Markus 6

Auso Tulun Aparsaya di Yisus siri Bandar Nasarit

(Mat. 13:53-58; Luk. 4:16-30; Yaya 4:44)

1Om pampanauno dii i Yisus mivaja di tongotulunJo mantad siri do muli siri Nasarit, kampungJo kondiri. 2Korikot nopo dii i Tadau Koingkajadan om ongoino dii Isido monuduk siri valai sasambayangan. Om oguu tulun siri rumongou om moiduduat dii do oiranan pasal di Yisus do ka, “Osundupo dii mamarong i Yisus, owo. Inombo naku nontodon dilo kopintaranJo?” kadiolo, om, “Isai minonuduk do toilaanJo? 3Tutukang kajui bo Isido. Okoniko i Moria iinojo? Om okoniko i Yakub, i Jusis, i Yudas om i Simun i tadijo om oiadiJo tongondu nga siti daton?”#6:3 daton: ditokou kadiolo. Nga aasaban dii mamarong iolo di Yisus om au aparsaya.

4Nga kadii di Yisus diolo, “I nabi nopo, i popolombus do tinangaran di Kinoringan, nga au urumaton do tongotulun siri kampungjo kondiri, nga siri pantok di vokon om ampa urumaton isido,” ka. 5Jadi au kadapat i Yisus popoontong do sinunduJo siri kampung kondiri. Kivaro nogi nga okuyak iri tulun au kataru nolingasanno do kinama Disido. 6Om oiranan dii Isido do auso kaparsayaan di tongotulun siri.

Sinuu di Yisus i TongotulunJo Mongoi Papaabar di Abar do Aandai

(Mat. 10:5-15; Luk. 9:1-6)

Om ongoino dii pitongkop-tongkop i Yisus si tongokampung sondiang do monuduk di tongotulun. 7Om loovono dii Disido iri opulu om duvo tulunJo do suuonJo mampanau soroduduvo, om onuaiJo nogi dii iolo do kuasa monunsub do tongorogon. 8-9Om bilinaino dii di Yisus iolo do irad diti, “Mampanau kou nopo, om ada kouno mongovit do onuu nopo, insan kokorui, ko kontungan ko siin sino kambot muju, nga obuli kou mongovit do tungkat,#6:8 tungkat: tungkud om manangkasut, nga ada piopolo ino sabung muju,” kadi Yisus. 10Om kaDisido kavagu di tongotulunJo do, “Kivaro nopo tulun poindakod dikovu, om mindada kou nopo siri gosob do mampanau kou vagu. 11Nong kivaro tulun siri iso pantok do au poindakod dikovu om au mongkinongou dikovu, tantagono i lisovu si lukap muju ontok do mampanau kou mantad siri om toliban muju nopo iolo, do irino i tanda do popoilo kou di kasalaan diolo,” kadi Yisus.

12Om pampanauno dii i tongotulun di Yisus do mangaabar di tongotulun do apatut iolo do rumorogo di duso. 13Om oguu dii iri tulun rinosukan do rogon do sinunsuban diolo. Om oguu nogi tulun do au kataru do linanaan diolo do nolingasan.

Kinapatajan di Yaya Mamamatis#6:14 Mamamatis: Momomonsu

(Mat. 14:1-12; Luk. 9:7-9)

14Om kotongkop nopo dii iri ngaran di Yisus om nokorongou dii i Raja Irudis#6:14 Raja Irudis: iIrudis Ontipas, i raja silo Vonuvo Golilia. Antangai “Irudis” si Kamus Kitab. do moitatangar i tongotulun nong isai Isido. Nga kivaro tulun mitangar do ka, “Novijau kavagu daa i Yaya Mamamatis#6:14 Mamamatis: Momomonsu do mantad si pialatan di tulun napatai, om irino sabap do kisinundu Isido,” kadi tulun.

15Om kivaropo tulun kavagu mitangar do, “Isidono nabi Ilia” ka.

Om kivaropo tulun kavagu mitangar do, “Isidono nabi irad di nabi pogulu,” ka.

16Om karangaai dii di Raja Irudis do minitangar i tongotulun do irad dii, om kadii disido, “Tulun nopo dino nga i Yaya Mamamatis, i nototokku i liou di pogulu nga novijau kavagu,” ka.

