Markus 5

Sinunsub di Yisus i Rogon Tasapou

(Mat. 8:28-34; Luk. 8:26-39)

1Om nokorikotno dii oi Yisus siri sondipau si Vonuvo do Garasa. 2Om kotitindali di Yisus mantad siri talud, kivaro dii iso tulun rinosukan do rogon mantad siri kalabangan sinumamung Disido. 3Tulun nopo diri nga poingijon siri kalabangan, om au dii kadapat i tongotulun mongogos disido kavagu sabap rinosukan isido do rogon, insan kagasanpo do rantai nga au. 4Do opogotno dii kagasan diolo do rantai i longon nga nopimpukat, om iri bosi nikogos siri takod nga nopimpopor. Insan iso tulun nga auso kopusus do ogirot isido. 5Om tadau sodop isido mijak-gijak siri kalabangan om siri kokuludan, om maganu isido di vatu tatarom om ridis-ridison i kojuvanjo kondiri.

6Nga kaantangai nopo dii disido i Yisus siri sodu, om panangkusno#5:6 panangkus: pogundak dii isido rumomut si di Yisus om singkotudno dii si gotuvangJo. 7-8Om kadi Yisus disido do, “Rogon! Labusno mantad sino tulun,” ka.

Om mijak-gijak dii do opuod marong i tulun rinosukan mitangar di Yisus do ka, “Yisus, Tanak do Kinoringan i Agajo Marong Kuasa do onuu nopo! Kukuroyon oku Dika? Mokianu oku Dika si di Kinoringan do ada oku kukuroyo Dika,” kaadi tulun rinosukan do rogon.

9Om duatono dii di Yisus isido do ka, “Isai ngarannu,” ka.

Nga jawapno dii isido, “Ngaranku nopo nga Tasapou do oguu ikoi,” kadi rogon. 10Om minokianu dii marong i tongorogon di Yisus do, “Ada ikoi polobuso siti vonuvo,” ka.

11Nga nuka do oguu marong i vogok siri sokid do sonsungal-sungal mangakan. 12Om pokitulungno dii marong i tongorogon di Yisus do, “Potopiko ikoi pogi silo tongovogok,” ka. 13Nga pinobojou nopo di Yisus i tongorogon. Om labusno dii iolo mantad siri tulun om topikno dii siri vogok. Nga korosukai nopo dii iri tongovogok di rogon, om kinam-kinampo dii i tongovogok diri do santangkus-tangkus#5:13 santangkus-tangkus: songundak-undak rumuuk siri kurimbang do tasavat do lumavog siri vaig gosob do naavi nolosod. Ginuu kama diri vogok nga duvo noribu.

14Nga kaantangai nopo dii di tongotulun momimiara di vogok, om piogono dii iolo mogidu, do mongoi soi bandar om soi kokompungan do minangaabar di tongotulun do nopinlolosod iri tongovogok. Om ongoino dii i tongotulun do mongontong di komoion diolo nong potingkukuro iri. 15Jadi korikot nopo dii iolo siri di Yisus, om naantangan dii diolo iri tulun di sinunsuban do rogon do poingogomno dii, do kisabung om aandaino dii marong i ginavojo. Sabap do inong diri, i tongotulun nga rinumosi di Yisus. 16Om pangaabarno dii iri tongotulun di nokoontong nong onu dii kinojodio diri tulun di iniduan do rogon om iri tongovogok nopinlosod. 17Om pokitulungno dii marong iolo di Yisus do mogidu mantad siri vonuvo diolo.

18Om sako nopo dii kavagu i Yisus siri talud, om sivavaja daa marong dii iri tulun di sinunsuban do rogon. 19Nga au povojoon di Yisus isido, kanogi, “Pouliaino pogi soi valainu, om abaraino i kosuladannu nong songkuro kaandaio do Tuhan dika, om kosianan Disido dika,” kadi Yisus.

20Om pampanauno dii i tulun om timpuunno dii mangaabar siri pantok ponguranan do Opulu Bandar pasal do sinunsuban di Yisus isido do rogon, om oiranan dii kasangkat iri tongotulun.

