristus,” kadi tongotulun di Yisus.

12-13Om jawapno dii i Yisus diolo, “Oinomodno do rumikot mogulu iri iso tulun irad di nabi Ilia do poposiap diri ginavo do tulun. Om oinomod nogi do nokorikotno iri tulun irad diIlia siti.#9:12-13 Komoion nopo di nabi Ilia nga i Yaya Mamamatis (Momomonsu). Om irino do nokobojou iolo mangaraat disido do onuu nopo iri kouvangan diolo irad di nokotulis si Kitab. Om Ioku nogi i Sinumiliu do Tulun nga oguui kasansaraanKu om iada Okui do tulun irad di nokotulis siri Kitab,” kadi Yisus.

Minonunsub i Yisus do Rogon siri Tanak

(Mat. 17:14-21; Luk. 9:37-43)

14Nga kogunggulipo dii i Yisus om i tolu tulunJo siri tongotulunJo vokon, om naantangan dii diolo iri tongotulun di Yisus liniputan do tulun toguu. Om kivaro nogi piipiro tulun monunuduk do Undang-undang Ugama do Joudi do kumisival diri tongotulun di Yisus. 15Kaantangai nopo dii di tongotulun toguu i Yisus nga oiranan marong iolo, om panangkusno#9:15 panangkus: pogundak dii iolo sumalam Disido.

16Om pongoduat dii i Yisus di tongotulunJo siri, “Onu iti pisivalan muju diolo?” ka.

17Nga kivaro iso kusai siri di tulun toguu do minitangar di Yisus, “Guru, noovitku daa iti tanakku kusai siti Dikau do rinosukan isido do rogon om au katangar. 18Om sombo nopo pantok nong orosukan isido do rogon oilaanpo om kalaposno isido si tana, om momuputa i kabangjo, om marit-ngarit i niponjo, om kumodou i kojuvanjo om madan. Om pinokisunsubankuno daa di tongotulunNu, nga au kosunsub iolo diri rogon,” kadiamojo#9:18 kadiamo: kadiapa di tanak.

19Nga jawapno dii i Yisus diolo, “Ikovuno tulun do maso maino do au aparsaya Dogo! Komuropo linaidKu do poirunggum dikovu? Om komuropo linaidKu asabar dikovu? Pokoyo siti Dogo ino tanaknu,” kadi Yisus. 20Om angataino dii diolo i tanak siri di Yisus.

Om koontong nopo dii i rogon di Yisus, nga mopor-koporno dii i tanak do pinaadan di rogon, om karatu nopo dii isido si tana, om mibalik-balikpo om momuputa i kabang. 21Om duatono dii di Yisus iamojo#9:21 amo: apa di tanak, “Komuro nogi linaid disido do irad diti?” ka.

Om jawapno dii iamojo, “Mantadpo di opoyokpo. 22Om opogot pataamo di rogon silo tapui om silo vaig do pokipatai daa dilo rogon. Nga nong osiananKo dagai, om tulungo ikoino, tuan, nong kivaro kobulian,” ka.

23Om jawapno i Yisus disido do, “Nokuro kanu, ‘Nong kivaro kobulian,’ ka? Nga nong isai-isai aparsaya Dogo, kasangkat nga tulungon isido di Kinoringan,” kadi Yisus.

24Om pongogijakno dii iamojo di tanak do, “Aparsaya okui Dika, nga aupo songkuro. Nga tulungo okuno Dika supaya aparsaya oku marong Dikau,” kadisido.

25Om kaantangai dii di Yisus i tongotulun sotongkusan#9:25 sotongkusan: songundakan do muntun siri diolo, nga sunsubo dii di Yisus i rogon kosikap, om kaDisido, “Rogon, ikano i pobobou om pobongol di tanak, pogiduno om adano asu kavagu silo tanak,” kadi Yisus.

26Om pongogijakno dii mamarong i rogon, om turus kumopor, om novunduk i tanak do pinokorualan marong di rogon, om turus dii pogidu i rogon antad si tanak. Naantangan dii di tongotulun i tanak nga iradpo do napatai i kojuvanjo. Jadi kadi tongotulun, “Napataino dii iti tanak,” ka. 27Nga kuutaino dii di Yisus i longon di tanak om tungagono dii di Yisus, om ingkakatno dii i tanak.

28Om kalangkat dii oi Yisus mantad siri om asu dii iolo siri iso valai. Om kobubugol nopo dii iolo om pongoduat dii i tongotulunJo di Yisus do, “Nokuro naku do au kosunsub ikoi di rogon?” ka.

29Nga kadi Yisus diolo, “Bansa nopo diri rogon nga au osunsub nong au sumambayang,” ka.

Kumoinduvo di Yisus Popoilo diri KapatajanJo

(Mat. 17:22-23; Luk. 9:43-45)

30Om pampanauno dii oi Yisus mantad siri nga au moo i Yisus do oilaan di tongotulun do tumalib Isido siri Vonuvo Golilia, 31sabap monuduk Isido di tongotulunJo. Om kaDisido diolo, “Iokuno i Sinumiliu do Tulun do pataakon Oku di tongotulun om patajon Oku nogi dino diolo, om kotolu tadau om ovijau Oku kavagu mantad di kinapatajanKu,” ka.