17-19Do itino kinoontodon do kinapamatajan di Raja Irudis di Yaya di pogulu, do kivaro iso tongondu, ngaran nopo dii nga iOrudia, savo di Pilipus, longuon diIrudis, nga sovoo dii diIrudis. Nga kadi Yaya diIrudis, “Auko apatut daa do manansavo dilo longuonnu do poimvijaupo i Pilipus iakanu,” ka. Nga oruol dii ginavo diOrudia do araatan di Yaya. Nga irino sabap do sinuu dii diIrudis iri tongosoujorjo do mongoi manangkap di Yaya do patangkangan om poosuon siri jiil. Om pokipatajan daa dii diOrudia i Yaya do araatan marong disido. Nga au kadapat isido do aui moo iIrudis do patajon i Yaya, 20nga uvungo nopo dii disido i Yaya do rumosi, do noilaanno diIrudis do aandai i ginavo di Yaya om songonuvon isido di Kinoringan. Sombibia dii do korongou iIrudis di tangar di Yaya om opiduvo dii i ginavojo. Nga insan irad dii aandaian isido mongkinongou di Yaya.

21Kivaro iso tadau taandai kouvangan diOrudia do mamatai di Yaya, irino tadau tagajo iri pongurumatan di kinosusuvan di Raja Irudis. Om untunno dii i ongogagajo pangkat, om i tongokotua do soujor, om i tongokotua-kotua si Vonuvo do Golilia do mogiginakan siri diIrudis. 22Om asuno dii i raraa, i tanak laid diOrudia, om ongoino dii manari. Nga aandaian dii marong i ginavo di Raja Irudis om i tongotulun siri do nokoontong di pananari di raraa. Nga kadi raja di raraa, “Pokianuno dogo onuu nopo i kouvangannu, om onuanku ika,” kadi raja. 23Om minangajanji i raja di raraa diri do, “Nunuupo i pokionuonnu dogon itaakkui dikau, insan opintangapo iti kopomorintaanku pataakonkui dikau,” kadi Raja Irudis.

24Om labusno dii i raraa diri, om ongoino dii siri diinojo mitangar, “Ino, onu kama pokionuonku?” kadi raraa.

Om jawapno dii iinojo do, “Pokionuono i tulu di Yaya Mamamatis,” kadiinojo.

25Om mogoogono dii i raraa do mampanau rumomut vagu si di raja om kadisido, “Pokionuonku nopo maino dikau nga i tulu di Yaya Mamamatis om pokoyonno siri talam,” ka.

26Om oludus#6:26 oludus: olunggui ko osusa marong ginavo dii i raja do pokionuon di raraa iri tulu di Yaya, nga kukuroyonpo do nakalanduno dii isido sinumumpa do mangajanji di raraa siri gotuvang di tongotulun. Om aui dii moo isido mungkir di pokionuon di raraa diri. 27Om ponuuno dii i Raja Irudis do iso soujor do mongoi maganu di tulu di Yaya. Om labusno dii iri soujor om putulo i tulu di Yaya siri jiil. 28Om onuojono dii iri tulu di Yaya, om pokoyono siri talam, om ovitono dii muli, om pataakono dii di raraa om pataako kavagu dii di raraa si diinojo. 29Om karangaai nopo dii di tongotulun di Yaya do napataino isido, om ongoiono dii diolo iri kojuvanjo om lobongo diolo.

Papaakan i Yisus diri Limo Noribu Kusai

(Mat. 14:13-20; Luk. 9:10-17; Yaya 6:1-13)

30Iri nopo tongosusuuon di Yisus nga minuli siri Disido, om pangaabarno dii diolo i Yisus i kasangkat diri gaagaya diolo, om kasangkat diri nituduk diolo di tongotulun. 31Om moisusuvoli dii i tongotulun rumikot om muli gosob do au kosivat iolo mangakan, nga kadi Yisus di tongosusuuonJo, “Kayo tokou pogi bubugol mongoi soi tojongou, om mingkojod tokoupo oruai,” ka. 32Om sakono dii iolo siri talud do bubugol mongoi siri pantok tojongou.

33Om oguu dii i tongotulun nokoontong diolo sumondipau, om otutunan dii diolo oi Yisus. Om pointikid-tikid di bandar kivaro santangkus-tangkus#6:33 santangkus-tangkus: songundak-undak mampanau takod linumiput di vaig mongoi siri rikoton di Yisus. Nga nokopogulu nogi dii i tongotulun rumikot mantad doi Yisus. 34Om korikot nopo dii i Yisus siri pantok ongoionJo, tindalno dii Isido om i tongotulunJo. Om kaantangaiJo dii iri tongotulun toguu, om osianan dii marong Isido diolo do irad di kambing biri-biri do auso momimiara, om timpuunno dii i Yisus monuduk diolo diri, om oguu dii nituduk Disido diolo.

35Om minsosodopno dii ilo tadau, om ongoino dii i tongotulunJo si di Yisus om kadiolo, “Okonko kivaro valai siti pantok diti om minsosodopno ilo tadau. 36Gaam nogi do suuon daa ilo tongotulun toguu poongoi silo tongokampung om silo tongodumo, om pomolijoni iolo do kokorui doisido,” kadi tongotulun di Yisus.

