Markus 8

Pinapaakan i Yisus di Apat Noribu Tulun

(Mat. 15:32-39)

1Om kivaro insan tadau, do oguu marong tulun minuntun kavagu si di Yisus om auso tongokokorui diolo. Om loovono dii di Yisus i tongotulunJo do poromut Disido om pitangarno dii Isido diolo do ka, 2“Osianan Okuno marong diolo diti, do toluno tadau iolo maja-vaja Dogo, om noovianno dii iolo do kokorui. 3Om nong suuonKu iolo muli do irad dilo, oluluk iolo silo tanga ralan do olikapan, do okonko kivaro kinaakanan diolo diti, om osodu nogi dino ulion diolo vokon,” kadi Yisus.

4Om minongoduatpo dii i tongotulun di Yisus do, “Inombo pogonuan do taakanon do ipaakan do tongotulun toguu diti do okonko kivaro kampung osomok-somok?” ka.

5Om pongoduatpo dii i Yisus do, “Piropo noinan i kuui muju bato?” ka.

Nga kadiolo, “Turupo noinan,” ka.

6Om suuono dii di Yisus i tongotulun do mogom siri tana, om onuo nogi dii Disido i turu noinan kuui om ponorimakasino dii Isido di Kinoringan, om poikokib-kokibo om popintaako nogi dii Disido di tongotulunJo, supaya potikidon diolo si di tongotulun, om maja iolo di komoion di Yisus. 7Om kivaro nogi piipiro tinan i sada ongopoyok om barakataino dii di Yisus, om suuono dii Disido i tongotulunJo do potikid di sada nogi si di tongotulun. 8Om pangakanno dii iolo gosob do nabajakan. Om koopod nopo dii i tongotulun toguu mangakan om pumpungono dii di tongotulun di Yisus iri tongokuui noolu-olu di tongotulun mangakan, nga kivaropo dii turu balatak#8:8 balatak: bakul noponu. 9Ii nopo minangakan dii nga kivaro kama apat noribu tulun. Om suuo nogi dii di Yisus iolo pouli. 10Om turus sako dii oi Yisus di talud do sumondipau mongoi soi Vonuvo Dolomonuta.

Mokiintalang i Kumpulan Porisi do Kosunduvan di Yisus

(Mat. 16:1-4)

11Om korikot dii oi Yisus siri Vonuvo Dolomonuta, om kivaro dii kumpulan Porisi do rinumikot kumisival di Yisus do moo daa iolo monginam Disido. Om mokiintalang daa iolo di kuasa di Yisus do pongintutunan do mantad Isido si di Kinoringan. 12Nga monikabo#8:12 monikabo: mitikabo i Yisus do osusa i ginavoJo om kaDisido, “Nokokuro i tongotulun do maino do mokiintalang noopo daa di pongintutunan? PatangaronKu marong dikovu iti do auso nunu pongintutunan do ipoontongKu diolo,” kadi Yisus. 13Om iduai nopo dii di Yisus i tongoPorisi do sinumako vagu si talud do sumondipau.

Jaajagawo i Tulun di Mamamalid

(Mat. 16:5-12; Luk. 12:1-3)

14Nga noolingan di tongotulun di Yisus do mongovit do kuui, kivaroi nga songinginanpo si talud. 15Om tudukai dii di Yisus iolo do, “Antatangai mujuno kaandai-andai, om jaajagawo mujuno iri poudor di kumpulan Porisi om tulun diIrudis,” ka.

16Nga moitatangar dii i tongotulunJo nong onu komoion di Yisus do ka, “Mitangar gia Isido dilo do auso dii kuui noovit tokou maino,” ka.#8:16 Nga nakatangar i tongotulun di Yisus do irad dino sabap au oilaan diolo i komoion di Yisus. Komoion nopo Disido di poudor nga i ponudukan di kumpulan Porisi om tulun do Irudis do mamalid do tulun.

17Nga oilaan di Yisus i tinangar diolo, om kaDisido, “Nokuro kou do moitatangar do, ‘Auso kuui tokou,’ kamuju? Aupo naku kosuut kou di ponudukanKu ko aupo kaarati kou? Nokuro do okodou marong i ginavo muju? 18Kimato kou, nokuro do au koontong? Om kitolingo kou, nokuro do au korongou? Au aandaman muju? 19Pikokib-kokiboKu iri limo noinan kuui om nipaakanKu di limo noribu i tulun, nga piropo dii vakid noponu i noolu di tulun mangakan i pinumpung muju?” kadi Yisus.

Om jawap iolo, “Opulupo om duvo i vakid noolu diri,” ka.

20Om kadi Yisus minongoduat kavagu di tongotulunJo, “Pikokib-kokiboKu dii iri turu noinan kuui om nipaakanKu di apat noribu tulun, nga piropo dii balatak#8:20 balatak: bakul noponu i noolu di tulun mangakan i pinumpung muju?” ka.

Nga jawap iolo, “Turupo i balatak noolu diri,” ka.

21Pongoduat dii i Yisus, “Au dii naku kaarati kou diri, do okonko sumurau Oku do auso kuui?” ka.

