Markus 7

Adat mantad Diodu-aki do Tulun Joudi

(Mat. 15:1-9)

1Om untunno dii i tongokotua do bansa Joudi si di Yisus do rinumikot mantad soi Bandar Yorusalim. Iolo nopo diri nga kumpulan Porisi om piipiro i monunuduk do Undang-undang Ugama do Joudi. 2Om naantangan dii diolo i piipiro tulun di Yisus mangakan di kuui di longon asaim, irino komoion do au maja di adat do kumpulan Porisi do pongungugas.

3Do kumpulan Porisi nopo om kasangkat i tongotulun Joudi vokon nga aupo mangakan nong aupo ougasan i palad sampai iri lunggajan do maja di adat diodu-aki. 4Om irad nogi dino nong nokouli iolo mantad pasar, aupo mangakan iolo nong aupo kopongolinggagup do vaig, om oguupo tongaadat vojoon diolo inong do adat do mongugas do tongopongiupan om mongugas do tongopangakanan atau tongotambaga i vinaal do pagansakan.

5Om i kumpulan Porisi om i tulun do monunuduk do Undang-undang Ugama minongoduat di Yisus do, “Nokuro ilo tongotulunNu do au maja di adat diodu-aki tokou pogulu, do aupo kougas marong dilo longonjo om mangakanno?” kadiolo.

6-7Om jawapno dii i Yisus diolo do, “Oinomodno i tinangar di nabi Yasaya do popoilo isido laaid di tinangaran di Kinoringan di pogulu pasal dikovu, tulun do puupura, do irad diti tinulisjo do,

‘ “Mongurumat daa iti kabang do tongotulun Dogo,

nga ginavo nopo diolo nga osodu mantad Dogo.

Om osia-sia naama iolo sumamba Dogo,

do monuduk iolo di ponudukan do tulun

om tangaron diolo do irino tinangarKu,”

kadi Kinoringan,’ i tinulis do Yasaya.#Antangai Yasaya 29:13.

8Au kou maja di isuu do Kinoringan nga maja kou noopo do adat diodu-aki muju,” kadi Yisus.

9Om pitangar kavagu i Yisus do, “Aandai kouno marong dino do iada muju iri nisuu do Kinoringan, om vaja kou nogi diri adat muju kondiri! 10Do kadi Musa di pogulu, ‘Urumato mujuno marong iamonu#7:10 amo: apa om iinonu,’ ka, om ponuu kavagu isido do, ‘Isaai nopo mangararaat diamojo#7:10 diamo: diapa om iinojo nga misti patajon,’ kadi Musa.#Antangai Kinolobusan 20:12; 21:17; Gulion 5:16; Imam 20:9. 11Nga ikovu nopo monuduk om kamuju, ‘Nong kivaro tulun kivaro onuu nopo do obuli itulung di moloingjo, nga obuli isido popoilo diamojo ko iinojo do, “Auso kountungannu dogo do auso pataakonku dika sabap inanuku do Kurban,” kadisido,’ kamuju. -- Komoion nopo do Kurban nga i pataakon si di Kinoringan. -- 12Nga nong irad dino, potingkod kou di tulun do monulung diamojo ko iinojo. 13Irad kou nopo dino nga au nogi maja kou diri tinangaran di Kinoringan, om au kou mongkinongou. Om poomit kou nogi di adat mantad diodu-aki muju, om oguupo sosondiang irad dino do vojoon muju,” kadi Yisus.

I Taraat Lumabus mantad siri Ginavo do Tulun

(Mat. 15:10-20)

14Om loovono dii kavagu di Yisus i kinoguuan do tulun om pitangar Isido diolo do, “Pongkinongou kouno kasangkat Dogo, om rotio mujuno marong. 15Onuu nopo lumabus mantad siri ginavo do tulun nga irino monginsasaim disido, okoniko iri mantad soribau do tulun do masu si kojuvan do monginsasaim disido. 16[Nga isaai nopo iri kitolingo, rumongouno marong diti tinangaranKu,]” kadi Yisus.