37Jawapno dii i Yisus di tongotulunJo, “Paakanon muju nono iolo,” ka.

Nga kadi tongotulun di Yisus, “Kukuroyonja mongoi momoli do taakanon diolo diti do insan torogo duvo naatus pirok nga au kosukup!” kadiolo.

38Om kadi Yisus diolo, “Piropo noinan i kuui muju bato? Ongoio mujupo antangai,” ka.

Om ongoiono dii di tulunJo antangai, om koilaai dii diolo do kivaro limopo noinan iri kuui om duvo tinan iri sada, om poiloo nogi dii diolo i Yisus do, “Limopo noinan i kuui om duvo tinan i sada naansak,” ka.

39Om suuono dii di Yisus i tongotulun do moipuruk-puruk mogom siri sakot totomou. 40Om aturno dii iolo mogom do kivaro aatus, om kivaro limo nopulu do iso puruk. 41Om onuono dii di Yisus iri limo noinan i kuui om iri duvo tinan i sada, om tingaa nogi dii Isido soi tavan#6:41 tavan: langit do sumambayang do mangarajou#6:41 mangarajou: mongompod do Kinoringan. Om poikokib-kokibo dii Disido i kuui, om popintaako nogi dii di tongotulunJo supaya potikidon diolo si di tongotulun. Om irad nogi dino iri duvo tinan sada do pinoiutul-utul di Yisus om pataako nogi diolo di tongotulun. 42Om pangakanno dii iolo kasangkat gosob do nabajakan. 43Om koopod nopo dii i tongotulun toguu mangakan om pumpungono dii di tongotulun di Yisus iri noolu-olu diolo mangakan, nga kivaropo dii opulu om duvo vakid noponu di tongosongkokiban di kuui om i tongosomputul di sada. 44Om kinoguuo nopo diolo minangakan om kivaro kama iri do limo noribu tulun, nga kira tongotosukod kusai noopo.

Minampanau i Yisus siri Soribau Vaig

(Mat. 14:22-34; Yaya 6:16-21)

45-46Koopod nopo dii i Yisus papaakan di tongotulun diri, om logosono dii Disido i tongotulunJo sumako kosisikap si talud do mogulu sumondipau siri Bandar Boitsida. Om ontok nogi diri suuoJono dii i tongotulun toguu do pouli, om poiririjangno dii iolo, om i Yisus nopo dii nga tinumakad siri kulud#6:45 kulud: kotud do sinumambayang.

47Mintutuvongpo dii nga siri nogi tanga di botung tagajo i tongotulun di Yisus. I Yisus nopo nga sosoiso Isido si sokid. 48Om naantangan dii di Yisus iolo do osusa gumaau do au kotori di sarup do ologod. Nga katalib kama iri do pukul tiga minanavau, om rikotno dii i Yisus siri diolo do minampanau siri soribau do vaig. Om pokitoliban daa dii Disido iolo. 49-50Nga kaantangai nopo diolo i Yisus do manau-panau siri soribau do vaig, turus do nokotigog iolo do panantaman nopo daa diolo nga tatod taraat, gosob do sonluvapan iolo do nokorosi marong, do kasangkat di tongotulunJo nokoontong di Yisus.

Nga turus poiloo di Yisus iolo, do kaDisido, “Ada kosusa. Ada kou rumosi, Iokui iti,” kadi Yisus. 51Om romutno dii i Yisus si diolo, om sakono dii siri talud, om i sarup nga tinumingkod. Om oiranan dii marong iolo, 52do aupo karati iolo di kosunduvan di Yisus irad di naantangan diolo ontok do papaakan Isido di tongotulun di kuui, do ongokodou i ginavo diolo.

Minongolingos i Yisus di Tongotoruol siri Gonisarit

(Mat. 14:34-36)

53Om lombusno dii oi Yisus sumondipau gosob do nokorikot si disan soi Gana Gonisarit, om pokogosono dii diolo iri talud. 54Om kolintuun dii iolo mantad siri talud om turus oguu dii i tongotulun kotutun di Yisus. 55Om santangkus-tangkus#6:55 santangkus-tangkus: songundak-undak dii i tongotulun diri do tumongkop diri kokompungan om pinoiuup-uupai dii diolo mangakat iri toodopon di tongotulun di au kataru, mongovit siri tongopantok do kinarangaan diolo do siri i Yisus. 56Om nombo nopo kinoongoio di Yisus, siri kokompungan, ko siri kababandaran nga sirino pasar pinongovitan di tongotulun di tulun au kataru, do mokilila di Yisus do pokombiton noopo daa di soririg di sabungJo. Om pobojoo nopo dii Disido, om isai-isai nopo dii nokokombit di sabungJo nga nolingasan kasangkat.

Currently Selected:

Markus 6: LabukPKV

Highlight

Copy