I Tanak di Jorius om i Tongondu di Kinumombit di Yisus

(Mat. 9:18-26; Luk. 8:40-56)

21Om gulino dii oi Yisus siri sondipau di botung tagajo diri. Tindalno dii i Yisus om oguuno dii i tulun minuntun siri Disido si disan do vaig. 22Om rikotno dii iso kotua do sasambayangan siri, ngaran nopo dii nga i Jorius. Kaantangai nopo dii disido i Yisus, nga ongoino dii tungub siri somok takodJo. 23Om pokitulungno dii maamarong isido do, “Ongoiopo kamawo ilo kojuvan di tanakku tondu do sipapataino do au marong kataru, supaya apangkau om au apatai,” kadi Jorius.

24Om pivajano dii iolo mampanau, om oguu dii marong tulun minaja di Yisus, gosob do opitomping-tomping i Yisus mampanau.

25Nga kivaro nogi siri iso tongondu do opulu om duvo toun do au ototoduan di raa. 26Oguu kosusaan di tongondu diri sabap minokiubat isido siri tongoduktur toguu, gosob do naavino dii i tongobarangjo niboli diri ubat, nga au nogi lumingos i toruoljo, muang-ruang nogi dii. 27Nokorongou nopo dii isido pasal di Yisus, om soriatno dii isido di tongotulun do minsomok marong ponong likud di Yisus, 28do kadi ginavojo, “Olingasan oku bo diti insan kumombit noopo dilo sabungJo,” ka. Koromut nopo dii isido siri likud di Yisus om kombitno dii di sabungJo. 29Pogkombit disido turus dii do notodu i raajo, om nopurimananjo do nolingasan isido.

30Kopurimanai dii di Yisus do linumabus i sinunduJo, om turus gotuvangaiJo dii iri tulun toguu, om pitangar dii do, “Isai bala minongombit diti sabungKu?” kadi Yisus.

31Om jawapno dii i tongotulunJo, “Nokuro do opitomping-tompingKo do oguu tulun, om mitangarKopo do, ‘Isai bala minongombit Dogo?’ kaNu?” kadiolo.

32Nga pingantangai dii di Yisus i tongotulun nong isai minongombit di sabungJo. 33Om ongoino dii i tongondu tungub si gotuvang di Yisus, sabap noilaanjo do nolingosno i toruoljo. Om mopor-kopor dii isido om pangaabarno dii isido di Yisus kasangkat di najadi. 34Om pitangarno dii i Yisus do ka, “Abu, nolingasankono di toruolnu do aparsayako Dogo. Nga ulino pogi do nolingasankono om antatangaino,” kadi Yisus.

35Nga di mangar-tangarpo i Yisus di tongondu, om rikotno dii i tongotulun mantad siri valai di Jorius, i kotua do valai sasambayangan, om mitangar di Jorius do ka, “Tuan, mokimaap ikoi dikau, om popoilo ikoi dikau, iri nopo i tanaknu dii om noovongno. Onupo bo dino koboringaannu ino Guru?” kadiolo.

36Nga aui rinongou di Yisus i tinangaran di tongotulun, om minitangar nogi Isido di kotua sasambayangan do, “Ada korosi, aparsaya noopo Dogo,” ka. 37Om au dii povojoon di Yisus i tongotulun vokon, isoiko do i Pitrus om i Yakub om i Yaya, tadijo. 38Om korikot nopo dii iolo siri valai di Jorius, om kaantangai dii di Yisus iri tongotulun songurau-urau, om songiad-iad om songupus-upus do opuod. 39Om asuno dii i Yisus siri valai diri, om kaDisido, “Nokuro kou do songurau-urau om songiad-iad? Okoniko napatai ilo tanak dilo, nga nokoodop noopo,” kadi Yisus. 40Nga irak-irakai nogi dii diolo Isido.

Om suuono dii di Yisus i tongotulun lumabus. Om angataino dii Disido i tulunJo, om iamojo#5:40 amo: apa di tanak om iinojo do masu siri bilik di tanak. 41Om kuutaino dii di Yisus i longon di tanak om pitangar dii do tangarJo kondiri, “Tolita koum,” kadi Yisus. Komoion nopo dii nga, “Tanak, posikno, tungagno,” ka. 42Om turus tungagno dii i tanak om pampanauno dii do umur nopo disido nga opuluno om duvo toun. Nga oirananno dii maamarong iolo diri tanak do novijau kavagu. 43Om bilinai dii marong di Yisus iolo do, “Ada muju sangkaabarai i tongotulun vokon pasal diri,” ka. Om suuono dii Disido iamojo om iinojo do, “Paakanonno ilo tanak muju,” ka.

Currently Selected:

Markus 5: LabukPKV

Highlight

Copy