17Om koiduai nopo dii di Yisus iri tongotulun toguu, om asuno dii Isido siri valai. Om pokitudukno dii i tongotulunJo di Yisus do komoion di poiradan. 18Om kadi Yisus diolo, “Nokuro do ikovu nogi nga au kaarati diri tinangarKu? Oilaan mujui do onuu nopo do taakanon do akanon disido nga ausoi monginsasaim disido, 19do onuu nopo iri masu nga siri tijan noopo om lumabus, nga okoniko masu si ginavo,” kadi Yisus. -- Iradno dii nipoilo di Yisus di tongotulun do onuu nopo i taakanon nga ongaandai akanon. --

20Om kadi Yisus vagu di tongotulunJo do, “Nga onuu nopo i lumabus mantad siri ginavo do tulun nga irino monginsasaim disido. 21-22Do iri nopo lumabus mantad si saralom ginavo do tulun, iri sinoromo do araat, mamaal kalalasu, manakau, mamamatai do tulun, lumapau, au obobos ginavo, mimvavaal do taraat, monoro, monongondu, sumolon,#7:21-22 sumolon: tumaai mangararaat do vokon, osumbung om au moilo tudukan. 23Om kasangkat di ongoraraat diri nga lumabus mantad siri ginavo om monginsasaim do tulun,” kadi Yisus.

Kaparsayaan di Tongondu Puniki

(Mat. 15:21-28)

24Om pampanauno dii i Yisus mantad si Vonuvo Golilia om ongoino Isido siri pantok do Bandar Tirus om Bandar Sidun. Om asuno Isido siri iso valai, do lumosok daa supaya auso tulun koilo, nga potingkukuro pun aui kadapat. 25-26Nga kivaro iso tongondu kitanak tongondu do rinosukan do rogon i tanakjo. Nga isido nopo om okonko tulun Joudi do tangarjo nopo nga Yunani, bansa nopo nga Puniki siri Vonuvo Siria. Pogrongou#7:25-26 Pogrongou: Pagrongou diinojo di tanak do siri i Yisus, ongoino dii isido om tungub si takod di Yisus, do mokitulung isido monunsub di rogon mantad si tanakjo.

27Nga pitangarno dii i Yisus di tongondu do poiradon Disido i bansa Israil irad do tangaanak om i tulun di okonko bansa Israil irad do tasu, do kaDisido, “Tantu ipaakanpo mogulu di tangaanak sabap au apatut isumad do tasu iri taakanon do tangaanak,” kadi Yisus.#7:27 Komoion nopo di Yisus do tulungonJopo mogulu ino bansaJo, ampa nogi do monulung do bansa vokon.

28Nga jawapno i tongondu, “Obontol ino, Tuan, nga insan tasupo nga sumaaui siri susuk do mija monginsomumuti diri mumu do tangaanak,” ka.

29Om jawapaino di Yisus i tongondu do, “Irad nopo dino tangaronnu, nga pouliaino pogi soi valainu do nokoiduno i rogon si kojuvan di tanaknu,” kadi Yisus.

30Om kouli nopo dii i tongondu si valaijo, nga naantangan disido i tanakjo do modop-odop siri toodoponjo do nokoiduno dii i rogon mantad si kojuvanjo.

Nolingasan Iso Tulun Bongolonpo om Boboupo

31Om uli nopo dii oi Yisus mantad siri Tirus, om otoliban dii Disido i Bandar Sidun, om otoliban nogi dii Disido iri ponguranan do Opulu Bandar gosob nokoruuk siri Botung Tagajo do Golilia. 32Angataino dii di tulun si di Yisus iri iso tulun do bongoloni boboui, om pokikama dii iolo di Yisus supaya olingasan isido.

33Angatai dii di Yisus iri tulun rumijang do minsodu mantad di kinoguuan di tulun, om posusuko dii di Yisus i tunturuJo si tolingo di tulun do bongolon, om pongodula dii Isido om potuduo nogi dii i dila di tulun do bobou. 34Om tingaano dii i Yisus si tavan#7:34 tavan: langit do monikabo,#7:34 monikabo: mitikabo om kaDisido di tulun, “Ipata,” ka, komoion diri, “Ukabono,” ka. 35Nga turus dii do korongou om katangar i tulun, do noiduno dii i nakatangkong di dilajo.

36Nga bilinaino dii di Yisus i tongotulun do, “Ada sangkaabarai do isaai nopo do tulun,” ka. Nga makin nogi dii do minangaabar iolo. 37Atuuk! Osumboijanno dii marong iolo do kavantang i tulun bobou mitangar, om kadiolo do, “Sukup kaandai i gaagaya Disido dino. Antangai pogi nga bongolon do bobou nga olingasan,” ka.

Currently Selected:

Markus 7: LabukPKV

Highlight

Copy