Minongolingos i Yisus di Tulun Bolou si Boitsida

22Om korikot nopo dii i Yisus om i tongotulunJo siri Kampung Boitsida, om kivaro dii piipiro tulun do minongovit di tulun nobolou do pokikamaan di Yisus. 23Om kuutaino dii di Yisus iri longon di tulun nobolou do mangaak disido, om angatai dii siri ososoodu mantad di kavalajan, om dulaaino dii di Yisus om kamawo iri matojo, om duato nogi dii di Yisus nong koontongno dii isido.

24Om jangogno#8:24 jangog: rangog dii i tulun bolou, om pitangar do ka, “Koontong okuno dii nga irad do puun do kaju antanganku ilo tongotulun sampanau-panau,” ka.

25Om kamawopo dii vagu di Yisus iri mato disido, om siratai#8:25 siratai: otontong marong disido mongontong om nolingasan nogi ampa anavau marong pongontongjo. 26Om suuono dii di Yisus pouli do kaDisido, “Adako mongoi silo Kampung Boitsida,” ka.

Pongokuan di Pitrus do i Yisusno i Koristus

(Mat. 16:13-20; Luk. 9:18-21)

27Om lombusno dii i Yisus mivaja di tongotulunJo do mongoi siri somok do kokompungan di Koisoria Polipi, om siripo tanga di ralan om pongoduatno dii i Yisus diolo do, “Nong kaandaman di tongotulun isai naku Oku diti?” kaDisido.

28Om jawapno dii i tongotulunJo minitangar do, “Kivaro diolo mitangar do Ikano i Yaya Mamamatis,#8:28 Mamamatis: Momomonsu om kivaro diolo mitangar do Ikano i nabi Ilia, om kivaro nogi diolo mitangar do Ikano isopo nabi vokon mantad di nabi pogulu, i popolombus do tinangaran di Kinoringan,” kadi tongotulun di Yisus.

29Om pongoduatpo kavagu i Yisus diolo do, “Nong ikovu, isai Oku kaandaman muju,” ka.

Nga jawapno dii i Pitrus, “Ikano i Koristus,” ka.

30Om pitangarno dii i Yisus di tongotulunJo do, “Adano marong sangkaabarai do tongotulun vokon do i Koristus Oku,” kaDisido.

Kotimpuunon di Yisus Popoilo diri KapatajanJo

(Mat. 16:21-23; Luk. 9:22)

31Om timpuunno dii i Yisus do monuduk di tongotulunJo do irad diti, “Ioku nopo nga i narait di tongonabi i Sinumiliu do Tulun, om potingkuro pun misti do pasansarawon Oku marong, om iada Oku di tongokotua do tulun Joudi, irino i tongomoloingon om i tongokotua di imam om i tongotulun monunuduk di Undang-undang Ugama do Joudi gosob do patajon Oku diolo. Nga ontok di tadau kotolu om ovijau Oku kavagu,” kadi Yisus. 32Om navantang marong di Yisus mitangar irad dino.

Nga korongou nopo i Pitrus di tangar di Yisus, kuutaino dii disido i Yisus poinsomok disido, om toguro dii di Pitrus Isido do, “AdaKo mitangar irad dino,” kadi Pitrus.

33Nga tolikudno dii i Yisus di Pitrus om mongontong isido di tongotulunJo vokon, om toguroJo i Pitrus do kaDisido, “Kotua do rogon, pogiduno siti! Do okonko kouvangan di Kinoringan ino ondomonnu nga irino kouvangan do tulun ino ondomonnu,” kadi Yisus.

Ponudukan di Yisus pasal di Kovijaan do Tulun

(Mat. 16:24-28; Luk. 9:23-27; 17:33)

34Om loovono dii di Yisus i tongotulun toguu om i tongotulunJo do porikot si Disido om kaDisido, “Isaai nopo uvang maja Dogo, misti do olinganno i kouvanganjo kondiri, om monimban di salibjo, irino mijau matai nga sumangal#8:34 sumangal: tumaan diri kasansaraanjo sabap aparsaya Dogo, om maja nogi Dogo. 35Do isaai nopo momiara noopo do kovijaanjo kondiri nga irino oliangan do kovijaan diri auso koovion. Nga isaai nopo oliangan do kovijaanjo sabap do maja Dogo om sabap popitongkop di Abar do Aandai nga irino kaanu kovijaan diri auso koovion. 36Sabap auso kountungan do tulun insan asanganupo disido kasangkat iti vonuvo, om apatai i tatodjo. 37Au dii kopituuk do kovijaan di tulun diri auso koovion. 38Do isaai nopo dikovu oikuman mangakun do maja Dogo om oikuman mangakun diri ponudukanKu si tulun kiduso, iri au rumalan maja di Kinoringan maso maino, om Ioku nogi i Sinumiliu do Tulun nga oikuman Okui do mangakun disido si gotuvang diAmoKu#8:38 diAmo: diApa ontok do rumikot Oku kavagu siti vonuvo saralom do vinaang diAmoKu mivaja di tongomoloikat i ongolidang.

Currently Selected:

Markus 8: LabukPKV

Highlight

Copy