32Om au kaarati iolo do komoion di Yisus, om au kopusu iolo mongoduat Disido.

Pongoduatan nong Isai Agajo Pangkat

(Mat. 12:30; 18:1-5; Mar. 10:31; Luk. 9:46-50)

33Om korikot iolo siri Bandar Kaparnaum, om asuno dii i Yisus siri valai, om duatono dii Disido i tongotulunJo do, “Onu iri pinisivalan muju maino si ralan?” ka. 34Nga ootos dii iolo do au jinumawap di Yisus sabap pinisivalan nopo diolo siri ralan nga minoiduat-duat do, “Isai daton diti agajo marong pangkat?” ka.

35Om ogom-ogomno#9:35 ogom-ogomno dii i Yisus: Kinaagaman nopo di Yisus nga irino do monuduk Isido di tongotulunJo, do ontok nopo di maso diri nong monuduk i tulun Joudi nga mogom-ogom. dii i Yisus om loovono dii Disido i opulu om duvo tulunJo om kaDisido diolo, “Isaai nopo i uvang do kopogulu nga misti tumouri om osiliu isido do susuuon kasangkat do tongotulun,” ka. 36Om ongoiono dii di Yisus iri iso tanak, om poingkokoto dii si gotuvangon di tongotulunJo, om gopuso dii di Yisus i tanak om pitangarno dii Isido, 37“Isaai nopo monorima irad diti iso tanak sabap aparsaya Dogo nga irino monorima Dogo, nga okonko Ioku noo torimawon diri nga irino i minonuu Dogo siti vonuvo nogi do torimawonjo,” kadi Yisus.

Isai iri Au Lumavan Daton#9:38 Daton: Ditokou Irino Poirunggum Daton

(Luk. 9:49-50)

38Om kadi Yaya di Yisus, “Guru, kivaro iso tulun naantanganja do mangarait di ngaranNu do monunsub di rogon. Nga pinotingkodja dii isido do okoniko songkoruangan tokou isido,” kadi Yaya.

39Nga jawap dii i Yisus, “Ada kou potingkod diri tulun do mangarait do ngaranKu. Nong kivaro tulun mangarait do ngaranKu do mamaal do kosunduvan, nga tantu do au buli isido mangararaat Dogo, 40do isaai nopo iri au lumavan daton#9:40 daton: ditokou om irino poirunggum daton. 41PatangaronKu marong dikovu iti do isaai nopo popoiup dikovu sanggalas i vaig sabap di ngaranKu, i Koristus, om aui olijot iri isuli disido mantad di Kinoringan,” kadi Yisus.

Ponudukan pasal di Tulun Mamamalid

(Mat. 18:6-9; Luk. 17:1-2)

42Om kadi Yisus kavagu, “Isaai nopo mamajajat diri iso tulun i oluoi ginavo mamaal do duso, do aparsaya iri tulun Dogo, gaam nogi do agatan do tali i liou om limbagatan do vatu tagajo di tulun diri mamajajat, om itobung nogi dino si laut, mantad do mamajajat diri tulun i oluoi i ginavo mamaal do duso. 43Nga nong i longonnu do mongovit dika mamaal do duso, totokono iri. Gaam nogi do pukung i longonnu sampaping do masu siri kovijaan di auso koovion mantad do oulit ino longonnu do potunuvon siri tapui naraka iri au moilo pisokon. 44[Siri nopo giras nga au matai, om tapui nogi nga au moilo pisokon.] 45Om nong takodnu mongovit dika mamaal do duso, totoko nogi iri. Gaam nogi do pukung takodnu sampaping do masu siri kovijaan di auso koovion mantad do oulit ino takodnu do potunuvon siri tapui naraka. 46[Siri nopo giras nga au matai, om tapui nogi nga au moilo pisokon.] 47Om nong matonu mongovit dika mamaal do duso, sungkitono#9:47sungkito: suvilo i linsou matonu. Gaam nogi do bolou sampaping matonu do masu siri Kopomorintaan do Kinoringan mantad do oulit ino matonu do potunuvon siri tapui naraka. 48Siri nopo giras nga au matai, om tapui nogi nga au moilo pisokon.#Antangai Yasaya 66:24.

49Do pointikid-tikid do tulunKu misti do osusa irad do nosuat do tapui supaya osompini ginavo disido mamaal do aandai irad di taakanon diri noosinan. 50Tasin nopo mimang aandai pongosin do onuu nopo taakanon supaya au apasa, nga nong malo iri rasa do tasin diri nga auno dii moilo poosinon kavagu. Om irad kou nogi dino misti irad do tasin si gotuvangon do tongotulun, om moiso kou do ginavo, om moitotoluod#9:50 otoluod: oinsasamod kou,” kadi Yisus.

Currently Selected:

Markus 9: LabukPKV

Highlight

Copy